Mau uiraa a te feia taio

Eaha te auraa e haamori ia Iehova “ma te varua”?

I to ˈna pororaa i te hoê vahine Samaria o tei haere mai e huti i te pape i te apoo pape a Iakoba i pihai iho i te oire o Sikara, ua parau o Iesu Mesia e: “E Varua te Atua, e te feia e haamori ia ˈna ra, e haamori ïa ma te varua e te parau mau e tia ˈi.” (Ioane 4:24) E tia ia ravehia te haamoriraa mau ‘ma te parau mau’ oia hoi ia tuati te reira i te mea ta te Atua ra o Iehova i faaite i roto i te Bibilia no nia ia ˈna iho e ta ˈna mau opuaraa. E tia atoa ia itoito ta tatou taviniraa i te Atua, turaihia e te hoê aau î i te here e te faaroo. (Tito 2:14) Teie râ, te faaite ra te mau irava tapiri e ua taaihia te mau parau a Iesu no nia i te ‘haamoriraa i te Atua ma te varua’ hau roa ˈtu â i te hoê huru feruriraa e tavini ai tatou ia Iehova.

Te aparauraa ta Iesu i fanaˈo e te vahine i te apoo pape ra, e ere ïa no nia i te itoito aore ra te ereraa i te itoito i roto i te haamoriraa. E nehenehe atoa te haamoriraa hape e ravehia ma te itoito e te paieti. I muri aˈe râ i to ˈna parauraa e eita te Metua e haamorihia i nia i te hoê mouˈa i Samaria eita atoa i te hiero i Ierusalema—e piti vahi ite-mata-hia—ua haamataratara Iesu i te hoê raveraa apî e haamori niuhia i nia i te natura mau o te Atua. (Ioane 4:21) Ua na ô oia e: “E Ihotaata varua o te Atua.” (Ioane 4:24, Charles B. Williams) E ere te Atua mau i te mea materia e eita e nehenehe e itehia aore ra e fafahia. Aita ta ˈna haamoriraa i niuhia i nia i te hoê hiero materia aore ra i nia i te hoê mouˈa. No reira, ua faahiti Iesu i te hoê pae o te haamoriraa o te hau atu â i te mau mea o te ite-mata-hia.

Hau atu â i te ravehia ma te parau mau, e tia atoa ia arataihia te haamoriraa e fariihia e te varua moˈa—te puai ohipa itea ore o te Atua. “E imi hoi te [varua moˈa] i te mau mea atoa nei,” ta te aposetolo Paulo ïa i papai, “e te mau mea hohonu atoa a te Atua.” Ua na ô faahou â oia e: “Te [v]arua i noaa ia tatou nei, e ere ïa i to teie nei ao, o te [v]arua râ no ǒ mai i te Atua ra: ia ite tatou i te mau mea i horoa-noa-hia mai e te Atua no tatou nei.” (Korinetia 1, 2:8-12; MN) No te haamori i te Atua ma te fariihia, e tia ia tatou ia fanaˈo i to ˈna varua e ia arataihia tatou e te reira. Hau atu â, mea faufaa ia tuea to tatou huru feruriraa e te varua o te Atua na roto i te haapiiraa e te faaohiparaa i ta ˈna Parau.

[Hohoˈa i te api 28]

A haamori i te Atua “ma te varua e te parau mau”