E hopoi mai anei te haapaoraa i te hau na te ao atoa?

MAI te 28 e tae atu i te 31 no Atete 2000, ua hau atu i te 500 tia no na fenua e 73 tei tairuru atu i te oire o New York. Ua putuputu ratou i te mau Nunaa Amui no “Te apooraa a te mau aratai haapaoraa e pae varua no te hau na te ao atoa o te mireniuma.” Ua tia te mau aratai—mea rahi e taupoo ahu taviriviri to ratou, e ahu rearea safran, e taupoo huruhuru moa, aore ra e pereue roa ereere—no te mau faaroo e rave rahi. Te vai ra te mau haapaoraa Bahaˈi, Bouddha, Hindou, Mahometa, Jaïn, Ati Iuda, Shinto, Sikh, Taoïste, Zoroastrien, e a te Amuiraa faaroo Kerisetiano.

Ua putuputu te mau tia i te mau Nunaa Amui no na mahana matamua e piti o na mahana apooraa e maha. E ere râ na te mau Nunaa Amui i faanaho aore ra i haamau i te apooraa, na te mau taatiraa turu e rave rau râ. Atira noa ˈtu, ua paraparau te mau Nunaa Amui e te mau aratai haapaoraa no nia i te faufaaraa e haa amui no te faaore i te veve, te riri i te nunaa ê, te mau fifi o te natura, te tamaˈi, e te mau mauhaa haapohe taata.

Ua tarima te mau tia i te hoê parau mana ma te upoo parau ra “Faaauraa parau no te hau na te ao atoa.” Noa ˈtu e te faˈi ra te parau mana e “i te iˈoa o te haapaoraa e ravehia ˈi i te tahi mau taime” te haavîraa uˈana e te tamaˈi, te na ô ra taua parau ra e “e haa amui” te feia tarima “e te mau Nunaa Amui . . . i roto i te tapiraa i te hau.” Aita râ e faaotiraa taa maitai e faaite ra nafea te reira e ravehia ˈi.

I te piti o te mahana, ua faaoti o Bawa Jain, te papai parau rahi o te apooraa, i ta ˈna mau parau omuaraa na roto i te faataaraa e tau matahiti na mua ˈˈe, ua tapao oia i te hoê hohoˈa peni i te mau Nunaa Amui. I nia i te hohoˈa peni, te vai ra te hoê taata rahi aˈe i te fare o te piha papai parau a te Nunaa Amui. Te patoto ra oia i nia i te fare mai te huru ra e e opani. I raro aˈe i te hohoˈa, te vai ra te parau ra: “Arii o te hau.” Ua na ô o Jain Tane e: “Ua maere roa vau i [te hohoˈa] i te taime i ite atu ai au. Ua ui au i te mau taata rau eaha to [te reira] auraa. Te manaˈo nei au i teie mahana e, ua noaa ia ˈu te pahonoraa. Te faaite maira to outou paatoa putuputuraa i ǒ nei, te mau aratai haapaoraa e pae varua no te ao atoa, ia ˈu e [teie] mai nei te arii o te hau e patoto ra i nia i te opani o te mau Nunaa Amui.”

Te vauvau ra te Bibilia i te hoê manaˈo ê. Te faaite ra oia e o Iesu Mesia te Arii o te hau. E hopoi mai oia i te hau na te ao atoa, eiaha na roto i te mau tutavaraa a te mau aratai haapaoraa aore ra poritita a teie nei ao, na roto râ i te Basileia o te Atua. Na teie Basileia, te faatereraa a te Atua i te raˈi, e tahoê i te huitaata faaroo ma te manuïa e e rave e ia haapaohia te hinaaro o te Atua i te fenua nei.—Isaia 9:6; Mataio 6:9, 10.