Te “tiai” ra anei outou?

“Mai te aha to outou huru e tia ˈi i te haapao maitai e te paieti; i te tiairaa e te ruraa ˈtu ia tae mai taua mahana o te Atua ra?”—PETERO 2, 3:11, 12.

1, 2. E nafea tatou e faahohoˈa ˈi i te ‘tiairaa’ i te mahana o Iehova?

 A FERURI na e te tiai ra te hoê utuafare i te mau manihini no te tamaa. Te piri oioi maira te taime faataahia e tae mai ai ratou. Te rave ra te vahine i te mau faaineineraa hopea no te tamaaraa. Te hiˈopoa ra ta ˈna tane e ta raua mau tamarii e ua ineine anei te mau mea atoa. Mea oaoa roa te mau melo atoa. Oia mau, te tiai ru nei te utuafare taatoa i te mau manihini, i te maa au roa e i te auhoaraa maitai.

² Ei Kerisetiano, te tiai nei tatou i te hoê mea faufaa roa ˈtu â. Eaha ïa? Te tiai nei tatou paatoa i te “mahana o te Atua”! Hou taua mahana ra e tae mai ai, e mea faufaa roa ia riro tatou mai te peropheta Mika, tei parau e: ‘E hiˈo vau ia Iehova; e tiai au i te Atua o to ˈu nei ora.’ (Mika 7:7) E tiai anei ïa tatou ma te parahi noa? Eita. Mea rahi te ohipa e rave.

3. Ia au i te Petero 2, 3:11, 12, mai te aha te huru o te mau Kerisetiano?

³ Te tauturu maira te aposetolo Petero ia tiai ma te huru e tano. Te na ô ra oia e: “Mai te aha to outou huru e tia ˈi i te haapao maitai e te paieti; i te tiairaa e te ruraa ˈtu ia tae mai taua mahana o te Atua ra?” (Petero 2, 3:11, 12) A tapao na e na roto i teie tatararaa, aita o Petero e mârô ra i te huru taata e mea tia ia riro tatou. I roto i ta ˈna na rata e piti i faauruahia e te Atua, ua faataa oia mai te aha te huru o te mau Kerisetiano e tia ˈi. Ua aˈo atoa oia ia ratou ia rave â i te mau ohipa “haapao maitai e te paieti.” Noa ˈtu e fatata e 30 matahiti i mairi mai to Iesu Mesia horoaraa i te tapao o “te hopea o teie nei ao,” eiaha te mau Kerisetiano e faaea i te vai ara. (Mataio 24:3) E mea tia ia ‘tiai e ia ru atu’ ratou ia tae mai te mahana o Iehova.

4. Eaha te auraa “te ruraa ˈtu ia tae mai taua mahana o te Atua ra”?

⁴ Parau mau, eita ta tatou e nehenehe mau e ‘ru atu’ ia tae mai te mahana o Iehova. Inaha ‘aore tatou i ite i te mahana e te hora atoa’ e haere mai o Iesu Mesia e haava i te mau enemi o to ˈna Metua. (Mataio 24:36; 25:13) Te faataa ra te hoê buka e te auraa i ǒ nei o te ihoparau tumu o te taˈo ra “ruraa ˈtu,” “‘e faaoioi’ ïa e ua taai-roa-hia te reira i ‘te itoito rahi, te haaraa, te tapitapiraa i te tahi mea.’” No reira, te faaitoito ra o Petero i te mau hoa faaroo ia hinaaro roa e ia tae mai te mahana o Iehova, na roto i te haamanaˈo-noa-raa i te reira. (Petero 2, 3:12) Ia na reira atoa tatou i te feruri, i te mea e ua fatata roa te “mahana rahi riaria o Iehova.”—Ioela 2:31.

 E tiai anaˈe ma te mau ohipa “haapao maitai”

5. E nafea tatou e faaite ai e te hinaaro roa ra tatou e ite i ‘te mahana o Iehova’?

⁵ Ia hinaaro roa tatou e ora ˈtu i te mahana o Iehova, e faaite ïa tatou na roto i ta tatou mau ohipa “haapao maitai e te paieti.” Na roto i te parau ra te mau ohipa “haapao maitai,” e haamanaˈo tatou i te aˈoraa a Petero: “Mai te tamarii faaroo ra, eiaha e faaau ia outou iho i to outou mau hinaaro i mutaa iho i to outou mauaraa ra; mai ia ˈna hoi i parau mai ia outou e moˈa ra, ia moˈa atoa outou i ta outou mau parau atoa: ua oti hoi i te papaihia e, Ia [moˈa] outou; te [moˈa] nei hoi au.”—Petero 1, 1:14-16; MN.

6. Ia moˈa tatou, e mea tia ia aha tatou?

⁶ Ia moˈa tatou, e mea tia ia vai mâ noa tatou i te pae tino, i te pae feruriraa, i te pae morare, e i te pae varua. Te faaineine ra anei tatou no ‘te mahana o te Atua’ ma te vai moˈa noa ei mau taata e amo ra i to Iehova iˈoa? E ere i te mea ohie ia vai moˈa i teie mahana no te mea te ino noa ˈtura te mau ture aveia morare a te ao. (Korinetia 1, 7:31; Timoteo 2, 3:13) Te ite ra anei tatou e te taa ê noa ˈtu ra ta tatou mau ture aveia morare e ta te ao? Mai te peu e aita, e mea tano ia haapeapea tatou. E riro anei e te ino ra ta tatou iho mau ture aveia teitei aˈe i ta te ao? Mai te peu e e, e mea tia ia haa tatou no te faaafaro i te fifi, a oaoa ˈtu ai te Atua.

7, 8. (a) E nafea e moe ai ia tatou te faufaaraa e rave i te mau ohipa “haapao maitai”? (b) Eaha te tahi mau faatitiaifaroraa e titauhia ia rave?

⁷ Na roto i te mahitiraa mai o te peu faufau i roto i te Internet e te neheneheraa e mataitai atu oe anaˈe, te ite nei te tahi pae aita hoi i ite aˈenei i tera mau peu faufau i “te mau ravea pau ore no te taati,” ta te hoê taote ïa e parau ra. Mai te peu e e maimi tatou i tera mau afata poroi Internet faufau, eita ïa tatou e tâuˈa i te faaueraa bibilia “eiaha e rave noa ˈtu i te mea viivii.” (Isaia 52:11) E ‘ru’ mau anei tatou “ia tae mai taua mahana o te Atua ra”? Aore ra e faanuu to tatou feruriraa i taua mahana ra, ma te na ô e aita e peapea ia haaviivii i to tatou feruriraa i te mau mea hairiiri, e taime iho â to tatou no te tamâ ia tatou? Mai te peu e ua û tatou i teie fifi, e mea ru roa ia ani tatou ia Iehova ia ‘faafariu ê i to tatou mata ia ore ia hiˈo i te mea faufaa ore e ia faaitoito ia tatou i to ˈna ra eˈa’!—Salamo 119:37.

⁸ Te faatura nei te rahiraa o te mau Ite no Iehova apî e te paari, i te mau ture aveia teitei i te pae morare a te Atua e te ape nei i te mau faahemaraa faufau a teie nei ao. No te mea ua ite ratou i te ru o to tatou tau e i te faaararaa a Petero e ‘e tae mai te mahana o Iehova mai te eiâ,’ te rave â ra ratou i te mau ohipa “haapao maitai.” (Petero 2, 3:10) Te haapapu ra ta ratou mau ohipa e ‘te tiai ra e te ru atu ra ratou ia tae mai te mahana o te Atua.’ *

E tiai anaˈe ma te mau ohipa “paieti”

9. E turai te paieti ia tatou ia aha?

⁹ Mea faufaa roa atoa te mau ohipa “paieti” no te haamanaˈo i te mahana o Iehova. Te “paieti,” o te faaturaraa ïa i te Atua o te turai ia tatou ia rave i ta ˈna e au. Na te here taiva ore ia Iehova e turai ia tatou ia rave i tera mau ohipa paieti. E hinaaro oia i “te taata atoa ia ora, e ia noaa te ite i te parau mau.” (Timoteo 1, 2:4) Eita te Atua e “hinaaro e ia pohe atu te hoê, ia noaa paatoa râ te tatarahapa.” (Petero 2, 3:9) No reira, eita anei to tatou paieti e turai ia tatou ia tutava ˈtu â i te tauturu i te taata ia ite ia Iehova e ia pee ia ˈna?—Ephesia 5:1.

10. No te aha tatou e ara ˈi i “te haavare o te taoˈa”?

 ¹⁰ E î to tatou oraraa i te mau ohipa paieti ia mata tatou i te imi i te Basileia o te Atua. (Mataio 6:33) Te auraa ra, ia faito noa to tatou manaˈo no nia i te mau mea materia. Ua faaara o Iesu e: “E ara ia outou i te nounou taoˈa, rahi noa iho hoi ta te taata nei taoˈa, e ere hoi tei taua taoˈa na ˈna ra to ˈna ora.” (Luka 12:15) E mea fifi paha ia feruri e ua poirihia tatou i te nounou moni, tera râ, e mea maitai ia tapao e e nehenehe ‘te parau a te Atua e hoene’ i ‘te titau rahi i to teie nei ao e te haavare o te taoˈa.’ (Mataio 13:22) E ere paha i te mea ohie ia noaa mai te tahi imiraa. I te tahi mau fenua, mea rahi o te manaˈo e no te fanaˈo i te hoê oraraa maitai aˈe, e mea tia ia reva ratou i te hoê fenua ona aˈe, ma te faarue paha i to ratou utuafare tau matahiti i te maoro. Ua manaˈo atoa te tahi pae o te nunaa o te Atua mai te reira. Ia reva ratou i te fenua ê, e maraa paha ia ratou ia horoa i te mau maitai no teie tau na to ratou utuafare. Eaha râ te huru o te ea pae varua o to ratou utuafare here ia hoˈi atu ratou? I te mea e aita e aratairaa tano a te upoo utuafare, e fanaˈo anei ratou i te ea pae varua e hinaarohia no te ora ˈtu i te mahana o Iehova?

11. Mea nafea to te hoê rave ohipa tau poto faaiteraa e mea faufaa aˈe te mau ohipa paieti i te taoˈa rahi?

¹¹ Ua haapii te hoê rave ohipa tau poto no Philipino i te parau mau bibilia maoti te mau Ite no Iehova i Tapone. I to ˈna haapiiraa no nia i te mau hopoia bibilia o te tiaraa upoo, ua taa ia ˈna e mea tia ia tauturu oia i to ˈna utuafare ia riro ei feia haamori ia Iehova. (Korinetia 1, 11:3) Ua patoi roa ino ta ˈna vahine i Philipino i to ˈna faaroo apî e ua hinaaro e ia hapono noa ˈtu oia i te moni eiaha râ ia hoˈi i te fare no te haapii i ta ˈna mau tiaturiraa bibilia i te utuafare. Turaihia râ e te ru o te tau e te tapitapi i to ˈna utuafare, ua hoˈi oia i ǒ na. Ua haamaitaihia to ˈna faaoromai i te haaraa ma te here i nia i to ˈna utuafare. I muri aˈe, ua tahoê to ˈna utuafare i roto i te haamoriraa mau, e ua rave ta ˈna vahine i te taviniraa taime taatoa.

12. No te aha e mea maitai ai ia rave na mua tatou i te mau faufaa pae varua i roto i te oraraa?

¹² E nehenehe e faaau i to tatou huru tupuraa e to te feia i roto i te hoê fare e paapaa ra i te auahi. E haerea paari anei ia horo haere tatou ma te hepohepo e haru mai i te mau taihaa i roto i te fare e ura ra o te fatata i te hiˈa? E ere anei râ i te mea faufaa aˈe ia faaora i te taata—ia outou, to outou utuafare e te tahi atu e parahi ra i tera fare? Ua fatata roa teie nei faanahoraa ino o te mau mea i te hiˈa, e e nehenehe te taata e pohe. No reira, e mea maitai iho â ia rave na mua tatou i te mau faufaa pae varua e ia haapao maite ma te itoito rahi i te ohipa pororaa i te Basileia o te faaora i te taata.—Timoteo 1, 4:16.

Ia riro tatou ei mea “porao ore” e tia ˈi

13. I roto i teihea huru tupuraa e hinaaro ai tatou ia roohia mai tatou ia tae mai te mahana o Iehova?

¹³ Ma te haamahitihiti i te faufaaraa ia tiai noa, te parau ra Petero e: “E au mau here e, o te reira mau mea ta outou e tiai na, e faaitoito, e haapapu hua ia roohia mai outou e [te Atua] ma te hau, ma te porao ore e te hapa ore.” (Petero 2, 3:14) Hau atu â i ta ˈna aˈoraa e rave i te mau ohipa haapao maitai e te paieti, te haamahitihiti ra o Petero i te faufaaraa ia roohia mai  tatou e Iehova ei feia i mâ i te toto taoˈa o Iesu. (Apokalupo 7:9, 14) E titauhia ia faahotu i te faaroo i te tusia o Iesu e ia riro ei tavini pûpûhia e te bapetizohia a Iehova.

14. Eaha te auraa ia vai “porao ore” tatou?

¹⁴ Te aˈo maira o Petero ia faaitoito e ia roohia mai tatou ma te “porao ore.” Mea porao ore noa anei to tatou ahu Kerisetiano oia hoi to tatou haerea e to tatou huru, tei ore i tafetafeta i te ao? Ia ite tatou i te hoê tafeta i nia i to tatou ahu, e tamata tatou i te faaore atu i reira iho. Mai te peu e mea au roa na tatou tera ahu, e tamâ maite iho â ïa tatou i te reira. E na reira atoa anei tatou ia tafetafeta to tatou ahu Kerisetiano, ei auraa parau, no te tahi paruparu o to tatou huru aore ra haerea?

15. (a) No te aha te mau Iseraela i faauehia ˈi ia hamani i te faaunaunaraa i nia i te hiti o to ratou ahu? (b) No te aha te mau tavini no teie tau a Iehova e taa ê ai?

¹⁵ Ua faauehia te mau Iseraela ia hamani i “te faaunaunaraa i nia i te hiti o to ratou ahu” e “te hoê taamu ereere tapemoana i nia iho i taua faaunaunaraa ra i te hiti o to ratou ahu.” No te aha? Ia manaˈo ratou i te mau parau a Iehova, ia rave i te reira, e ia “moˈa” no to ratou Atua. (Numera 15:38-40) Ei mau tavini no teie tau a Iehova, mea taa ê tatou i te ao no te mea te haapao nei tatou i te mau ture e te mau faaueraa tumu a te Atua. Ei hiˈoraa, mea mâ noa tatou i te pae morare, te faatura nei i te huru moˈa o te toto, e te ape nei i te haamoriraa idolo huru rau. (Ohipa 15:28, 29) Mea rahi o te faatura nei ia tatou no ta tatou faaotiraa papu eiaha ia viivii.—Iakobo 1:27.

Ia riro tatou ei mea “hapa ore” e tia ˈi

16. Eaha te auraa ia vai “hapa ore” noa tatou?

¹⁶ Te parau atoa ra o Petero e ia roohia mai tatou ma te “hapa ore” e tia ˈi. E nafea? I te rahiraa o te taime, e nehenehe e faaore i te hoê porao, eiaha râ te hoê hapa. E faaite te hoê hapa e te vai ra te hoê mea ino, te hoê mea hape i roto. Ua faaue te aposetolo Paulo i te mau hoa Kerisetiano no Philipi e: “E rave i te mau mea atoa ra ma te ohumu ore, e te mârô ore. Ia riro outou ei feia hapa ore, e te ino ore, ei tamarii na te Atua aore e faainoraa, i rotopu i teie nei ui piˈo e te mârô; ia anaana maite outou i roto ia ratou mai te mau tiarǎma o te ao nei.” (Philipi 2:14, 15) Mai te peu e e pee tatou i teie aˈoraa, e ape tatou i te ohumu e te mârô e e tavini tatou i te Atua ma te manaˈo turai viivii ore. Na te here ia Iehova e to tatou taata-tupu e turai ia tatou ia poro i “te evanelia o te basileia.” (Mataio 22:35-40; 24:14) Hau atu â, e poro â tatou i te evanelia noa ˈtu e eita te rahiraa o te taata e taa no te aha tatou e horoa ˈi i to tatou taime no te faaitoito i te tauturu ia vetahi ê ia haapii no nia i te Atua e ta ˈna Parau, te Bibilia.

17. Eaha te turai ia tatou ia hinaaro uˈana tatou i te mau fanaˈoraa taa ê i roto i te amuiraa Kerisetiano?

¹⁷ Ia hinaaro tatou e ia roohia mai tatou ma te “hapa ore,” e mea maitai ia hiˈopoa tatou eaha te turai ra ia tatou i roto i ta tatou mau ohipa atoa. Ua haapae tatou i te huru raveraa a te ao no te mau tumu miimii, mai te onoonoraa i te titau i te mau taoˈa materia aore ra te mana. Ia hinaaro uˈana tatou i te mau fanaˈoraa taa ê i roto i te amuiraa Kerisetiano, ia vai viivii ore noa ïa to tatou mau manaˈo turai e ia turai-noa-hia tatou e te here i te Atua e ia vetahi ê. E mea mahanahana ia ite i te mau tane haapao i te mau ohipa pae varua ia ‘hinaaro uˈana i te  toroa [tiaau]’ ma te oaoa e te hinaaro haehaa e tavini ia Iehova e to ratou mau hoa faaroo. (Timoteo 1, 3:1; MN; Korinetia 2, 1:24) Oia mau, te “faaamu” ra te feia e au ia tavini ei matahiapo ‘i te nǎnǎ a te Atua no te hinaaro; eiaha no te taoˈa tia ore ra ia noaa, no te tae mau râ o te aau; eiaha ma te faahepo i nia iho i te tufaa a te Atua ra, ei aveia râ no te nǎnǎ.’—Petero 1, 5:1-4.

Ia “hau” tatou e tia ˈi

18. Mea matau-maitai-hia te mau Ite no Iehova no teihea nau huru maitatai?

¹⁸ I te pae hopea, te parau maira o Petero e ia roohia mai tatou ma te “hau.” Ia au i teie titauraa, e mea tia ia hau tatou e o Iehova e to tatou taata-tupu. Te haamahitihiti ra o Petero i te faufaaraa ia ‘uˈana maite te aroha te tahi i te tahi’ e ia vai hau noa tatou e to tatou mau hoa Kerisetiano. (Petero 1, 2:17; 3:10, 11; 4:8; Petero 2, 1:5-7) Ia vai hau noa tatou, e titauhia ia aroha tatou te tahi i te tahi. (Ioane 13:34, 35; Ephesia 4:1, 2) E ite-maitai-hia to tatou aroha e to tatou hau ia tupu ta tatou mau tairururaa nunaa rau. I te hoê tairururaa i Costa Rica i te matahiti 1999, ua inoino te hoê taata hoo i te tauraa manureva no te mea ua faaapǐapǐ te mau Ite no reira tei haere mai e tii i te mau tia i ta ˈna vahi hoohooraa ma te opua ore. I te piti râ o te mahana, ua ite oia i te aroha e te hau i roto i te manavaraa aau tae ta te mau tia i fanaˈo, noa ˈtu e aita te mau Ite no reira i matau maitai ia ratou. I te mahana hopea, ua apiti atu te taata hoo i roto i te manavaraa e ua ani i te hoê haapiiraa bibilia.

19. No te aha e mea faufaa roa ˈi ia tapi tatou i te hau e te mau hoa faaroo?

¹⁹ E nehenehe te tapiraa tatou ma te aau haavare ore i te hau e to tatou mau taeae e tuahine pae varua, e ohipa i nia i to tatou hinaaro mau e tiai i te mahana o Iehova e ta ˈna ao apî i fafau mai. (Salamo 37:11; Petero 2, 3:13) Peneiaˈe e mea fifi no tatou ia vai hau noa e te tahi hoa faaroo. E nehenehe anei tatou e feruri e parahi ma te hau e o ˈna i roto i te Paradaiso? Mai te peu e ua inoino te hoê taeae ia tatou, e mea maitai ia ‘faite vave tatou ia ˈna.’ (Mataio 5:23, 24) E mea faufaa roa te reira ia hau tatou e o Iehova.—Salamo 35:27; Ioane 1, 4:20.

20. E nafea tatou e faaite ai e te “tiai” ra tatou?

²⁰ Te ‘tiai ra e te ru ra ˈtu’ anei tatou iho e ‘ia tae mai te mahana o te Atua’? E itehia to tatou hinaaro uˈana e ite i te hopea o te ino i roto i to tatou vai-moˈa-raa i roto i teie nei ao morare ore. Hau atu â, maoti ta tatou mau ohipa paieti e itehia ˈi to tatou hinaaro ru e ia tae mai te mahana o Iehova e ia ora i raro aˈe i te faatereraa a te Basileia. E na te tapiraa i te hau e to tatou mau hoa haamoriraa i teie nei e faaite i ta tatou tiairaa e ora i roto i te ao apî o te hau. Na roto i tera mau ravea e faaite ai tatou e te “tiai” ra tatou e te ‘ru atu ra ia tae mai te mahana o te Atua.’

[Nota i raro i te api]

Te haamanaˈo ra anei outou?

• Eaha te auraa e ‘ru atu ia tae mai te mahana o te Atua’?

• E nafea te ‘tiairaa’ e itehia ˈi i roto i to tatou haerea?

• No te aha e mea faufaa roa ˈi te mau ohipa “paieti”?

• E mea tia ia aha tatou ia roohia mai tatou e Iehova “ma te hau, ma te porao ore e te hapa ore”?

[Uiraa haapiiraa]

[Hohoˈa i te api 11]

E itehia te ‘tiairaa’ i roto i te mau ohipa haapao maitai

[Hohoˈa i te api 12]

E faaora te ohipa pororaa i te Basileia i te taata

[Hohoˈa i te api 14]

A tiai ai tatou i te mahana o Iehova, e tapi anaˈe i te hau e vetahi ê