Eaha te mea faufaa mau?

Mea oaoa te fanaˈoraa i te hoê mea faufaa mau. Eaha râ tera mea? Te moni rahi anei? Te hoê taoˈa moni aore ra taa ê roa? Te roo e te tiaraa teitei? Mea rahi te taata e haafaufaa rahi ra i teie mau mea. E nehenehe te fanaˈoraa i teie mau mea e riro ei ravea imiraa, e horoa ˈtu â i te auraa i te oraraa, aore ra e haamâha i te hoê hinaaro no roto i te mauruuru e te manuïaraa. Te tutava ra anei tatou i te tapi i taua mau mea ra, ma te tiaturi e maoti te reira e naeahia ˈi ta tatou mau fa e e tupu ai to tatou mau hinaaro no te tau no a muri aˈe?

MEA matauhia e e haafaufaa te taata i te hoê mea o te haamâha i to ratou mau hinaaro aore ra o te pahono i to ratou mau tiaturiraa. E poihere tatou i te mau mea o te faatupu i te au-maitai-raa e o te pûpû mai i te tiaturiraa o te hoê oraraa papu no a muri aˈe. E poihere tatou i te mau mea o te hopoi oioi mai i te tamǎrûraa, te tamahanahanaraa, aore ra te mauruuru. Mea faufaa ore râ e mea haroaroa ore te haafaufaaraa i te hoê mea tei niuhia i nia i to tatou mau tiaturiraa aore ra mau maitai o te taui noa. I te tanoraa, na to tatou hinaaro rahi roa ˈˈe e faataa eaha te mea faufaa mau.

Eaha ïa to tatou hinaaro rahi roa ˈˈe? Aita hoê aˈe mea faufaa ahiri e aita e ora, te hoê mea faufaa roa. Aita anaˈe e ora, aita ïa tatou i ǒ nei. Ua papai o Solomona, arii o Iseraela i tahito ra, e: “Aita râ a te feia i pohe ra e parau itea. . . . Aore hoi e ohipa, aore e imiraa, aore hoi e ite, aore hoi e paari, i te apoo [menema matauhia o te huitaata].” (Koheleta 9:5, 10) Ia pohe tatou, e faahepohia tatou ia vaiiho mai i ta tatou mau mea atoa. No reira, to tatou hinaaro rahi roa ˈˈe, oia hoi ia noaa mai te hoê mea o te paruru i to tatou ora. Na te aha e paruru i to tatou ora?

Na te aha e paruru i to tatou ora?

“E haapuraa tei te moni,” ta te arii Solomona ïa i parau. (Koheleta 7:12) Ia navai te moni, e nehenehe e noaa mai ia tatou te maa e te hoê fare nahonaho. Maoti te moni e nehenehe ai tatou e oaoa i te  reva i te mau vahi atea. E nehenehe te reira e horoa mai i te mau mea e hinaarohia ia ore e maraa ia tatou i te rave i te ohipa no te matahiti rahi aore ra te paruparu. Mea rahi te mau vahi maitatai o te fanaˈoraa i te moni. Tera râ, eita te moni e nehenehe e paruru i to tatou ora. Ua aˈo te aposetolo Paulo ia Timoteo e: “E aˈo atu i te feia taoˈa rahi i teie nei ao, eiaha ei aau teitei, eiaha hoi e tiaturi i te taoˈa rahi itea ore, ei te Atua ora râ.” (Timoteo 1, 6:17) Eita te taatoaraa o te moni i roto i te ao e nehenehe e hoo mai i te ora no tatou.

A rave na i te hiˈoraa o te hoê taata o Hitoshi te iˈoa. I te mea e ua paari oia i roto i te hoê utuafare veve, e hinaaro i te rahi to Hitoshi e riro ei taata taoˈa rahi. No to ˈna tiaturi rahi roa i te mana o te moni, ua manaˈo oia e e nehenehe te moni e hoo atoa mai i te taata. I muri aˈe, ua haere te hoê taata i ǒ Hitoshi e ua ui ia ˈna ua ite anei o ˈna e ua pohe o Iesu Mesia no ˈna. Ua anaanatae o Hitoshi i teie uiraa no te mea ua manaˈo oia e aita hoê aˈe e pohe no te hoê taata mai ia ˈna. Ua haere oia e faaroo i te hoê oreroraa parau bibilia no te taatoaraa e ua maere oia i to ˈna faarooraa i te aˈoraa e ‘tapea noa i te mata haehaa.’ Ua faataa te taeae orero e e hiˈo atea te mata “haehaa” i mua e e tiatonu i te mau mea pae varua. (Luka 11:34, MN) Ua haamata ˈtura o Hitoshi i te tuu i te mau faufaa pae varua i te parahiraa matamua i roto i to ˈna oraraa, eiaha râ i te haa puai no te moni.

E nehenehe atoa ta te mau taoˈa materia e hopoi mai i te tahi aueue-ore-raa e panaˈonaˈo ore. Ia rahi ta tatou mau mea, eita ïa tatou e haapeapea no te mau mea e hinaarohia i te mau mahana atoa. E nehenehe te fanaˈoraa i te hoê fare nehenehe i te hoê vahi au maitai e horoa mai i te manaˈo e ua rave tatou i te tahi mea. E umere paha vetahi ê ia tatou no te mea e ahu faeta e e pereoo nehenehe to tatou.

E haamaitairaa ia ‘rave tatou i te maitai no ta tatou mau ohipa.’ (Koheleta 3:13) E maoti te mau taoˈa hau e nehenehe ai te feia here ‘e faaea maite, e amu, e inu, e e rearea maite.’ Tera râ, e faufaaraa morohi noa to te mau taoˈa materia. I roto i te hoê faaararaa no nia i te nounou taoˈa, ua parau Iesu Mesia e: “Rahi noa iho hoi ta te taata nei taoˈa, e ere hoi tei taua taoˈa na ˈna ra to ˈna ora.” (Luka 12:15-21) Eita ta te mau taoˈa, noa ˈtu eaha te rahi aore ra te faufaaraa, e nehenehe e haapapu mai e e ora tatou.

A rave na i te hiˈoraa o Liz o tei faaipoipo i te hoê tane taoˈa rahi. Te faatia ra oia e: “E fare nehenehe e e piti pereoo to mâua, e maoti to mâua oraraa fanaˈo i te pae moni, e nehenehe ta mâua e fanaˈo i te mau mea atoa ta te ao e pûpû mai i te pae materia . . . Te mea maere râ, te tapitapi noa ra vau no te moni.” Te faataa ra oia e: “Mea rahi roa hoi ta mâua e ere. E au ra e ia rahi noa ˈtu ta oe mau taoˈa, e iti noa ˈtu â oe i te ite i te panaˈonaˈo ore.”

Mea rahi o te haafaufaa roa atoa ra i te roo e te tiaraa teitei no te mea e hopoi mai te reira i te arueraa e te hanahana. I roto i te ao i teie mahana, o te hoê toroa manuïa te nounouhia. E nehenehe te faahoturaa i te mau ite aore ra mau aravihi otahi e tauturu mai ia tui to tatou roo. E arue paha vetahi ê ia tatou, e haafaufaa roa i to tatou mau manaˈo, e e hinaaro ru i ta tatou farii maitai. Mea oaoa e mea mauruuru paha teie mau mea atoa. I te pae hopea râ, e morohi te reira. E hanahana e e mana atoa to Solomona e nehenehe e noaa mai i te hoê arii, ua autâ râ oia e: “E ore hoi e haamau-papu-hia te manaˈoraa, to te taata paari e to te maamaa, e hope roa hoi te mau mea e vai nei i te haamoehia.” (Koheleta 2:16) Eita te roo aore ra te tiaraa teitei e horoa mai i te ora.

Ua haafaufaa rahi te hoê taata nanaˈo o Celo te iˈoa i te hoê mea faufaa aˈe i te roo. No te mea e mea ite roa oia, ua fanaˈo oia i te hoê haapiiraa o tei haamaitai i to ˈna mau aravihi. Aita i maoro, ua aruehia ta ˈna ohipa i roto i te mau vea e e te feia hiˈopoa i te mau ohipa rimaî. Mea rahi o ta ˈna mau nanaˈoraa tei faaiteitehia i roto i te mau oire rarahi i Europa. Te faatia ra o Celo e: “E tia ia ˈu ia parau e no te hoê taime, o te ohipa rimaî te mea faufaa roa ˈˈe i roto i to ˈu oraraa. Ua taa râ ia ˈu e e au te rave-noa-raa i to ˈu toroa i te taviniraa e piti fatu.  (Mataio 6:24) Ua papu ia ˈu e o te pororaa i te parau apî maitai o te Basileia o te Atua te mea faufaa roa ˈˈe ta ˈu e nehenehe e rave. No reira vau i faaoti roa ˈi e vaiiho i ta ˈu ohipa nanaˈo.”

Eaha te mea faufaa roa ˈˈe?

I te mea e mea faufaa ore te mau mea atoa aita anaˈe e ora, eaha ïa ta tatou e nehenehe e tapi o te haapapu mai e e ora noa tatou? No ǒ mai te mau ora atoa i te Atua ra o Iehova. (Salamo 36:9) Oia mau, “no ˈna hoi to tatou ora, e i hahaere ai, e i parahi ai.” (Ohipa 17:28) E horoa oia i te ora mure ore ei ô na te feia ta ˈna e here. (Roma 6:23) Eaha te tia ia tatou ia rave e au ai ia tatou taua ô ra?

Tei to tatou faatupuraa i te taairaa piri e o Iehova e fanaˈo ai tatou i te ô o te ora mure ore. No reira, mea faufaa aˈe ta ˈna farii maitai i te tahi aˈe mea e nehenehe e noaa mai ia tatou. Ia fanaˈo tatou i ta ˈna farii maitai, e tiaturiraa ïa to tatou e ite i te oaoa mau mure ore. Aita anaˈe râ te farii maitai a te Atua, e mou roa ïa tatou. Mea papu maitai ïa e mea faufaa roa te mau mea atoa o te tauturu ia tatou ia faatupu i te taairaa maitai e o Iehova.

Eaha te titauhia ia rave tatou

Tei te noaaraa mai te ite e manuïa ˈi tatou. To roto te ite mau i te Parau a Iehova, te Bibilia. O teie anaˈe buka te parau maira eaha te tia ia tatou ia rave e mauruuru ai te Atua. Mea titauhia ïa ia haapii maite tatou i te mau Papai. Ia faaitoito maite tatou i te haapii i te mau mea atoa no nia i te Atua ra o Iehova e ia Iesu Mesia, e noaa mai ïa ‘te ite o te horoa mai i te ora mure ore.’ (Ioane 17:3) E taoˈa faufaa taua ite ra e tia ia tatou ia poihere!—Maseli 2:1-5.

Te ite e noaa mai ia tatou i roto i te Parau a te Atua, e faaineine ïa ia tatou i te rave i te taahiraa avae i muri mai—te faatupuraa i te faaroo ia Iesu Mesia. Ua faaue Iehova e mea na roto i te arai o Iesu e tae ai te taata atoa ia ˈna ra. (Ioane 14:6) Inaha, “aore roa hoi e ora ia vetahi ê.” (Ohipa 4:12) E ere tei “te ario e te auro” to tatou faaoraraa hopea, tei “te toto taoˈa râ o te Mesia.” (Petero 1, 1:18, 19) Mea titauhia ia faaite tatou i to tatou faaroo na roto i te tiaturiraa i ta Iesu mau haapiiraa e te peeraa i to ˈna hiˈoraa. (Hebera 12:1-3; Petero 1, 2:21) Auê te faufaa ta ˈna tusia e! Na te faaohiparaa i te mau maitai o taua tusia ra e faataa i te oraraa mure ore no a muri aˈe o te huitaata atoa. Ia faaohipa-roa-hia te reira i nia ia tatou, e fanaˈo ïa tatou i te ô faufaa mau o te ora mure ore.—Ioane 3:16.

Ua parau Iesu e: “Hinaaro oe i to Atua ia Iehova ma to aau atoa, e ma to [nephe] atoa, e ma to manaˈo atoa.” (Mataio 22:37; MN) Ia hinaaro tatou ia Iehova, e ‘haapao ïa tatou i ta ˈna [mau faaueraa].’ (Ioane 1, 5:3; MN) E titau ta ˈna mau faaueraa ia faataa ê mai tatou i te ao, ia pee noa i te hoê haerea tia, e ia turu ma te taiva ore i to ˈna Basileia. Mea na reira tatou e ‘rave ai i te ora’ eiaha te pohe. (Deuteronomi 30:19) E ‘ia haafatata ˈtu tatou i te Atua, e e haafatata mai oia ia tatou.’—Iakobo 4:8.

Mea hoona aˈe te haapapuraa o te farii maitai a te Atua i te mau taoˈa atoa a te ao. Te feia tei ia ratou ra te farii maitai a te Atua, o ratou ïa te feia taoˈa roa ˈˈe i te fenua nei! No reira, e tutava anaˈe i te tapi i te taoˈa faufaa mau—te farii maitai a Iehova. Oia mau, e faaohipa anaˈe i te aˈoraa a te aposetolo Paulo: ‘A tapi i te parau-tia, i te paieti, i te faaroo, i te hinaaro, i te faaoromai, e te mǎrû. A rohi hua i te rohiraa maitai ra i te faaroo, a [tapea maite] i te ora mure ore.’—Timoteo 1, 6:11, 12; MN.

[Hohoˈa i te api 21]

Eaha te mea faufaa roa no outou? Te moni, te mau taoˈa materia, te roo, aore ra te tahi atu mea?

[Hohoˈa i te api 23]

Mea titauhia ia haapii maite tatou i te mau Papai