Aamu

Taviniraa i te vahi atoa e hinaarohia vau

FAATIAHIA E JAMES B. BERRY

O te matahiti 1939 tera. Te haafifi roa ra te topatari rahi i te oraraa i te mau Hau Amui, e te faaineine maira te tamaˈi na Europa atoa. Ua tere mâua to ˈu teina o Bennett mai to mâua nohoraa i Mississippi e tae atu i Houston, i Texas, e imi i te ohipa.

I TE hoê mahana, fatata i te hopea o te tau veavea, ua faaroo mâua i te hoê parau faaara peapea na roto i te papaina o te radio: ua tomo atu te nuu a Hitler i Polonia. “Ua haamata o Aramagedo!” o ta to ˈu ïa taeae i parau. Ua faarue oioi aˈera mâua i ta mâua ohipa. Ua haere mâua i te Piha a te Basileia fatata roa ˈˈe e faaroo i ta mâua putuputuraa matamua. No te aha hoê Piha a te Basileia? E haamata ïa vau mai te omuaraa.

Ua fanauhia vau i Hebron, i Mississippi, i te matahiti 1915. Te faaea ra matou i te mataeinaa. I haere mai na te Feia haapii Bibilia, mai tei parauhia na te mau Ite no Iehova, na taua vahi ra hoê taime i te matahiti e i faanaho na ratou i te hoê oreroraa parau i te fare o te hoê taata. Ei faahopearaa, ua rahi roa te mau papai bibilia a to ˈu mau metua. Ua riro mâua Bennett i te tiaturi i ta teie mau buka e haapii ra: E ere te po auahi i te mea ura, e pohe te nephe, e ora te feia parau-tia i nia i te fenua e a muri noa ˈtu. Mea rahi â râ te mau mea e tia ia mâua ia haapii. I muri rii aˈe i te hoperaa ta ˈu tau haapiiraa, ua fano atu mâua to ˈu teina i Texas e imi i te ohipa.

I to mâua farereiraa i te pae hopea i te mau Ite i te Piha a te Basileia, ua ui mai ratou e e pionie anei mâua. Aita roa ˈtu i taa ia mâua e te hoê pionie, o te hoê ïa tavini taime taatoa Ite no Iehova. Ua ui maira ratou e e hinaaro anei mâua e poro. “Oia!” o ta mâua ïa i pahono. Ua manaˈo mâua e e tono ratou i te hoê taata na muri ia mâua no te  faaite mai nafea ia poro. Aita râ hoi, ua toro noa mai ratou i te hoê tapura fenua e ua parau mai nei e, “A ohipa i ǒ!” Aita hoi mâua Bennett i ite i te hoê noa ˈˈe a o te ohipa pororaa, e aita mâua i hinaaro e ite i te haama. I te pae hopea, ua hapono noa ˈtu mâua i te tapura fenua e ua hoˈi mai nei i Mississippi!

To mâua pee-maite-raa i te parau mau

I muri aˈe i to mâua hoˈiraa i te fare, ua taio mâua i te mau papai a te mau Ite i te mau mahana atoa fatata hoê matahiti i te maoro. Aita e uira i roto i to matou fare, no reira ia po, e taio mâua ma te turamahia e te auahi. I taua tau ra, e haere te mau tiaau ratere e farerei i te mau amuiraa Ite no Iehova e te mau Ite moemoe e haapuai ia ratou i te pae varua. Ua haere mai te hoê o teie mau tiaau, o Ted Klein, e hiˈo i ta matou amuiraa e ua apee ia mâua Bennett i roto i te ohipa pororaa i tera e tera fare, a rave pinepine ai ia mâua e piti atoa ra i te hoê â taime. Ua faataa mai oia ia mâua eaha mau na te ohipa pionie.

Ua turai mau mai te apitiraa ia ˈna ia feruri e rave hau atu â no te tavini i te Atua. No reira Taeae Klein i bapetizo ai ia Bennett, to mâua tuahine o Velva, e ia ˈu i te 18 no Eperera 1940. To reira to matou mau metua i to matou bapetizoraahia e ua oaoa raua i ta matou faaotiraa. Fatata e piti matahiti i muri aˈe, ua bapetizo-atoa-hia raua. Aita raua i taiva i te Atua e tae noa ˈtu i to raua poheraa—o Papa i te matahiti 1956 e o Mama i te matahiti 1975 ra.

I to Taeae Klein uiraa mai e e nehenehe anei ta ˈu e riro ei pionie, ua parau vau ia ˈna e te hinaaro nei iho â vau, aita râ ta ˈu e moni, aita e ahu, aita hoê aˈe mea. “Aita e peapea,” o ta ˈna ïa i parau, “na ˈu e haapao i te reira.” E ua na reira oia. A tahi, ua hapono oia i ta ˈu aniraa no te taviniraa pionie. I muri iho, ua rave oia ia ˈu na muri ia ˈna i te Nouvelle-Orléans, fatata e 300 kilometera i te atea, e ua faaite mai i te tahi mau nohoraa haviti i nia mai i te Piha a te Basileia. No te mau pionie te reira. Aita i maoro, ua haere au e faaea i ǒ e ua haamata aˈera i ta ˈu toroa pionie. Ua tauturu te mau Ite no te Nouvelle-Orléans na roto i te horoaraa i te ahu, te moni e te maa na te mau pionie. Ia ao, e hopoi mai te mau taeae i te maa e vaiiho i te pae opani aore ra e tuu roa ˈtu i roto i te faatoetoe na matou. Ua titau mai te hoê taeae e fare tamaaraa ta ˈna aita i atea roa ia haere tamau atu i te hora opaniraa e tii i te maa apî—mai te iˈo, te faraoa, te chili, te pai—i toe mai i taua mahana ra.

Faarururaa i te huru uˈana o te nahoa

Ia maoro rii, ua tonohia vau i Jackson, i Mississippi, ei pionie. Ua farerei mâua to ˈu apiti apî i te huru uˈana o te nahoa i ǒ, e e au ra e to muri mai te mau mutoi no taua vahi ra i te mau nahoa! Hoê â atoa i ta mâua tuhaa taviniraa i muri mai—i Columbus, i Mississippi. No te mea e poro mâua i to te mau huru nunaa e mau huru tiaraa basileia atoa, e riri te tahi feia iri uouo ia mâua. Mea rahi te manaˈo ra e te hara ra mâua i te orureraa hau. Tera te manaˈo o te raatira o te taatiraa a te mau faehau tahito a te Légion Marite, te hoê faanahonahoraa here aiˈa roa. Mea pinepine to ˈna faaitoitoraa i te mau nahoa e riri ra ia aro mai ia mâua.

I te taime matamua i arohia ˈi mâua i Columbus, ua haere mai te hoê nahoa na muri mai ia mâua a opere ai mâua i te vea i nia i te purumu. Ua turai ratou ia mâua i nia i te hiˈo o te hoê fare toa. Ua putuputu mai te taata e hiˈo eaha teie e tupu nei. Aita i maoro, te tae mai nei te mau mutoi e ua hopoi ratou ia mâua i te tiripuna. Ua faaara te nahoa tei apee ia matou i te tiripuna, i  mua i te feia toroa atoa i ǒ e mai te peu e e faarue mâua i te oire hou te hoê taio mahana, e haere ïa mâua ma te ora. Mai te peu e e faarue mâua i muri aˈe i taua taio mahana ra, eita ïa! Ua manaˈo aˈera mâua e mea maitai aˈe e faarue i te oire no te hoê taime. Tau hebedoma râ i muri aˈe, ua hoˈi mai mâua e rave faahou i te pororaa.

Aita i maoro i muri aˈe, tei nia maira te hoê pǔpǔ e vau feia ohipa ino ia mâua e turai i roto i to ratou na pereoo e piti. Ua faahoro ratou ia mâua i roto i te uru raau, ua iriti i to mâua ahu e ua hui tataitahi aˈera ia mâua e 30 taime e to ˈu hatua! E pupuhi e e taura ta ratou, e e tia ia ˈu ia parau e te mehameha ra mâua. Te manaˈo ra vau e e taamu ratou ia mâua a taora ˈtu ai i roto i te anavai. Ua pihae ratou i ta mâua mau papai e ua taue haere atu e ua faahuˈahuˈa atoa i ta mâua matini faataˈi pehe i nia i te hoê tumu raau.

I muri aˈe i to ratou huiraa ia mâua, ua faaue mai ratou e oomo i to mâua ahu e e haere na nia i te hoê eˈa i roto i te uru raau ma te ore e hiˈo i muri. A haere ai mâua, ua manaˈo mau mâua e ia fariu noa ˈtu mâua i muri, e pupuhi haapohe ratou ia mâua—ma te ore e faautuahia! Tau minuti râ i muri aˈe, ua faaroo mâua ia ratou i te revaraa.

I te tahi atu taime, ua aˈuaˈu te hoê nahoa e riri ra ia mâua, e mea titauhia ia taamu mâua i to mâua ahu i nia i to mâua aˈî e ia ǎu i roto i te anavai no te maue ê. Aita i maoro i muri aˈe, ua tapeahia mâua ma te pariraa o te orureraa hau. Ua faaea mâua e toru hebedoma i roto i te fare tapearaa hou te haavaraa a tupu ai. Ua paraparau-rahi-hia teie ohipa i Columbus. Ua faatia-roa-hia te mau tamarii haapii o te hoê fare haapiiraa tuatoru fatata ia faarue i te haapiiraa no te haere mai e faaroo. I te taeraa mai te mahana, ua î roa te tiripuna—mea tiatia noa te toea! I roto i te feia e ite ra no te Hau, te vai ra e piti orometua, te tavana oire, e te mutoi.

Ua tonohia te hoê paruru e Ite o G. C. Clarke e to ˈna apiti e tia no mâua. Ua ani raua ia faaorehia te pariraa o te orureraa hau no te mea aita e haapapuraa. Ua vauvau te paruru e ohipa ra e o Taeae Clarke, noa ˈtu e e ere oia i te hoê Ite no Iehova, i te mau parau faahiahia roa no mâua. I te hoê taime, ua parau atu oia i te haava e, “Te parau nei te taata e e maamaa te mau Ite no Iehova. Maamaa? Ua haamaamaahia o Thomas Edison!” Toro atura oia i te rima i nia i te hoê mori uira e parau atura e, “A hiˈo na râ i taua hiˈo mori ra!” Ua faarirohia paha o Edison, tei feruri i te hiˈo mori, ei maamaa, e vetahi pae, aita râ e taata e nehenehe e patoi i ta ˈna mau haaraa.

Ia oti ia ˈna i te faaroo i te faaiteraa, ua faaara ˈtu te haava e peretiteni ra i te tiripuna mataeinaa i te auvaha ture e: “Aita ta oe e haapapuraa haihai roa no te orureraa hau, e e tiaraa to raua e rave i teie ohipa. Eiaha e hopoi faahou mai ia raua i roto i teie tiripuna e haamâuˈa i te taime e te moni a te Hau e to ˈu atoa taime e ia noaa roa mai te haapapuraa ia oe!” Ua upootia ïa mâua!

I muri aˈe râ, ua titau mai te haava ia mâua i roto i ta ˈna piha ohipa. Ua ite oia e aita te oire taatoa i farii i ta ˈna faaotiraa. No reira oia i faaara mai ai ia mâua e: “Ua au te mea ta ˈu i parau i te ture, teie râ ta ˈu iho aˈoraa ia orua e piti atoa ra: A faarue i teie vahi, eita anaˈe, e haapohe ratou ia orua!” Ua ite mâua e ua tano oia, no reira mâua i faarue ai i te oire.

Mai reira ˈtu, ua haere au e apiti ia Bennett e ia Velva e tavini ra i Clarksville, i Tennessee, ei pionie taa ê. I muri aˈe tau avaˈe, ua tonohia matou i Paris, i Kentucky. Hoê matahiti e te afa i muri aˈe, ua ineine matou i te haamau i te hoê amuiraa i ǒ  i te taeraa mai ta mâua Bennett titauraa taa ê roa.

Haereraa i roto i te taviniraa mitionare

I to mâua iteraa i te titauraa e haere i te piti o te piha Haapiiraa bibilia no Gileada a te Watchtower, ua manaˈo mâua e, ‘Ua hape ratou! Eaha ratou e titau ai e piti taurearea apî e te haehaa no Mississippi i taua haapiiraa ra?’ Ua manaˈo noa mâua e e hinaaro ratou i te taata i noaa te ite, ua haere atu râ mâua. Hoê hanere feia haapii to roto i te piha, e e pae avaˈe i te maoro te haapiiraa. Ua tupu te faatuiteraa i te 31 no Tenuare 1944, e te ru ra mâua e tavini i te fenua ê. I taua râ tau ra, e maoro e noaa mai ai te buka ratere e te visa, no reira te feia haapii e tonohia ˈi no te hoê taime poto i te mau Hau Amui. I muri aˈe i to mâua taviniraa maa taime iti i Alabama e i Géorgie, ua tae mai nei ta mâua Bennett tuhaa taviniraa—te Barbade, i te mau Antilles.

Te tupu noa râ te Piti o te Tamaˈi Rahi, e ua opanihia te ohipa e te mau papai a te mau Ite no Iehova i te mau vahi e rave rahi, tae noa ˈtu i te Barbade. I te vahi hiˈopoaraa a te mau tuanie, ua iriti e ua hiˈopoa te feia toroa i ta mâua vairaa ahu e ua itea mai ia ratou te mau papai ta mâua i huna i roto. Ua manaˈo aˈera mâua e, ‘Ua oti mâua.’ Aita râ hoi, ua parau noa mai hoê taata toroa e: “Eiaha e inoino mai e ua paheru matou i ta orua vairaa ahu; mea opanihia te tahi o teie mau papai i te Barbade nei.” Ua vaiiho noa râ oia ia mâua ia haere e te mau papai atoa ta mâua i tuu i roto i te vairaa ahu! I muri aˈe, i to mâua pororaa ˈtu i te feia toroa a te hau, ua parau ratou e aita ratou i ite no te aha te mau papai i opanihia ˈi. Tau avaˈe i muri aˈe, ua faaorehia te opaniraa.

Mea manuïa roa ta mâua taviniraa i te Barbade. Te faatere tataitahi ra mâua 15 aˈe haapiiraa bibilia, e ua haere te rahiraa o te feia haapii i mua i te pae varua. Te oaoa ra mâua i te iteraa i te tahi pae ia haere mai i te mau putuputuraa a te amuiraa. No te mea râ e mea huru maoro te opaniraahia te mau papai, aita to te mau taeae no reira e maramarama apî nafea ia faatere i te mau putuputuraa. Aita râ i maoro, ua noaa ia mâua i te haapii i te tahi mau taeae aravihi. Ua oaoa mâua i te tautururaa e rave rahi o ta mâua feia haapii ia haamata i te taviniraa Kerisetiano e te iteraa i te amuiraa i te rahiraa mai.

Te aratairaa i te hoê utuafare

I muri aˈe 18 avaˈe i te Barbade, mea titauhia ia tâpûhia vau e ia hoˈi i te mau Hau Amui. I reira, ua faaipoipo vau i te hoê Ite o Dorothy te iˈoa ta ˈu i papai noa ˈtu i te rata. Ua tavini mâua ta ˈu vahine ei pionie i Tallahassee, i Floride, e ono râ avaˈe i muri aˈe, ua haere mâua e faaea i Louisville, i Kentucky, i reira to te hoê Ite pûpûraa mai i te hoê ohipa na ˈu. Ua tamau noa to ˈu teina o Bennett i ta ˈna taviniraa i te Barbade e rave rahi matahiti i te maoro. I muri aˈe, ua faaipoipo oia i te hoê hoa mitionare e ua tavini i roto i te ohipa ratere i nia i te mau motu. I te pae hopea, mea titauhia oia ia hoˈi mai i te mau Hau Amui, o te ea te tumu. Ua tamau raua i te tavini i te mau amuiraa reo Paniora i roto i te  ohipa ratere e tae roa i te poheraa o Bennett i te matahiti 1990 i te 73raa o to ˈna matahiti.

I te matahiti 1950, ua fanau o Dorothy i to mâua matahiapo, te hoê tamahine iti ta mâua i mairi i te iˈoa o Daryl. I te pae hopea, e pae tamarii ta mâua. E piti noa matahiti e te afa te poheraa te piti o ta mâua tamarii, o Derrick i te ira tuiroro. Ua tae mai râ o Leslie i te matahiti 1956, apeehia e Everett i te matahiti 1958. Ua tutava mâua Dorothy i te aratai i ta mâua mau tamarii ia au i te parau mau bibilia. Ua tamata noa iho â mâua i te faatere i te hoê haapiiraa bibilia utuafare tahebedoma e te faariro i te reira ei mea anaanatae no te mau tamarii atoa. A vai apî noa ˈi Daryl, Leslie e o Everett, ua horoa mâua i te mau uiraa na ratou e imi i te mau hebedoma atoa e e pahono i te hebedoma i muri mai. Ua hauti taata ora atoa ratou i te pororaa i tera e tera fare. E haere te hoê i roto i te afata vairaa ahu ma te parau e o o ˈna te fatu fare. E tia te tahi i rapae mai e patoto atu i te opani. E faaohipa ratou i te mau parau faaata no te haamǎtaˈu te tahi i te tahi, ua tauturu râ te reira ia ratou ia faatupu i te hinaaro i te ohipa pororaa. Ua poro tamau atoa mâua e o ratou.

I te fanauraahia to mâua tamaiti hopea o Elton i te matahiti 1973, fatata to Dorothy e 50 matahiti e to ˈu e 60. I roto i te amuiraa, ua pii ratou ia mâua o Aberahama e o Sara! (Genese 17:15-17) I rave pinepine na te mau tamaroa paari aˈe ia Elton na muri ia raua i roto i te taviniraa. Te manaˈo ra mâua e e faaiteraa puai tera i te taata ia ite ratou i te mau utuafare—te taeae, te tuahine, te metua e te tamarii—ia haa amui i te faataaraa i te mau parau mau bibilia ia vetahi ê. E rave te mau tuaana o Elton ia ˈna i nia i to raua tapono te tahi i muri aˈe i te tahi e e tuu raua i te hoê api parau bibilia i roto i to ˈna rima. Fatata i te mau taime atoa, e faaroo te taata ia iriti ratou i te opani e ia ite ratou i teie tamaiti iti haviti i nia i te tapono o to ˈna tuaana. Ua haapii te mau tamaroa ia Elton ia toro atu i te api parau i te taata ia hope te tauaparauraa e ia parau i te tahi maa parau. Mea na reira to ˈna haamataraa i te poro.

I te roaraa o te mau matahiti, ua nehenehe ia matou e haapii ia vetahi ê ia ite ia Iehova. I te hopea o te mau matahiti 1970, ua haere matou mai Louisville e faaea i Shelbyville, i Kentucky, e tavini i roto i te hoê amuiraa te vai ra te hinaaro. I ǒ, aita noa matou i ite i te haereraa i mua o te amuiraa, ua tauturu atoa râ matou i te imi i te hoê fenua e te patu i te hoê Piha a te Basileia. I muri aˈe, ua anihia matou e tavini i roto i te tahi atu amuiraa e ere i te mea atea roa.

Mau mea papu ore o te oraraa utuafare

Te vai noa ra to ˈu hinaaro e parau e ua faaea noa ta mâua mau tamarii i nia i te eˈa o Iehova, e ere râ mai te reira. I muri aˈe i to ratou paariraa mai e haereraa e faaea i te tahi atu vahi, ua faarue e toru o ta mâua mau tamarii i ora mai i te eˈa o te parau mau. Ua pee râ ta mâua tamaiti o Everett i to ˈu hiˈoraa e ua rave i te taviniraa taime taatoa. Ua tavini oia i muri mai i te pu rahi a te mau Ite no Iehova i New York e i te matahiti 1984, ua titauhia oia e haere i roto i te 77raa o te piha haapiiraa no Gileada. I muri aˈe i te faatuiteraa, ua reva oia i ta ˈna tuhaa taviniraa i Sierra Leone, i Afirika Tooa o te râ. I te matahiti 1988, ua faaipoipo oia ia Marianne, te hoê pionie no Peretita. Ua tavini amui raua ei mitionare mai reira mai.

Mai ta te mau metua atoa e nehenehe e feruri, ua tarapape to mâua aau i te iteraa e toru o ta mâua mau tamarii i te faarueraa i te eˈa o te ora o te riro hoi ei mea mauruuru i teie nei e te horoa mai i te tiaturiraa nehenehe roa o te ora mure ore i nia i te fenua paradaiso a muri aˈe. I te tahi mau taime, e faahapa vau ia ˈu iho. Ua itea mai râ ia ˈu te tamahanahanaraa i te iteraa e ua faaea atoa hoi te tahi mau tamarii varua, aore ra melahi a Iehova iho i te tavini ia ˈna—noa ˈtu e e aˈo Iehova ma te here e te maitai e eita roa ˈtu oia e hape haere noa. (Deuteronomi 32:4; Ioane 8:44; Apokalupo 12:4, 9) Ua haamaramarama te reira ia ˈu e noa ˈtu te puai o to te mau metua tamataraa i te aratai i ta ratou mau tamarii i nia i te eˈa o Iehova, eita paha te vetahi e farii i te parau mau.

Mai te hoê raau e tairihia ra e te mataˈi puai, e tia ia tatou ia faaruru i te mau ati e te mau fifi rau e haere maira i nia ia tatou. I te roaraa o te mau matahiti, ua itea mai ia ˈu e ua horoa mai te haapiiraa bibilia tamau e te haereraa ma te tuutuu ore i te mau putuputuraa i te puai no te faaruru e te ora mai i te pae varua. A paari atu â ˈi au e a ite ai i te mau hape ta ˈu i rave i mutaa iho, e tamata  vau i te hiˈo i te paeau maitai. Inaha hoi, ia vai taiva ore noa tatou, e haamaitai noa ˈtu â teie mau tupuraa i to tatou haereraa i mua i te pae varua. Ia huti mai tatou i te haapiiraa, e nehenehe te mau huru iino o te oraraa e horoa mai i te tahi mau vahi maitai.—Iakobo 1:2, 3.

I teie nei, aita faahou to mâua Dorothy e ea maitai e e itoito no te rave mai ta mâua e hinaaro i roto i te taviniraa ia Iehova. Te mauruuru nei râ mâua no te tauturu a to mâua mau taeae e tuahine Kerisetiano here. Fatata i te mau putuputuraa atoa, e faaite mai te mau taeae e te oaoa roa ra ratou e ua tae mai mâua. E e pûpû ratou ia ratou iho no te tauturu mai na roto i te mau ravea atoa e nehenehe—tae noa ˈtu no te tataî i te fare e te pereoo.

I te tahi taime, e nehenehe ta mâua e rave i te taviniraa pionie tauturu, e e faatere mâua i te haapiiraa bibilia e te feia e anaanatae ra. Te hoê oaoaraa taa ê ta mâua e au noa, te faarooraa ïa i te mau parau apî no to mâua tamaiti e tavini ra i Afirika. Te rave noa râ mâua i ta mâua haapiiraa bibilia utuafare, noa ˈtu e i teie nei no mâua e piti anaˈe. Te oaoa nei mâua e ua horoa mâua ehia rahiraa matahiti i roto i te taviniraa ia Iehova. Te haapapu maira oia e eita oia e ‘haamoe i ta mâua ohipa i rave, e to mâua hinaaro i to ˈna ra iˈoa.’—Hebera 6:10.

[Hohoˈa i te api 25]

Bapetizoraahia o Velva, o Bennett e o vau e Ted Klein i te 18 no Eperera 1940

[Hohoˈa i te api 26]

E ta ˈu vahine, o Dorothy, i te omuaraa o te mau matahiti 1940 e i te matahiti 1997

[Hohoˈa i te api 27]

Te oreroraa parau no te taatoaraa, “Te Arii o te hau” e faaiteitehia i nia i te hoê pereoo utaraa taata a te oire i te Barbade

[Hohoˈa i te api 27]

To ˈu teina o Bennett i mua i te fare mitionare