“E haafatata ˈtu i te Atua, e na ˈna e haafatata mai ia outou”

Na mua ˈˈe e i muri aˈe—ua itehia mai e ana te puai no te taui

UA FAATAA o Sandra, te hoê vahine i Mehiko, ia ˈna iho ei vahine atâta e te au-ore-hia e to ˈna utuafare. Ua ino roa to ˈna taurearearaa i to ˈna faarueraahia e to ˈna ereraa i te here. Te na ô ra o ˈna e: “Ua faaruru vau i te hoê taurearearaa e te manaˈo moemoe tamau e te feaa rahi no nia i te tumu o to ˈu oraraa e o te oraraa.”

A haere noa ˈi oia i te haapiiraa tuarua, ua haamata o Sandra i te inu i te uaina a to ˈna metua tane. I muri iho, ua haamata ˈtura oia i te hoo mai i ta ˈna iho mau mohina ava e riro atura oia ei vahine inu hua i te ava. “Aita e tumu papu e turai ra ia ˈu ia ora,” ta ˈna ïa e faˈi ra. No to ˈna hepohepo rahi, ua haamata ˈtura o Sandra i te rave i te raau taero. “Te mea noa i tauturu ia ˈu ia haamoe i to ˈu mau fifi,” ta ˈna ïa e parau ra, “o ta ˈu ïa i taˈitaˈi na i roto i ta ˈu pute: hoê mohina ava, te tahi huero raau taero, aore ra maa marijuana iti.”

I muri aˈe i te hoperaa te haapiiraa toroa taote a Sandra, ua topa roa ˈtu â oia i roto i te inu-hua-raa i te ava. Ua tamata ˈtura oia i te haapohe ia ˈna. Ua ora mai râ oia.

Ua imi faufaa ore o Sandra i te tauturu pae varua e te turu pae aau i roto i te haapaoraa rau. No te ereraa i te tiaturiraa e te hepohepo roa, ua tamau oia i te tuô i te Atua: “Teihea roa oe? No te aha oe e ore ai e tauturu ia ˈu?” Ua topa roa ino to ˈna mau huru aau haafaufaa ia ˈna iho i to ˈna paraparauraa i te hoê vahine Ite no Iehova. Ua haamata te hoê haapiiraa bibilia taitahi. Ua putapû roa o Sandra ia ˈna i haapii e “te fatata nei Iehova i te feia aau paruparu ra.”—Salamo 34:18.

Ua tauturu te vahine i haapii ia Sandra i te Bibilia ia taa e ua ite te Atua ra o Iehova e e mea paruparu tatou no te mea e ua naeahia tatou i te hara e te huru tia ore no ǒ mai ia Adamu ra. Ua taa aˈera ia Sandra e ua ite te Atua e eita ta tatou e nehenehe e pee ma te tia roa i te mau ture aveia parau-tia. (Salamo 51:5; Roma 3:23; 5:12, 18) Ua oaoa oia i te haapiiraa e eita Iehova e manaˈonaˈo i to tatou mau paruparu, e eita roa ˈtu oia e titau hau atu i ta tatou e nehenehe e rave. Ua ui te papai salamo e: “Ahiri oe, e Iehova, e tapao na i te mau hara nei, o vai, e Iehova, te taata e mau?”—Salamo 130:3.

Te hoê parau mau bibilia faufaa o tei tamahanahana i te mafatu o Sandra, o te tusia taraehara ïa o Iesu Mesia. Maoti te reira, e faariro Iehova ma te aroha i te mau taata auraro ei feia tia noa ˈtu to ratou huru tia ore. (Ioane 1, 2:2; 4:9, 10) Oia, e nehenehe ta ‘tatou hara e faaorehia’ a tauturuhia ˈtu ai tatou ia faaruru i te mau manaˈo atoa e mea faufaa ore tatou.—Ephesia 1:7.

Ua huti mai o Sandra i te mau haapiiraa faufaa roa na roto i te hiˈoraa o te aposetolo Paulo. Ua mauruuru rahi oia i te hamani maitai o te Atua i te faaoreraa mai i ta ˈna mau hapa i tahito ra ma te aroha e i te tururaa mai i ta ˈna aroraa fifi no te upootia i nia i taua noâ mau paruparu ra. (Roma 7:15-25; Korinetia 1, 15:9, 10) Ua faatitiaifaro o Paulo i to ˈna oraraa, ‘ua moto i to ˈna tino ia vî’ no te faaea noa i nia i te eˈa fariihia e te Atua.  (Korinetia 1, 9:27) Aita oia i vaiiho e ia vî oia i to ˈna mau hinaaro hara.

Ua haamauiui te mau paruparu o Sandra ia ˈna, ua tamau râ oia i te aro atu. Ua pure oia ma te aau tae ia Iehova ia tauturu ia ˈna ia tinai atu e ua imi i to ˈna aroha hamani maitai. (Salamo 55:22; Iakobo 4:8) I to ˈna iteraa e te anaanatae ra te Atua iho ia ˈna, ua nehenehe atura o Sandra e taui roa i to ˈna huru oraraa. “Te oaoa nei au i te haapiiraa ia vetahi ê i te Bibilia ma te taime taatoa,” ta ˈna ïa e parau ra. Ua roaa ia Sandra te fanaˈoraa taa ê e tauturu i to ˈna tuaana e to ˈna tuahine apî aˈe ia noaa te ite no nia ia Iehova. I te mea e te rave ra oia i te mea “hamani maitai,” te pûpû atoa ra oia i to ˈna iho mau aravihi i te pae no te rapaauraa i te mau tairururaa a te mau Ite no Iehova.—Galatia 6:10.

E te mau peu matauhia a Sandra? Te na ô ra oia ma te tiaturi e: “Mea maitai to ˈu feruriraa. Aita vau e inu, e puhipuhi, aore ra e rave faahou ra i te raau taero. Aita vau e hiaai faahou ra i te reira. Ua itehia ia ˈu ta ˈu i imi noa na.”

[Parau iti faaôhia i te api 9]

“Ua itehia ia ˈu ta ˈu i imi noa na”

[Tumu parau tarenihia i te api 9]

Te ohipa a te mau faaueraa tumu bibilia

Teie te tahi mau faaueraa tumu bibilia o tei tauturu e rave rahi ia tiamâ mai i te mau peu viivii:

“E tamâ hua tatou ia tatou iho i te mau viivii atoa o te tino e te varua, ma te faatupu hua i te maitai i te mǎtaˈuraa ˈtu i te Atua.” (Korinetia 2, 7:1) E haamaitai te Atua i te feia o tei tamâ ia ratou iho i te viivii ma te faarue roa i te mau peu viivii.

“Mǎtaˈu to ˈu ia Iehova, e te riaria nei au i te ino.” (Maseli 8:13) E tauturu te mǎtaˈu faatura i te Atua i te hoê taata ia haapae roa i te mau peu iino mai te rave-hua-raa i te raau taero. Hau atu i te faaoaoa ia Iehova, e paruruhia te hoê taata tei taui i te mau maˈi riaria.

“E auraro maite i te hui arii e te feia mana.” (Tito 3:1) Mea rahi te vahi, e ofatiraa i te ture ia fanaˈo aore ra ia rave i te tahi mau raau taero. Aita ta te mau Kerisetiano mau e mau raau taero opanihia e te ture aita atoa ratou e rave ra i te reira.