“E ao to te taata i noaa ia ˈna te paari”

E ROHIPEHE oia, e taata hamani hohoˈa fare, e arii. O o ˈna te arii taoˈa rahi roa ˈˈe o te mau arii atoa i nia i te fenua, e 200 e tiahapa mirioni dala Marite ta ˈna e fanaˈo i te matahiti. Ua tui atoa to ˈna roo no to ˈna paari. Ua maere roa te hoê arii vahine tei haere e hiˈo ia ˈna e ua na ô e: “Inaha, te toe nei te rahi i te parau aore â i faaitehia mai ia ˈu: ua hau ê atura to oe paari e to oe mana i tei faaitehia mai ia ˈu nei.” (Mau arii 1, 10:4-9) Tera ïa te tiaraa o Solomona, arii o Iseraela i tahito ra.

E taoˈa e e paari atoa to Solomona. E maoti te reira i ineine taa ê ai oia i te faaoti eaha te mea faufaa mau i roto i na mea e piti. Ua papai oia e: “E ao to te taata i noaa ia ˈna te paari; te taata i noaa ia ˈna te [haroaroaraa] ra! O te taoˈa hoi e hoona ˈi oia ra, e maitai rahi ïa i to te ario ra, e ia rahi hoi oia ra, e maitai rahi ïa i to te auro maitai ra. E maitai rahi to ˈna i to te poe; e te mau mea atoa i hinaarohia ra, e ore roa ïa e au ia ˈna.”—Maseli 3:13-15; MN.

Ihea râ e itea mai ai te paari? No te aha mea faufaa aˈe te reira i te taoˈa? Eaha to ˈna mau tuhaa anaanatae? E pahono te pene 8 o te buka bibilia ra Maseli, i papaihia e Solomona, i teie mau uiraa ma te faahiahia roa. I roto, ua faataatahia te paari, mai te mea ra e nehenehe ta ˈna e paraparau e e ohipa. E te faaite roa ra te paari i to ˈna huru au mau e to ˈna faufaaraa.

“Te pii noa ra oia”

E haamata te Maseli pene 8 na roto i te hoê uiraa o te haaferuri: “E ere anei te pii hua nei te paari, e te faateitei nei te [haroaroaraa] i to ˈna reo?” * Oia, te pii hua noa ra te paari e te haroaroaraa, mea huru taa ê râ i te vahine taiata e tapuni ra i te mau vahi poiri e e omumu ra i te mau parau faahinaaro i te tariˈa o te hoê taurearea taa noa e te ite ore. (Maseli 7:12; MN) “Tei nia i te mau vahi teitei, i te pae eˈa ra; i te tiaatiraa o te mau eˈa ra i te tia-noa-raa oia. Tei te uputa rahi ra, a tomo atu ai i roto i te oire ra: tei te uputa iti ra hoi, te pii noa ra oia.” (Maseli 8:1-3) E faaroo-rahi-hia te reo puai e te itoito o te paari i te mau vahi taata—i te mau uputa rahi, te mau tiaatiraa eˈa, te mau uputa rii o te hoê oire. E nehenehe ta te taata e faaroo ohie i taua reo ra e e pahono.

O vai te nehenehe e patoi e te vai ra te paari o te Atua tei papaihia i roto i te Parau faauruahia a te Atua, te Bibilia, i pihai fatata i te taata atoa i te fenua nei o te hinaaro e fanaˈo atu? “O te Bibilia te buka taio-roa ˈˈe-hia i roto i te tuatapaparaa,” ta The World Book Encyclopedia ïa e parau ra. Oia atoa: “Mea rahi aˈe te mau hohoˈa o te Bibilia tei operehia i to te tahi atu buka. Ua huri-atoa-hia te Bibilia e rave rahi aˈe taime, e na roto e rave rahi aˈe  reo, i te tahi atu buka.” Maoti te Bibilia taatoa aore ra te tahi mau tuhaa na roto hau atu i te 2 100 reo e reo amaa, hau atu i te 90 % o te fetii taata te fanaˈo atu i te tahi aˈe tuhaa o te Parau a te Atua na roto i to ratou reo.

Te faaite haere nei te mau Ite no Iehova i te poroi o te Bibilia i mua i te taata i te mau vahi atoa. I roto e 235 fenua, te poro nei ratou ma te itoito i te parau apî maitai o te Basileia o te Atua e te haapii nei i te mau parau mau niuhia i nia i te Parau a te Atua i te taata. Te neneihia nei hau atu i te 20 mirioni hohoˈa o te vea hoê, o ta ratou na vea bibilia Te Pare Tiairaa, na roto 140 reo, e te A ara mai na!, na roto e 83 reo. Papu maitai e te pii hua noa ra te paari i te mau vahi taata!

“Ia outou, e te mau tamarii a te taata nei, tau reo i te piiraa ˈtu”

E haamata te paari i faataatahia i te paraparau, ma te na ô e: “Ia outou â, e te mau taata nei, ta ˈu e pii atu; ia outou, e te mau tamarii a te taata nei, tau reo i te piiraa ˈtu. E te mau ite ore e, titau maite i te haapao; e te mau maamaa e, e imi i te [maramarama] ia noaa.”—Maseli 8:4, 5; MN.

Te pii ra te paari i te taata atoa. Te titau manihini ra oia i te huitaata atoa. Te titau-manihini-atoa-hia ra te feia ite ore ia haapao, aore ra ia hiˈoana, e te mau maamaa ia imi i te maramarama. Oia mau, te tiaturi ra te mau Ite no Iehova e no te taatoaraa te Bibilia e te tutava ra ma te faatia pae tahi ore i te faaitoito i te taata atoa ta ratou e farerei ia fafa ˈtu ia itea mai te mau parau a te paari i roto.

“E parau hoi tau vaha i te parau mau”

E pii â te paari e: “E faaroo mai, o te parau maitai hoi ta ˈu e parau atu: e te parau-tia hoi ta ta ˈu vaha e parau. E parau hoi tau vaha i te parau mau, e riro hoi te ino ei mea riaria no tau vaha. Te tia nei te mau parau atoa o to ˈu nei vaha; aore roa o reira e piˈo, aore e mârô.” Oia, mea maitai roa te mau haapiiraa a te paari, mea parau-tia, mea mau e te tia. Aita e piˈo e mârô i roto. “E parau vaiiho noa anaˈe ïa i te feia i ite ra, e te tia hoi i te feia i noaa te ite ra.”—Maseli 8:6-9.

Ma te tano, e faaitoito te paari e: “Ia rahi te farii mai i ta ˈu nei aˈo i to te ario, e te ite hoi i to te auro maitai roa ra.” Mea tano roa teie taparuparuraa, “e maitai rahi hoi to te paari i to te mau poe, e te mau mea atoa i hinaarohia ra, e ore ïa e au ia ˈna.” (Maseli 8:10, 11) No te aha râ? Na te aha e faariro i te paari ei mea faufaa aˈe i te mau taoˈa?

“E maitai rahi tei ia ˈu i to te auro”

Mea faufaa aˈe te mau ô ta te paari e horoa na tei faaroo atu ia ˈna i te auro, te ario, aore ra te poe. A faaite ai eaha teie mau ô, e na ô te paari e: “O vau nei o te paari, e tia vau i ǒ te haapao ra i te parahiraa, e te roaa nei te ite i te [puai feruriraa]. Mǎtaˈu to ˈu ia Iehova, e te riaria nei au i te ino; te teoteo, e te faarahi, e te parau a te feia taiata, e te vaha mârô ra, o ta ˈu ïa e riaria nei.”—Maseli 8:12, 13; MN.

E horoa te paari i te haapao e te puai feruriraa  na to ˈna fatu. E faatura e e mǎtaˈu atoa te taata tei ia ˈna ra te paari o te Atua, no te mea “te matamua o te paari ra, o te mǎtaˈu ïa ia Iehova.” (Maseli 9:10) No reira, e riri oia i te mau mea ta Iehova e riri. Aita e teoteo, e faarahi, e haerea taiata, e e parau mârô i roto ia ˈna. E paruru to ˈna riri i te mea ino ia ˈna eiaha oia ia faaohipa i te mana ma te miimii. Mea faufaa mau â ïa ia imi te feia e mau hopoia ta ratou i roto i te amuiraa Kerisetiano, tae noa ˈtu te mau upoo utuafare, i te paari!

“Tei ia ˈu nei te parau e te paari mau,” ta te paari ïa e parau â. “Tei ia ˈu te [maramarama], tei ia ˈu te puai. No ˈu i arii ai te mau arii, e ia faatupu ai te hui arii ra i te parau-tia. No ˈu i noaa ˈi te hau i te hui arii ra, te feia mana atoa, e te mau haava atoa o te fenua nei.” (Maseli 8:14-16; MN) Te ite hohonu, te maramarama, e te puai, e hotu atoa ïa o te paari—mea hinaaro-roa-hia te reira e te mau arii, te feia mana, e te mau haava. Mea faufaa roa te paari no te feia e mana to ratou e te feia e aˈo ra ia vetahi ê.

Mea ohie no te taatoaraa ia fanaˈo i te paari mau, e ere râ o te taata atoa te ite atu ra. Te patoi nei te vetahi aore ra te ape ra i te reira noa ˈtu â tei pihai noa mai. “Te hinaaro nei au i te feia i hinaaro mai ia ˈu ra,” ta te paari ïa e parau ra, “e te imi vave mai ia ˈu ra, e ite ïa ratou ia ˈu.” (Maseli 8:17) E noaa te paari i te feia noa e imi maite ra ia ˈna.

Mea afaro e mea tia te mau eˈa o te paari. E haamauruuru oia i te feia e imi ia ˈna. E na ô te paari e: “Tei ia ˈu te taoˈa rahi e te tura: te taoˈa vaiiho taiata e te parau-tia. E maitai rahi tei ia ˈu i to te auro e to te auro maitai roa ra, e ta ˈu nei taoˈa i te ario mâ maitai ra. Te aratai nei au na te eˈa parau-tia ra, na ropu i te mau eˈa i faaauhia ra. E faarahi au i te taoˈa a te feia i hinaaro mai ia ˈu ra; e ta ratou ra mau vairaa e faaîîhia e au.”—Maseli 8:18-21.

Hau atu â i te mau huru maitai roa mai te hiˈoanaraa, te puai feruriraa, te haehaa, te ite hohonu, te paari mau, e te maramarama, to roto atoa te mau taoˈa e te tura i te mau ô a te paari. E nehenehe te hoê taata paari e taoˈahia na roto i te mau ravea tia, e e ruperupehia oia i te pae varua. (Ioane 3, 2) E horoa atoa te paari i te tura na te hoê taata. Hau atu â, e mauruuru oia i te mea i noaa mai ia ˈna, e e hau to ˈna feruriraa e e mâ to ˈna manaˈo haava i mua i te Atua. Oia, e ao to te taata i noaa ia ˈna te paari. Oia mau, mea maitai aˈe te hotu o te paari i te auro mâ maitai e te ario maitai roa.

E tano maitai ïa teie aˈoraa no tatou, i te mea e te ora nei tatou i roto i te hoê ao nounou taoˈa o te onoono ra i nia i te tapiraa i te faufaa na roto i te mau huru ravea atoa noa ˈtu eaha te haamâuˈaraa! Eiaha roa ˈtu ïa tatou e haamoe i te faufaa rahi o te paari aore ra e faaohipa i te mau ravea tia ore no te tapi i te  faufaa. Eiaha roa ˈtu tatou e haafaufaa ore i te mau faanahoraa o te horoa mai i te paari—ta tatou mau putuputuraa Kerisetiano e ta tatou haapiiraa taitahi i te Bibilia e i te mau papai a “te tavini haapao maitai e te paari”—no te tapi i te mau taoˈa.—Mataio 24:45-47.

“Ua faatahinuhia vau mai tahito mai â”

E ere te faataataraa i te paari i roto i te Maseli pene 8 i te hoê noa ravea no te faataa i te mau tuhaa taa ê o te hoê huru maitai vaimanaˈo. Ma te taipe, te faaite atoa ra oia i te mea faufaa roa ˈˈe ta Iehova i poiete. E na ô â te paari e: “Ia Iehova ra vau i haamata ˈi oia i ta ˈna ohipa; hou ta ˈna mau ohipa, mai tahito mai â. Ua faatahinuhia vau mai tahito mai â; hou te haamataraa i te ohipa nei, hou te fenua nei. Aore hoi e miti ra, i fanau na vau, aore hoi e pape rahi i te pihaaraa. Aita i tatumuhia te mau mouˈa, aita hoi te mau aivi, i fanau na vau; aita hoi oia i hamani i te fenua, e te mau vahi atea ra, e te hoê huˈa iti repo o te mau fenua nei.”—Maseli 8:22-26.

E tano maitai teie faataaraa o te paari i faataatahia e tei parauhia no nia i “te Logo” i roto i te mau Papai! “I vai na te Logo i te matamua ra,” ta te aposetolo Ioane ïa i papai, “i te Atua ra hoi te Logo, e [e atua] hoi te Logo.” (Ioane 1:1; MN) Te faahohoˈa ra te paari i faataatahia i te Tamaiti a te Atua, o Iesu Mesia, a ora ˈi oia hou a riro ai ei taata. *

O Iesu Mesia “tei fanau na i te mau mea atoa i hamanihia ra: na ˈna hoi i hamani i te mau mea atoa nei, o to te raˈi, e to te fenua nei, o tei itea ia hiˈo ra e tei ore i itea.” (Kolosa 1:15, 16) “Ia ˈna [Iehova] i haamau i te mau raˈi ra, tei reira vau,” ta te paari faataatahia ïa e parau â, “ia ˈna i tipao i te moana e ati noa ˈˈe; ia ˈna i haamau i te mau ata i nia ra; ia ˈna i faaetaeta i te mau tumu o te moana; ia ˈna i haapao i te otia o te miti ra, ia haapao maite te moana i to ˈna otia; ia ˈna i haamau i te tumu o te fenua ra. Tei pihaiiho hoi au ia ˈna i reira mai te [“rave ohipa aravihi,” MN]; e te oaoa noa ra vau i te mau mahana atoa ra, i te oaoa-tamau-maite-raa i mua i tana aro; i te oaoa-maite-raa i te fenua i parahihia e te taata ra; e tei te mau tamarii a te taata ra to ˈu oaoaraa.” (Maseli 8:27-31) Tei pihai iho te Tamaiti matahiapo a Iehova i to ˈna Metua, e haa ra ma te itoito e o o ˈna—te Atua Poiete faito ore o te raˈi e te fenua. I to te Atua ra o Iehova poieteraa i te taata matamua, ua apiti atoa mai ta ˈNa Tamaiti i roto i teie ohipa ei Rave ohipa aravihi. (Genese 1:26) No reira iho â ïa te Tamaiti a te Atua e haapao maitai ai, e au roa atoa ˈi, i te huitaata nei!

“E ao to te taata e faaroo mai ia ˈu ra”

Ei paari i faataatahia, e parau te Tamaiti a te Atua e: “E tena na, e faaroo mai ia ˈu, e te mau tamarii e; e ao hoi to te feia e haapao mai i ta ˈu nei parau. E faaroo mai i te aˈo ia paari, eiaha roa e ohipa ê i te reira. E ao to te taata e faaroo mai ia ˈu ra, o tei ara maite i te mau mahana atoa i te mau uputa no ˈu ra, o tei tiai maite i na pou uputa no ˈu ra! Ua itea hoi au ia ˈna ra, ua ite ïa oia i te ora, e herehia mai hoi oia e Iehova. O tei hara ê râ ia ˈu nei, ua hamani ino ïa i to ˈna iho varua; e tei ore atoa i hinaaro mai ia ˈu nei, ua hinaaro ïa i te pohe.”—Maseli 8:32-36.

O Iesu Mesia te hiˈoraa hau ê mau o te paari o te Atua. Ua “vaiiho-paatoa-hia te taoˈa ra o te paari e te ite i roto ia ˈna ra.” (Kolosa 2:3) No reira, e faaroo maitai roa anaˈe ia ˈna e e pee maite anaˈe i to ˈna mau taahiraa avae. (Petero 1, 2:21) Ia faarue tatou ia ˈna, e hamani ino ïa tatou i to tatou iho nephe e e hinaaro i te pohe, no te mea ‘aore roa e ora ia vetahi ê.’ (Ohipa 4:12) Oia mau, e farii anaˈe ia Iesu ei ravea ta te Atua i horoa e ora ˈtu ai tatou. (Mataio 20:28; Ioane 3:16) I reira ïa tatou e fanaˈo ai i te oaoa no ǒ mai i te ‘itearaa mai te ora e te hereraahia mai e Iehova.’

[Nota i raro i te api]

[Hohoˈa i te api 26]

Mea faufaa te paari no te feia e hopoia ta ratou

[Hohoˈa i te api 27]

Eiaha e haafaufaa ore i te mau faanahoraa o te horoa mai i te paari