“Ua puai atu â to tatou here”

I TE Mahana pae 31 no Mati 2000, ua tutuha te mouˈa Usu i Hokkaido, i Tapone i te auahi, i muri aˈe i te taotoraa e 23 matahiti i te maoro. Tau tausani taata no reira tei tia ia faarue i te tuhaa fenua atâta. Mea rahi o tei ere i to ratou fare e ta ratou ohipa, te mea oaoa râ, aita hoê aˈe o ratou i pohe. I rotopu i te feia i horo ê, te vai ra e 46 Ite no Iehova, aita râ ratou i vaiiho-noa-hia mai tera aita e tauturu.

I te mahana iho o te tutuharaa auahi, ma te turu a te hoê tiaau ratere Kerisetiano e tavini ra i taua tuhaa fenua ra, ua faanahohia te tauturu. Aita i maoro, ua tae mai te mau taihaa tauturu no ǒ mai i te mau amuiraa tapiri. I raro aˈe i te aratairaa a te amaa no Tapone, ua faanaho-oioi-hia te hoê tomite tauturu, e ua horoa te mau Ite no Iehova no Tapone taatoa i te mau ô no te afata faufaa tauturu. No te turu i te mau ohipa pae varua, ua tonohia te tahi mau tavini taime taatoa a te mau Ite no Iehova i te mau amuiraa i fifi-roa ˈˈe-hia, e e pinepine, ua tere haere te tiaau haaati na te tuhaa fenua no te horoa i te turu i te pae aau e i te pae varua.

I te tuhaa fenua i fifihia, ua tamau noa te mau Ite i te faatupu i ta ratou mau putuputuraa Kerisetiano i taua tau fifi ra na roto i te faaohiparaa i te fare o te taata i te hoê vahi maitai aˈe. I te faaoreraahia te faaueraa e faarue i te tuhaa fenua to reira te Piha a te Basileia, ua hoˈi atu te mau taeae e ua ite atu ratou e ua hipa, ua afâfâ, e ua ino roa te piha. Aita i atea roa i te Piha a te Basileia, te tutuha noa râ te apoo apî i te au auahi meumeu. Ua uiui te mau Ite e, ‘Mea maitai anei ia tamau noa i te faatupu i te mau putuputuraa i ǒ nei? E nehenehe anei te Piha a te Basileia e tataîhia?’

Ua faaotihia ˈtura e patu i te hoê Piha a te Basileia apî i te hoê vahi tapiri maitai aˈe. Ua pûpû atu te Tomite paturaa no te fenua i te tauturu hinaarohia. Ua faaohipahia te moni ta te mau Ite no te fenua taatoa i horoa noa, no teie paturaa. Ua noaa oioi mai te fenua, e maoti te turu a te mau hanere rima tauturu, ua oti mai te hoê Piha a te Basileia apî i roto i te hoê area taime poto. I te Tapati 23 no Tiurai 2000, e 75 taata tei tae mai i te putuputuraa matamua i tupu i roto i teie Piha a te Basileia i patu-apî-hia. No te oaoa, ua tahe te roimata o te feia e rave rahi i tae mai. I te avariraahia te Piha a te Basileia i te avaˈe Atopa no taua noâ matahiti ra, ua parau roa te hoê o te mau matahiapo o te amuiraa no reira e: “Ua faatupu te tutuharaa auahi i te ati e te mauiui. Teie râ, ua faariro teie paturaa i to tatou mǎtaˈu ei oaoa. Ua puai atu â to tatou here ia Iehova e i to tatou mau taeae Kerisetiano here!”

[Faaiteraa i te fatu o te hohoˈa i te api 19]

Tutuharaa auahi o te mouˈa Usu: AP Photo/Koji Sasahara