Eaha mau â te po auahi aore ra hade?

NOA ˈTU eaha te hohoˈa e puta mai i roto i to oe feruriraa no nia i te taˈo “hade,” te manaˈo ra te rahiraa o te taata e e vahi faautuaraa te hade no te hara. Teie ta te Bibilia e parau ra no nia i te hara e to ˈna faahopearaa: “No te taata hoê ra i ô mai ai te [hara] i te ao nei, e no te [hara] hoi te pohe; e ua taea-atoa-hia te taata atoa e te pohe i te mea ua hara paatoa.” (Roma 5:12; MN) Te na ô atoa ra te mau Papai e: “E utua te pohe no te hara.” (Roma 6:23) I te mea e o te pohe te utua no te hara, teie ïa te uiraa faufaa roa o te faataa i te auraa mau o te hade: Eaha te tupu i nia ia tatou ia pohe tatou?

E tamau anei te tahi huru ora i muri aˈe i te pohe? Eaha te hade, e teihea mau taata o te haere i reira? E tiaturiraa anei to te feia i roto i te hade? Te horoa ra te Bibilia i te mau pahonoraa mau e te mauruuru no nia i teie mau uiraa.

Te ora i muri aˈe i te pohe?

E ora ˈtu anei te tahi mea i roto ia tatou, mai te hoê nephe aore ra te hoê varua, ia pohe te tino? A hiˈo na e mea nafea to te taata matamua ra o Adamu haereraa mai i te ora. Te na ô ra te Bibilia e: “A hamani ai te Atua ra o Iehova i te taata i te repo fenua nei, ua haapuai ihora oia i te aho ora i roto i tana apoo ihu ra.” (Genese 2:7) Noa ˈtu e na te hutiraa aho e faaoraora ra ia ˈna, e ere noa te haapuairaa i “te aho ora” i roto i to ˈna apoo ihu i te puhi-noa-raa ˈtu i te mataˈi i roto i to ˈna mahaha. Te auraa atoa e ua tuu te Atua i roto i te tino ora ore o Adamu i te maa ora—“te puai ora,” e haa ra i roto i te mau mea ora atoa o te fenua. (Genese 6:17; 7:22; MN) Te faahiti ra te Bibilia i teie puai ora mai te “varua.” (Iakobo 2:26) E nehenehe taua varua ra e faaauhia i te uira e ohipa ra i roto i te hoê matini aore ra te hoê taihaa e o te faatere i te reira. Eita roa ˈtu te uira e haru mai i te hohoˈa o te taihaa ta ˈna e faatere ra, eita atoa ïa te puai ora e haru mai i te mau huru o te mea poietehia ta ˈna e faaoraora ra. Aita to ˈna e huru taata e aita e feruriraa.

Eaha te tupu i nia i te varua ia pohe te hoê taata? Te na ô ra te Salamo 146:4 e: “Te reva nei hoi to ˈna varua, te hoˈi nei oia i to ˈna ra repo; mou roa ˈtura ta ˈna i opua i taua mahana ra.” Ia pohe te hoê taata, eita to ˈna varua ihotaata ore e tamau i te ora i roto i te tahi atu ao ei mea varua i poietehia. E ‘hoˈi te varua i te Atua i horoa maira.’ (Koheleta 12:7) Te auraa ra e tei te Atua anaˈe te tiaturiraa o taua taata ra no te hoê oraraa a muri aˈe.

Ua tiaturi na philosopho Heleni no tahito ra  o Socrate e o Platon e e ora ˈtu te hoê nephe i roto i te hoê taata ia pohe oia e e ore roa te reira e pohe. Eaha ta te Bibilia e haapii maira no nia i te nephe? “Riro aˈera” o Adamu “ei nephe ora,” ia au i te Genese 2:7 (MN). Aita i horoahia te hoê nephe no ˈna; e nephe o ˈna—e taata taatoa. Te parau ra te mau Papai e e rave te hoê nephe i te ohipa, e amu i te maa, e eiâhia, e tarapape to ˈna aau, e te vai ra ˈtu â. (Levitiko 23:30; Deuteronomi 12:20; 24:7; Salamo 119:28) Oia, e nephe te taata iho. Ia pohe te hoê taata, e pohe taua nephe ra.—Ezekiela 18:4.

Eaha ïa te huru o te feia pohe? I to ˈna faahitiraa i te utua i nia ia Adamu, ua parau Iehova e: ‘E repo oe, e e hoˈi faahou atu â oe i te repo.’ (Genese 3:19) Teihea roa o Adamu hou te Atua a hamani ai ia ˈna i te repo e a horoa ˈtu ai i te ora? Aita noa ïa oia e vai ra! I to ˈna poheraa, ua hoˈi o Adamu i taua huru o te vai-ore-roa-raa ra. Te faataa-maitai-hia ra te huru o te feia pohe i roto i te Koheleta 9:5, 10, i reira tatou e taio ai e: ‘Aita a te feia i pohe ra e parau itea. . . . Aore e imiraa, aore hoi e ite, aore hoi e paari, i te apoo ta oe e haere na.’ Ia au i te Bibilia, e vai-ora-ore-raa te pohe. Aita e parau itea, aita e huru o te aau, aita e manaˈo to te feia pohe.

E haamauiuiraa hopea ore anei aore ra e menema matauhia?

I te mea e aita e parau itea a tei pohe, eita ïa e nehenehe e parau e e vahi auahi te hade i reira te feia iino e haamauiuihia ˈi i muri aˈe i te pohe. Eaha ïa te hade? E tauturu te hiˈopoaraa i tei tupu i nia ia Iesu i to ˈna poheraa, i te pahono i tera uiraa. Te faatia ra te taata papai bibilia ra o Luka e: “Eita [Iesu] e vaiihohia i hade [enfer, Ostervald], e eita to ˈna tino e vaiiho-noa-hia ia tahuti noa na.” a (Ohipa 2:31) Teihea roa te hade ta Iesu i haere atu? Ua papai te aposetolo Paulo e: “Ua tuu atu hoi au ia outou . . . e i pohe te Mesia i ta tatou nei hara, mai tei te parau i papaihia ra; e i tanuhia hoi oia, e tia faahou maira i te rui toru, mai tei te parau i papaihia ra.” (Korinetia 1, 15:3, 4) No reira, tei roto na Iesu i te hade, te menema, aita râ oia i vaiihohia i reira, no te mea ua faatiahia mai oia.

A rave atoa na i te hiˈoraa o te taata parau-tia ra o Ioba, o tei mauiui rahi na. No to ˈna hinaaro e ora ˈtu i to ˈna mauiui, ua taparuparu oia e: “Ahiri oe e faatapuni ia ˈu i hade [shéol] e; ahiri oe e huna ia ˈu, e ia ore to oe riri.” b (Ioba 14:13) Eita ïa e tano ia manaˈo e ua hinaaro Ioba e haere i te hoê vahi veavea roa ino no te paruru ia ˈna! No Ioba, e menema noa te “hade” i reira to ˈna mauiui e ore ai. No reira, te hade o te Bibilia, o te menema matauhia ïa o te huitaata i reira te feia maitatai e te feia iino atoa e haere ai.

Po auahi ura?

E taipe anei te po auahi no te haamouraa hope? No te faataa ê i te auahi e te hade, te na  ô ra te mau Papai e: “E hurihia ˈtura te apoo e hade i roto i te roto auahi.” E “roto” taipe teie e parauhia ra i ǒ nei, i te mea e eita te pohe e te hade, o te hurihia ˈtu i roto, e nehenehe e taninahia i te auahi. “O te piti teie [roto auahi] o te pohe.”—Apokalupo 20:14.

Hoê â auraa to te roto auahi e to “te auahi i gehena [auahi i hade, Bible en français courant]” ta Iesu i faahiti. (Mataio 5:22; Mareko 9:47, 48) E itehia te taˈo gehena 12 taime i roto i te mau Papai Heleni Kerisetiano, e te parauhia ra no nia i te peho no Hinoma, i rapaeau mai i te patu o Ierusalema. A vai mai ai Iesu i te fenua nei, ua faaohipahia teie peho ei faarueraa pehu, “i reira te mau tino pohe o te feia ohipa ino, e te mau ivi animara, e te tahi atu â mau pehu atoa e faaruehia ˈi.” (Smith’s Dictionary of the Bible) E tuuhia te gopheri ia ama noa te auahi no te tanina i te pehu. Ua faahiti o Iesu i taua peho ra ei taipe tano maitai no te haamouraa mure ore.

Mai te gehena, e taipe te roto auahi no te haamouraa mure ore. Te auraa e e ‘hurihia’ te pohe e te hade i roto, oia ïa e mou roa teie na mea ia tiamâ mai te huitaata i te hara e te utua o te pohe. E “tufaa” atoa ta te feia o tei rave i te hara ma te hinaaro mau e tei ore i tatarahapa, i roto i taua roto ra. (Apokalupo 21:8) E mou roa atoa ratou. I te tahi aˈe pae, e oraraa faahiahia no a muri aˈe to te feia i roto i te hade—te menema matauhia o te huitaata—ta te Atua e haamanaˈo ra.

Aita faahou e taata pohe i roto i te hade!

Te na ô ra te Apokalupo 20:13 e: “Ua tuu maira te miti i te feia i pohe i roto ia ˈna ra, e ua tuu maira te apoo e hade i te feia i pohe i roto ia raua ra.” Oia, aita faahou e taata pohe i roto i te hade o te Bibilia. Mai ta Iesu i fafau, ‘te fatata mai nei te hora e faaroo ai te feia atoa i roto i te [mau menema mehararaa] ra i to Iesu reo, e e haere mai i rapae.’ (Ioane 5:28, 29; MN) Noa ˈtu e aita faahou te reira e tupu nei, e faatiahia mai, aore ra e faahoˈihia mai, te mau mirioni feia pohe i roto i te mehara o te Atua ra o Iehova, i te ora i roto i te paradaiso e haamau-faahou-hia i nia i te fenua.—Luka 23:43; Ohipa 24:15.

I roto i te ao apî a te Atua, e ore roa te feia e faatiahia mai o te haapao i ta te Atua mau ture parau-tia e pohe faahou. (Isaia 25:8) Na Iehova “e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa.” Oia mau, ‘e mou te mau mea tahito ra.’ (Apokalupo 21:4) Auê ïa haamaitairaa e tiai maira i te feia i roto i te hade—“te mau menema mehararaa”! Oia mau, no teie haamaitairaa e tano ai ia titau atu â tatou i te ite no nia i te Atua ra o Iehova e ta ˈna Tamaiti, o Iesu Mesia.—Ioane 17:3.

[Nota i raro i te api]

[Hohoˈa i te api 5]

Ua pure Ioba ia paruruhia oia i roto i te hade

[Hohoˈa i te api 6]

Auahi i gehena—hoê taipe o te haamouraa mure ore

[Hohoˈa i te api 7]

‘E haere mai te feia i roto i te mau menema mehararaa i rapae’