“E na to oe ra maramarama e maramarama ˈi matou”

TE MARAMARAMA, o te hoê ïa mea aita tatou e haafaufaa pinepine roa ra e tae roa ˈtu e aita e uira faahou e tei roto te vahi e haaati ra ia tatou i te poiri. Auaa râ, mea papu roa ta tatou “fare uira”—te mahana—i nia i te raˈi. E maoti te maramarama no ǒ mai i te mahana ra e nehenehe ai tatou e ite, e tamaa, e huti i te aho, e e ora.

I te mea e mea faufaa te maramarama no te oraraa, eita ïa tatou e maere ia taio i roto i te Genese e ua fa mai te maramarama i te mahana poieteraa matamua. “Ua parau ihora te Atua, Ei maramarama; ua maramarama ihora.” (Genese 1:3) Ua farii noa te mau taata faatura mai te arii ra o Davida ia Iehova ei tumu o te ora e te maramarama. “Tei ia oe hoi te tumu o te ora,” ta Davida ïa i papai. “E na to oe maramarama e maramarama ˈi matou.”—Salamo 36:9.

E auraa mau e e auraa taipe atoa to te mau parau a Davida. Te haamahitihiti ra te buka ite rahi ra te Encyclopædia Britannica e: “Papu maitai, o te maramarama te tumu i te pae o te ite mata.” Te na ô faahou ra te buka e: “E fanaˈo te roro o te taata i te mau haamaramaramaraa hau na roto i te mata maoti i te tahi atu â mero.” I te mea e ua taaihia te rahiraa o te mau mea ta tatou e haapii i te ô o te ite mata—o te titau ra i te maramarama no te ohipa maitai—e faaohipa-atoa-hia te maramarama i roto i te mau Papai i roto i te hoê auraa taipe.

No reira, ua parau Iesu i ta ˈna mau pǐpǐ e: “O vau te maramarama o teie nei ao, o te pee mai ia ˈu ra, e ore ïa e haere noa i te pouri, e maramarama ora ïa to ˈna.” (Ioane 8:12) Te maramarama taipe i faahitihia e Iesu, o te poroi ïa o te parau mau ta ˈna i poro, o te nehenehe e turama i te feruriraa e te aau o te feia e faaroo ia ˈna. I muri aˈe i te mau matahiti poiri i te pae varua, e nehenehe te mau pǐpǐ a Iesu i te pae hopea e maramarama i te opuaraa a te Atua no te taata e te tiaturiraa o te Basileia. O te “maramarama ora” mau teie, i te mea e e aratai atu taua ite ra i te ora mure ore ra. “Teie hoi te ora mure ore,” ta Iesu ïa i parau i to ˈna Metua i te raˈi i roto i ta ˈna pure, “ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) Eiaha roa ˈtu tatou e haafaufaa ore i teie maramarama i te pae varua!