Mau uiraa a te feia taio

I roto i te Petero 1, 4:3, te taio nei tatou e i rave na te tahi mau Kerisetiano i “te mau peu atâta a te idolo ra.” Aita anei te Atua i faahapa e i opani i te taatoaraa o te mau peu atâta a te idolo?

Oia, i te manaˈo o te Atua, mea opanihia te mau peu idolo atoa e te ture. Eita ïa e tia ia rave te feia e imi ra i ta ˈna farii maitai i te peu idolo.—Korinetia 1, 5:11; Apokalupo 21:8.

E au ra râ e te faahiti ra te aposetolo Petero i te tahi atu â peu idolo. Na mua, mea matauhia te peu idolo i roto e rave rahi nunaa i tahito ra e e ere atoa i te mea opanihia e te feia mana toroa. Te auraa ra, aita te ture o te fenua i opani i taua peu idolo ra. E tuhaa atoa te tahi peu idolo no te poritita a te faatereraa aore ra a te aiˈa. I roto ïa i taua auraa ra i rave ai vetahi pae i ‘te mau peu idolo e ere i te mea opanihia’ hou a riro mai ai ei Kerisetiano. (New World Translation, neneiraa no 1950) E nehenehe e tapaohia, ei hiˈoraa, e ua faatia te arii Babulonia ra o Nebukanesa i te hoê tii auro, tera râ, ua patoi na tavini a Iehova ra o Sadaraka, o Meseka, e o Abede-nego i te haamori i te reira.—Daniela 3:1-12.

I te tahi aˈe pae, i roto i te mau peu faaroo idolo e rave rahi, te vai ra te mau ohipa aita roa ˈtu e tu ra e te tahi ture au noa aore ra e te manaˈo morare no ǒ mai i te manaˈo haava i tutuuhia mai. (Roma 2:14, 15) Ua papai te aposetolo Paulo no nia i te mau peu hairiiri “au ore” e te “haama,” e e pinepine, te ravehia ra te reira i roto i te mau peu faaroo. (Roma 1:26, 27) Aita te mau tane e te mau vahine e rave ra i te peu atâta idolo e haapao ra i te hitahita ore e au i te ture o te naturaraa taata. Mea tano mau â ïa ia haapae te feia i riro mai ei Kerisetiano i taua mau peu viivii ra.

Taa ê atu i tei parauhia mai nei, ua faahapa te Atua ra o Iehova i taua mau peu idolo ra tei matauhia i roto i te feia e ere i te ati Iuda. No reira, mea opanihia te reira e te ture. *—Kolosa 3:5-7.

[Nota i raro i te api]