Mea ora te parau a Iehova

Manaˈo faufaa o te buka pae o te Salamo

E NA ô paha te taata taoˈa rahi e: “Ia riro ta matou mau tamarii tamaroa i to ratou apîraa ra, mai te raau itoito tupu maitai ra; e ta matou mau tamahine mai te pou i te hiti o te fare, i hamanihia mai to te fare o te hui arii ra. Ia îî to matou mau fare vairaa taoˈa . . . ia riro ta matou mau nǎnǎ ei tausani anaˈe.” Hau atu â, e parau paha te taata ona e: “E ao [aore ra oaoa] to te feia, mai te reira te huru!” Area te papai salamo, e na ô ïa oia e: “E ao [aore ra oaoa] to te feia, o Iehova to ratou Atua!” (Salamo 144:12-15) E nafea hoi e ore ai? O Iehova te Atua oaoa e no te feia iho â o te haamori nei ia ˈna te oaoa. (Timoteo 1, 1:11, MN) E itehia teie parau mau i roto i te haapueraa hopea o te mau himene faaurua a te Atua, oia hoi te Salamo 107 e tae atu i te 150.

E haamataratara atoa te buka pae o te Salamo i te mau huru maitatai hau ê o Iehova, tae noa ˈtu to ˈna aau aroha, ta ˈna parau mau, e to ˈna maitai. Ia rahi noa ˈtu to tatou maramarama i to te Atua huru, e rahi noa ˈtu tatou i te here e te mǎtaˈu ia ˈna. E hopoi mai te reira i te oaoa ei faahopearaa. Mea faufaa mau â te poroi ta tatou e ite ra i roto i te buka pae o te Salamo!—Hebera 4:12.

A OAOA NO TO IEHOVA AAU AROHA

(Salamo 107:1–119:176)

“E haamaitai ia Iehova i to ˈna ra [aau] aroha, e te mau ohipa taa ê na ˈna i te mau tamarii a te taata nei,” ta te mau ati Iuda ïa i afai-ê-hia o tei hoˈi mai mai te faatîtîraa i Babulonia e himene. (Salamo 107:8, 15, 21, 31; MN) Ma te haamaitai i te Atua, e himene Davida e: ‘E tae noa ˈtu ta oe ra parau mau i te reva nei.’ (Salamo 108:4) I roto i te himene i muri iho, e pure oia e: “E tauturu mai oe ia ˈu e tau Atua, e Iehova e! e faaora oe ia ˈu i to oe ihora [aau] aroha.” (Salamo 109:18, 19, 26; MN) E tohu te Salamo 110 i te faatereraa Mesia. Teie ta te Salamo 111:10 e faahiti ra: “O te matamua o te paari ra, oia te mǎtaˈu ia Iehova ra.” Ia au i te salamo i muri iho, “e ao to te taata i mǎtaˈu ia Iehova ra.”—Salamo 112:1.

E parauhia te Salamo 113 e tae atu i te 118 te mau Salamo Hallel, no te mea e faahiti pinepine te reira i te parau ra “Halelu Ia,” aore ra “Arue ia Ia!” Ia au i te Mishnah—te hoê buka no te senekele toru ra i papaihia te tutuu parau vaha matamua—i himenehia na teie mau himene i te oroa Pasa e i na oroa matahiti e toru a te mau ati Iuda. E faahanahana te salamo e te pene roa roa ˈˈe atoa, te Salamo 119 i ta Iehova parau faaitehia.

Uiraa bibilia pahonohia:

109:23—Eaha te auraa o ta Davida parau: “Ua riro vau mai te ata e pee ra”? Ua parau Davida ma te pehepehe e ua manaˈo oia e ua fatata roa mai to ˈna poheraa.—Salamo 102:11.

110:1, 2—Ua aha ‘te Fatu o Davida’ ra o Iesu Mesia a parahi ai oia i to te Atua rima atau? I muri aˈe i to ˈna tia-faahou-raa, ua maue Iesu i nia i te raˈi e tiai atura i te rima atau o te Atua e tae atu i 1914 no te arii mai. I taua taime ra, ua arii Iesu i nia i ta ˈna mau pǐpǐ faatavaihia, ma te aratai ia ratou i roto i te ohipa pororaa e te faariroraa i te taata ei pǐpǐ e oia atoa ma te faaineine ia ratou no te faatere e o ˈna i roto i to ˈna Basileia.—Mataio 24:14; 28:18-20; Luka 22:28-30.

110:4—Eaha ta Iehova ‘i tǎpǔ ma te ore e tatarahapa’? Teie tǎpǔ, o te faufaa ïa ta Iehova i faaau ia Iesu Mesia no te tavini ei Arii e ei Tahuˈa Rahi.—Luka 22:29.

113:3—E nafea te iˈoa o Iehova e haamaitaihia ˈi “mai te hitiraa mai o te mahana e tae noa ˈtu i to ˈna mairiraa”? E ere noa te hoê pǔpǔ taata e haamori ra i te Atua i te mau mahana  atoa. Mai te hitiraa mai o te mahana i te hitia o te râ e tae noa ˈtu i to ˈna mairiraa i te tooa o te râ, te turama ra te mau hihi o te mahana i te paraneta taatoa. Oia atoa, e mea tia ia haamaitaihia Iehova e ati aˈe i te fenua nei. Eita te reira e nehenehe e faatupuhia aita anaˈe e tutavaraa faanahohia. Ei Ite no Iehova, e fanaˈoraa taa ê faufaa roa ta tatou e haamaitai i te Atua e e apiti ma te itoito rahi i te pororaa i te Basileia.

116:15; MN—E nafea ‘te pohe o te feia [taiva ore] o Iehova e mea taoˈa ˈi i to ˈna aro’? E mea taoˈa roa te pohe o te feia haamori taiva ore o Iehova ei pǔpǔ, e hoo rahi roa ïa ia aufau e ore ai oia e faatia ia tupu te reira. Ia vaiiho noa ˈtu Iehova ia tupu te reira, mai te huru râ ïa e mea puai roa ˈtu â to ˈna mau enemi ia ˈna. Hau atu â, aore e taata e vaiihohia i nia i te fenua nei ei niu no te ao apî.

119:71—E nafea e nehenehe ai e riro ei mea maitai ia faaoromai i te ati? E nehenehe te fifi e haapii ia tatou ia turui roa ˈtu â i nia ia Iehova, ia pure papu atu â ia ˈna, e ia haapii maite atu â i te Bibilia e ia faaohipa ˈtu â i ta te reira e parau ra. Hau atu â, e nehenehe te fariiraa i te ati e faaite i to tatou mau paruparu o te tia ia faatitiaifarohia. Eita te mauiui e faainoino ia tatou ia vaiiho tatou i te reira ia ohipa mai.

119:96—Eaha te auraa o “te hopea o te mau mea maitatai atoa nei”? Te faahiti nei te papai salamo i te tia-roa-raa ia au i to te taata hiˈoraa. Ua haamanaˈo paha oia e ua taotiahia te manaˈo o te taata no nia i te tia-roa-raa. Area ta Iehova parau, aore ïa e taotiaraa. E au ta ˈna aratairaa i te mau tuhaa atoa o te oraraa.

119:164—Eaha te auraa ‘ia taihitu haamaitairaa i te Atua i te mahana hoê’? Te faataa pinepine ra te numera hitu i te oti-roa-raa. Te parau nei ïa te papai salamo e au ia Iehova te mau haamaitairaa atoa.

Haapiiraa no tatou:

107:27-31. E “hope” te paari a te ao ia tairi mai Aramagedo. (Apokalupo 16:14, 16) Eita te reira e nehenehe e faaora i te hoê taata i te haamouraa. O te feia anaˈe o te fariu atu ia Iehova ra no te faaoraraa te ora ˈtu no te ‘haamaitai ia ˈna no to ˈna aau aroha.’

109:30, 31; 110:5. E ere iho â te hoê faehau e ˈoˈe i te rima atau i te parururaa a te hoê paruru i tuuhia i te pae aui. Ei auraa parau, ‘tei te rima atau’ Iehova o ta ˈna mau tavini no te aro no ratou. E paruru e e tauturu ïa oia ia ratou—e tumu maitai roa no tatou no te ‘haamaitai rahi roa ia ˈna.’

113:4-9. Mea teitei roa Iehova e e tuu haehae atoa oia i “te hiˈoraa mai i raro i nia i te mau raˈi.” Teie râ e aumihi oia i te feia rii, veve, e te vahine fanautama. Mea haehaa te Arii e Fatu ra o Iehova e mea hinaaro na ˈna ia na reira atoa to ˈna feia haamori.—Iakobo 4:6.

114:3-7. E mea tia ia ohipa roa te iteraa i te mau ohipa taa ê ta Iehova i rave no to ˈna nunaa i te miti Uteute, i te anavai Ioridana, e i te mouˈa Sinai i nia ia tatou. Ia mǎtaˈu te huitaata, tei faahohoˈahia i te “fenua”—ei auraa taipe “ia aueue”—i te aro o te Fatu e tia ˈi.

119:97-101, MN. E paruru te noaaraa te paari, te ite rahi, e te maramarama no roto mai i te Parau a te Atua ia tatou i te ati pae varua.

119:105. E lamepa te Parau a te Atua no to tatou avae i te mea e e nehenehe te reira e tauturu ia tatou ia faaruru i te mau fifi  matauhia. E turama atoa te reira, ei auraa taipe, i to tatou eˈa, i te mea e te faaite atea ra te reira i te opuaraa a te Atua no te tau a muri aˈe.

A OAOA NOA ˈTU TE ATI

(Salamo 120:1–145:21)

E nafea tatou e nehenehe ai e faaû i te mau tupuraa fifi roa ˈˈe e e ora ˈtu ai i te ati? E horoa te Salamo 120 e tae atu i te 134 i te hoê pahonoraa maramarama no nia i teie uiraa. E ora ˈtu tatou i te ati e e oaoa noa tatou maoti te fariuraa ia Iehova ra no te ani i te tauturu. Ua himenehia paha teie mau salamo, tei parauhia te Sire a te Moluta aore ra Himene o te paiumaraa, a tere tia ˈtu ai te mau Iseraela i Ierusalema no te faatupu i ta ratou mau oroa matahiti.

E faataa te Salamo 135 e te 136 ia Iehova mai Tei rave i te mau mea atoa ta ˈna e hinaaro, e ere ïa mai te mau idolo faufaa ore. Ua papaihia te Salamo 136 no te himene-faahou-raa, ua himenehia te tuhaa hopea o te irava taitahi ei pahonoraa i te matamua. E faatia to muri iho salamo i te tupuraa mauiui o te mau ati Iuda i Babulonia o tei hinaaro e haamori ia Iehova i Ziona. No nia te Salamo 138 e te 145 ia Davida. E hinaaro oia ‘e haamaitai ia Iehova ma to ˈna aau atoa.’ No te aha? “Ua taa ê hoi to ˈu hamaniraahia,” ta ˈna ïa e parau ra. (Salamo 138:1; 139:14) I roto i na salamo e pae i muri iho, e pure Davida ia paruruhia oia i te taata parau ino, no te mau aˈoraa tia, ia ora mai oia i te feia hamani ino, e ia aratai i to ˈna haerea. E haamataratara oia i te oaoa o te nunaa o Iehova. (Salamo 144:15) I muri aˈe i te hiˈo-faahou-raa i te rahi e te maitai o te Atua, e faahiti Davida e: “E parau tau vaha ma te arue ia Iehova; e ia haamaitai te taata atoa i to ˈna ra iˈoa moˈa e a muri noa ˈtu.”—Salamo 145:21.

Uiraa bibilia pahonohia:

122:3—Mea nafea Ierusalema te oire i ‘ta atiati-hua-hia ˈi’? Mai tei matauhia i roto i te mau oire i tahito ra, mea piri roa te paturaahia te mau fare i Ierusalema. Mea papu roa te oire e mea ohie ïa ia paruru. Hau atu â, no te piri hoi te mau fare, ua nehenehe te feia e parahi ra i te oire e tiaturi te tahi i te tahi no te tauturu e te paruru ia ratou. Te faaite ra te reira i te auhoêraa pae varua o na opu 12 o Iseraela ia ratou i haere amui e haamori.

123:2—Eaha te manaˈo faufaa o te faahohoˈaraa o te mata o te mau tavini? Te hiˈo ra te mata o te mau tavini e tavini vahine i te rima o te hoê fatu aore ra fatu vahine no e piti tumu: no te ite i ta ˈna e hinaaro ra e no te fanaˈo i te parururaa e te mau mea faufaa o te oraraa. Oia atoa, e fariu tatou ia Iehova ra no te haroaroa i to ˈna hinaaro e ia noaa ta ˈna farii maitai.

131:1-3—Mea nafea Davida ‘i tuu haehaa ˈi e i faanâ ˈi ia ˈna iho mai te tamaiti i mairi te û o to ˈna metua vahine’? Mai te hoê tamarii i faaorehia te û o te ite ra i te tamahanahanaraa e te mauruuru i roto i te rima o to ˈna metua vahine, ua ite Davida i te tuu haehaa e te faanâ ia ˈna iho ‘mai te tamaiti i mairi te û o to ˈna metua vahine.’ Mea nafea? Eiaha ma te aau teitei e te mata teoteo e eiaha ma te imi i te mau mea no te faarahi roa ia ˈna. Ua ite iho â Davida i to  ˈna mau taotiaraa e ua faaite i te haehaa, aita râ oia i imi i te tiaraa. E haerea paari to tatou ia pee i to ˈna huru aau ia hinaaro iho â râ tatou i te mau fanaˈoraa taa ê i roto i te amuiraa.

Haapiiraa no tatou:

120:1, 2, 6, 7. E nehenehe te mau pariraa haavare e te parau faaooo e faatupu i nia ia vetahi ê i te ahoaho e mea fifi ia faaoromai. Te hoê ravea no te faaite e “o te hau” tatou, o te tapearaa ïa i to tatou arero.

120:3, 4. Mai te peu e e patoi tatou i te taata “arero faahema,” e nehenehe tatou e tamahanahanahia i te iteraa e e faatitiaifaro Iehova i te mau mea i to ˈna taime au. E roohia te feia pari haavare i te ati i te rima o “te feia puai.” E riro mau ratou ei farii o te haavaraa ura a Iehova i faataipehia e “te arahu retama e ama ra.”

127:1, 2. I roto i ta tatou mau tutavaraa atoa, ia fariu tatou ia Iehova ra no te ani i te aratairaa.

133:1-3. Mea tamǎrû, mea maitai, e mea haumârû te auhoêraa o te nunaa o Iehova. Eiaha tatou e totoa i te reira ma te moemoe i te hapa, te tatamaˈi aore ra te amuamu.

137:1, 5, 6. Ua ati maite te feia haamori afai-ê-hia o Iehova ia Ziona, tei faataipe na i te faanahonahoraa a te Atua. E o tatou? Te ati maite ra anei tatou ma te taiva ore i te faanahonahoraa ta Iehova e faaohipa nei i teie tau?

138:2. ‘Te faarahi ra Iehova i ta ˈna parau ia hau atu i to ˈna iˈoa ra’ i te mea e ua fafau oia ma to ˈna iˈoa e hau roa ˈtu â te mau tiairaa ta tatou e nehenehe e fanaˈo. Oia mau, to mua te mau tiairaa faahiahia ia tatou.

139:1-6, 15, 16. Ua ite Iehova i ta tatou mau ohipa, to tatou mau manaˈo, e ta tatou mau parau hou tatou e faahiti atu ai. Ua ite oia ia tatou i to tatou vai-oti-ore-roa-raa, hou a ite-maitai-hia ˈi te mau tuhaa atoa o te tino. Te ite o te Atua ia tatou ei taata, “eita ïa e noaa” ia taa. Auê te mahanahana te iteraa e eita Iehova e ite noa i te hoê tupuraa fifi roa ta tatou e faaû ra, e taa atoa râ ia ˈna e e ohipa te reira i nia ia tatou!

139:7-12. Aita e vahi e nehenehe ai tatou e haere e mea atea no te Atua ia haapuai ia tatou.

139:17, 18. E riro anei te ite o Iehova ei mea maitai no tatou? (Maseli 2:10) Mai te peu e tera iho â, ua itea ia tatou te tumu o te oaoa pau ore. “E rahi” to Iehova mau manaˈo “i te one tahatai.” Mea rahi noâ te haapii no nia ia ˈna.

139:23, 24. E mea tia ia hinaaro tatou ia hiˈopoa Iehova i to tatou huru o roto no te “haamainaina”—te mau manaˈo, hiaai, e hinaaro tano ore—e no te tauturu ia tatou ia tatara i te reira.

143:4-7. E nafea tatou e nehenehe ai e faaoromai i te mau ati ino mau? Te horoa maira te papai salamo i te ravea: E feruriruri i ta Iehova mau ohipa, e haamanaˈo noa i ta ˈna mau raveraa, e e pure ia ˈna no te ani i te tauturu.

“A arue ia Ia, e te taata e!”

E hope na haapueraa taitahi matamua e maha o te salamo e te hoê arueraa ia Iehova. (Salamo 41:13; 72:19, 20; 89:52; 106:48) Hoê â huru no te haapueraa hopea. E na ô te Salamo 150:6 (MN) e: “O tei huti i te aho ra ia haamaitai anaˈe ïa ia Iehova. Halelu Ia. [A arue ia Ia, e te taata e]!” E tupu mau iho â te reira i roto i te ao apî a te Atua.

A tiai rû ai tatou i tera ra taime haamaitaihia, e tumu papu ta tatou no te faahanahana i te Atua mau e no te haamaitai i to ˈna iˈoa. Ia feruri tatou i to tatou oaoa no te mea ua ite tatou ia Iehova e te fanaˈo ra tatou i te hoê taairaa maitai e o ˈna, eita anei te reira e turai ia tatou ia arue ia ˈna ma te aau mauruuru?

[Hohoˈa i te api 9]

Mea faahiahia te mau ohipa taa ê a Iehova

[Hohoˈa i te api 10]

“E rahi” to Iehova mau manaˈo “i te one tahatai”