Ekalesia e te Hau i Byzance

UA FAATAA maitai roa Tei haamau i te Kerisetianoraa i te taa-ê-raa papu i roto i ta ˈna mau pǐpǐ e te ao o te taata tei atea ê i te Atua. Ua parau Iesu i ta ˈna mau pǐpǐ e: “Ahiri outou no teie nei ao, e au mai teie nei ao i to ˈna iho: no te mea râ e ere outou i to teie nei ao, o vau i maiti ia outou no roto i teie nei ao, e riri mai ai teie nei ao ia outou.” (Ioane 15:19) Teie ta Iesu i parau ia Pilato, tia no te hau poritita o to ˈna tau: “E ere i to teie nei ao to ˈu basileia.”—Ioane 18:36.

No te amo i ta ratou hopoia e poro “e tae noa ˈtu i te hopea o te fenua ra,” ua tia i te mau Kerisetiano ia ara ia ore ratou e fifihia i te mau ohipa a teie nei ao. (Ohipa 1:8) Mai ia Iesu, eita te mau Kerisetiano matamua e rave i te mau ohipa poritita. (Ioane 6:15) Ua ite-maitai-hia e aita te mau  Kerisetiano haapao maitai i rave i te mau toroa poritita aore ra tiaraa faatere. Ua taui te reira i te pae hopea.

“No teie nei ao”

Tau taime i muri aˈe i te poheraa o te aposetolo hopea, ua opua te mau aratai haapaoraa i te taui i to ratou mau manaˈo no nia i to ratou taairaa e te ao. Ua haamata ratou i te opua i te hoê “basileia” i roto i te ao e no te ao atoa. E noaa mai te haapiiraa ia hiˈo tatou nafea to te haapaoraa piri-roa-raa ˈtu i te poritita i roto i te Hau emepera no Byzance—te Hau emepera Roma Hitia o te râ, e to ˈna oire pu o Byzance (Istanbul i teie mahana).

I roto i te hoê ao ua matauhia e e tuhaa rahi ta te haapaoraa, e mana rahi to te Ekalesia e to ˈna pu i Byzance. I te hoê taime, ua parau te taata tuatapapa a te Ekalesia ra o Panayotis Christou e: “Ua manaˈo to Byzance e to ratou hau emepera i te fenua nei, e hohoˈa ïa o te Basileia o te Atua.” Aita râ te mana emepera i farii noa i tera manaˈo. Ei faahopearaa, ua tupu te mau umeumeraa i te tahi taime i rotopu i te Ekalesia e te Hau. Te na ô ra The Oxford Dictionary of Byzantium e: “Ua rau te huru o te mau epikopo no Constantinople [aore ra Byzance], te vai ra te auraro ma te mǎtaˈu haere noa i te hoê taata faatere puai . . . , te haa-amui-raa faufaa e te emepera . . . , e te patoiraa mǎtaˈu ore i te hinaaro o te emepera.”

Ua riro mai te patereareha no Constantinople, te upoo o te Ekalesia Hitia o te râ, ei taata mana rahi. Na ˈna i faakorona i te emepera, e no reira e tiaihia ˈi i  te emepera ia riro ei paruru taiva ore i te Ekalesia Orthodoxe. E taata taoˈa rahi roa atoa te patereareha, i te mea e na ˈna e hiˈopoa i te mau faufaa rahi roa a te ekalesia. No ǒ mai to ˈna mana rahi i to ˈna mana faatere i nia i te mau nahoa monahi e to ˈna mana i nia i te mau taata raita.

E pinepine, e nehenehe ta te patereareha e aa ˈtu i te emepera. E nehenehe ta ˈna e tiavaru i te taata—ma te faahepo i to ˈna hinaaro na nia i te iˈoa o te Atua—aore ra e faaohipa i te tahi atu mau ravea e tatarahia ˈi te mau emepera i to ratou tiaraa.

A iti mǎrû ai te faatereraa tivira i rapaeau i te oire pu, e pinepine te mau epikopo i te riro ei mau taata mana roa ˈˈe i roto i to ratou mau oire, mai te mau tavana o te mau mataeinaa, ta ratou e maiti. E haapao te mau epikopo i te mau ohipa haavaraa e te mau ohipa i roto i te ao i te mau taime atoa e tuhaa atoa ta te ekalesia aore ra aita i te tahi taime. Tau ahuru tausani hoi perepitero e monahi e faaterehia ra e ta ratou iho mau epikopo.

 Poritita e te simonie

Mai tei faahitihia aˈenei, mea piri roa te tiaraa orometua e te poritita. Hau atu â, ua hinaarohia te hoê tino moni rahi no te mea e mea rahi roa te mau ekalesiatiko e no ta ratou mau ohipa faaroo. E oraraa fanaˈo to te rahiraa o te mau ekalesiatiko tiaraa teitei roa. A noaa mai ai i te ekalesia te mana e te faufaa, ua morohi te veve e te moˈaraa o te mau aposetolo. Ua peta te tahi mau perepitero e mau epikopo ia nominohia ratou. Mea matauhia te simonie i roto i te mau tiaraa teitei roa ˈˈe o te feia faatere i te ekalesia. E aa te mau ekalesiatiko ratou ratou iho, turuhia e te mau taata taoˈa rahi, no te titau i te mau tiaraa ekalesiatiko i mua i te emepera.

Te mau petaraa, e ravea atoa tera no te ohipa i nia i te mau aratai haapaoraa paari aˈe. I to te emepera vahine Zoé (area matahiti 978-1050 T.T.) raveraa e ia taparahi-pohe-hia ta ˈna tane o Romain III no to ˈna hinaaro e faaipoipo i to ˈna hoa o Michel IV o te riro mai ei emepera, ua titau oioi oia i te patereareha o Alexis i te aorai. I reira to te patereareha faarooraa e ua pohe o Romain e te tiaihia ra ia ˈna ia faatupu i te oroa faaipoiporaa. I te mea e te faatupu ra te ekalesia i te Faraire Moˈa i taua po ra, ua fifihia ïa o Alexis. Teie râ, ua farii oia i te mau ô horoa noa a te vahine emepera e ua faatia ˈtura i to ˈna hinaaro.

Auraroraa i te emepera

I te tahi taime i roto i te tuatapaparaa o te Hau emepera no Byzance, e faaohipa te emepera i to ˈna tiaraa mana e faatoroa i te taime e maitihia ˈi te patereareha no Constantinople. I taua area tau ra, aita hoê aˈe e nehenehe e riro ei patereareha aore ra e tapea maoro roa i tera tiaraa ia ore anaˈe te emepera e hinaaro.

No te emepera Andronic II (1260-1332), mea titauhia ia taui i te mau patereareha e iva taime. I te rahiraa o te mau taime, e faatoroahia te mau tane o te fati haere noa. Ia au i te buka The Byzantines, ua papai roa te hoê patereareha i te hoê parau tǎpǔ na te emepera “e e rave oia i te mau mea atoa ta ˈna e ani, noa ˈtu e e ofati te reira i te ture, e eita oia e rave i te tahi mea e riri ai oia.” E piti taime to te mau emepera tamataraa i te faahepo i to ratou hinaaro i nia i te ekalesia na roto i te faataaraa i te hoê tamaiti o te fetii hui arii ei patereareha. Ua tuu te emepera Romain I i ta ˈna tamaiti o Théophylacte, 16 noa matahiti, i nia i te tiaraa patereareha.

Ia ore te hoê patereareha e auraro ia ˈna, e nehenehe ta te emepera e faahepo ia ˈna ia vaiiho i to ˈna tiaraa aore ra e faaue i te hoê apooraa ia tatara i te patereareha i to ˈna tiaraa. Te na ô ra te buka Byzantium e: “I roto i te tuatapaparaa o Byzance, te rahi noa ˈtura te tuhaa a te feia mana toroa e te mana o te emepera, e rave i roto i te maitiraa i te mau epikopo.”

Paturuhia mai e te patereareha, e peretiteni atoa te emepera i te mau apooraa ekalesiatiko. E aratai oia i te mau aparauraa, e hamani i te mau irava faaroo, e tauaparau e te mau epikopo e te mau hairesi, e na ˈna te parau hopea—aita anaˈe, o te pohe ïa. E haapapu e e faaohipa atoa te emepera i te mau ture rii o tei fariihia i roto i te apooraa. Te feia e patoi ia ˈna, e pari te emepera ia ratou i te faainoraa i te arii e i te enemiraa i te faaroo e i te Atua. “Eita e tia ia rave i te tahi mea i roto i te Ekalesia o te patoi i te hinaaro o te emepera e ta ˈna mau faaueraa,” ta te hoê patereareha no te senekele ono ïa  i parau. E pinepine, eita te mau epikopo i roto i te tiripuna—e mau tane ite i te peu, e fati haere noa, e hema haere noa i te mau ohipa farii maitai e te mau faaauraa patatoa—e patoi atu mai to ratou taata faatere.

Ei hiˈoraa, i to te patereareha Ignace (area matahiti 799-878 T.T.) patoiraa e ia rave te faatere hau rahi o Bardas i ta ˈna fariiraa Euhari, ua pahono atu te faatere hau. Ua pari Bardas ia Ignace i te raveraa i tei parauhia e e opuaraa e e taivaraa. Ua haruhia te patereareha e ua tiavaruhia ˈtura. No te mono ia ˈna, ua rave te faatere hau e ia maitihia o Photius, te hoê taata raita o te haere i mua i roto i te tiaraa ekalesiatiko, e tae roa ˈtu ai i nia i te tiaraa patereareha, i roto e ono mahana. Ua ineine anei o Photius no taua tiaraa pae varua ra? Ua faataahia oia mai te hoê taata “nounou roa i te toroa, te faaahaaha roa, e aita e faaauraa to to ˈna ite i te poritita.”

Haapiiraa i roto i te tuhaa poritita

E pinepine, e tapoˈi te Haapaoraa Orthodoxe e te hairesi i te patoiraa poritita, e o te mau tumu poritita eiaha te hinaaroraa e faaô mai i te mau haapiiraa apî tei mana i nia e rave rahi emepera. I te rahiraa o te taime, e tiaraa to te emepera e haamau ma te faahepo i te mau haapiiraa e e titau i te ekalesia ia auraro i to ˈna hinaaro.

Ei hiˈoraa, ua tamata puai te emepera Héraclius (575-641 T.T.) i te arai i te hoê amahamaharaa no nia i te huru o te Mesia o te haafifi ra i ta ˈna hau emepera haaparuparu e te paari ore. No te faaau atu, e faaô mai oia i te hoê haapiiraa apî parauhia Monothélisme. a E ia mâmâ mai te mau mataeinaa apatoa o ta ˈna hau emepera, e maiti o Héraclius i te hoê patereareha apî no Alesanederia, o Kuro no Phasis, o tei farii i te haapiiraa paturuhia e te emepera. Aita noa te emepera i faatoroa ia Kuro ei patereareha, ei tavana atoa râ no Aiphiti, o te mana i nia i te feia faatere no reira. Na roto i te tahi hamani-ino-raa iti, ua noaa mai ia Kuro te parau faatia a te rahiraa o te ekalesia Aiphiti.

Hoê ootiraa mauiui

Nafea hoi teie mau tupuraa e faaite ai i te parau e te manaˈo o te pure a Iesu, i reira to ˈna parauraa e ‘e ere ta ˈna mau pǐpǐ i to teie nei ao’?—Ioane 17:14-16.

I te anotau Byzantin e i muri aˈe, ua ooti mai te mau aratai tei parau e e Kerisetiano ratou i te mau faahopearaa mauiui no to ratou raveraa i te mau ohipa poritita e ta te nuu o te ao. Eaha ta teie faahohonuraa poto noa o te tuatapaparaa e faaite maira? Ua fanaˈo anei te mau aratai o te Ekalesia no Byzance i te farii maitai a te Atua e a Iesu Mesia?—Iakobo 4:4.

Aita te Kerisetianoraa mau i paturuhia e tera mau aratai haapaoraa nounou toroa e to ratou mau hoa poritita. Te faahuru ê ra teie anoiraa moˈa ore o te haapaoraa e te poritita i te haapaoraa viivii ore haapiihia e Iesu. Ia huti mai ïa tatou i te haapiiraa na roto i te tuatapaparaa e ia riro noa tatou ei mau taata ‘e ere i to teie nei ao.’

[Nota i raro i te api]

[Tumu parau tarenihia/Hohoˈa i te api 10]

“MAI TE HOÊ ATUA O TE HAHAERE MǍRÛ RA I NIA I TE RAˈI”

Te faaite ra te mau tupuraa no nia i te patereareha Michel Cérulaire (area matahiti 1000-1059) i te tuhaa ta te upoo o te ekalesia e nehenehe e rave i roto i te mau ohipa a te Hau e te mau nounou toroa. I muri aˈe i to ˈna faatoroaraahia ei patereareha, ua titau o Cérulaire i te toroa nia ˈˈe. Ua faataahia oia mai te hoê taata ahaaha, teoteo, e te fati ore—“e au ra e e ohipa oia mai te hoê atua o te hahaere mǎrû ra i nia i te raˈi.”

No to ˈna nounou i te toroa, ua faataa ê mai Cérulaire ia ˈna i te pâpa i Roma i te matahiti 1054, e ua faahepo oia i te emepera ia farii i te reira. No te mauruuru i teie upootiaraa, ua faanaho o Cérulaire e ia tuuhia o Michel VI i nia i te terono e ua tauturu ia ˈna ia haapapu i to ˈna mana. Hoê matahiti i muri aˈe, ua faahepo o Cérulaire i taua emepera ra ia vaiiho i to ˈna parahiraa e ua faaterono atura oia ia Isaac Comnène (area matahiti 1005-1061).

Ua rahi te peapea i rotopu i te mau patereareha e te hau emepera. Ua haamǎtaˈu, ua titau, e ua faaohipa o Cérulaire i te haavîraa uˈana—ma te paturuhia mai e te huiraatira. Ua tapao te hoê taata tuatapapa no taua tau ra e: “Ua faaite atea oia i te toparaa o te Emepera ma te parau au ore e te ino, ‘E faateitei au ia oe, e maamaa; tera râ, e haamou vau ia oe.’” Teie râ, ua rave o Isaac Comnène e ia haruhia oia, ia tapeahia, e ia hopoi-tîtî-hia i Imroz.

Te faaite ra tera mau hiˈoraa i te mau fifi rahi ta te patereareha no Constantinople e nehenehe e faatupu e to ˈna mǎtaˈu ore e aa ˈtu i te emepera. E pinepine, o tera mau huru taata ta te emepera e faaruru, e mau taata poritita aravihi, o te ore e mǎtaˈu i te aa ˈtu i te emepera e te nuu atoa.

[Hohoˈa fenua/Hohoˈa i te api 9]

(Hiˈo i te papai)

Aanoraa rahi roa o te Hau emepera no Byzance

Ravenne

Roma

MAKEDONIA

Constantinople

Mer Noire

Nicée

Ephesia

Anetiohia

Ierusalema

Alesanederia

Mediteranea

[Faaiteraa i te tumu]

Hohoˈa fenua: Mountain High Maps® Copyright © 1997 Digital Wisdom, Inc.

[Hohoˈa i te mau api 10, 11]

Comnène

Romain III (i te pae aui)

Michel IV

Emepera vahine Zoé

Romain I (i te pae aui)

[Faaiteraa i te tumu]

Comnène, Romain III, e Michel IV: Courtesy Classical Numismatic Group, Inc.; emepera vahine Zoé: Hagia Sophia; Romain I: Photo courtesy Harlan J. Berk, Ltd.

[Hohoˈa i te api 12]

Photius

[Hohoˈa i te api 12]

Héraclius e ta ˈna tamaiti

[Faaiteraa i te tumu]

Héraclius e ta ˈna tamaiti: Photo courtesy Harlan J. Berk, Ltd.; mau hohoˈa atoa, mau api 8-12: From the book L’Art Byzantin III Ravenne et Pompose