Te hoê taatiraa na te ao nei o te haapao ra te tahi i te tahi

E TAE roa ˈtu i te vahi e nehenehe te mata e ite atu, te vai ra te taata. Mea rahi e ruhiruhia ratou, i te mea e mea paruparu roa vetahi pae, mea fifi no ratou ia haere. Te vai ra te mau vahine hapû e te mau taata faaipoipo apî e ta ratou mau tamarii nainai. E feia horo ê anaˈe ratou—te mau tane, te mau vahine, e te mau tamarii—tei faahepohia e te tamaˈi tivira, te ati natura, aore ra te tahi atu tupuraa, ia faarue i to ratou fare e ia imi i te haapuraa i te hoê fenua tapiri. Ua faahepo-pinepine-hia vetahi pae ia faarue i to ratou nohoraa. Ia ite ratou i te tapao matamua o te hoê aroraa tivira aore ra o te hoê ati natura, e ohi ratou i te tahi mau mea i te fare, e haaputu i ta ratou mau tamarii, e horo atu ai i te hoê vahi papu aˈe. Ia oti, ia afaro te mau mea, e rave rahi feia horo ê te hoˈi e hamani faahou i to ratou mau fare e mai tera noa.

I te roaraa o te mau matahiti, ua farii te Repupirita Afirika no Ropu i te feia horo ê no te tahi atu mau fenua. Aita i maoro aˈenei, tau tausani taata, tae noa ˈtu e rave rahi mau Ite no Iehova, tei faahepohia ia faarue i te Repupirita Demotaratia no Congo tei amahamaha i te tamaˈi e ia haere i te Repupirita Afirika no Ropu mea huru paruru-aˈe-hia.

Ua tauturu te mau taeae

No te mau Ite i te Repupirita Afirika no Ropu, e fanaˈoraa taa ê te faanahoraa i te tauturu. Ua noaa mai te mau nohoraa no te mau taeae Kerisetiano e tae maira. I te omuaraa, e mau piha tei itehia mai i roto i te tahi mau fare faaearaa, a rahi ai râ te numera o te feia horo ê, mea papu e e mau faanahoraa rahi atu â tei hinaarohia. Ua faarirohia te tahi mau Piha a te Basileia ei mau vahi taotoraa. Ua tamau te tahi mau Ite no reira i te mau mori hau, i te mau tuio pape, e ua tima i te tahua ia naho maitai te nohoraa o te feia e faaea i reira. Ua haa te feia horo ê e te mau taeae no reira i te tamau i teie mau vahi taotoraa no te hoê area taime. Ua faanahohia te hoê porotarama putuputuraa Kerisetiano na roto i te reo Lingala ia fanaˈo te feia e tae atu i te maa pae varua faufaa no te ora. Ua faaite te haa-amui-roa-raa te mau Ite no reira e ta ratou mau manihini e te vai mau ra te hoê hui taeae nunaa rau.

Aita te mau utuafare horo ê i tae amui noa mai. I te tahi taime, ua farerei faahou te tahi mau melo utuafare tei taa ê i te vahi tapaeraa. I roto i te mau Piha a te Basileia atoa, te vai ra te hoê tapura iˈoa o te feia i tae maitai mai. Ua  ravehia te tahi mau faanahoraa no te imi i te feia aitâ i tae mai. Ua faareva te amaa o te haapao ra i te ohipa a te mau Ite no Iehova i taua fenua ra e toru pereoo i te mahana no te tauturu i te mau Ite e haere avae noa ra e no te imi i tei moe paha. Ua papai-rahi-hia “WATCH TOWER—Ite no Iehova” i nia i teie mau pereoo.

A feruri na i te oaoa o te hoê pǔpǔ e hitu tamarii horo ê tei taa ê e to ratou mau metua, i to ratou iteraa ˈtu i te hoê pereoo rahi a te mau Ite no Iehova. Ua horo vave atura ratou i te pereoo ra e faaite atura e e mau Ite ratou. Ua haapaiuma te mau taeae ia ratou i nia i te pereoo e faahoro atura ia ratou i te hoê Piha a te Basileia, i reira to ratou farerei-faahou-raa i to ratou mau fetii.

Maoti te aha i nehenehe ai teie mau Kerisetiano haavare ore e faaruru i taua mau tupuraa ra, eiaha hoê noa taime, ma te pinepine râ? Ua papu roa ia ratou e te ora nei tatou i te anotau hopea tei tohuhia i roto i te mau Papai Moˈa.—Timoteo 2, 3:1-5; Apokalupo 6:3-8.

No reira, ua ite ratou e e fatata te Atua ra o Iehova i te faaore roa i te tamaˈi, te riri, te haavîraa uˈana, e te amahamaharaa. E riro e no tahito te fifi e horo ê. Hou râ te reira, ia au i te faaueraa a te aposetolo Paulo i roto i te Korinetia 1, 12:14-26, te tutava ra te mau Ite no Iehova i te haapao te tahi i te tahi. Noa ˈtu e ua faataa-ê-hia ratou e te mau tahora rarahi, te mau otia, te mau reo, e te atea, te haapeapea ra ratou no te tahi e te tahi, no reira, ia erehia te hoê taata, e ohipa vave ratou.—Iakobo 1:22-27.

[Hohoˈa fenua i te api 30]

(Hiˈo i te papai)

AFIRIKA

Repupirita Afirika no Ropu

Repupirita Demotaratia no Congo

[Faaiteraa i te tumu]

Mountain High Maps® Copyright © 1997 Digital Wisdom, Inc.

[Hohoˈa i te api 30]

E toru Piha a te Basileia tei faarirohia ei fare fariiraa taata

[Hohoˈa i te api 31]

Ua tamau-oioi-hia te mau fare tutu

[Hohoˈa i te api 31]

Mea rahi â te tae maira

[Hohoˈa i te api 31]

A tahi nei a fanauhia ˈi e te horo ê aˈena ra