Tâpûraa ma te toto ore—‘Te hoê ravea rapaauraa e rahi noa ˈtura’

I RARO aˈe i te upoo parau “Tâpûraa ‘ma te toto ore,’” ua faataa te vea Maclean’s e ua “haamau na” te tahi mau taote na Kanada atoa “i te tahi mau ravea anohaa apî o tei faariro i tei parauhia te tâpûraa ma te toto ore ei ravea rapaauraa e rahi noa ˈtura i te roaraa o na matahiti e pae i mairi.” O Brian Muirhead, taote faataoto i te pu ihi rapaauraa no Winnipeg, te hoê o ratou. Na te aha i turai ia ˈna e maimi i te hoê rapaauraa mono aita e toto?

I te matahiti 1986 ra, ua faaruru te taote Muirhead i te tautooraa e tâpû i te hoê ruhiruhia e 70 matahiti e aai tahetahe to ˈna o tei ani i te hoê rapaauraa eita e titau i te pâmuraa toto no ta ˈna mau tiaturiraa niuhia i nia i te Bibilia ei Ite no Iehova. (Ohipa 15:28, 29) Ua “maiti” te taote Muirhead “i te hoê ravea mea varavara i te faaohipahia no te pâmu i te hoê pape tamiti i roto i te taata maˈi ia vai tano noa to ˈna neˈiraa toto,” o ta te Maclean’s ïa e faataa ra. “Ua manuïa te raveraa, e ua haapapu i te tiaturiraa o Muirhead o te rahi noa ˈtura e ‘te horoa rahi roa ra tatou i te mau pâmuraa toto. Ua manaˈo vau e ua tae i te taime e imi ai i te mau ravea mono.’”

Mea “faaitoitohia” te maimiraa i te tâpûraa ma te toto ore “e te mau haapeapearaa no nia i te haapueraa toto horoahia no a muri aˈe—e te mǎtaˈu o te feia maˈi e rave rahi e roohia i te hoê tirotiro maˈi na roto i te hoê pâmuraa toto.” Auaa te maimiraa a te mau taote tei imi i te ravea apî, e ere noa te mau Ite no Iehova, mea rahi atu â râ tei faufaahia. “Taa ê atu i te faaoreraa i te hinaaro i te mau pâmuraa toto i roto i te mau tupuraa e rave rahi, e faaiti mai te tâpûraa ma te toto ore i te fifi—noa ˈtu te haihai—e roohia i te toto viivii,” o ta te Maclean’s ïa e parau ra. E nehenehe atoa râ te toto “mâ” e faatupu i te haapê na roto i te faaoreraa no te hoê taime poto i te puai parururaa ia ˈna iho o te feia maˈi.

Eaha te niu o te tiaturiraa aueue ore a te mau Ite no Iehova no nia i te rapaauraa mono aita e toto? E anaanatae paha outou i te taio i te buka rairai Nafea te toto ia faaora i to outou ora? E oaoa te mau Ite no Iehova i te hopoi atu hoê na outou.