‘E parai i to mata i te raau mata’

NA IESU Mesia i horoa i taua faaueraa ra i te amuiraa Kerisetiano no te senekele matamua i Laodikea, i Asia Iti.

Ua parau Iesu e: ‘E hoo mai oe i te raau mata no te parai i to mata, ia ite oe.’ E ere i te maˈi mata mau teie, e matapo pae varua râ e tia ia rapaauhia. Ua hema te mau Kerisetiano no Laodikea i te huru feruriraa o to ratou oire ruperupe i te pae materia e aita ratou i tâuˈa i to ratou mau hinaaro mau i te pae varua.

Tera te tumu i ore ai ratou i ite maitai, no reira Iesu i parau ai e: “Te parau na oe, E taoˈa rahi ta ˈu, ua faarahi au i ta ˈu taoˈa, e aore e mea toe ia au; e aita oe i ite e, e pohe rahi to oe, e mai te mea arohahia ra, e te faufaa ore, e te matapo, e te veve.” Noa ˈtu e aita ratou e ite ra, ua hinaaro te mau melo o te amuiraa i te “raau mata” faaora e noaa mai na roto noa i te fariiraa i te haapiiraa e te aˈo a Iesu Mesia. “E hoo mai oe ia ˈu nei,” ta Iesu ïa i parau.—Apokalupo 3:17, 18.

Mai no te feia i Laodikea, mea hinaarohia ia vai ara te mau Kerisetiano mau i teie mahana ia ore ratou e vare noa, peneiaˈe ma te ite ore, i te ao nounou taoˈa e o te tapi ra i te mau mea navenave ta ratou e ora ra. Te itehia ra te faaueraa e atuatu i te hoê manaˈo maitai i te pae varua i roto i teie aˈoraa: ‘E hoo mai oe ia Iesu i te raau mata no te parai i to mata, ia ite oe.’

A tapao na e mea hoo mai teie “raau mata.” E titauhia te tahi haamâuˈaraa. Mea titauhia ia faataa tatou i te taime no te haapii e no te feruriruri i te Parau a te Atua. Te haapapu maira te papai salamo e e ‘mea maramarama teie Parau, e maramarama ˈi te mata [pae varua].’—Salamo 19:8.