E taime to te faaite i te hoê parau moe

E nehenehe te tapearaa vetahi mau parau moe e faataa i te taa-ê-raa i rotopu i te hau e te mârôraa. E taime anei râ to te faaite i te hoê parau moe? A tapao na eaha ta te peropheta Amosa e parau ra no nia i to ˈna Atua: “Aita a . . . Iehova e peu i rave, maori râ ia faaite i ta ˈna parau i moe i tana ra mau tavini i te mau peropheta.” (Amosa 3:7) Na roto i teie mau parau, e nehenehe tatou e haapii mai i te tahi mea no nia i te tapearaa i te parau moe. E nehenehe Iehova e tapea i te tahi mau parau moe no te hoê taime e i te pae hopea, e faaite atu ai i te reira i te tahi mau taata. Nafea tatou e pee ai ia Iehova i roto i taua tuhaa ra?

I te tahi mau taime, te manaˈo ra te mau tiai mamoe faatoroahia i roto i te amuiraa Kerisetiano e mea maitai ia tapea i te tahi parau ite-ore-hia. (Ohipa 20:28) Ei hiˈoraa, no te maitai o te amuiraa, e nehenehe ratou e faaoti e tapea i te mau parau rii no nia i te tahi mau faanahoraa aore ra mau tauiraa hopoia i roto i te amuiraa ma te ore e faaite e tae roa ˈtu ai i te hoê taime taa ê maitai.

I roto i te hoê tupuraa mai teie râ, mea faufaa ia haamaramarama i te feia o ratou atoa to roto, i teihea taime e mea nafea e faaitehia ˈi te parau mai te peu e e na reirahia. E tauturu te iteraa afea e faaitehia ˈi te hoê parau i mua i te taata ia ratou ia tapea i te parau ite-ore-hia.—Maseli 25:9.