E hinaaro anei outou e ora e a muri noa ˈtu?

“AITA vau e taiâ ra i te pohe,” ta te hoê vahine ruhiruhia i Tapone ïa i parau. “Te peapea nei râ vau i te mea e e taa ê au i teie mau tiare.” Ua taa i te hoê tavini Kerisetiano o tei farerei ia ˈna i to ˈna fare, i teie mau parau, no te mea e ô nehenehe mau ta tera vahine. Te oaoa mau ra e rave rahi o te parau ra e aita ratou e taiâ ra i te pohe, i te mau mea faahiahia o te poieteraa e te hinaaro mau ra paha ratou e ora e a muri noa ˈtu.

Ora e a muri noa ˈtu? E mea rahi o te patoi ra i tera manaˈo. E parau atoa paha vetahi e e aita ratou e anaanatae ra e ora e a muri noa ˈtu. No te aha te taata e manaˈo ai mai te reira?

Te ora mure ore—e mea haumani anei?

Te manaˈo ra vetahi e e mea haumani ia ora e a muri noa ˈtu. Te manaˈo ra paha ratou i te huru oraraa haumani o te taata e rave rahi i faatuhaahia, aita ˈtu ta ratou e ohipa maori râ te parahi-noa-raa e te mataitai-noa-raa i te afata teata. Mai te peu e e tera atoa to outou manaˈo, e hiˈo anaˈe ïa i ta te aivanaa ihi reva teitei o Robert Jastrow i parau i to ˈna uiraahia e e haamaitairaa anei te ora mure ore aore ra e ati. Ua pahono o Jastrow e: “E riro te reira ei haamaitairaa no te feia e feruriraa ui maere e e hiaai mâhâ ore to ratou no te haapii. E mahanahana roa ratou i te manaˈo e e tau mure ore â te vai ra i mua ia ratou no te apo â i te ite. No vetahi ê râ, tei manaˈo e ua noaa ia ratou te mau mea atoa e tia ia ite e tei ore i haamahora i to ratou feruriraa, e riro ïa ei ati rahi mau. Eita ratou e ite e nafea ratou ia faaohipa i to ratou taime.”

Noa ˈtu e e manaˈo outou e mea haumani te ora mure ore aore ra eita, tei to outou noa huru feruriraa. Mai te peu e ‘e feruriraa ui maere e e hiaai mâha ore to outou no te haapii,’ a manaˈo na i ta outou e nehenehe e rave i roto i te mau tuhaa o te ohipa aravihi, upaupa, paturaa, faaapu, aore ra i roto i te tahi atu tapiraa e au ta outou e anaanatae ra. E horoa mai te ora mure ore i nia i te fenua nei i te mau tiaturiraa faahiahia roa no te faarahi i to outou mau aravihi i roto i te mau tuhaa ohipa e rave rau.

Oia mau, e faariro te neheneheraa e faaite e e fanaˈo i te here e a muri noa ˈtu, i te ora mure ore ei mea mauruuru mau. Ua poietehia tatou e te aravihi no te faaite i te here, e e oraora maitai tatou ia ite anaˈe e te herehia ra tatou. E hopoi mai te faaiteraa i te here mau i te mauruuru hohonu o te ore e iti mai a mairi ai te tau. E pûpû mai te oraraa e a muri noa ˈtu i te ravea hopea ore no te atuatu i te here eiaha noa i te taata-tupu, i te Atua iho â râ. “Te hinaaro ra . . . te hoê taata i te Atua,” ta te aposetolo Paulo ïa i parau, “oia te itehia mai e ana.” (Korinetia 1, 8:3) Auê ïa tiaturiraa faahiahia roa—ia ite e ia itehia mai e te Arii o te ao atoa nei! Hau atu â, aita e hopearaa no te haapii no nia i to tatou Atua Poiete î i te here. No reira ˈtura, e nafea ïa te ora mure ore e riro ai ei mea haumani e te anaanatae ore?

Te oraraa—poto e te faufaa

Te manaˈo ra vetahi e no te poto o te oraraa i riro ai te reira ei mea faufaa roa. E faaau paha ratou te oraraa i te auro, o te itehia i roto noa i te mau faito iti. Mai te peu e e itehia te auro i te mau vahi atoa, ta ratou e parau ra, e iti mai ïa to ˈna faufaa. Noa ˈtu râ, e vai nehenehe noa iho â te auro. Papu maitai e mai te reira atoa te oraraa.

E nehenehe tatou e faaau te fanaˈoraa i te ora mure ore i te noaa-rahi-raa te mataˈi. E haafaufaa rahi taa ê te mau ihitai i te mataˈi i roto i te hoê pahi hopu e fifihia ra i te hoˈi mai i nia. I muri aˈe ratou e faaorahia ˈi, e manaˈo anei outou  e e amuamu ratou ma te mauruuru ore i te fanaˈo-rahi-faahouraa mai te mataˈi? Eita roa ˈtu ïa!

Mai tera mau ihitai, e nehenehe tatou e faaorahia ma te tiaturiraa rahi atu â râ e ora e a muri noa ˈtu. “E utua te pohe no te hara,” ta te aposetolo Paulo ïa i papai, “area te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.” (Roma 6:23) Na roto i te tusia taraehara o Iesu, e iriti ê te Atua i te huru tia ore o te taata e te pohe e e pûpû mai oia i te ô o te ora mure ore na te huitaata auraro. Auê tatou i te mauruuru i tera huru faanahoraa î i te here!

E no te feia herehia e outou?

E manaˈo paha vetahi mau taata: ‘E no te feia herehia e au? Aita e auraa rahi to te ora mure ore i nia i te fenua nei no ˈu mai te peu e aita ratou na muri ia ˈu.’ Peneiaˈe ua farii outou i te ite o te Bibilia e ua haapii outou no nia i te ravea e fanaˈo ai i te ora mure ore i nia i te hoê fenua paradaiso. (Luka 23:43; Ioane 3:16; 17:3) E hinaaro iho â ïa outou e i reira atoa te mau melo o to outou iho utuafare, te tahi atu feia herehia, e te mau hoa herehia, ia fanaˈo ratou i te hoê â mau oaoaraa o ta outou e tiaturi ra e fanaˈo i roto i te ao apî parau-tia fafauhia a te Atua.—Petero 2, 3:13.

Eaha râ mai te peu e eita to outou mau hoa e te feia herehia e outou e anaanatae e ora e a muri noa ˈtu i nia i te hoê fenua paradaiso? Eiaha e vaiiho i te reira ia haaparuparu ia outou. A tamau noa i te farii i te ite mau no roto mai i te mau Papai e a ohipa ia au i te reira. Ua papai te aposetolo Paulo e: “Eaha hoi oe i ite ai, e tera ra vahine, e eita to tane e ora ia oe? e eaha hoi oe i ite ai, e tera tane, e eita to vahine e ora ia oe?” (Korinetia 1, 7:16) E nehenehe te taata e taui. Ei hiˈoraa, ua taui te huru o te hoê taata i patoi na i te Kerisetianoraa i te hoê taime, e i muri aˈe ua riro mai oia ei matahiapo i roto i te amuiraa Kerisetiano. Te parau ra oia e: “Te mauruuru rahi nei au e ua tamau noa to ˈu utuafare iti i te pee i te mau faaueraa tumu bibilia noa ˈtu ta ˈu mau patoiraa atoa.”

Te haapao mau nei te Atua i to outou ora e te oraraa o te feia herehia e outou. Oia mau, “aita roa [Iehova] i hinaaro e ia pohe atu te hoê, ia noaa paatoa râ te tatarahapa.” (Petero 2, 3:9; MN) Te hinaaro nei te Atua ra o Iehova ia ora outou e te feia herehia e outou e a muri noa ˈtu. Mea rahi aˈe to ˈna here i to te feia tia ore. (Isaia 49:15) No te aha ïa e ore ai e faahotu i te taairaa maitai e te Atua? E nehenehe paha ïa outou e tauturu i te feia herehia e outou ia na reira atoa. Noa ˈtu e aita ratou e tiaturi ra i teie nei e ora e a muri noa ˈtu, e nehenehe paha ratou e taui ia ite ratou ia outou ia ohipa ia au maite i te ite mau o te Bibilia.

E no te feia herehia e outou o tei pohe paha? No te mau mirioni feia pohe, te pûpû ra te Bibilia i te tiaturiraa faahiahia roa o te tia-faahou-raa, te araraa mai mai te pohe mai e te oraraa i roto i te Paradaiso i nia i te fenua nei. Ua fafau Iesu Mesia e: ‘Te fatata mai nei te hora e haere mai ai te feia atoa i roto i te apoo ra i rapae.’ (Ioane 5:28, 29) E tae noa ˈtu te feia i pohe ma te ore i ite i te Atua, e ora faahou mai ratou, mai ta te Bibilia e faahiti ra: “E tia-faahou-raa to tei pohe, te feia parau-tia e te feia parau-tia ore.” (Ohipa 24:15) Auê te oaoa mau i te farii i tera mau taata ia ora faahou mai ratou!

Te ora mure ore—te hoê tiaturiraa oaoa

Mai te peu e e itehia ia outou te oaoa e te mauruuru i teie nei noa ˈtu te mau fifi o teie nei ao, e papu maitai e e oaoa outou i te ora mure ore i nia i te hoê fenua paradaiso. Tera râ, i to te hoê  vahine Ite no Iehova faaiteraa i te mau haamaitairaa ta te ora mure ore e hopoi mai, ua parau te hoê vahine e: “Aita vau e hinaaro ra e ora e a muri noa ˈtu. E navai noa vau i teie oraraa e 70 aore ra e 80 matahiti.” Ua ui atura te hoê matahiapo Kerisetiano i reira i taua taime ra, ia ˈna: “Ua feruri aˈena anei oe i te huru o ta oe mau tamarii mai te peu e e pohe oe?” Ua tahe maira te roimata i nia i to ˈna paparia i to ˈna manaˈoraa i te oto ta ratou e ite ia pohe to ratou mama. “No te taime matamua, ua taa ˈtura ia ˈu i to ˈu miimii,” ta ˈna ïa i faˈi, “e ua nehenehe au e ite e e ere te ora mure ore i te hoê tiaturiraa miimii e titau râ te reira ia ora no vetahi ê.”

E manaˈo paha vetahi e e ere i te mea faufaa mai te peu e e ora aore ra e pohe ratou. E mea tâuˈa râ na Tei horoa mai i te ora, o tei parau e: “Te ora nei au ra, aore roa o ˈu e mauruururaa i te pohe o te taata ino ra; ia fariu mairâ te taata i ta ˈna parau ino ia ora.” (Ezekiela 33:11) I te mea e te haapao maitai ra te Atua i te ora o te feia ino atoa, e papu maitai ïa e mea haapao roa ˈtu â oia i te feia e here ra ia ˈna.

Ua tiaturi o Davida, arii no Iseraela i tahito ra, i te haapao î i te here o Iehova. Ua parau Davida i te hoê taime e: “Faarue noâ tau metua tane e tau metua vahine ia ˈu, ei reira Iehova e rave mai ai ia ˈu.” (Salamo 27:10) Ua tiaturi papu o Davida i te here o to ˈna na metua ia ˈna. Tera râ, noa ˈtu e e faarue mai to ˈna na metua—to ˈna na taairaa taata piri roa ˈˈe—ia ˈna, ua ite oia e e eita o Iehova e faarue ia ˈna. No to ˈna here e to ˈna tâuˈa, te pûpû maira Iehova i te ora mure ore e te auhoaraa hopea ore e o ˈna. (Iakobo 2:23) Eita anei e tia ia farii tatou ma te mauruuru rahi i teie mau ô faahiahia roa?