Hoê haapiiraa na roto i te tuatapaparaa Roma

“I TAPUTO na vau i te mau taehae i Ephesia ra, i te peu a te taata nei.” Ia au i teie mau parau, i papaihia i roto i te Korinetia 1, 15:32, te manaˈo ra te tahi pae e ua faautuahia te aposetolo Paulo e taputô i nia i te hoê tahua taputôraa Roma. Noa ˈtu e o te reira iho â aore ra eita, mea matauhia te mau taputôraa e tae atu i te pohe i nia i te mau tahua taputôraa i taua tau ra. Eaha ta te tuatapaparaa e faaite maira no nia i te tahua taputôraa e te mau ohipa e tupu i reira?

Ei Kerisetiano, e hinaaro tatou e haapii i to tatou manaˈo haava ia au i to Iehova manaˈo, e nehenehe hoi te reira e tauturu mai ia rave i te mau faaotiraa no nia i te faaanaanataeraa manaˈo no teie tau ei hiˈoraa. A hiˈo na eaha to te Atua manaˈo i te haavîraa uˈana i roto i teie mau parau: “Eiaha oe e feii i te taata hamani ino mai, eiaha e haere na ta ˈna ra mau eˈa.” (Maseli 3:31) Ua aratai teie aˈoraa i te mau Kerisetiano matamua a au roa ˈi te taata e rave rahi e haaati ra ia ratou i te mau taputôraa Roma. A hiˈopoa ˈi  tatou eaha tei tupu i taua mau taputôraa ra, e hiˈo tatou eaha te haapiiraa maramarama no te mau Kerisetiano i teie tau.

Te taputô ra e piti nau taata, e mauhaa ta raua, i nia i te hoê tahua taputôraa Roma. I te tairiraa matamua o te ˈoˈe i nia i te paruru, e tutuô te nahoa mai te maamaa ra no te faaitoito i ta ratou taata taputô. E taputôraa hoata ore tera. Eita e maoro, e pepe hoê e eita ta ˈna e nehenehe faahou, e tuu oia i to ˈna rima e to ˈna turi i raro no te faaite e ua pau oia e e ani oia ia arohahia oia. E puai atu â te tutuôraa. E tuô te tahi pae no te aroha, e te tahi atu no te pohe. Tei nia te mata atoa i te emepera. Ia au i te hinaaro o te nahoa, e nehenehe ta ˈna e tuu i te taata taputô i pau aore ra e faaue e haapohe ia ˈna ma te hoê aparaa rima.

Ua maamaahia to Roma i te mau taputôraa. E maere paha outou ia ite outou e i te omuaraa, e tupu taua mau taputôraa ra i te mau hunaraa o te tahi mau taata rahi. Te manaˈohia ra e no ǒ mai tera mau taputôraa i te mau tusia taata i rotopu i te mau Osques aore ra te mau Samnites o te fenua e parauhia i teie mahana o Italia no ropu. E pûpûhia te mau tusia no te tamǎrû i te varua o te feia pohe. E parauhia tera taputôraa te hoê munus, aore ra “ô” (otini, munera). Ua tupu te mau hautiraa matamua i tapaohia i Roma i te matahiti 264 H.T.T. i reira e toru taata apipiti i te taputôraa i roto i te hoê matete hooraa puaatoro. I te hunaraa o Lépide, e 22 taputôraa tei tupu. I te hunaraa o Publius Licinius, e 60 taata apipiti tei taputô. I te matahiti 65 H.T.T., ua tono o Jules César e 320 taata taputô apipiti i nia i te tahua taputôraa.

“E mau ohipa poritita te mau hunaraa o te mau taata rahi,” o ta te taata tuatapapa ra o Keith Hopkins ïa e parau ra, “e e auraa poritita to te mau hautiraa i te hunaraa . . . no te mea e mea matauhia te reira e te mau tino huiraatira maiti. Oia mau, te tumu i rahi noa ˈi te hanahana o te mau taputôraa, no te mau tataˈuraa poritita ïa i rotopu i te feia rahi nounou toroa.” I raro aˈe i te faatereraa a Auguste (matahiti 27 H.T.T. e tae atu i te matahiti 14 T.T.), ua riro mai te mau munera ei mau ô e rave rahi—no te faaanaanatae i te nahoa—ta te mau ofitie taoˈa rahi na te hau e horoa no te paturu i to ratou toroa poritita.

Feia taputô e faaineineraa

E ui paha outou e, ‘O vai ma te feia taputô?’ E mau tîtî ïa, e mau taata ohipa ino i faautuahia i te pohe, e mau taata i haruhia i te tamaˈi, aore ra e mau taata tiamâ mea au na ratou te mau mea arearea aore ra o te tiaturi ra e fanaˈo i te roo e te taoˈa rahi. E faaineinehia ratou paatoa i roto i te mau fare haapiiraa e au i te fare tapearaa. Te parau ra te buka Giochi e spettacoli (Hautiraa e taputôraa) e “e hiˈopoa-noa-hia” te feia taputô e faaineinehia ra “e te mau tiai e e tia ia ratou ia auraro i te aˈo etaeta, i te mau ture rii teiaha roa ˈˈe, e i te mau utua rahi iho â râ . . . E pinepine teie faanahoraa i te turai i te taata ia haapohe ia ratou iho, ia orure hau, e ia faahuehue.” I roto i te fare haapiiraa taputôraa rahi roa ˈˈe i Roma, te vai ra te mau piha e hoê aˈe tausani taata i roto. E tuhaa haapiiraa ta te taata taitahi. E taputô te tahi ma te haana tamaˈi, te paruru, e te ˈoˈe, e te tahi atu ma te upeˈa e te mahae e toru tara. Area te tahi atu râ, e faaineinehia no te taputô e te animara taehae i roto i te tahi atu tuhaa, te auauraa. Te faahiti ra anei Paulo i tera iho â ohipa?

E nehenehe te feia faanaho e imi i te tauturu a te mau ona o te tihepu e o te faaineine i te mau taurearea 17 aore ra 18 matahiti no te ohipa taputôraa. E imiraa hoona te tapihooraa i te taata. I roto i te hoê taputôraa taa ê ta Trajan i pûpû no te  haamanaˈo i te hoê upootiaraa a te nuu, te vai ra 10 000 taata taputô e 11 000 animara.

Hoê mahana i nia i te tahua taputôraa

E faataahia te mau poipoi i nia i te tahua taputôraa no te mau auauraa. E faahaerehia te mau huru animara taehae atoa i nia i te tahua taputôraa. Mea au iho â râ na te feia i tae mai ia taputô te hoê puaatoro oni e te hoê daba. E pinepine, e taamu-apipiti-hia nau animara o te taputô e pohe noa ˈtu hoê, ia oti, e tupaihia te animara i ora mai e te hoê taata auau. I roto i te tahi atu taputôraa matauhia, e liona ïa e te mimi taehae, aore ra e elefani e te daba. E faaite te feia auau i to ratou ite i te tupai i te mau animara no te tahi atu mau fenua o te hau emepera, aita e hiˈoraa i te haamâuˈaraa—te nemera, te rhinocéros, te puaa pape, te girafe, te hyène, te kamela, te luko, te puaa oviri, e te antilope.

Na roto i te tahi mau mea faanehenehe, eita e moehia te mau auauraa. E tuuhia te mau mato, te mau vai hopuna, e te mau tumu raau no te faahohoˈa i te uru raau. I nia i te tahi mau tahua taputôraa, e fa taue mai te mau animara, i tuuhia mai na roto i te mau piha utaraa e te mau uputa tarava na raro i te fenua. E faaanaanatae atu â te huru manaˈo-ore-hia o te animara i te taata, te mea râ o te faariro i te auauraa ei mea au roa, o te peu taehae ïa.

O te haapoheraa to muri iho i roto i te porotarama. E tutavahia i te rave i te reira ma te raveraa otahi. E faaitehia mai te mau hautiraa aai e e pohe iho â te feia hauti.

I te mau avatea, e taputô te mau pǔpǔ taata taputô, o tei haapii i te mau ravea rau, te tahi i te tahi ma ta ratou mauhaa. Te faaahuraa o te tahi pae o te feia e arato i te mau tino, mai to te atua ïa o te ao i raro i te fenua.

Faahopearaa i nia i te feia mataitai

Mea mâha ore te hinaaro o te nahoa i te taputôraa, no reira te feia taputô aau tae ore e faaitoitohia ˈi ma te hui e te auri tapao. E tuô ïa te nahoa e: “No te aha oia e faaû ai i te ˈoˈe ma te mǎtaˈu haere noa? No te aha oia e tairi ai ma te paruparu rahi? No te aha oia e ore ai e [hinaaro] e pohe? A hui ia ˈna ia haere oia e taputô! Ia tupaihia oia ei tahooraa, ma te ouma vai tahaa noa e te paruru-ore-hia i te tairiraa!” Ua papai te tia hau Roma ra o Sénèque e ua horoahia te hoê parau faaara i te hoê taime faafaaearaa: “Maa tâpûraa arapoa a tiai noa ˈi, te tahi atu â ïa faaanaanataeraa manaˈo!”

E ere i te mea maere ia faˈi o Sénèque e “mea ino atu â e mea aroha ore atu â” oia i to ˈna hoˈiraa i te fare. E tano ia feruri maite tatou i teie faˈiraa huna ore a taua taata mataitai ra. E riro atoa anei te feia mataitai i te tahi mau haa tuaro i teie tau ei “mea ino atu â e te aroha ore atu â”?

E parau paha te tahi pae tei hoˈi i ǒ ratou e mea fanaˈo ratou. I to te hoê taata mataitai faahitiraa i te tahi parau hauti no nia ia Domitien, ua ume  mai taua emepera ra ia ˈna mai nia mai i to ˈna parahiraa e ua huri atu ia ˈna i te mau urî ra. Ua faaue o Caligula e haru i te hoê pae nahoa e e huri atu ia ratou i te mau animara ra, no te mea aita e taata ohipa ino e haapohe. E i te oreraa te mau matini teata e tere mai ta ˈna i hinaaro, ua faaue o Kalaudio i te feia haapao i te mau matini e taputô i nia i te tahua taputôraa.

Ua tupu atoa te ati e te faahuehueraa no te maamaa o te feia mataitai. Ua hiˈa te hoê vahi apooraa rahi i te pae apatoerau noa o Roma, e ua parauhia e e tau tausani taata tei pohe. Ua tupu te hoê faahuehueraa i roto i te hoê taputôraa i Pompéi i te matahiti 59 T.T. Te parau ra o Tacite e ua haamata te peapea i rotopu i te feia tumu e te feia no te hoê oire tapiri na roto i te parau ino, te taoraraa ofai, e ua faaohipa roa ˈtura ratou i te ˈoˈe. Tau taata tei mutu haere aore ra tei pepe, e mea rahi tei pohe.

Hoê haapiiraa maramarama

Ua haamanaˈo mai te hoê faaiteiteraa apî (Sangue e arena, “Toto e one”) i roto i te Colisée i Roma i te tahi mau tupuraa no teie tau o te tuea i te munera. Te tahi tuhaa anaanatae, ua patahia te mau hohoˈa video no nia i te taputôraa puaatoro, te motoraa rahi, te mau ati pereoo e te mau ati moto riaria roa, te taputôraa taehae a te mau maona i roto i te mau hautiraa, e te taputôraa faahuehue a te feia mataitai. Ua hope te faaiteiteraa ma te hoê hohoˈa na nia mai o te Colisée. I to outou manaˈo, eaha te faaotiraa a te feia mataitai? Ehia o te huti mai i te haapiiraa?

Mea matauhia te taputôraa urî, te faatitoraa moa, te taputôraa puaatoro, e te mau haa tuaro uˈana i te tahi mau fenua i teie tau. I roto i te mau faahororaa pereoo, e faaû te tahi pae i te pohe no te faahoruhoru i te mau nahoa rahi. E a feruri na i te mau hohoˈa teata e patahia i te mau mahana atoa. Ia au i te mau maimiraa i te hoê fenua tooa o te râ, e ite te tamarii o te mataitai i te afata teata i te faito au noa, 10 000 taparahiraa taata e 100 000 hamani-ino-raa ia naeahia to ˈna 10 matahiti.

“Aita” te mau mea arearea o te mau hautiraa “e tuati ra i te haapaoraa mau e i te auraroraa mau i te Atua mau,” o ta te taata papai no te senekele toru ra o Tertullien ïa i parau. No ˈna, te paturu ra te feia mataitai i te feia e haapohe ra i te taata. Eaha ïa i teie tau? E ui paha te hoê e, ‘Mea arearea anei na ˈu te mau hohoˈa no nia i te toto, te pohe, aore ra te haavîraa uˈana i roto i te afata teata aore ra i nia i te Internet?’ Mea maitai ia haamanaˈo i ta te Salamo 11:5 e parau ra: “Te tamata maira Iehova i te feia parau-tia, area te taiata e te rave parau ino ra, ua riri roa tana aau ia ˈna.”

[Tumu parau tarenihia i te api 28]

Mau taputôraa no te “tamǎrû i te feia pohe”

No nia i te tumu o te taputôraa, teie ta te taata papai no te senekele toru ra o Tertullien e parau ra: “Te manaˈo ra te feia no tahito ra e na roto i teie huru ohipa, te hamani maitai ra ratou i te feia pohe, i muri aˈe i te faaau-noa-raa i te reira ma te hoê huru maitai atu â o te peu taehae. I tahito ra i te mau hunaraa, no te tamǎrû i te nephe o te feia pohe i te toto taata, ua matau ratou i te pûpû i te mau tîtî aore ra mau tavini faahiahia ore ta ratou i hoo mai, ei tusia. Ia oti, e faariro ratou i teie peu ei mea arearea no te huna i to ratou paieti ore. No reira, ia oti te feia i te faaineinehia i te faaohipa i te mauhaa e ia aravihi maitai ratou—e haapiihia hoi ratou ia pohe—e haapohehia ratou i te mahana hunaraa i faataahia i te mau menema. E ite ratou i te tamahanahanaraa i mua i te pohe i roto i te haapoheraa. No reira mai te munus. I muri aˈe, ua haamaitai ratou i te peu etaeta; mai te peu e eita te mau animara oviri e hahae i te tino o te taata, e ere ïa te mahana oroa i te mea arearea roa. E hiˈohia te mea e pûpûhia no te tamǎrû i te feia pohe mai te hoê oroa hunaraa.”

[Hohoˈa i te api 27]

Taupoo e paruru ivifara tahito a te feia taputô

[Hohoˈa i te api 29]

Eita te mau Kerisetiano no tahito ra e farii i te mau faaanaanataeraa manaˈo haavî uˈana. E o outou?

[Faaiteraa i te tumu]

Motoraa: Dave Kingdon/Index Stock Photography; ati pereoo: AP Photo/Martin Seppala

[Faaiteraa i te fatu o te hohoˈa i te api 26]

Phoenix Art Museum, Arizona/Bridgeman Art Library