E au anei outou i te hoê lagani auna?

I ROTO i te hoê oire iti i te mau otia o Port Moresby, i Papua, te hoˈi ra e piti tavini i te fare i muri aˈe i ta raua ohipa pororaa. A haere noa ˈi raua, ua ite raua i te hoê tumu raau nehenehe. “E lagani auna!” ta te taata paari aˈe ïa i parau. Ma te hiˈo atu i te taata apî aˈe, ua parau â oia e: “Te auraa o tera iˈoa, oia ïa ‘tumu raau tamatahiti.’ Taa ê roa i te tahi atu mau tumu raau o te mau pae rua ma, i te mau matahiti atoa e topa to ˈna mau rauere e e au oia e ua pohe. Ia ûa mai râ, e ora faahou mai oia, e uaa rahi oia, e e faaite faahou mai oia i to ˈna unauna.”

E haapiiraa te nehenehe e hutihia mai na roto i te lagani auna, aore ra flamboyant, mai tei matauhia i te parau. Ia au i te tahi feia îite, ua taiohia oia i rotopu i na tumu raau e pae uaa nehenehe roa ˈˈe i te ao atoa nei. Noa ˈtu e e topa to ˈna mau uaa e rauere i te roaraa o te tau mǎrô, e haapue te tumu raau i te pape. E mea puai to ˈna mau aˈa e e nehenehe te reira e tupu ati aˈe i te mau mato i roto roa i te hohonuraa o te fenua. Na roto i tera ravea, e mau maitai te reira i mua i te mau mataˈi puai. Ei haapotoraa, e tupu te reira ma te faaau atu i te rahiraa o te mau tupuraa fifi.

E nehenehe tatou iho e farerei i te mau huru tupuraa o te tamata i te huru maitai o to tatou faaroo. Eaha te tauturu ia tatou ia faaoromai? Mai te lagani auna, e nehenehe tatou e inu e e haapue i te pape ora o te Parau a te Atua. E mea titau-atoa-hia ia ati maite tatou ma te paari i to ‘tatou mato,’ ia Iehova, oia atoa i ta ˈna faanahonahoraa. (Samuela 2, 22:3) Ma te papu maitai, e haamanaˈoraa puai te lagani auna, i roto atoa i te hoê tupuraa fifi, e nehenehe tatou e tapea i to tatou puai e unauna pae varua mai te peu e e faaohipa tatou i te mau faanahoraa ta Iehova e horoa maira. I te na reiraraa, e ‘noaa ïa tei parauhia maira’ e ana, oia atoa te parau fafau o te ora mure ore.—Hebera 6:12; Apokalupo 21:4.