No te aha e ore ai e tia ia faataa ê roa ia tatou

“E maitai te taata toopiti i te taata hoê . . . Ia hiˈa hoi te tahi ra, na te hoa e rave e faatia i nia.”—Arii Solomona

UA PARAU o Solomona, te arii o Iseraela i tahito ra, e: “E maitai te taata toopiti i te taata hoê; no te mea e utua maitai ta raua i ta raua ohipa. Ia hiˈa hoi te tahi ra, na te hoa e rave e faatia i nia; te taata hoê râ ia hiˈa ra, atae hoi oia, aita hoi o ˈna e taua ei faatia ia ˈna i nia!” (Koheleta 4:9, 10) Te haamahitihiti ra teie taata mataitai paari i te haerea o te taata i to tatou hinaaro i te auhoaraa e i te faufaaraa eiaha e faataa ê ia tatou. E ere râ teie i te manaˈo taata noa. No roto mai te parau a Solomona i te paari o te Atua e ta ˈna faauruaraa.

E ere i te haerea paari ia faataa ê ia tatou. E hinaaro te taata te tahi i te tahi. E hinaaro tatou paatoa i te puai e te tauturu ta vetahi ê e nehenehe e horoa mai. “O tei faataa ê ia ˈna ihora, te imi ra ïa i to ˈna ihora hinaaro,” ia au i te hoê parau paari bibilia. “E mârô oia i te imi i te mau paari atoa ra.” (Maseli 18:1) No reira, e ere i te mea maere ia faaitoito te mau aivanaa totiare i te taata ia amui i te hoê pǔpǔ e ia anaanatae ia vetahi ê.

I roto i te mau poroi no te faahoˈi mai i te oraraa totiare, te faahiti ra te orometua haapii ra o Robert Putnam i “te haapuairaa i te mana o te faaroo i te Atua.” E hiˈoraa maitai to te mau Ite no Iehova i roto i teie tuhaa, no te mea te fanaˈo ra ratou i te parururaa i roto i te mau amuiraa e au i te utuafare i nia i te fenua taatoa. Ia au i te mau parau a te aposetolo Petero, ‘e aroha ˈtu ratou i te hui taeae,’ o te ‘mǎtaˈu ra i te Atua’ ma te faatura. (Petero 1, 2:17) E ape atoa te mau Ite i te faataa ê ia ratou e te faahopearaa ino o te reira, no te mea e turai noa te mau ohipa maitatai e rave rahi tei taaihia i te haamoriraa mau ia ratou ia tauturu i to ratou mau taata-tupu ia ite i te parau mau i roto i te Parau a te Atua, te Bibilia.—Timoteo 2, 2:15.

Ua taui te here e te auhoaraa i to ratou oraraa

E nunaa tahoêhia te mau Ite no Iehova, i reira te melo taitahi e rave ai i te hoê ohipa faufaa. A rave na i na hiˈoraa o Miguel, o Froylán, e o Alma Ruth, na melo e toru o te hoê â utuafare no Marite Latino. Ua fanauhia ratou ma te tahi fifi o te ivi, ei faahopearaa, e mea poto roa ratou. E parahiraa turai to ratou tootoru. Eaha te faahopearaa o to ratou amuimuiraa e te mau Ite i nia i to ratou oraraa?

Te faataa ra o Miguel e: “Ua farerei au i te tahi mau tau fifi, i to ˈu râ haamataraa i te  amuimui e te nunaa o Iehova, ua taui to ˈu oraraa. E mea atâta roa ia faataa ê ia tatou. Ua tauturu rahi mai te amuimuiraa e te mau hoa faaroo i te mau putuputuraa Kerisetiano, te amuimuiraa e o ratou i te mau hebedoma atoa, ia ite i te mauruuru e te oaoa.”

Te na ô atoa ra o Alma Ruth e: “I û na vau i te tahi mau taime hepohepo rahi; ua peapea roa vau. Teie râ, i to ˈu haapiiraa no nia ia Iehova, ua manaˈo vau e e nehenehe ta ˈu e haafatata roa ˈtu ia ˈna. Ua riro te reira ei mea faufaa roa ˈˈe no ˈu i roto i te oraraa. Ua paturu rahi to ˈu utuafare ia matou, e ua tahoê atu â matou.”

Ma te here, ua haapii te papa ia Miguel i te taio e te papai. I muri aˈe, na Miguel i haapii atu ia Froylán e ia Alma Ruth. E mea faufaa roa te reira no to ratou ea pae varua. “Ua faufaa-roa-hia matou i te haapiiraa i te taio no te mea ua nehenehe matou e tamaa i te pae varua maoti te taioraa i te Bibilia e te mau papai bibilia,” ta Alma Ruth ïa e parau ra.

I teie nei, e matahiapo Kerisetiano o Miguel. Ua taio o Froylán i te Bibilia e iva taime. Ua faaaano o Alma Ruth i ta ˈna taviniraa ia Iehova ma te riro ei pionie, aore ra vahine poro taime taatoa i te Basileia, mai te matahiti 1996 mai â. Te faataa ra oia e: “Maoti te haamaitairaa a Iehova i raea ˈi ia ˈu teie fa, a tauturu atoa ˈi to ˈu mau tuahine Ite here ia ˈu eiaha noa ia poro, ia haapii atoa râ i te taata ma te faatere 11 haapiiraa bibilia ta ˈu i nehenehe e haamata.”

Te vai atoa ra te hiˈoraa maitai o Emelia, e titauhia ia faaohipa oia i te hoê parahiraa turai no te mea ua pepe roa to ˈna nau avae e to ˈna tuamoo i roto i te hoê ati. Ua haapii te mau Ite no Iehova no Mexico i te Bibilia e o ˈna, e ua bapetizohia oia i te matahiti 1996. Te na ô ra o Emelia e: “Hou a ite ai i te parau mau, ua hinaaro vau e haapohe ia ˈu iho; aita vau i hinaaro faahou e ora. Ua moemoe roa vau e ua oto i te rui e te ao. I to ˈu râ amuimuiraa e te nunaa o Iehova, ua ite au i te here o te mau taeae. Ua riro to ratou anaanatae-roa-raa ia ˈu ei faaitoitoraa. E au te hoê o te mau matahiapo ei taeae aore ra ei metua tane no ˈu. Na ˈna e na te tahi mau tavini tauturu e afai ia ˈu i te mau putuputuraa e i roto i te pororaa ma to ˈu parahiraa turai.”

Ua bapetizohia o José ei Ite no Iehova i te matahiti 1992 e o ˈna anaˈe to ˈna faaearaa. E 70 matahiti to ˈna e ua faatufaahia oia i te  matahiti 1990. I û na o José i te hepohepo, i muri aˈe râ i to te hoê Ite pororaa ia ˈna, ua haamata oioi oia i te haere i te mau putuputuraa Kerisetiano. Ua au oia i ta ˈna i faaroo e i ite i reira. Ei hiˈoraa, ua ite oia i te auhoaraa i roto i te mau taeae e to ratou tapitapi ia ˈna ei taata. Na te mau matahiapo e te mau tavini tauturu o ta ˈna amuiraa e haapao ra ia ˈna i teie nei. (Philipi 1:1; Petero 1, 5:2) E “haamahanahana” tera mau hoa faaroo ia ˈna. (Kolosa 4:11) E afai ratou ia ˈna i te taote, e haere e hiˈo ia ˈna i to ˈna fare, e ua tauturu ia ˈna i te roaraa o to ˈna na tâpûraa e maha. Te na ô ra oia e: “Te tapitapi ra ratou ia ˈu. E fetii mau â ratou no ˈu. Te fanaˈo ra vau i to ratou auhoaraa.”

E mea oaoa mau â ia horoa ˈtu

I to te arii Solomona parauraa e “e maitai te taata toopiti i te taata hoê,” te faahiti noa ra oia i te faufaa ore ia faaitoito hope i te titau i te mau taoˈa materia. (Koheleta 4:7-9) Tera mau â ta te taata e rave rahi e tapi ru ra i teie mahana, noa ˈtu e e titau te reira ia haapae ratou i te mau taairaa e o vetahi ê i roto e i rapaeau i te utuafare.

Te turai ra te huru feruriraa nounou e te miimii i te taata e rave rahi ia faataa ê ia ratou. Aita te reira e hopoi mai ra i te oaoa e te mauruuru i roto i te oraraa, no te mea o te inoino e te ereraa i te tiaturiraa te tupu pinepine nei i rotopu i te feia e pee ra i taua huru feruriraa ra. Area te mau aamu i faatiahia aˈenei, te faaite ra ïa i te mau faahopearaa maitatai ia amuimui e te feia e tavini ra ia Iehova e o te turaihia ra e te here ia ˈna e i to ratou taata-tupu. Te tae-tamau-raa i te mau putuputuraa Kerisetiano, te turu e te anaanatae o te mau hoa Kerisetiano, e te ohipa itoito rahi i roto i te taviniraa, e mau mea faufaa roa ïa no te tauturu i teie mau taata ia tinai i te mau huru aau faatoaruaru tei taaihia i te faataa-ê-raa.—Maseli 17:17; Hebera 10:24, 25.

I te mea e e hinaaro tatou te tahi i te tahi, e tupu mai iho â ïa te mauruuru ia rave tatou i te tahi mau mea na vetahi ê. Ua parau o Albert Einstein, ua faufaahia hoi vetahi ê i ta ˈna ohipa, e: “Ia itehia te faufaaraa o te hoê taata . . . i roto i ta ˈna e horoa eiaha i roto i ta ˈna e fanaˈo.” Te tuati ra te reira i teie mau parau a to tatou Fatu ra o Iesu Mesia: “E mea maitai i te horoa ˈtu i te rave mai.” (Ohipa 20:35) No reira, noa ˈtu e e mea maitai ia fanaˈo i te here, e mea maitai roa atoa râ ia faaite i te here ia vetahi ê.

Teie te manaˈo o te hoê tiaau ratere, o tei tere i roto i te mau amuiraa e rave rahi matahiti i te maoro no te tauturu atu i te pae varua e o tei turu i te paturaa i te mau vahi putuputuraa na te mau Kerisetiano riirii: “No te oaoa e turu i to ˈu mau taeae e te iteraa i to ratou mata mauruuru roa, e tamau ai au i te imi i te ravea no te tauturu atu. Na roto i ta ˈu iho i ite, o te anaanatae-roa-raa ia vetahi ê te taviri o te oaoa. E ua ite au e ei matahiapo, e mea tia ia riro matou ‘mai te faarǔrǔraa i te vero ra, mai te pape rii tahe i te vahi pâpâmaro ra; e mai te maru o te hoê mato rahi i te fenua paurâ.’”—Isaia 32:2.

Auê te au e ia parahi ma te au maite!

Oia mau, e maitai rahi e e oaoa mau te noaa mai ia tauturu ia vetahi ê e ia faahoa ˈtu i te feia e tavini ra ia Iehova. “Inaha hoi,” ta te papai salamo  ïa i pii hua. “Te maitai e te popou, ia parahi atoa te mau taeae ma te au maite!” (Salamo 133:1) E mea faufaa roa te au-maite-raa utuafare no te turu te tahi i te tahi, ia au i te hiˈoraa o Miguel, o Froylán, e o Alma Ruth. E auê ïa haamaitairaa ia au maite te tahi i te tahi i roto i te haamoriraa mau! I muri aˈe i te aˈoraa i te mau tane e te mau vahine faaipoipo Kerisetiano, ua papai te aposetolo Petero e: “E teie nei, ei aau tahi to outou atoa, i te aroha-atoa-raa, ei aroha taeae ra, ei aau mǎrû, ei aau taua.”—Petero 1, 3:8.

E horoa mai te auhoaraa mau i te maitai rahi, i te pae aau e i te pae varua atoa. Teie ta te aposetolo Paulo e aˈo i to ˈna mau hoa faaroo: ‘E haamahanahana ˈtu i te aau taiâ, e tauturu atu i tei paruparu, ia maoro te faaoromai i te taata atoa ra. E titau maite i te maitai eiaha e faaea, i roto ia outou iho e te taata atoa ra.’—Tesalonia 1, 5:14, 15.

No reira, a imi i te mau ravea e au ia faaohipa no te hamani maitai ia vetahi ê. ‘E hamani maitai i te taata atoa, ia rahi atu râ i to te fetii faaroo ra,’ no te mea e horoa mai te reira i te auraa mau i to outou oraraa e e ite outou i te oaoa e te mauruuru. (Galatia 6:9, 10) Ua papai o Iakobo, te pǐpǐ a Iesu, e: “Ia pohe hoi te hoê taeae, e te hoê tuahine i te veve, e aore e maa i te mau mahana atoa ra, ia parau atu râ te hoê o outou ia raua ra, Ia ora na i te haerea, ia mahanahana hoi orua, e ia paia hoi, aita râ i horoa ˈtu i te mea e maitai ai te tino ra; eaha to reira faufaa?” (Iakobo 2:15, 16) E mea maramarama maitai te pahonoraa i taua uiraa ra. E mea faufaa roa ‘eiaha e haapao i ta tatou anaˈe ihora, e haapao atoa râ i to vetahi ê ra maitai.’—Philipi 2:4.

Hau atu i te tauturu ia vetahi ê i te pae materia mai te peu e te vai ra te hoê hinaaro taa ê aore ra e ati tei tupu, te haa puai nei te mau Ite no Iehova i te hamani maitai i te mau taata-tupu na roto i te hoê ravea faufaa roa—te pororaa i te parau apî maitai o te Basileia o te Atua. (Mataio 24:14) Te apitiraa o na Ite e 6 tiahapa mirioni i roto i te faaite-haere-raa i teie poroi o te tiaturiraa e o te tamahanahanaraa, e haapapuraa ïa i to ratou anaanatae mau î i te here ia vetahi ê. E haamâha atoa râ te horoaraa i te tauturu no roto mai i te mau Papai Moˈa, i te tahi atu hinaaro o te taata. Eaha ïa?

Haamâharaa i te hoê hinaaro faufaa roa

No te fanaˈo i te oaoa mau, e mea faufaa roa ia maitai to tatou taairaa e te Atua. I parauhia na e: “Te hinaaroraa te taata i te mau vahi atoa e i te mau taime atoa, mai te haamataraa mai e tae roa mai i teie nei, e tiaoro i te tahi mea ta ˈna e manaˈo ra e mea teitei aˈe e mea puai aˈe ia ˈna, te faaite ra ïa e mea natura te haapaoraa e e mea tia ia farii i te reira i te pae o te ihi. . . . Ia î tatou i te mǎtaˈu, te umere e te faatura i te iteraa i te taatoaraa o ta te taata maimiraa e tiaturiraa i te hoê ihotaata hau ê.”—Man Does Not Stand Alone, a Cressy Morrison.

Ua parau o Iesu Mesia e: “E ao to tei ite i to ratou veve i te pae varua.” (Mataio 5:3, MN) Eita te taata e maitai ia faataa ê maoro oia ia vetahi ê. E mea ino roa ˈtu râ ia faataa ê i to tatou Atua Poiete. (Apokalupo 4:11) E mea maitai ia riro te titauraa e te faaohiparaa i “te ite i te Atua” ei tuhaa faufaa i roto i to tatou oraraa. (Maseli 2:1-5) Oia mau, e mea maitai ia faaoti maite tatou i te haapao i to tatou mau hinaaro pae varua, no te mea eita e tia ia tatou ia faataa ê roa i te Atua. Ua taaihia te hoê oraraa oaoa e te mauruuru mau i te taairaa maitai e o Iehova, “tei Teitei i te fenua atoa nei.”—Salamo 83:18.

[Hohoˈa i te api 5]

Miguel: “Ua farerei au i te tahi mau tau fifi, i to ˈu râ haamataraa i te amuimui e te nunaa o Iehova, ua taui to ˈu oraraa”

[Hohoˈa i te api 5]

Alma Ruth: “I to ˈu haapiiraa no nia ia Iehova, ua manaˈo vau e e nehenehe ta ˈu e haafatata roa ˈtu ia ˈna”

[Hohoˈa i te api 6]

Emelia: ‘Hou a ite ai i te parau mau, . . . ua moemoe roa vau’

[Hohoˈa i te api 7]

E mâha to tatou mau hinaaro pae varua i te amuimuiraa e te feia haamori mau