Uiraa a te feia taio

E farii anei te mau Ite no Iehova i te mau tuhaa rii atoa o te toto?

E nenei-faahou-raa te pahonoraa i muri nei o te numera o te 15 no Tiunu 2000.

Te pahonoraa matamua, eita te mau Ite no Iehova e farii i te toto. Te tiaturi nei tatou e eita te ture a te Atua no nia i te toto e nehenehe e faaapîhia no te faatano atu i te mau manaˈo taui noa. E hiti mai râ te mau tumu parau apî no te mea e nehenehe te toto e faataa-ê-hia na roto i te mau tuhaa rahi e te mau tuhaa nainai aˈe o taua mau tuhaa rahi ra. Ia faaoti oia e farii aore ra eita i te reira, eita noa te hoê Kerisetiano e hiˈo i te vahi maitai e te vahi atâta o te rapaauraa. E tapitapi atoa oia i ta te Bibilia e parau ra e te faahopearaa o te reira i nia i to ˈna taairaa e te Atua Mana hope.

Mea huru ohie te mau tumu parau rahi. Ei tautururaa ia ite no te aha, e hiˈo anaˈe i te tahi huru tupuraa bibilia, i te pae tuatapaparaa e rapaauraa.

Ua parau te Atua ra o Iehova i to tatou tupuna o Noa e e mea tia ia hiˈo i te toto mai te hoê mea taa ê. (Genese 9:3, 4) I muri aˈe, ua faaite â te ture a te Atua na Iseraela i te moˈaraa o te toto: “E to te fetii o Iseraela, e to te feia atoa e purutia noa . . . ia amu i te toto ra, e tano maite tau mata i te reira taata i tei amu i te toto ra.” Ia patoi oia i te ture a te Atua, e nehenehe te hoê Iseraela e haaviivii ia vetahi ê; no reira te Atua i parau faahou ai e: “E tâpû ê atu vau ia ˈna i to ˈna ra nunaa.” (Levitiko 17:10) I muri aˈe, i te hoê apooraa i Ierusalema, ua faaoti te mau aposetolo e te mau matahiapo e ‘eiaha tatou e amu i te toto.’ Mea faufaa roa te na reiraraa, oia atoa eiaha e faaturi e e haamori i te idolo.—Ohipa 15:28, 29.

Eaha te auraa ‘eiaha e amu’ i taua tau ra? Aita te mau Kerisetiano i amu i te toto, mea apî aore ra mea putua, aita atoa ratou i amu i te iˈo o te hoê animara aita te toto i faatahehia i rapae. Oia atoa te maa i anoihia i te toto, mai te toti e toto to roto. E ofatiraa i te ture a te Atua te amuraa i te toto ia au i teie mau ravea atoa.—Samuela 1, 14:32, 33.

Aita te rahiraa o te taata i te tau tahito i haapeapea i te amuraa i te toto, mai ta tatou e nehenehe e ite i roto i te mau papai a Tertullien (senekele 2 e te 3 T.T.). Ei pahonoraa i te mau pariraa haavare e i amu na te mau Kerisetiano i te toto, ua faahiti Tertullien i te mau opu taata o tei haamau na i te mau parau faaau na roto i te inuraa i te toto. Ua tapao atoa oia e “i roto i te aroraa a te feia taputô, ua ote [vetahi] ma te poihâ mâha ore i te toto mahanahana â o te feia taparahi taata . . . no te rapaau i to ratou maˈi hopii.”

No te mau Kerisetiano, mea ino tera mau peu (noa  ˈtu e e rave vetahi no Roma i te reira no te faaora i te maˈi): “Eita matou e rave i te toto animara i roto i ta matou amuraa maa matau noa,” ta Tertullien ïa i papai. Ua faaohipa to Roma i te maa e toto to roto ei tamataraa i te taiva ore o te mau Kerisetiano mau. Ua na ô â Tertullien e: “I teie nei, te ui atu nei au ia outou, eaha tera, ua ite hoi outou e e faariaria [te mau Kerisetiano] i te toto animara, e manaˈo ïa outou e e hiaai ratou i te toto taata?”

I teie mahana, mea iti te taata e manaˈo e te mârôhia ra te mau ture a te Atua Mana hope ia parau te hoê taote e farii i te toto. E hinaaro mau â te mau Ite no Iehova e ora noa, ua faaoti papu atoa râ ratou e faaroo i te ture a Iehova no nia i te toto. Eaha ïa te auraa i te pae ravea rapaauraa no teie tau?

I te matauraahia i te faaohipa i te mau pâmuraa toto taatoa i muri aˈe i te Piti o te Tamaˈi rahi, ua taa i te mau Ite no Iehova e aita te reira e tuati ra e te ture a te Atua—e te reira noâ ta ratou e tiaturi ra. I muri aˈe râ, ua taui te rapaauraa. I teie mahana, e ere te rahiraa o te mau pâmuraa i te pâmuraa toto taatoa, e pâmuraa râ i te hoê o te mau tuhaa rahi o te toto: (1) te mau toropuru ura; (2) te mau toropuru tea; (3) te mau taoˈa tahi haaputua toto; (4)  te pape toto (terumu). Ia au i te huru o te hoê taata maˈi, e horoa paha te mau taote i te mau toropuru ura, te mau toropuru tea, te mau taoˈa tahi haaputua toto, aore ra te pape toto. Maoti te pâmuraa i teie mau tuhaa rahi, e nehenehe te hoê noa faito toto e operehia na te taata maˈi e rave rahi atu â. Te tiaturi nei te mau Ite no Iehova e e ofati te fariiraa i te toto taatoa aore ra i te hoê o tera na tuhaa rahi e maha, i te ture a te Atua. A tapao na e ua paruru te haapaoraa i teie tiaraa niuhia i nia i te Bibilia ia ratou i te fifi atâta e rave rahi, oia atoa i te mau maˈi mai te maˈi upaa e te heˈa mate e nehenehe e noaa mai na roto i te toto.

I te mea râ e e nehenehe te toto e vahihia na roto i te mau tuhaa nainai aˈe, e hiti mai te mau uiraa no nia i te mau tuhaa nainai aˈe o te mau tuhaa rahi o te toto. E nafea ia faaohipa i tera mau tuhaa nainai aˈe, e ia hiˈopoa te hoê Kerisetiano i te aha ia rave oia i ta ˈna faaotiraa e tia ˈi?

Mea taa ê roa te toto. Tae noa ˈtu te pape toto—e 90 % hoi pape to roto—mea rahi te oromona i roto, te miti ora ore, te enzyme, te maa, oia atoa te mau taoˈa maitai o te repo e te tihota. Te vai atoa ra te poroteina mai te albumine, te mau taoˈa haaputua, e te mau taoˈa aro maˈi, i roto i te pape toto. E faataa ê e e faaohipa te feia anohaa i te poroteina e rave rahi o te pape toto. Ei hiˈoraa, ua horoahia te taoˈa haaputua VIII na te feia eita to ratou toto e putua, e tahe haere noa râ. Aore ra ia roohia te hoê taata i te tahi maˈi, e patia paha te mau taote i te gammaglobuline, no roto mai i te pape toto o te hoê taata tei paruru-ê-na-hia. E faaohipahia te tahi atu â mau poroteina o te pape toto no te rapaau, te faaite ra râ na hiˈoraa i faahitihia aˈenei e nafea e haahia ˈi i nia i te hoê tuhaa rahi o te toto (te pape toto) ia roaa mai te mau tuhaa nainai aˈe. *

Mai te pape toto, e nehenehe atoa te tahi atu mau tuhaa rahi o te toto (te toropuru ura, te toropuru tea, te taoˈa tahi haaputua toto) e vahihia na roto i te mau tuhaa nainai aˈe. Ei hiˈoraa, e horoa te mau toropuru tea i te interféron e te interleukine, o te ravehia no te rapaau i te tahi mau maˈi tirotiro haapê e te mariri ai taata. Mai roto mai i te mau taoˈa tahi haaputua toto, e iritihia mai te hoê mea o te rapaau i te pepe. E te hamani-atoa-hia ra te tahi atu â mau raau o te faaohipa (i te omuaraa aˈe) i te mau mea no roto mai i te mau tuhaa o te toto. E ere tera mau rapaauraa i te pâmuraa o taua mau tuhaa rahi ra; e pinepine e faaohipahia te mau tuhaa nainai aˈe o te reira. E mea tia anei ia farii te mau Kerisetiano i teie mau tuhaa ei rapaauraa? Eita e tia ia matou ia pahono atu. Aita te Bibilia e horoa ra i te mau tatararaa rii atoa, no reira e mea tia e na te Kerisetiano taitahi e faaoti no ˈna iho ia au i to ˈna manaˈo haava i mua i te Atua.

E patoi vetahi i te mau mea atoa no roto mai i te toto (tae noa ˈtu i te mau tuhaa nainai aˈe i ravehia no te horoa i te puai parururaa taime poto). O ta ratou ïa i taa i te faaueraa a te Atua ‘eiaha e amu i te toto.’ Ua ite atoa ratou e i titau na ta ˈna ture ia Iseraela ia “faatahe” i te toto o te animara “i raro i te repo.” (Deuteronomi 12:22-24) No te aha e mea tano ai te reira? Inaha, no te faaineine i te gammaglobuline, te mau taoˈa haaputua no roto mai i te toto, e te vai ra ˈtu â, e titauhia ia haapue i te toto e ia haa i nia i te reira. No reira te tahi mau Kerisetiano e patoi ai i teie mau raau, mai ia ratou e patoi i te pâmuraa i te toto taatoa aore ra i na tuhaa rahi e maha o te toto. E tano ia faatura i to ratou tiaraa haavare ore e au i to ratou manaˈo haava.

Mea taa ê te faaotiraa a te tahi atu mau Kerisetiano. E patoi atoa ratou i te mau pâmuraa i te toto taatoa, te toropuru ura, te toropuru tea, te taoˈa tahi haaputua toto aore ra i te pape toto. E farii râ paha ratou ia rapaau te hoê taote ia ratou i te hoê tuhaa nainai aˈe no roto mai i te mau tuhaa rahi. I ǒ nei atoa, te vai ra te mau taa-ê-raa. E farii paha te hoê Kerisetiano i te hoê patia gammaglobuline, e farii râ paha oia aore ra eita i te hoê patia e tuhaa o te toropuru ura aore ra o te toropuru tea to roto. Hau atu â râ, eaha te aratai i te tahi  mau Kerisetiano ia faaoti e e nehenehe ta ratou e farii i te mau tuhaa nainai aˈe o te toto?

Ua tapao te “Uiraa a te feia taio” o Te Pare Tiairaa o te 1 no Tiunu 1990 (Farani) e e haere te mau poroteina pape toto (te mau tuhaa nainai aˈe) mai te toto o te hoê vahine hapû i roto atu i te tereraa toto taa ê o te feto. E horoa ˈtu ïa te mama na to ˈna aiû i te immunoglobuline, te hoê parururaa faufaa roa. Hau atu â, ia pohe te mau toropuru ura o te feto, e riro mai te mau tuhaa o te taˈitaˈi i te mataˈi ora ei bilirubine, te hoê taoˈa o te haere atu na roto i te pufenua o te mama e o te faaruehia e te mau ino o to ˈna tino. E faaoti paha te tahi mau Kerisetiano e i te mea e e nehenehe te mau tuhaa o te toto e haere i roto i te tahi atu taata i roto i teie tupuraa natura, e tia ia ratou ia farii i te hoê tuhaa o te toto no roto mai i te pape toto aore ra te mau toropuru.

Mai te peu e e nehenehe te mau manaˈo e te mau faaotiraa ia au i te manaˈo haava e taa ê, o te auraa anei ïa e e ere i te ohipa faufaa? Eita. E ohipa faufaa teie, e mea huru ohie râ. Te faaite ra teie tumu parau e e patoi te mau Ite no Iehova i te mau pâmuraa i te toto taatoa e i te mau tuhaa rahi o te toto. Te faaue ra te Bibilia i te mau Kerisetiano ‘eiaha e amu i te maa i afaihia i te idolo ra e te toto, e eiaha e faaturi.’ (Ohipa 15:29) No nia i te mau tuhaa nainai aˈe o te mau tuhaa rahi atoa o te toto, e mea tia e na te Kerisetiano taitahi e faaoti no ˈna iho ia au i to ˈna manaˈo haava, i muri aˈe i to ˈna feruri-maite-raa i roto i te pure.

Mea rahi te taata o te farii noa i te mau rapaauraa atoa o te nehenehe e haamaitai oioi ia ratou, noa ˈtu e ua ite-maitai-hia e mea atâta te hoê rapaauraa, mai te mau raau hamanihia i te toto. E faaitoito te Kerisetiano aau rotahi i te pee i te hoê huru hiˈoraa aano aˈe e te faito maitai aˈe o te ore e haapao i te mau tuhaa pae tino noa. Te mauruuru nei te mau Ite no Iehova i te mau tutavaraa no te horoa i te rapaauraa maitai roa, e te faito maitai ra ratou i te vahi atâta e te vahi maitai o te mau rapaauraa atoa. No nia râ i te mau raau hamanihia i te tuhaa o te toto, e haafaufaa maite ratou i ta te Atua e parau ra e i to ratou iho taairaa e te Tumu o te ora.—Salamo 36:9.

Auê ïa haamaitairaa no te hoê Kerisetiano ia tiaturi oia mai te papai salamo tei na ô e: “E mahana . . . e te paruru te Atua ra o Iehova; e horoa mai Iehova i te maitai e te hanahana: e aore roa a ˈna maitai e tapea i te feia haerea piˈo ore ra. E Iehova . . . , e ao to te taata i tiaturi ia oe ra.”—Salamo 84:11, 12.

[Nota i raro i te api]

[Tumu parau tarenihia i te api 31]

UIRAA E AU IA UI I TE TAOTE

Mai te peu e e tâpûhia outou aore ra e rapaauhia i te hoê raau hamanihia i te toto, a ui atu:

Ua ite anei te pǔpǔ rapaau taatoa e, ei Ite no Iehova, eita roa ˈtu vau e farii i te pâmuraa toto (toto taatoa, toropuru ura, toropuru tea, taoˈa tahi haaputua toto, aore pape toto)?

Ia horoahia ˈtu te hoê raau tei hamanihia paha i te pape toto, te toropuru ura, te toropuru tea, aore ra te taoˈa tahi haaputua toto, a ui atu:

Ua hamanihia anei te raau i te hoê o na tuhaa rahi e maha o te toto? Mai te peu e e, e nehenehe anei oe e faataa mai eaha to roto?

Ehia rahiraa o teie raau no roto mai i te toto e horoahia mai na ˈu, e e nafea?

Ia faatia to ˈu manaˈo haava ia ˈu ia farii i teie tuhaa, eaha te vahi atâta i te pae rapaauraa?

Ia ore to ˈu manaˈo haava e faatia ia ˈu ia farii i teie tuhaa, eaha ˈtu â ˈi te rapaauraa?

Ia oti ia ˈu i te feruri atu â i teie tumu parau, afea vau e nehenehe ai e faaite atu i ta ˈu faaotiraa?