Eaha te faufaaraa o te hoê manaˈo haava mâ?

“UA FAAUEHIA te faatereraa ia farii e 20 000 raera.” Tera te upoo parau maere i itehia aita i maoro aˈenei i roto i te vea Beresilia Correio do Povo. Te faatia ra te tumu parau i te aamu o Luiz Alvo de Araújo, te hoê afai rata no reira, o tei hoo atu i te hoê tâpû fenua i te faatereraa hau. I muri aˈe i te tarimaraa i te parau tiaraa fatu, ua maere Luiz i te iteraa e ua aufauhia na ˈna e 20 000 raera (fatata e 8 000 dala Marite) hau atu i te moni i faaauhia!

E ere i te mea ohie ia faahoˈi i te moni hau. I muri aˈe i te mau hoˈi-faahou-raa manuïa ore e rave rahi i te mau piha a te hau, ua aˈohia Luiz ia rave i te hoê paruru e ia tuu i te fifi i mua i te tiripuna. “E au ra e ua hape te hoê taata, e no te rahi o te mau papie a te hau, aita e taata i ite nafea ia faatitiaifaro i te tupuraa,” ta te haava o tei faautua i te faatereraa ia rave i te moni e ia aufau i te mau haamâuˈaraa haamanahia, ïa i parau. “O te tupuraa matamua teie ta ˈu i ite aˈenei.”

Te faataa ra Luiz, e Ite no Iehova oia, e: “Eita to ˈu manaˈo haava haapiihia ia au i te Bibilia e faatia ia ˈu ia tapea i te mea e ere na ˈu iho. Ua tia ia ˈu ia tutava i te faahoˈi i te moni.”

E manaˈo e rave rahi e mea maere roa te hoê haerea mai teie aore ra mea taa ore atoa. Teie râ, te faaite ra te Parau a te Atua e mea faufaa roa no te mau Kerisetiano mau ia tapea i te hoê manaˈo haava mâ i roto i ta ratou mau ohipa e te mau tia faatere o te ao. (Roma 13:5) Ua faaoti papu te mau Ite no Iehova e tapea noa i te hoê ‘aau tia e e haapao maitai i te mau mea atoa.’—Hebera 13:18.