E ite-mau-hia anei te hoê ao aita e pǔpǔ taata?

TO ROTO atoa o John Adams, o tei riro mai ei piti o te peretiteni o te mau Hau Amui, i te feia i tarima i te Faˈiraa i te tiamâraa faufaa i roto i te tuatapaparaa, teie hoi te tahi mau parau faahiahia i papaihia: “Te tapea nei matou i teie mau parau mau ei parau papu maitai, ua poietehia te mau taata atoa ma te aifaito.” E au ra râ e aita i papu roa ia John Adams e mea aifaito iho â te taata, ua papai hoi oia e: “No te mea ua haamau maitai te Atua Mana hope i te aifaito-ore-raa o te feruriraa e o te tino i roto i te hamaniraa o te natura taata, aita ïa e opuaraa maitai aore ra e manaˈo tumu e nehenehe e faaaifaito ia ratou.” Area te taata tuatapapa Beretane ra o H. G. Wells ra, ua feruri ïa oia i te hoê ao e mea aifaito te taata atoa, niuhia i nia e toru mea: te hoê haapaoraa rahi mea mâ râ e mea viivii ore, te hoê â haapiiraa no te taatoaraa, e aita e nuu.

E tae mai i teie mahana, aita te tuatapaparaa i haamau i te ao e mea aifaito te taata atoa, te ao ferurihia e Wells. E ere roa ˈtu  te taata i te mea aifaito, e te parare noa ra te mau faataa-ê-raa i te mau pǔpǔ taata. Ua hopoi mai anei taua mau pǔpǔ ra i te maitai na te huitaata? Aita. Te faaamahamaha ra te mau faanahoraa pǔpǔ totiare i te taata, a faatupu atu ai i te feii, te riri, te oto, e te haamaniiraa toto e rave rahi. Ua hopoi mai te huru feruriraa e mea teitei aˈe te uouo i Afirika, i Auteralia, e i Marite Apatoerau i te ati i nia i te feia e ere i te uouo—tae noa ˈtu te haamou-roa-raa i te feia tumu no te fenua o Van Diemen (Tasmanie i teie nei). I Europa, ua riro te faataa-ê-raa i te mau ati Iuda ei nunaa haihai aˈe ei omuaraa i te Taparahiraa a te mau Nazis. O te taoˈa rahi a te faatereraa hui mana e te mauruuru ore i rotopu i te mau pǔpǔ taata haihai aˈe e te au noa, te tumu i tupu ai te Orureraa hau Farani i te senekele 18 e te Orureraa hau Bolchevique i Rusia i te senekele 20.

Teie ta te hoê taata paari no tahito ra i papai: ‘Ua faatere te taata i te taata e ia ino atu.’ (Koheleta 8:9, MN) E parau mau teie noa ˈtu e e taata aore ra e pǔpǔ taata teie e faatere nei. I te taime e faateitei ai te hoê pǔpǔ taata ia ratou i nia ˈˈe i te tahi atu, e tupu mai iho â te ati e te mauiui.

Mea aifaito te taatoaraa i mua i te aro o te Atua

Mea teitei aˈe iho â anei te tahi mau pǔpǔ taata i te tahi atu? Eita, i mua i te aro o te Atua. Te na ô ra te Bibilia e: “Na [te Atua] i hamani i te taata i te mau fenua atoa nei i te toto o te taata hoê ra, ei parahi i te mau fenua atoa nei.” (Ohipa 17:26) Hau atu â, aita te Atua Poiete i “haapaia ˈtu i te hui arii ra, o tei ore i rahi i te haapao i te feia mana, iti ihora te taata rii: na to ˈna iho rima hoi i hamani ia ratou atoa ra.” (Ioba 34:19) E fetii anaˈe te taata atoa, e i mua i te aro o te Atua, ua fanauhia mai ratou paatoa ma te aifaito.

A haamanaˈo atoa na e ia pohe te hoê taata, e mou roa ta ˈna mau parau atoa e mea teitei aˈe oia ia vetahi ê. Aita to Aiphiti i tahito ra i tiaturi i te reira. Ia pohe te hoê Pharao, e tuu ratou i te mau taihaa taoˈa rahi i roto i to ˈna menema ia nehenehe oia e faaohipa ˈtu a tamau noa ˈi oia i te amo i to ˈna tiaraa teitei i roto i te hoê oraraa a muri aˈe. Te reira mau anei? Eita. Mea rahi o taua mau faufaa ra tei riro atu i te feia eiâ menema, e e rave rahi taihaa, aita i eiâhia, e itehia ra i roto i te mau fare vairaa taihaa tahito i teie mahana.

I te mea e ua pohe oia, eita ta te Pharao e nehenehe e faaohipa i taua mau taihaa moni ra. I te pohe, aita e pǔpǔ teitei aˈe e aita e pǔpǔ haihai aˈe, aita e taoˈa rahi e aita e veve. Te na ô ra te Bibilia e: “E pohe iho â te feia paari; te feia maamaa, te feia haavî, e pohe anaˈe ïa. No te mea e au te taata i te puaatoro o te ore e ora e a muri noa ˈtu, e au ratou i te animara e taime poto to ratou.” (Salamo 49:10, 12, The New English Bible) Noa ˈtu e e arii aore ra e tavini tatou, e tano teie mau parau faauruahia no tatou paatoa: ‘Aita a te feia i pohe ra e parau itea. Aita hoi a ratou e utua toe . . . Aore hoi e ohipa, aore e imiraa, aore hoi e ite, aore hoi e paari, i te apoo ta oe e haere na.’—Koheleta 9:5, 10.

I mua i te aro o te Atua, ua fanauhia tatou paatoa ma te aifaito, e mea aifaito tatou paatoa ia pohe tatou. Mea faufaa ore mau â ïa ia faateitei tatou i te hoê pǔpǔ taata i nia ˈˈe i te tahi i te roaraa o to tatou oraraa poto noa!

Hoê ao aita e pǔpǔ totiare—Nafea?

Teie râ, te vai ra anei te tiaturiraa e ia tae i te hoê mahana, e itehia te hoê ao e ere te pǔpǔ totiare i te mea faufaa? E, te vai ra. Fatata e 2 000 matahiti aˈenei, a vai ai Iesu i nia i te fenua, ua faaineinehia te niu no taua huru ao ra. Ua horoa Iesu i to ˈna ora ei tusia taraehara no te feia faaroo atoa ia “ore ia pohe te faaroo ia ˈna ra, ia roaa râ te ora mure ore.”—Ioane 3:16.

No te faaite e eiaha ta ˈna mau pǐpǐ e faateitei ia ratou i nia ˈˈe i te mau hoa faaroo, ua parau Iesu e: “Area outou, eiaha e titau ia parauhia, ia Rabi; hoê roa hoi a outou orometua, o te Mesia; e e taeae anaˈe hoi outou atoa na. E eiaha roa  outou e faametua i te hoê taata o teie nei ao, oia anaˈe ra hoi to outou Metua o te parahi i te raˈi ra. Eiaha atoa e titau ia parauhia outou, i te aratai; hoê roa hoi o outou aratai, o te Mesia. E tei rahi ra i roto ia outou na, ei tavini ïa no outou. Te faateitei ia ˈna ihora, e faahaehaahia ïa.” (Mataio 23:8-12) I mua i te aro o te Atua, mea aifaito anaˈe te mau pǐpǐ mau a Iesu i roto i te faaroo.

No te mau Kerisetiano matamua, mea aifaito anei ratou? Oia, no te feia i maramarama i ta Iesu haapiiraa. No ratou, mea aifaito ratou i roto i te faaroo e ua faaite ratou i te reira na roto i te piiraa te tahi i te tahi “taeae.” (Philemona 1, 7, 20) Aita hoê aˈe i faaitoitohia ia manaˈo e mea maitai aˈe oia ia vetahi ê. A hiˈo na nafea to Petero faataaraa ia ˈna iho ma te haehaa i roto i te piti o ta ˈna rata: “Simona Petero, e tavini e e aposetolo hoi na Iesu Mesia, i te feia i noaa atoa ia ratou taua faaroo maitai ia matou nei.” (Petero 2, 1:1) Ua haapii-roa-hia Petero e Iesu, e ei aposetolo, e hopoia faufaa ta ˈna. Tera râ, ua faariro oia ia ˈna mai te hoê tavini e ua ite maitai oia e hoê â ta ˈna e ta te tahi atu mau Kerisetiano fanaˈoraa taa ê i roto i te faaroo.

E parau mai paha te tahi pae e te patoihia ra te manaˈo tumu o te aifaitoraa, no te mea i te tau hou te Kerisetianoraa, ua faariro te Atua ia Iseraela ei nunaa taa ê no ˈna. (Exodo 19:5, 6) E parau mai paha ratou e teie te hoê hiˈoraa o te hau-ê-raa te hoê nunaa taata, tera râ, e ere te reira. E parau mau e ua fanaˈo te mau Iseraela, te mau huaai o Aberahama, i te hoê taairaa taa ê e te Atua e ua faaohipahia ratou ei arai no te horoa mai i ta te Atua mau faaiteraa. (Roma 3:1, 2) Te tumu râ, e ere ïa no te faateitei ia ratou. No te ‘maitai râ o te mau fenua atoa.’—Genese 22:18; Galatia 3:8.

Aita te rahiraa o te mau Iseraela i pee i te faaroo o to ratou tupuna ra o Aberahama. Ua taiva ratou e aita i farii ia Iesu ei Mesia. No reira te Atua i faarue ai ia ratou. (Mataio 21:43) Teie râ, aita te feia haehaa i rotopu i te huitaata i ere i te mau haamaitairaa i tǎpǔhia. I te Penetekose 33 T.T., ua fa mai te amuiraa Kerisetiano. Ua parauhia teie faanahonahoraa o te mau Kerisetiano i faatavaihia i te varua moˈa, ‘te Iseraela o te Atua,’ e ua riro te reira ei arai no te ninii mai i taua mau haamaitairaa ra.—Galatia 6:16.

Ua hinaaro te tahi mau melo o taua amuiraa ra ia haapiihia ratou i te parau o te aifaitoraa. Ei hiˈoraa, ua aˈo te pǐpǐ ra o Iakobo i te feia e faahanahana rahi aˈe ra i te mau Kerisetiano taoˈa rahi i te mau Kerisetiano veve aˈe. (Iakobo 2:1-4) Eita te reira e tano. Ua faaite te aposetolo Paulo e e ere roa ˈtu te mau Kerisetiano Etene i te mea haihai aˈe i te mau Kerisetiano ati Iuda, e e ere roa ˈtu te mau Kerisetiano vahine i te mea haihai aˈe i te mau Kerisetiano tane. Ua papai oia e: “E tamarii anaˈe hoi outou na te Atua i te faaroo ia Iesu Mesia ra. O to outou atoa hoi i bapetizohia i roto i te Mesia ra, ua ahu ïa i ta te Mesia ra. Aita e ati Iuda, aita e Heleni, aita e tavini, aita e tiamâ, aita e tane, aita e vahine: hoê â hoi outou i roto i te Mesia ra ia Iesu.”—Galatia 3:26-28.

Hoê nunaa aita e pǔpǔ i teie mahana

I teie mahana, te tamata ra te mau Ite no Iehova i te ora ia au i te mau faaueraa tumu bibilia. Ua ite ratou e aita e auraa taa ê to te mau pǔpǔ totiare i mua i te aro o te Atua. No reira, aita e faataa-ê-raa i te pǔpǔ ekalesiatiko e te pǔpǔ raita i  rotopu ia ratou, e aita ratou i faataa-ê-hia ia au i te iri aore ra te taoˈa rahi. Noa ˈtu e e taoˈa rahi paha ta te tahi pae, eita ratou e onoono i nia i “te ahaaha o te oraraa nei,” no te mea ua ite ratou e mea morohi noa taua mau mea ra. (Ioane 1, 2:15-17) Area râ, ua hoê ratou paatoa i roto i ta ratou haamoriraa i te Arii o te ao taatoa, te Atua ra o Iehova.

Te farii ra te mau Ite atoa i te hopoia e poro i te parau apî maitai o te Basileia i to ratou taata-tupu. Mai ia Iesu, te faatura ra tatou i te feia i teimaha e aita e tâuˈahia ra, na roto i te farereiraa ia ratou i to ratou fare no te pǔpǔ atu i te haapii ia ratou i te Parau a te Atua. Te haa amui ra te feia e tiaraa haihai to ratou i roto i te oraraa e te feia e hiˈohia ra paha e te tahi pae ei pǔpǔ teitei aˈe. O te mau huru maitatai i te pae varua te mea faufaa, eiaha te pǔpǔ totiare. Mai i te senekele matamua, e taeae e e tuahine anaˈe te taatoaraa i roto i te faaroo.

Aifaitoraa noa ˈtu te rau o te huru

Parau mau, te aifaitoraa e ere ïa te hohoˈa-roa-raa te tahi i te tahi. I roto i teie faanahonahoraa Kerisetiano, te vai ra te tane e te vahine, te ruhiruhia e te feia apî no ǒ mai i te mau nunaa, te mau reo, te mau aiˈa, e te faanavairaa faufaa e rave rahi. Ei taata, e ere hoê â to ratou huru feruriraa e to ratou aravihi i te pae tino. Aita râ taua mau taa-ê-raa ra e faariro ra i te tahi pae ei mea teitei aˈe aore ra te tahi pae ei mea haihai aˈe. Aita, e horoa mai taua mau taa-ê-raa ra i te hoê huru rau faahiahia. Ua ite taua mau Kerisetiano ra e no ǒ mai to ratou aravihi i te Atua ra e aita e tumu e manaˈo ai ratou e mea teitei aˈe ratou.

Te vai ra te mau faataa-ê-raa i te mau pǔpǔ taata no te mea te tamata ra te taata i te faatere ia ˈna iho maori râ i te pee i te aratairaa a te Atua. Fatata te Basileia o te Atua i te faatere mai i teie fenua i tera e tera mahana, e te faahopearaa, e ore roa ïa te mau faataa-ê-raa i te mau pǔpǔ totiare a te taata, e tae noa ˈtu te tahi atu mau mea o tei faatupu i te mauiui i te roaraa o te tau. I reira ïa ‘e parahi mau ai te feia mǎrû i te fenua.’ (Salamo 37:11) Aita e tumu faahou e teoteo ai te taata i to ˈna hau-ê-raa manaˈo-noa-hia. Eita roa ˈtu te mau pǔpǔ totiare e faatia-faahou-hia ia faaamahamaha i te huitaeae i te ao nei.

[Parau iti faaôhia i te api 5]

Aita te Atua Poiete “i rahi i te haapao i te feia mana, iti ihora te taata rii: na to ˈna iho rima hoi i hamani ia ratou atoa ra.”—Ioba 34:19.

[Hohoˈa i te api 6]

E faatura te mau Ite no Iehova i to ratou taata-tupu

[Hohoˈa i te api 7]

O te mau huru maitatai pae varua te mea faufaa i rotopu i te mau Kerisetiano mau