Mau uiraa a te feia taio

Mea nafea na maurima no te amoraa i te afata o te faufaa i te faanahoraahia, i te mea e te faaite ra Te mau arii 1, 8:8 e e iteahia te reira mai te vahi Moˈa atu?

I to Iehova horoaraa ia Mose i te hohoˈa o te sekene i roto i te medebara, o te afata o te faufaa te tauihaa faufaa. Tei roto i teie afata oeha, vehîhia i te auro te mau pǎpǎ o te Ture e te tahi atu mau mea. I vaiihohia na te reira i roto roa, i te vahi Moˈa Roa. I nia i te tapoˈi o te Afata, te vai ra e piti kerubi auro ma te mau pererau hohorahia. I na pae e piti atoa o te Afata, te vai ra te mau potaa, ia nehenehe te reira e amohia e na maurima i hamanihia i te raau sitima vehîhia i te auro. I te tanoraa mau, e tuuhia na maurima na roto i te mau potaa e i te pae roa o te Afata. No reira, ma te Afata i to ˈna vairaa i roto i te vahi Moˈa Roa o te sekene, i mua i te pae hitia o te râ, ua hurihia ˈtu na maurima i te pae apatoerau apatoa. Hoê â huru i muri aˈe i te vaiihoraahia te Afata i roto i te hiero ta Solomona i patu.—Exodo 25:10-22; 37:4-9; 40:17-21. *

Te faataa ê ra te hoê paruru i te vahi Moˈa Roa i te vahi Moˈa (te piha i rapae au mai). Eita te mau tahuˈa i roto i te vahi Moˈa e nehenehe e hiˈo atu i roto i te vahi Moˈa Roa e e hiˈo i te Afata, i nia i te reira hoi Iehova e faaite ai ia ˈna iho. (Hebera 9:1-7) No reira, mea maere paha te tatararaa o Te mau arii 1, 8:8: “I itea te hopea maurima i roto i te vahi moˈa i mua i te nao ra no te maoro, aita râ i itea i rapae au.” Te faahitihia ra te hoê â manaˈo i roto i te Paraleipomeno 2, 5:9. Nafea na maurima i iteahia ˈi e te hoê taata i roto i te vahi Moˈa o te hiero?

Ua manaˈo te tahi pae e e tote atu na maurima i te paruru, a itehia ˈtu ai te mau puu. E ere râ mai te reira ahiri e ua hurihia ˈtu na maurima i te pae apatoerau apatoa, ma te paruru e tuea ra i na maurima. (Numera 3:38) Te vai ra te hoê faataaraa au aˈe. E iteahia na maurima ahiri te vai ra te hoê area i rotopu i te paruru e te pǎpai o te hiero aore ra ia haere te tahuˈa rahi i roto i te vahi Moˈa Roa. Eita te hoê e ite atu i te Afata iho no te paruru, teie râ, e nehenehe e itehia na maurima e tarava ra i na pae taitahi na roto i te area. Noa ˈtu e mea tano teie faataaraa, eita tatou e faaetaeta i nia i te reira.

Papu maitai, te vai ra e rave rahi mau parau rii ta tatou e nehenehe hoi e haapii. Ua faahiti te aposetolo Paulo i te tahi tuhaa rii i roto i ta ˈna rata i te mau Hebera. Ua parau hoi oia e: “Eita . . . e tia ia tatou ia parau hua i taua mau mea ra i teie nei.” (Hebera 9:5) Na te tia-faahou-raa a muri aˈe o te mau taata haapao maitai e horoa mai i te mau ravea faaitoitoraa ia haapii na roto i teie mau taata mai ia Mose, ia Aarona, ia Bezaleela, e te tahi atu o tei ite i te hohoˈa e te ohiparaa o te sekene.—Exodo 36:1.

[Nota i raro i te api]