A oaoa i te tiaturiraa o te Basileia!

E TAIME oaoa te putuputuraa mai na feia e 5 784 i te 10 no Mati 2001, i na vahi e toru i te Hau no New York e faaohipahia ra e te fetii rahi o te Betela. I taua taime ra te faatuiteraahia te 110raa o te piha a te haapiiraa mitionare no Gileada.

Ua farii popou o Carey Barber, melo o te Tino Aratai a te mau Ite no Iehova, i te taatoaraa e ua haamata i te porotarama ma te parau e: “Te oaoa nei tatou i te mea e i teie nei, ua ineine maitai na feia haapii no Gileada o te 110raa o te piha ei mitionare o te tonohia i te mau tuhaa fenua e ati aˈe te fenua nei.”

Nafea ia vai oaoa noa

I te otiraa ta Taeae Barber mau parau omuaraa, o Don Adams tei paraparau i te feia e faaroo ra, to roto atoa na feia e faatuitehia ra e 48, i nia i te tumu parau ra “E taoˈahia tatou i ta Iehova haamaitairaa.” Ua niuhia ta ˈna oreroraa parau i nia i te Maseli 10:22, e ua haamanaˈo atu oia i te feia e faaroo ra e e turu e e haamaitai Iehova i ta ˈna mau tavini ia tuu ratou i te mau faufaa a te Basileia i te parahiraa matamua i roto i to ratou oraraa. Ua faaitoito oia i te feia haapii ia farii i ta ratou mau tuhaa taviniraa apî ma te hoê â hinaaro mau e to te aposetolo Paulo, o tei titauhia ia ‘fano i Makedonia e ia tauturu atu.’ (Ohipa 16:9) Te vai ra te mau fifi e faaruru atu, teie râ, ua hopoi mai te farii-maitai-raa Paulo e poro i te vahi i tonohia ˈi oia, i te mau maitai oaoa e rave rahi.

Ua oti ta te feia e faatuitehia ra e pae avaˈe haapiiraa bibilia e faaineineraa no te ohipa mitionare. Teie râ, ua faaitoito o Daniel Sydlik, melo o te Tino Aratai a te mau Ite no Iehova, ia ratou ia tamau noa ei feia haapii. A hohora ˈi oia i te tumu parau ra “Ia riro outou ei mau pǐpǐ mau,” teie ta ˈna i parau: “Te auraa o te riroraa ei pǐpǐ, o te faaroo-tamau-raa ïa i ta Iesu mau parau. Oia hoi, e ineine noa tatou i te faaroo i ta ˈna mau parau, ta ˈna poroi, ta ˈna haapiiraa.” Ua faataa oia e eita te mau pǐpǐ a te Mesia e rave i te mau faaotiraa ma te ore e faaroo i te reo o te Fatu; ua taaihia te paari o te Atua i te oraraa o te Mesia. (Kolosa 2:3) Eita ta tatou e nehenehe e parau e ua ite tatou i te mau mea atoa no nia ia Iesu mai te peu e ua faaroo tatou i ta ˈna mau parau hoê noa taime, no reira Taeae Sydlik i faaitoito ai i te feia e faatuitehia ra ia tamau noa i te haapii, i te faaohipa, e i te haapii atu i te parau mau Kerisetiano, o te faatiamâ hoi i te taata.—Ioane 8:31, 32.

Ia oaoa noa ratou i roto i te taviniraa a te Atua, e tia ia ratou ia ineine i te farii i te aˈo e te faatitiaifaroraa. “E aˈo anei to outou aau ia outou?” tera ïa te uiraa a te orometua haapii no Gileada, o Lawrence Bowen. Ua faaite oia e i roto i te Bibilia, ua taaihia te aau taipe i to tatou mau manaˈo e mau huru o te aau hohonu roa ˈˈe. E nehenehe te reira e faatitiaifaro i te hoê taata mai te peu e ua ô roa te manaˈo paari faauruahia o te Parau a te Atua i roto i te mau tuhaa hohonu o te huru o te hoê taata. (Salamo 16:7; Ieremia 17:10) E nehenehe atoa te haerea haapao maitai o te hoê e faaoaoa roa ia Iehova. I muri aˈe i to ˈna taioraa i te Maseli 23:15, 16, ua ui te taeae orero e: “E aˈo anei to outou aau ia outou?” Ua na ô â oia e: “Te tiaturi  nei matou i te reira, mea na reira hoi outou e faaoaoa roa ˈi ia Iehova. E faaara outou i te mau huru hohonu roa ˈˈe o to ˈna aau. Oia, ia haapao maite outou i ta outou mau tuhaa taviniraa, e oaoa ïa te aau o te Atua.”

Na Mark Noumair, o tei tavini ei mitionare i Kenya hou a riro ai ei orometua haapii no Gileada, i horoa i te oreroraa parau hopea o teie tuhaa o te porotarama. Ua haamahitihiti ta ˈna oreroraa parau “E mea maitai te rave i te mea i noaa ra” i te faufaaraa ia faahotu i te mauruuru. Ia au i te Koheleta 6:9, ua aˈo Taeae Noumair e: “A farii i te tupuraa mau. Oia hoi, a ‘rave i te mea i noaa ra.’ Eiaha e moemoeâ i te hoê mea ta outou e hinaaro e rave, aita râ outou e rave ra, a haamau maoti i to outou feruriraa i nia i te haafaufaaraa i to outou nei mau tupuraa. E riro noa outou i te ore e mauruuru e e oaoa ia ora outou i roto i te hoê ao moemoeâ, ia tiai outou i te tahi mau mea tano ore, aore ra ia faaea noa outou i nia i te mau mea faatoaruaru o ta outou tuhaa taviniraa.” Oia, noa ˈtu eaha te vahi tei reira tatou aore ra eaha te mau tupuraa, e hopoi mai te faahoturaa i te mauruuru niuhia i nia i to tatou taairaa e te Atua i roto i to tatou iho mau tupuraa, i te hoê huru feruriraa oaoa i roto i te taviniraa i to tatou Atua Poiete Rahi.

Mau tupuraa oaoa i roto i te taviniraa i te Basileia e i Gileada

I muri aˈe i te horoaraahia te mau aˈoraa e au ia faaohipahia i roto i taua mau oreroraa parau ra, ua faatia te feia haapii i te tahi mau tupuraa ta ratou i farerei i roto i te taviniraa i mua i te taata i te roaraa o ta ratou e pae avaˈe haapiiraa. I raro  aˈe i te aratairaa a Wallace Liverance, te papai parau o te Haapiiraa no Gileada, ua faatia te feia haapii e faatuitehia ra nafea to ratou haamaitairaa ia ratou iho ei tavini na te Atua. (Korinetia 2, 4:2) Ua noaa ia ratou i te haaputapû i te manaˈo haava no ǒ mai i te Atua ra o te tahi pae. Ua faaite te mau tupuraa i farereihia e te feia haapii nafea te haamataraahia te tahi mau haapiiraa bibilia e te mau taata haavare ore ta ratou i farerei i nia i te purumu, i roto i te taviniraa i tera e tera fare, e i roto i te tahi atu â mau tupuraa. I te mau taime taa ê, ua parau te tahi mau taata tei anaanatae e e parau mau to roto i te mau papai bibilia a te faanahonahoraa a Iehova. Ua farii maitai roa te hoê fatu fare i te hoê irava bibilia taa maitai. I teie nei, te haapii ra tera vahine i te Bibilia e te mau Ite no Iehova.

I muri iho, ua uiui o Joel Adams i te feia faatuitehia no Gileada o te mau piha matamua. Teie ta ˈna tumu parau, “Eiaha e faaea i te haapii, eiaha e faaea i te tavini ia Iehova.” E mau manaˈo paari tano maitai ta te feia i uiuihia i horoa na te mau mitionare apî. Teie ta Harry Johnson i parau no nia i tera tau a riro ai oia ei melo o te 26raa o te piha no Gileada: “Ua haapii matou e ua aratai noa iho â Iehova i to ˈna nunaa e e na reira noâ oia. Ua riro tera tiaturi papu ei faaitoitoraa i te roaraa o te mau matahiti.” Ua faaara o William Nonkes, melo o te 53raa o te piha no Gileada, i te feia faatuitehia e: “Te mea faufaa roa ˈˈe, o te haamanaˈoraa ïa i te mau faaueraa tumu bibilia, e te faaauraa ˈtu i te reira i nia i te mau faaotiraa atoa ta outou e rave i roto i te oraraa i teie nei e a muri noa ˈtu. Te faahopearaa, e noaa ïa ia outou i te haapao maitai i ta outou tuhaa taviniraa, a vai atu ai ta Iehova haamaitairaa rahi i nia ia outou.”

“Faaitoitohia no te rave i te hinaaro o Iehova,” tera te tumu parau ta Richard Rian i maiti no ta ˈna tuhaa o te porotarama. Te hoê o te feia ta ˈna i uiui, o John Kurtz ïa, tei faatuitehia i roto i te 30raa o te piha, e tei tavini ei mitionare i Paniora e hau atu i te 41 matahiti. I to ˈna uiuiraahia no nia i te porotarama o te haapiiraa no Gileada, teie ta Taeae Kurtz i parau: “O te Bibilia te buka matamua. I muri mai, o te mau papai haapiiraa bibilia ïa o te tauturu mai ia maramarama tatou i te Bibilia. Te vai ra ta te taatoaraa. Aita e parau apî huna i horoahia i Gileada. Aita roa ˈtu vau i faaea i te haapapu i te reira, no te mea e ite oioi te taatoaraa i te parau apî i horoahia i Gileada.”

Na Taeae Gerrit Lösch, melo o te Tino Aratai a te mau Ite no Iehova, i faaoti i te porotarama pae varua na roto i te hohoraraa i te tumu parau ra “I nia e i raro aˈe i to Iehova pererau.” Ua faataa oia nafea i roto i te Bibilia te parururaa e te turu a te Atua i ta ˈna mau tavini haapao maitai i faahohoˈahia ˈi i te pererau o te aeto. (Deuteronomi 32:11, 12; Salamo 91:4) I te tahi taime, e hohora te metua aeto i to ˈna pererau tau hora i te maoro no te paruru i to ˈna mau fanauˈa. I te tahi taime, e nehenehe atoa te maiaa aeto e hohora i to ˈna pererau i nia i to ˈna mau fanauˈa no te paruru ia ratou i te mataˈi toetoe. Oia atoa, ia au i ta ˈna opuaraa, e nehenehe ta Iehova e tauturu i ta ˈna mau tavini haapao maitai, ia faaruru iho â râ ratou i te mau fifi i te pae varua. Eita iho â Iehova e vaiiho e ia tamatahia ta ˈna mau tavini hau aˈe i ta ratou e nehenehe e faaoromai, e imi râ oia i te ravea ia nehenehe ratou e faaruru atu. (Korinetia 1, 10:13) Ei faaotiraa, ua parau Taeae Lösch e: “Ia paruru-noa-hia tatou i te pae varua, mea titauhia ia faaea noa tatou i raro aˈe i to Iehova pererau. Te auraa ra, eiaha ïa tatou e faahotu i te hoê huru feruriraa tiamâ. Ia vai noa tatou i pihai ia Iehova e ta ˈna faanahonahoraa e au i te hoê metua vahine, eiaha tatou e fariu ê i ta raua aratairaa e aˈoraa î i te here.”

Ua taio atura te peretiteni i te mau poroi e te mau rata haapopouraa na te ao atoa mai. Ia oti, ua horoahia te mau parau tuite. I te haamauraahia te Haapiiraa no Gileada, no te haapii noa ïa tau piha i te hoê roaraa e pae matahiti. Teie râ, ua faaohipa noa te Atua ra o Iehova i te haapiiraa e 58 matahiti i te maoro. Mai ta Taeae Barber i faahiti i roto i ta ˈna mau parau omuaraa: “E roo faahiahia mau â tei noaa mai i te feia faatuitehia no Gileada mai te matahiti 1943 mai, i reira te avariraahia o Gileada! Maoti ta ratou mau tutavaraa amui, tau hanere tausani feia haehaa o te fenua tei faatae-mau-hia i te faanahonahoraa hanahana a Iehova ra.” Oia, ua tauturu teie haapiiraa mitionare i te mau mirioni taata ia oaoa i te tiaturiraa o te Basileia.

[Tumu parau tarenihia i te api 24]

TAPURA O TE PIHA HAAPIIRAA

Rahiraa fenua e tia to ratou: 8

Rahiraa fenua e terehia ˈtu: 18

Rahiraa feia haapii: 48

Faito matahiti au noa: 34

Rahiraa matahiti au noa i roto i te parau mau: 18

Rahiraa matahiti au noa i roto i te taviniraa taime taatoa: 13

[Hohoˈa i te api 25]

Te 110raa o te piha faatuitehia a te Haapiiraa bibilia no Gileada a te Watchtower

I roto i te tapura iˈoa i muri nei, a taio i te mau anairaa mai mua e haere atu i muri, e te mau iˈoa mai te pae aui e haere atu i te pae atau.

(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.