O Iehova to tatou tauturu

“No ǒ ia Iehova ra te tauturu ia ˈu, o tei hamani i te mau raˈi e te fenua.”—SALAMO 121:2.

1, 2. (a) No te aha e nehenehe ai e parau e e hinaaro pauroa tatou i te tauturu i te tahi taime? (b) Mai teihea huru Tauturu o Iehova?

 O VAI i rotopu ia tatou o te ore roa ˈtu e hinaaro i te tauturu? E hinaaro pauroa iho â tatou i te tauturu i te tahi taime—no te faaruru i te hoê fifi teimaha, no te faaoromai i te hoê ereraa mauiui, no te mau maite i roto i te hoê tamataraa fifi. I te taime e hinaarohia ˈi i te tauturu, e pinepine te taata i te fariu atu i te hoê hoa î i te here. E mea ohie aˈe paha ia faaruru i te hoê faateimaharaa ia faaitehia ˈtu te reira i taua huru hoa ra. E otia râ to te tauturu ta te hoê hoa e nehenehe e rave. Hau atu â, eita noa paha vetahi ê e nehenehe e na reira ia hinaarohia i te tauturu.

² Te vai ra râ te hoê Tauturu tei ia ˈna hoi te mana e te mau ravea otia ore. Hau atu â, te haapapu maira oia e eita roa ˈtu oia e faarue ia tatou. O oia Tei faahitihia te iˈoa e te fatu salamo o tei parau ma te tiaturi taatoa e: “No ǒ ia Iehova ra te tauturu ia ˈu.” (Salamo 121:2) No te aha teie fatu salamo i papu ai e e hinaaro Iehova e tauturu ia ˈna? No te pahono i tera uiraa, e hiˈopoa anaˈe i te Salamo 121. E tauturu te na reiraraa ia tatou ia ite no te aha tatou atoa e nehenehe ai e hiˈo ia Iehova ma te tiaturi mai to tatou Tauturu.

Te tumu o te tauturu aueue ore

3. Ua hiˈo paha te mata o te fatu salamo i teihea mau mouˈa, e no te aha?

³ Ua haamata te fatu salamo ma te haamahitihiti i te tiaraa poiete o Iehova ei niu no te tiaturi: “E hiˈo anei tau mata i te mau aivi? e noaa anei te tauturu ia ˈu i reira? No ǒ ia Iehova ra te tauturu ia ˈu, o tei hamani i te mau raˈi e te fenua.” (Salamo 121:1, 2) Aita te mata o te fatu salamo i hiˈo noa i te mau mouˈa atoa. I te papairaahia teie mau parau, tei Ierusalema te hiero o Iehova. Ua riro tera oire, i nia i te mau mouˈa o Iuda, ei parahiraa taipe o Iehova. (Salamo 121:1, 2) Ua hiˈo paha te mata o te fatu salamo i te mau mouˈa o Ierusalema i reira te paturaahia te hiero o Iehova, ma te tiaturi e fariu ia Iehova ra no te ani i te tauturu. No te aha te fatu salamo i papu roa ˈi e e nehenehe ta Iehova e tauturu ia ˈna? No te mea o Oia “tei hamani i te mau raˈi e te fenua.” Te na ô mau ra te fatu salamo e, ‘Papu maitai e aita hoê aˈe mea e nehenehe e tapea i te Atua Poiete mana hope ia tauturu mai ia ˈu!’—Isaia 40:26.

4. Mea nafea to te fatu salamo faaiteraa e te haapao noa ra Iehova i te mau hinaaro o to ˈna nunaa, e no te aha e manaˈo tamahanahana ˈi te reira?

⁴ Ua faataa te fatu salamo i muri iho e te haapao noa ra Iehova i te mau hinaaro o ta ˈna mau tavini: “E ore oia e tuu noa i to avae ia pahee noa na: e ore tei tiai ia oe e varea i te taoto: inaha, o tei tiai ia Iseraela ra, e ore ïa e tiaruhi noa ˈtu, e ore hoi e taoto.” (Salamo 121:3, 4) Eita te Atua e vaiiho noa i tei tiaturi ia ˈna “ia pahee” aore ra ia hiˈa eita ˈtu ai ratou e tia faahou mai. (Maseli 24:16) No te aha e ore ai? No te mea e au Iehova i te hoê tiai mamoe araara maitai e tiai ra i ta ˈna mau mamoe. E ere anei tera i te manaˈo tamahanahana? Eita oia e tapo i to ˈna mata no te hoê taime i nia i te mau hinaaro o to ˈna nunaa. E tiai maite oia ia ratou i te ao e te rui.

5. No te aha i parauhia ˈi e tei te “rima atau” o Iehova?

⁵ Ma te tiaturi e o Iehova te Paruru taiva ore o to ˈna nunaa, ua papai te fatu salamo e: “O Iehova te tiai ia oe; o Iehova to maru i to rima atau ra. E ore oe e pohe i te mahana i te ao, e ore atoa i te marama i te rui.” (Salamo 121:5, 6) No te hoê ratere haere avae i Hitia o te râ no ropu, e parururaa hinaarohia te hoê vahi maru i mua i te  ǎhu o te mahana. E au Iehova i te hoê maru no to ˈna nunaa, a paruru atu ai ia ratou i te ǎhu veavea o te ati. A tapao na e ua parauhia e tei te “rima atau” o Iehova. I roto i te tamaˈi i tahito ra, aita te rima atau o te faehau i paruru-roa-hia e te paruru, tei mauhia hoi e te rima aui. E nehenehe te hoê hoa taiva ore e paruru ma te tia e ma te aro i te pae atau o te faehau. Mai taua hoa ra, te tia ra Iehova ma te taiva ore i pihai iho i to ˈna feia haamori, ma te ineine noa i te tauturu ia ratou.

6, 7. (a) E nafea te fatu salamo e haapapu mai ai e eita roa ˈtu Iehova e faaea i te tauturu i to ˈna nunaa? (b) No te aha tatou e nehenehe ai e tiaturi mai te fatu salamo?

⁶ E faaea anei Iehova i te tauturu i to ˈna nunaa? Eita roa ˈtu ïa. Ua faaoti te fatu salamo e: “Na Iehova oe e tiai i te mau ino atoa ra; na ˈna oe e tiai ia ora. Na Iehova e tiai i to haereraa ˈtu e te hoˈiraa mai, i teie nei e a muri noa ˈtu.” (Salamo 121:7, 8) A tapao na e ua taui te taata papai i te faahitiraa mai te tau nei i te tau a muri. Na mua ˈtu, i roto i te irava 5, ua parau te fatu salamo e: “O Iehova te tiai ia oe.” I roto râ i teie mau irava, teie ta te fatu salamo i papai: “Na Iehova oe e tiai.” Ua papu ïa i te feia haamori mau e e tae roa ta Iehova tauturu i te tau no a muri aˈe. Noa ˈtu eaha te vahi ta ratou e haere, te ati ta ratou e faaû, e tauturu noa oia ia ratou.—Maseli 12:21.

⁷ Oia mau, ua tiaturi te taata papai i te Salamo 121 e e tiai te Atua Poiete mana hope i ta ˈna mau tavini ma te mǎrû o te hoê tiai mamoe î i te here e te haapao maitai o te hoê tiai araara noa. E rave rahi tumu ta tatou no te tiaturi mai te fatu salamo, no te mea eita Iehova e taui. (Malaki 3:6, MN) Te auraa anei e e fanaˈo noa tatou i te parururaa i te pae tino? Eita, a faariro noa ˈi râ tatou ia ˈna mai to tatou Tauturu, e tiai oia ia tatou i te mau mea atoa o te nehenehe e faaino ia tatou i te pae varua. E mea tia iho â ia ui, ‘E nafea Iehova e tauturu mai ai?’ E hiˈopoa anaˈe e maha ravea e tauturu mai ai oia. I roto i teie tumu parau, e tauaparau tatou e mea nafea to ˈna tautururaa i ta ˈna mau tavini i te mau tau bibilia. I roto i te tumu parau i muri nei, e hiˈopoa tatou e nafea oia e tauturu ai i to ˈna nunaa i teie tau.

Tauturu a te mau melahi

8. No te aha e ere ai i te mea maere e e anaanatae rahi to te mau melahi i te maitai o te mau tavini a te Atua i te fenua nei?

⁸ Te faatere ra Iehova ahuru te tausaniraa i te manotini melahi. (Daniela 7:9, 10) Te rave ra teie mau tamaiti varua ma te haapao maitai i to ˈna hinaaro. (Salamo 103:20) Ua ite maite ratou e e here rahi to Iehova i to ˈna feia haamori e te hinaaro ra oia e tauturu ia ratou. E ere ïa i te mea maere e mea anaanatae rahi na te mau melahi te maitai o te mau tavini a te Atua i te fenua nei. (Luka 15:10) Papu maitai ïa e e mea au iho â na te mau melahi to ratou faaohiparaahia e Iehova no te tauturu i te mau taata. Mea nafea to Iehova faaohiparaa i te mau melahi no te tauturu i ta ˈna mau tavini i tahito ra?

9. A horoa i te hoê hiˈoraa e mea nafea to te mau melahi haamanaraahia e te Atua no te paruru i te mau taata haapao maitai.

⁹ Ua haamanahia te mau melahi e te Atua no te paruru e no te faaora i te mau taata haapao maitai. Ua tauturu e piti melahi ia Lota e ta ˈna na tamahine ia ape i te haamouraa o Sodoma e o Gomora. (Genese 19:1, 15-17) Ua haapohe te hoê noa melahi 185 000 faehau Asura o tei haamǎtaˈu ia Ierusalema. (Te mau arii 2, 19:35) I to Daniela taoraraahia i roto i te apoo o te mau liona, “ua tono” Iehova “i tana melahi, e ua opani oia i te vaha o te mau liona.” (Daniela 6:21, 22) Ua tuu mai te hoê melahi i te aposetolo Petero i rapaeau i te fare tapearaa. (Ohipa 12:6-11) Te faahiti ra te Bibilia e rave rahi atu hiˈoraa o te parururaa a te mau melahi, o te haapapu ra i ta te Salamo 34:7 e parau ra e: “Te patia nei te melahi a Iehova i te puhapa e ati noa ˈˈe i te feia mǎtaˈu ia ˈna, e ua faaora ia ratou.”

10. Mea nafea to Iehova faaohiparaa i te hoê melahi no te faaitoito i te peropheta Daniela?

¹⁰ I te tahi taime, ua faaohipa Iehova i te mau melahi no te faaitoito e no te faaetaeta i te mau taata haapao maitai. Te itehia ra te hoê hiˈoraa putapû i roto i te Daniela pene 10. I tera ra tau, ua fatata paha Daniela i te 100 matahiti. Ua toaruaru  roa te peropheta, e au ra e no te vai-ano-raa o Ierusalema e no te taere o te patu-faahou-raa o te hiero. Ua haapeapea atoa oia i muri aˈe i te iteraa i te hoê orama riaria. (Daniela 10:2, 3, 8) Ua tono Iehova ma te here i te hoê melahi no te faaitoito ia ˈna. E rave rahi taime to te melahi haamanaˈoraa ia Daniela e mea “here-rahi-hia” oia i te aro o te Atua. Te faahopearaa? Ua parau te peropheta ruhiruhia i te melahi e: “Ua faaetaeta mai . . . oe ia ˈu.”—Daniela 10:11, 19.

11. Eaha te tahi hiˈoraa o to te mau melahi faaohiparaahia no te aratai i te ohipa pororaa i te parau apî maitai?

¹¹ Ua faaohipa atoa Iehova i te mau melahi no te aratai i te ohipa pororaa i te parau apî maitai. Ua faaue te hoê melahi ia Philipa ia poro no nia i te Mesia i te hoê eunuka Etiopia, o tei bapetizohia i muri iho. (Ohipa 8:26, 27, 36, 38) Tau taime i muri aˈe, o te hinaaro ïa o te Atua e ia porohia te parau apî maitai i te mau Etene peritome-ore-hia. I roto i te hoê orama, ua fa mai te hoê melahi ia Korenelio, te hoê Etene e mǎtaˈu ra i te Atua, e ua faaue ia ˈna ia tii i te aposetolo Petero. I to te mau vea a Korenelio iteraa ia Petero, teie ta ratou i parau: “O Korenelio . . . i aˈohia mai oia e te hoê melahi moˈa, e tipapa ia oe e haere i to ˈna ra utuafare, ia ite oia i ta oe na parau.” Ua farii Petero i tera aniraa ma te haere ia Korenelio ra, e ua riro maira te Etene peritome-ore-hia matamua ei melo o te amuiraa Kerisetiano. (Ohipa 10:22, 44-48) A feruri na i to outou huru i te iteraa e ua tauturu te hoê melahi ia outou ia farerei i te hoê taata aau farii e tano!

Tauturu maoti te varua moˈa

12, 13. (a) No te aha e tumu papu ai ta te mau aposetolo a Iesu no te tiaturi e e nehenehe te varua moˈa e tauturu ia ratou? (b) Mea nafea to te varua moˈa haamanaraa i te mau Kerisetiano no te senekele matamua?

¹² Hou rii i to ˈna poheraa, ua haapapu Iesu i ta ˈna mau aposetolo e eita oia e vaiiho ia ratou ma te tauturu ore. E horoa te Metua i te hoê ‘faaaˈo, te varua moˈa’ na ratou. (Ioane 14:26) E tumu papu ta te mau aposetolo no te tiaturi e e nehenehe te varua moˈa e tauturu ia ratou. Inaha, ua î te mau Papai faauruhia i te mau hiˈoraa o to Iehova faaohiparaa i te varua moˈa, te puai rahi roa ˈˈe o te mau puai atoa no te tauturu i to ˈna nunaa.

¹³ Ua faaohipahia te varua moˈa e rave rahi taime no te haamana i te taata no te rave i to Iehova hinaaro. Ua haamana te varua moˈa i te mau Tavana ia faaora ia Iseraela. (Te mau tavana 3:9, 10; 6:34) Ua haamana terâ varua i te mau Kerisetiano no te senekele matamua ia tamau i te poro ma te mǎtaˈu ore noa ˈtu te mau huru patoiraa atoa. (Ohipa 1:8; 4:31) Ua haapapu puai mau to ratou manuïaraa i te rave i ta ratou taviniraa i te ohipa a te varua moˈa. Eaha ˈtu â te nehenehe e faataa e mea nafea te mau taata ‘haapii-ore-hia e te itea ore’ i nehenehe ai e haaparare i te poroi o te Basileia e ati aˈe te ao matauhia i tera ra tau?—Ohipa 4:13; Kolosa 1:23.

14. Mea nafea to Iehova faaohiparaa i to ˈna varua moˈa no te haamaramarama i to ˈna nunaa?

¹⁴ Ua faaohipa atoa Iehova i to ˈna varua moˈa no te haamaramarama i to ˈna nunaa. Ma te tauturu a te varua o te Atua, ua nehenehe Iosepha e tatara i to Pharao mau moemoeâ tohu. (Genese 41:16, 38, 39) Na roto i to ˈna varua, ua rave Iehova e ia faaitehia ta ˈna mau opuaraa i te feia haehaa, ia hunahia râ i te feia teoteo. (Mataio 11:25) No reira, no nia i te mau mea ta Iehova e vaiiho “no te feia i hinaaro ia ˈna,” ua parau te aposetolo Paulo e: ‘Ua faaite mai te Atua ia tatou i taua mau mea ra i to ˈna varua.’ (Korinetia 1, 2:7-10) Maoti noa te tauturu a te varua moˈa e nehenehe ai te hoê taata e maramarama mau i to te Atua hinaaro.

 Tauturu no roto mai i te Parau a te Atua

15, 16. Eaha tei parauhia ia Iosua ia rave no te ohipa ma te paari?

¹⁵ “E mea maitai” ta Iehova Parau faauruhia “ei haapiiraa,” e e tauturu te reira i te mau tavini a te Atua ia ‘aravihi roa, ia ineine roa no te mau ohipa maitatai atoa ra.’ (Timoteo 2, 3:16, 17, MN) Te vai ra i roto i te Bibilia e rave rahi hiˈoraa o to te nunaa o te Atua i tahito ra tautururaahia e te mau tuhaa o ta ˈna Parau i papai-aˈena-hia.

¹⁶ Ua tauturu te mau Papai ia horoa i te aratairaa papu na te feia haamori o te Atua. I te horoaraahia te hopoia e aratai ia Iseraela ia Iosua ra, ua parauhia ia ˈna e: “Eiaha te buka ture na [tei papaihia e Mose] ia taa ê atu i roto i to vaha, ia haamanaˈo maite oe i te reira i te rui e te ao, ia haapao hua oe i tei papai-atoa-hia i roto ra, ei reira e maitai ai to oe haerea, ei reira oe e [ohipa ˈi ma te paari].” A tapao na e aita te Atua i fafau ia Iosua i te tahi mau niniiraa semeio o te paari. Ia taio e ia feruriruri râ Iosua i te “buka ture,” ei reira ïa oia e ohipa ˈi ma te paari.—Iosua 1:8; MN; Salamo 1:1-3.

17. Mea nafea Daniela e te arii ra o Iosia i te tautururaahia e te mau tuhaa o te mau Papai e vai ra ia raua ra?

¹⁷ Ua tauturu atoa te Parau a te Atua i papaihia ia faaite i to ˈna hinaaro e ta ˈna opuaraa. Ua haroaroa Daniela, ei hiˈoraa, maoti ta Ieremia mau papai ehia maororaa e ano noa ˈi Ierusalema. (Ieremia 25:11; Daniela 9:2) A hiˈo atoa na i tei tupu i te roaraa o te faatereraa a Iosia, te arii no Iuda. Hou tera tau, ua atea ê te nunaa ia Iehova e aita iho â te mau arii i papai i te hoê hohoˈa o te Ture na ratou iho e i haapao i te reira. (Deuteronomi 17:18-20) A tataîhia ˈi râ te hiero, ua itehia mai “te buka ture,” tei papaihia paha e Mose. Peneiaˈe teie te papai tumu tei faaotihia fatata e 800 matahiti na mua ˈtu. I muri aˈe i to ˈna faarooraa i te taioraa i te mau mea e vai ra i roto, ua taa ˈtura ia Iosia e ua faarue te nunaa i to Iehova hinaaro, e ua faaoti papu aˈera te arii e rave i tei papaihia i roto i te buka. (Te mau arii 2, 22:8; 23:1-7) E ere anei i te mea maramarama e ua tauturuhia te nunaa o te Atua i tahito ra e te mau tuhaa o te mau Papai Moˈa e vai ra ia ratou ra?

Tauturu na roto i te mau hoa faaroo

18. No te aha e nehenehe ai e parau e o Iehova te tumu o te tauturu i te mau taime atoa e tauturu ai te hoê taata haamori mau i te tahi atu?

¹⁸ E pinepine Iehova i te tauturu na roto i te mau hoa faaroo. Oia mau, i te mau taime atoa e  tauturu ai te hoê taata haamori mau i te tahi atu, o te Atua ïa te tumu. No te aha tatou e nehenehe ai e na reira i te parau? No e piti tumu. A tahi, e ohipa ta te varua moˈa o te Atua i roto. E faatupu taua varua ra i te mau hotu, tae noa ˈtu te aroha e te maitai, i roto i te feia e imi ra i to ˈna mana. (Galatia 5:22, 23, MN) No reira, ia turaihia te hoê tavini a te Atua ia tauturu i te tahi atu tavini, e haapapuraa ïa te reira e te ohipa ra te varua o Iehova. A piti, ua hamanihia tatou ma to te Atua huru. (Genese 1:26) E nehenehe ïa tatou e faahotu i to ˈna mau ateributi, tae noa ˈtu to ˈna hamani maitai e to ˈna aumihi. No reira, i te mau taime atoa e tauturu ai te hoê tavini a Iehova i te tahi atu tavini, te faaitehia ra ïa te huru o te Tumu mau o tera tauturu.

19. Ia au i tei papaihia i roto i te Bibilia, mea nafea to Iehova tautururaa na roto i te mau hoa faaroo?

¹⁹ I te mau tau bibilia, mea nafea to Iehova tautururaa na roto i te mau hoa faaroo? Ua turai pinepine Iehova i te hoê o ta ˈna mau tavini ia aˈo i te tahi atu, mai ia Ieremia i aˈo no te faaora ia Baruka. (Ieremia 45:1-5) I te tahi taime, ua turaihia te feia haamori mau ia horoa i te tauturu materia na te mau hoa faaroo, mai to te mau Kerisetiano i Makedonia e i Ahaia faaiteraa i te itoito no te tauturu i to ratou mau taeae veve i Ierusalema. Ua tapao te aposetolo Paulo e ua faatupu tera aau horoa noa e tano “i te haamaitai i te Atua.”—Korinetia 2, 9:11.

20, 21. I roto i teihea mau tupuraa i faaetaetahia ˈi te aposetolo Paulo e te mau taeae no Roma?

²⁰ Te mea o te haaputapû iho â râ, o te mau aamu ïa o to te mau tavini a Iehova tutavaraa i te faaetaeta e i te faaitoito te tahi i te tahi. A hiˈo na i te aposetolo Paulo. A haere ai oia i Roma, ei taata tapeahia, ua tere atu Paulo na nia i te purumu Roma matauhia ei eˈa Appienne. E mea au ore iho â râ te tuhaa hopea o te tere, no te mea e haere atu te mau ratere na roto i te hoê fenua vari e te haehaa. * Ua ite te mau taeae o te amuiraa no Roma e te haere maira Paulo. E nafea ratou? E tiai anei ratou i roto i to ratou iho fare i roto i te oire ia tae roa mai o Paulo a farii atu ai ia ˈna?

²¹ Te faaite maira te taata papai Bibilia ra o Luka, o tei tere atu na muri ia Paulo, i tei tupu: “E ite aˈera te mau taeae i reira ia matou, ua haere maira ratou i Apio Phoro, e te Tabereno Toru ra, farerei maira ia matou.” E nehenehe anei outou e feruri i te tupuraa? Ma te ite e te haere maira Paulo, ua tere te hoê pǔpǔ taeae no Roma e farerei ia ˈna. Te tiai maira te tahi tuhaa o te pǔpǔ i te matete no Apio, tei matau-maitai-hia ei vahi faafaaearaa, fatata e 74 kilometera i te atea i rapaeau ia Roma. Te tiai maira te toea o te mau taeae i te Tabereno Toru ra, te hoê vahi faafaaearaa fatata e 58 kilometera i te atea i rapaeau i te oire. Eaha to Paulo huru? Te parau ra Luka e: “Ite aˈera Paulo ia ratou, haamaitai atura i te Atua e itoito atura.” (Ohipa 28:15) A feruri noa na—ua riro te ite-noa-raa i tera mau taeae o tei faaitoito i te tereraa mai na nia i tera mau eˈa atoa ei tumu o te faaetaetaraa e o te tamahanahanaraa no Paulo! E o vai ta Paulo i haamaitai no teie tauturu faufaa? Ua haamaitai oia i te Atua ra o Iehova, te tumu o te reira.

22. Eaha ta tatou irava matahiti no 2005, e eaha te hiˈopoahia i roto i te tumu parau i muri nei?

²² Papu maitai, te faaite ra ta te Atua mau haaraa i papaihia i roto i te Bibilia e e tauturu o Iehova. E Tauturu oia aita e faaauraa. Ma te tano, e fanaˈo te mau Ite no Iehova ei irava matahiti na ratou no 2005 i te mau parau o te Salamo 121:2: “No ǒ ia Iehova ra te tauturu ia ˈu.” E nafea Iehova e tauturu mai ai i teie tau? Te reira te hiˈopoahia i roto i te tumu parau i muri nei.

[Nota i raro i te api]

Te haamanaˈo ra anei outou?

Mea nafea to Iehova horoaraa i te tauturu—

• na roto i te mau melahi?

• maoti to ˈna varua moˈa?

• ma ta ˈna Parau faauruhia?

• na roto i te mau hoa faaroo?

[Uiraa haapiiraa]

[Parau iti faaôhia i te api 9]

Teie te irava matahiti no 2005: “No ǒ ia Iehova ra te tauturu ia ˈu.”—Salamo 121:2.

[Hohoˈa i te api 10]

Ua haamaitai Paulo i te Atua no te tauturu ta ˈna i fanaˈo na roto i te mau taeae no Roma