A faaite i te here i roto i te utuafare

“A TANINA paˈi! A tanina!” O ta Tohru ïa i parau i ta ˈna vahine, o Yoko. a “E tanina iho â vau,” ta te vahine ïa i pahono atu e ua tutui atura i te hoê mati no te tanina i te hohoˈa o raua to nia iho. Ua parau iria maira oia e, “E tanina vau i te fare i te auahi!” Ua poara ˈtura Tohru i ta ˈna vahine, a ore atu ai te tatamaˈiraa ma te haavî uˈana.

E toru matahiti na mua ˈtu, ua haamata o Tohru raua Yoko i te ora amui ei feia faaipoipo oaoa. Eaha râ te fifi? Noa ˈtu e e taata au maitai o Tohru ia hiˈohia, ua manaˈo ta ˈna vahine e aita ta ˈna tane e here ra ia ˈna e mea varavara oia i te tâuˈa i te huru o to ˈna aau. E au ra e aita i tia ia ˈna ia pahono i te here o ta ˈna vahine. No te noaa ore i te faaoromai, ua tupu to Yoko inoino e te riri iti rahi. Ua faaû atura oia i te mau fifi mai te oreraa e varea i te taoto, te ahoaho, te oreraa e tamaa, te iria, te hepohepo, e tae noa ˈtu i te mǎtaˈu rahi tupu taue. Teie râ, e au ra e aita Tohru e tâuˈa ra i te fifi e vai ra i roto i to ˈna utuafare. E au ra e mai tera iho â te oraraa no ˈna.

“Te mau taime ati rahi faaruru atâ”

Mea pinepine tera mau fifi i te tupu i teie mahana. Ua tohu te aposetolo Paulo e e riro te taata ei mea “aroha ore” i to tatou tau. (Timoteo 2, 3:1-5) Mea piri roa te taˈo tumu Heleni tei hurihia i ǒ nei ei “aroha ore” e te taˈo e faataa ra i te here e itehia i rotopu i te mau melo utuafare. Aita iho â tera huru aroha i to tatou tau. Noa ˈtu e te vai ra, mea varavara paha te mau melo utuafare i te faaite i te here te tahi i te tahi.

Mea rahi te metua i teie mahana aita i ite e nafea ia faaite i te aroha e te here i ta ratou iho mau tamarii. Ua paari mai vetahi i roto i te hoê utuafare aroha ore e aita paha ratou i ite e mea oaoa aˈe e mea au aˈe te oraraa ahiri paˈi e faahotuhia e e faaitehia te here. E au ra e tera te huru tupuraa o Tohru. I to ˈna tamarii-rii-raa, e ohipa noa ta to ˈna papa e e hoˈi oia i te fare i te maororaa po. Mea varavara oia i te paraparau ia Tohru, e ia paraparau oia, mea tuhi ïa. E ohipa taime taatoa atoa ta te mama o Tohru e mea varavara oia i te faataa i te taime no ˈna. Na te afata teata e haapao ia ˈna. Aita e haapopouraa e aita e aparauraa i roto i te utuafare.

O te taˈere atoa paha te tumu. I te tahi mau fenua i Marite Latino, eiaha te hoê tane e haapao i te peu matauhia no te faaite i to ˈna here i ta ˈna vahine. I te mau fenua e rave rahi i te pae Hitia o te râ e i Afirika, e opani te tutuu ia faaite i te here na roto i te parau aore ra te ohipa. Mea fifi paha na te mau tane ia parau e “Mea here na ˈu ia oe” i ta ratou mau vahine aore ra mau tamarii. Noa ˈtu râ, e nehenehe tatou e huti mai i te haapiiraa na roto i te taairaa utuafare faufaa roa ˈˈe, o tei vai maoro.

 Te taairaa utuafare maitai roa

Te hohoˈa maitai roa ˈˈe no te utuafare, o te taairaa piri roa ïa i rotopu i te Atua ra o Iehova e ta ˈna Tamaiti fanau tahi. E faaite raua i te here te tahi i te tahi ma te tia roa. Ahia tausani matahiti i te maoro, ua fanaˈo te varua o tei riro i muri aˈe ei Iesu Mesia i te hoê taairaa oaoa e to ˈna Metua. Teie ta ˈna faataaraa i tera taairaa: “[Ua riro vau tei here-taa-ê-hia e ana] i te mau mahana atoa ra, i te oaoa-tamau-maite-raa i mua i tana aro.” (Maseli 8:30; MN) Ua papu roa i te Tamaiti te here o to ˈna Metua i nehenehe ai oia e parau ia vetahi ê e te here taa ê ra Iehova ia ˈna i te mau mahana atoa. Te oaoa tamau maite ra oia i mua i te aro o to ˈna Metua.

I nia atoa i te fenua, ua haapapu-faahou-hia i te taata ra o Iesu, te Tamaiti a te Atua, i te here rahi o to ˈna Metua. I muri aˈe i to Iesu bapetizoraahia, ua faaroo oia i te reo o to ˈna Metua: “Tau Tamaiti here teie, ua mauruuru roa vau ia ˈna.” (Mataio 3:17) Auê ïa faaiteraa faaitoito mau i te here i te omuaraa o ta Iesu ohipa faauehia i nia i te fenua e! Ua puta iho â paha to ˈna aau i to ˈna faarooraa i te parau farii maitai a to ˈna Metua a haamanaˈo roa ˈi oia i to ˈna oraraa i nia i te raˈi.

No reira, te horoa maira Iehova i te hiˈoraa maitai roa ˈˈe i roto i te faaiteraa i te here i to ˈna fetii i te ao taatoa ma te faito hope roa. Ia farii tatou ia Iesu Mesia, e fanaˈo atoa tatou i to Iehova here. (Ioane 16:27) Noa ˈtu e eita tatou e faaroo i te tahi parau no te raˈi mai, e ite tatou i to Iehova here i roto i te natura, te tusia taraehara o Iesu, e te tahi atu mau ravea. (Ioane 1, 4:9, 10) E faaroo atoa Iehova i ta tatou mau pure e e pahono mai na roto i te hoê ravea maitai roa ˈˈe no tatou. (Salamo 145:18; Isaia 48:17) A faatupu ai tatou i te hoê taairaa piri roa e o Iehova, e rahi atu â to tatou mauruuru no to ˈna haapaoraa ia tatou ma te here.

Ua haapii Iesu na roto i te hiˈoraa o to ˈna Metua e nafea ia faaite i te aumauiui, te faatura, te aau maitai, e te haapao-maite-raa ia vetahi ê. Ua faataa oia e: “Te mau mea atoa ta [te Metua] e rave ra, oia atoa ta te Tamaiti e rave. E here â hoi te Metua i te Tamaiti, e faaite mai â hoi ia ˈna i te mau mea atoa ta ˈna iho e rave ra.” (Ioane 5:19, 20) Area tatou, e nehenehe ïa e haapii i te faaite i te here na roto i te faahohonuraa i te hiˈoraa ta Iesu i vaiiho mai a vai ai oia i te fenua nei.—Philipi 1:8.

Te here i roto i te utuafare—e nafea?

I te mea e ‘e aroha te Atua’ e ua hamanihia tatou ‘ma to ˈna huru,’ e tia ïa ia tatou ia faahotu e ia faaite i te here. (Ioane 1, 4:8; Genese 1:26, 27) Teie râ, eita te reira e tupu taue noa mai. No te faaite i te here, mea titauhia na mua ia faahotu tatou i te here i to tatou apiti e mau tamarii. E hiˈo maite, e e tapao tatou i to ratou mau huru au maitai, noa ˈtu e e mea haihai i te omuaraa, e e feruriruri i tera mau manaˈo. ‘Aita e huru au aˈe i nia i ta ˈu tane [vahine aore ra tamarii],’ ta outou paha ïa e parau. Eita paha te feia mea faanahohia to ratou faaipoiporaa e here roa i to ratou apiti. Eita paha te tahi mau apiti e hinaaro i te tamarii. A hiˈo na râ i to Iehova manaˈo i ta ˈna vahine taipe, te nunaa Iseraela, i te senekele 10 H.T.T. I to ta ˈna peropheta Elia parauraa e aita faahou e taata e haamori ra ia Iehova i roto i na opu hoê ahuru o te nunaa Iseraela, ua hiˈopoa maite Iehova ia ratou e ua itea mai ia ˈna te tahi mau taata—e 7 000 ratou paatoa—tei faahotu i te mau huru maitatai i to ˈna aro. E nehenehe anei outou e pee ia Iehova na roto i te imiraa i te maitai i  roto i te mau melo o to outou utuafare?—Mau arii 1, 19:14-18.

Ia ite râ te tahi atu mau melo utuafare i to outou here, mea titauhia ia tutava maite outou i te faaite atu. I te mau taime atoa e ite ai outou i te tahi mea maitai, a faaite i to outou mauruuru na roto i te parau. I roto i ta ˈna faataaraa i te vahine maitai, te tapao ra te Parau a te Atua i te hoê huru taa ê anaanatae o to ˈna utuafare: “E tia ta ˈna mau tamarii ma te faaora ia ˈna; e tana tane atoa, ma te haamaitai ia ˈna.” (Maseli 31:28) A hiˈo na, ua faaite noa te mau melo utuafare i to ratou mauruuru te tahi i te tahi. Na roto i te haamaitairaa i ta ˈna vahine na roto i te parau, e horoa te metua tane i te hiˈoraa maitai i ta ˈna tamaiti, ma te faaitoito ia ˈna ia haapopou noa i to ˈna apiti ia faaipoipo noa ˈtu oia.

Mea maitai atoa ia haapopou te mau metua i ta ratou mau tamarii. E tauturu te reira i te haaputa i te faatura ia ˈna iho i roto i te aau o te mau tamarii. Inaha, e nafea hoi te hoê taata e ‘aroha ˈi i to ˈna taata-tupu, mai te aroha ia ˈna iho’ mai te peu e eita o ˈna e faatura ia ˈna iho? (Mataio 22:39) I te tahi aˈe pae, ia faaino noa te mau metua i ta ratou mau tamarii, ma te ore roa ˈtu e haapopou atu, e ere oioi ïa i te mau tamarii i te faatura ia ratou iho e e fifihia paha ratou i te faaite i te here ia vetahi ê.—Ephesia 4:31, 32.

E nehenehe e itea mai te tauturu

E mai te peu e aita outou i paari i roto i te hoê utuafare î i te here? E nehenehe ta outou e haapii i te faaite i te here. Te taahiraa avae matamua, o te iteraa ïa eaha te fifi e te fariiraa e mea hinaarohia ia haamaitai outou ia outou. E tauturu rahi mai te Parau a te Atua, te Bibilia, i roto i taua tuhaa ra. E nehenehe e faaau i te Bibilia i te hoê hiˈo. Ia hiˈopoa tatou ia tatou iho ia au i te mau haapiiraa bibilia e au i te hoê hiˈo, e ite tatou i te mau vahi paruparu o to tatou huru feruriraa. (Iakobo 1:23) Ia au i te mau haapiiraa bibilia, e nehenehe ta tatou e faatitiaifaro i te mau hinaaro tano ore. (Ephesia 4:20-24; Philipi 4:8, 9) Mea faufaa ia tamau tatou i te na reira, ia ore roa ˈtu hoi tatou “e rohirohi i te parau maitai.”—Galatia 6:9.

Mea fifi paha na te tahi pae ia faaite i te here no ta ratou i haapii aore ra no to ratou taˈere. Ia au râ i te tahi mau maimiraa apî, e nehenehe e faatitiaifaro i tera mau fifi. Te faataa ra o Daniel Goleman, te hoê tahuˈa i te pae feruriraa, e ‘e nehenehe e taui atoa i te mau peu tei aˈa-roa-hia i roto i te aau mai te tamarii-rii-raa mai â.’ E hau atu i te 1 900 matahiti aˈenei, ua faaite te Bibilia e maoti te tauturu a te varua o te Atua, e nehenehe e taui atoa i te mau hinaaro o te aau tei aˈa-roa-hia. Te aˈo maira te Bibilia e: ‘Ua haapae outou i te taata tahito e ta ˈna atoa ra mau parau; e ua faa-taata-apî.’—Kolosa 3:9, 10.

Ua itea mai anaˈe eaha te fifi, e nehenehe te utuafare e haapii i te Bibilia ma te haamanaˈo i to ratou mau hinaaro. Ei hiˈoraa, no te aha e ore ai e maimi eaha ta te Bibilia e parau ra no nia i te “here”? E itea mai ïa ia outou te hoê irava mai teie: “Ua ite outou i te faaoromai o Ioba ra, e ua ite hoi outou i ta te Fatu i rave i te hopea ˈˈe; e ua î te Fatu i te aroha, e te hamani maitai rahi.” (Iakobo 5:11) Ia oti, a faahohonu i te aamu bibilia o Ioba, ma te hiˈo maite mea nafea to Iehova faaiteraa i te aroha e te hamani maitai rahi i nia ia Ioba. Papu roa e e hinaaro outou e pee ia Iehova i roto i te faaiteraa i te aroha e te hamani maitai rahi i to outou utuafare.

 No te mea râ e mea tia ore tatou, ‘te hapa nei ïa tatou atoa i te mau mea atoa e rave rahi’ i roto i ta tatou parau. (Iakobo 3:2) I roto i te utuafare, eita paha tatou e faaohipa i to tatou vaha no te faaitoito. I reira ïa e hinaarohia ˈi ia pure tatou e ia turui i nia ia Iehova. Eiaha e tuu. “Eiaha e tuutuu i te pure.” (Tesalonia 1, 5:17) E tauturu Iehova i te feia e imi ra i te here i roto i te utuafare tae noa ˈtu i te feia e hinaaro ra e faaite i te here, tera râ, te taiâ ra.

Hau atu â, te horoa maitai maira Iehova i te tauturu na roto i te amuiraa Kerisetiano. Ua papai Iakobo e: “Te pohe ra anei te hoê o outou i te maˈi [i te pae varua]? e tii oia i te mau [matahiapo o te amuiraa] ra, e na ratou e pure ia ˈna, ma te faatahinu ia ˈna i te monoˈi i te iˈoa o [Iehova] ra.” (Iakobo 5:14; MN) Oia, e nehenehe te mau matahiapo i roto i te mau amuiraa a te mau Ite no Iehova e tauturu rahi i te mau utuafare mea fifi na te mau melo ia faaite i te here te tahi i te tahi. E ere te mau matahiapo i te tahuˈa manava, e nehenehe râ ratou e tauturu ma te faaoromai i to ratou mau hoa faaroo, ma te ore e parau atu eaha te rave, ma te haamanaˈo atu râ i to Iehova manaˈo e ma te pure e o ratou e no ratou.—Salamo 119:105; Galatia 6:1.

No Tohru raua Yoko, ua faaroo noa te mau matahiapo Kerisetiano i to raua mau fifi e ua tamahanahana ˈtu. (Petero 1, 5:2, 3) I te tahi mau taime, e haere te hoê matahiapo e ta ˈna vahine i ǒ raua ia faufaahia Yoko i te auhoaraa o te hoê vahine Kerisetiano aravihi o te “aˈo” ia Yoko ‘ia aroha i ta ˈna tane.’ (Tito 2:3, 4) Ma te faaite e te taa ra ia ratou te mauiui e te peapea o te mau hoa Kerisetiano e i to ratou aumauiui, e riro te mau matahiapo “mai te faarǔrǔraa i te vero ra, e mai te pupuniraa i te mataˈi rahi ra.”—Isaia 32:1, 2.

Maoti te tauturu a te mau matahiapo maitatai, ua taa aˈera ia Tohru e mea fifi na ˈna ia faaite i to ˈna huru aau e te tairi ra Satani i te oraraa utuafare i te “anotau hopea.” (Timoteo 2, 3:1) Ua faaoti atura Tohru e faatitiaifaro i to ˈna fifi. Ua haamata oia i te ite e aita oia e faaite ra i te here no te mea aita oia i herehia a paari mai ai oia. Na roto i te haapii-maite-raa i te Bibilia e te pure, ua tâuˈa riirii o Tohru i te mau hinaaro o Yoko i te pae aau.

Noa ˈtu e ua riri na oia ia Tohru, ua tutava maite Yoko i te hiˈo i te huru maitai o ta ˈna tane, i te taaraa ia ˈna te huru oraraa utuafare o ta ˈna tane e to ˈna iteraa i to ˈna iho mau paruparu. (Mataio 7:1-3; Roma 5:12; Kolosa 3:12-14) Ua taparuparu maite oia i te puai ia Iehova ia here noa oia i ta ˈna tane. (Philipi 4:6, 7) Inaha, ua haamata Tohru i te faaite i to ˈna here, e te oaoa ra ta ˈna vahine.

Oia, noa ˈtu e mea fifi na outou ia faahotu e ia faaite i te here i roto i te utuafare, eita e ore e e matara to outou fifi. Te horoa maira te Parau a te Atua i te aratairaa maitai. (Salamo 19:7) Na roto i te fariiraa i te huru hoata ore o te fifi, te tamataraa i te hiˈo i te huru maitai o te mau melo o to outou utuafare, te haapiiraa e te faaohiparaa i te Parau a te Atua, te turuiraa i nia ia Iehova na roto i te pure haavare ore, e te imiraa i te tauturu a te mau matahiapo Kerisetiano feruriraa paari, e nehenehe te mea e manaˈohia e e fifi iti rahi i rotopu ia outou e to outou utuafare, e matara. (Petero 1, 5:7) E oaoa atoa outou, mai te hoê tane i te Hau Amui. Ua faaitoitohia oia ia faaite i to ˈna here i ta ˈna vahine. I to ˈna faaitoitoraa i te pae hopea i te parau e “Mea here na ˈu ia oe,” ua maere oia i ta ˈna pahonoraa. Ma te roimata, ua parau ta ˈna vahine e: “O vau atoa, a tahi ra râ oe a parau ai mai tera i roto e 25 matahiti.” Eiaha e tiai i tera maororaa no te faaite i to outou here i to outou apiti e mau tamarii!

[Nota i raro i te api]

[Hohoˈa i te api 28]

Te horoa ra Iehova i te tauturu i roto i ta ˈna Parau, te Bibilia