“E haere mai outou ia ˈu nei, . . . e na ˈu outou e tamahanahana”

“E hamani maitai tatou i te taata atoa”

O TE pororaa e te haapiiraa i te parau apî maitai o te Basileia o te Atua, te ohipa matamua a Iesu. (Mareko 1:14; Luka 8:1) No te hinaaro o te mau pǐpǐ a te Mesia e pee ia ˈna, te hiˈo ra ratou i te ohipa e haapii i te poroi bibilia no nia i te Basileia o te Atua ei ohipa faufaa roa ˈˈe na ratou i roto i te oraraa. (Luka 6:40) Mea mahanahana mau no te mau Ite no Iehova ia ite e nafea te poroi o te Basileia e hopoi mai ai i te tamahanahanaraa mure ore na te feia o te farii i te reira—mai ta te reira i hopoi na i to Iesu parahiraa mai i te fenua nei.—Mataio 11:28-30.

Taa ê atu i te haapiiraa i te Parau a te Atua, ua rave atoa Iesu i te tahi atu mau ohipa maitatai, mai te faaoraraa i te maˈi e te faataamaaraa i tei poia. (Mataio 14:14-21) Oia atoa, e apiti mai te mau Ite no Iehova i ta ratou ohipa haapiiraa i te Bibilia i te mau ohipa o te tauturu i te taata e hinaaro ra. Inaha, e faaineine te mau Papai i te mau Kerisetiano no “te mau ohipa maitaitai atoa ra” e e aˈo ia ratou ‘ia hamani maitai i te taata atoa.’—Timoteo 2, 3:16, 17; Galatia 6:10.

“Tei reira to tatou mau taeae”

I te avaˈe Tetepa 1999, ua tupu te hoê aueueraa fenua vavahi i Taïwan. Tau avaˈe i muri aˈe, ua faatupu te ûa puai e te mau heeraa fenua i te hoê o te mau ati natura ino roa ˈˈe i roto i te tuatapaparaa o te fenua Venezuela. Aita i maˈoro aˈenei, ua vavahi te mau vai pue rarahi i te fenua Mozambique. I roto i na hiˈoraa e toru atoa, ua tae oioi mai te mau Ite no Iehova i taua mau vahi ra ma te maa, te pape, te raau, te ahu, te mau fare ie, e te tauihaa tunuraa maa na te feia i roohia i te ati. Ua hamani te mau rima tauturu e mau aravihi to ratou i te pae rapaauraa i te mau fare utuuturaa maˈi rii no te rapaau i te mau taata i pepe e ua patu te mau rima tauturu e feia patu i te mau fare apî no te feia aita e fare faahou.

Ua putapû te mau taata i roohia i te fifi i te tauturu i te taime au ta ratou i fanaˈo. “Ia hepohepo roa matou, tei reira to tatou mau taeae,” o ta Malyori ïa e parau ra, o tei vavahi-roa-hia hoi te fare e te hoê heeraa fenua i Venezuela. I muri aˈe i to te mau rima tauturu paturaa i te hoê fare apî no to ˈna utuafare, ua na ô o Malyori e: “Eita roa ˈtu e navai ta matou haamauruururaa ia Iehova no te mau mea atoa ta ˈna i rave no matou!” E i te noaaraa mai i te mau taata i roohia i te  vai pue te taviri no to ratou fare i patu-apî-hia, ua himene aˈera te pǔpǔ taatoa i te himene o te Basileia ra “Iehova, to tatou haapûraa.” a

Mea tamahanahana atoa no te mau rima tauturu te tautururaa ˈtu i te feia i roto i te ati. “Ua oaoa vau i to ˈu faaohiparaahia no teie mau taeae i mauiui rahi roa,” o ta Marcelo ïa i parau, o tei haa ei tuati i roto i te hoê puhapa feia i horo ê i Mozambique. Te na ô ra o Huang, rima tauturu i Taïwan, e: “Mea oaoa roa ia apiti i roto i te opereraa i te maa e te mau fare ie no te mau taeae i roto i te ati. E haapuai te reira i te faaroo.”

Te hoê porotarama tauturu o te manuïa

Ua hopoi atoa te ohipa tauturu i te tamahanahanaraa pae varua i na auahuru tausani feia i mau i te fare tapearaa na te ao atoa nei. Nafea? I te mau matahiti aita i maoro aˈenei, ua horoa te mau Ite no Iehova i te mau papai bibilia na te mau taata e 30 000 e tiahapa e tapeahia ra i roto fatata e 4 000 fare tapearaa i te mau Hau Amui anaˈe. Hau atu â, ia nehenehe, e haere te mau Ite iho i te mau fare tapearaa no te haapii i te Bibilia e te feia i tapeahia e no te faatere i te mau putuputuraa Kerisetiano. Ua faufaahia anei te feia i tapeahia?

Te haamata ra te tahi mau taata i tapeahia e haapii nei i te Bibilia i te faaite i te mau haapiiraa tamahanahana o te Parau a te Atua i te mau hoa i tapeahia. Ei faahopearaa, i roto i te tahi mau fare tapearaa na te ao nei, te vai ra i teie nei te mau pǔpǔ o te feia i tapeahia o te haamori amui ra ia Iehova. “Mea tere maitai ta matou pǔpǔ,” ta te hoê ïa taata i tapeahia i faahiti i Oregon, i te mau Hau Amui, i te matahiti 2001. “E 7 taata poro i te Basileia ta matou e te faatere nei ratou e 38 haapiiraa bibilia. E hau atu i te 25 taata te haere mai i te oreroraa parau no te taatoaraa e te Haapiiraa o Te Pare Tiairaa, e ua tae mai e 39 taata i te Oroa haamanaˈoraa [i te poheraa o te Mesia]. E 3 â taata o te fatata i te bapetizohia!”

Mau haamaitairaa e mau oaoaraa

Ua tapao te feia toroa o te mau fare tapearaa e te manuïa ra teie porotarama ohipa tauturu. Te mea e haamaere roa ˈˈe i te feia toroa, o te maitairaa vai maoro ïa o teie porotarama tauturu. Te tapao ra te hoê taata papai e: “I roto i na ahuru matahiti a ravehia mai ai teie porotarama, aita hoê taata tei matara mai o tei bapetizohia i te fare tapearaa ei Ite no Iehova i hoˈi faahou i te fare tapearaa—ma te taa ê roa i na rahiraa e 50-60 % feia i tapea-faahou-hia no te tahi atu mau pǔpǔ.” No te maere o te mau numera i naeahia e te mau rima tauturu Ite, ua parau te hoê omonie o te fare tapearaa i Idaho i roto i te hoê rata i te pu rahi a te mau Ite no Iehova e: “Noa ˈtu e aita vau iho nei e farii ra i ta outou mau tiaturiraa, ua maere roa vau i ta outou faanahonahoraa.”

E oaoaraa atoa te tautururaa i te feia i roto i te fare tapearaa no te mau rima tauturu. I muri aˈe i to ˈna faatereraa i te hoê putuputuraa e te hoê pǔpǔ taata i tapeahia o tei himene i te hoê himene o te Basileia no te taime matamua, ua papai te hoê rima tauturu e: “Mea faaitoito ia hiˈo e 28 tane e apiti mai i roto i te mau himene arueraa ia Iehova. E ua himene ratou ma te reo puai! E fanaˈoraa taa ê mau ia tae mai i te hoê taime mai teie!” Te na ô ra te hoê rima tauturu o tei haere i te mau fare tapearaa i Arizona e: “E haamaitairaa mau ia apiti i roto i teie ohipa taa ê!”

Te farii maitai ra te mau rima tauturu Ite na te ao atoa nei i te manaˈo o Iesu o tei parau e: “E mea maitai i te horoa ˈtu i te rave mai.” (Ohipa 20:35) Te haapapu atoa ra ratou e mea mahanahana mau ia pee i te aˈoraa a te Bibilia e hamani maitai i te mau taata atoa.—Maseli 11:25.

[Nota i raro i te api]

[Hohoˈa i te api 8]

Venezuela

[Hohoˈa i te api 8]

Taïwan

[Hohoˈa i te api 8]

Mozambique