Mea ora te parau a Iehova

Manaˈo faufaa o te Maseli

“E TORU tausani a” te arii Solomona o Iseraela i tahito ra “parabole i parau.” (Te mau arii 1, 4:32) E fanaˈo iho â anei tatou i ta ˈna mau parau paari? E. E faahiti te buka bibilia o te Maseli, i oti i te papaihia fatata i 717 H.T.T., e rave rahi maseli a Solomona. O na pene hopea anaˈe o tei papaihia e te tahi atu mau taata—o Agura te tamaiti a Iake e o Lemuela te arii. Te manaˈo nei râ te tahi pae e o Lemuela te tahi atu iˈoa o Solomona.

E piti fa ta te mau parau faaurua i haaputuhia i roto i te Maseli—“Ia ite i te paari e te aˈo.” (Maseli 1:2) E tauturu teie mau parau ia tatou ia titau i te paari, te neheneheraa hoi e ite maramarama i te mau mea e te faaohiparaa i te ite no te faaafaro i te mau fifi. Maoti te reira e aˈo-atoa-hia ˈi, aore ra e haamatarohia ˈi tatou i te pae morare. E nehenehe te haapao-maitai-raa i teie mau maseli e te peeraa i te reira aˈo e ohipa i nia i to tatou aau, e faaoaoa mai, e e haamanuïa.—Hebera 4:12.

‘E TITAU I TE PAARI E E TAPEA ETAETA I TE AˈO’

(Maseli 1:1–9:18)

“Te pii hua nei te paari [mau] i roto i te mau aroâ ra,” ta Solomona ïa e parau. (Maseli 1:20) No te aha e mea tia ˈi ia faaroo tatou i to ˈna reo puai e te maramarama? E faahiti te pene 2 i te maitai e rave rahi ia titau i te paari. E tauaparauhia e nafea ia imi i te taairaa piri roa e o Iehova i roto i te pene 3. E na ô Solomona i muri iho e: “O te paari â te mea maitai; e titau i te paari; e te mau mea atoa e noaa ia oe ra e titau â i te [maramarama]. E tapea etaeta i te aˈo: eiaha roa e tuua.”—Maseli 4:7, 13; MN.

Eaha te tauturu mai ia patoi i te haerea morare ore o te ao? E pahono te pene 5 o te Maseli: A faaohipa i te aravihi i te feruri, e a ite i te mau ravea faahemaraa a te ao. A hiˈo atoa na i te mau faahopearaa iino ia rave i te morare ore. E faaara to muri iho pene i te mau peu e haerea o te haafifi i to tatou taairaa e o Iehova. E horoa te pene 7 i te hoê faataaraa mau o te ohiparaa a te hoê taata morare ore. I roto i te pene 8, te faataahia ra ma te faahiahia i te faufaaraa e te huru anaanatae o te paari. Te faaitehia ra i te pene 9, te hoê faahopearaa faaitoito o te hohorahia ˈtu na mua, mai te hoê faahohoˈaraa anaanatae o te turai ra ia tatou ia tapi i te paari.

Uiraa bibilia pahonohia:

1:7; 9:10, MN—No te aha “te matamua o te [ite] ra” e “te matamua o te paari ra” o te mǎtaˈu ïa ia Iehova? Aita anaˈe te mǎtaˈu ia Iehova, aita ïa e ite no te mea o oia te Atua Poiete i te mau mea atoa e te Fatu o te mau Papai. (Roma 1:20; Timoteo 2, 3:16, 17) O oia te Tumu iho o te taatoaraa o te ite mau. No reira, e haamata te ite e te mǎtaˈu faatura ia Iehova. Te matamua o te paari, o te mǎtaˈu atoa ïa i te Atua no te mea aita e paari aita anaˈe e ite. Hau atu â, eita te hoê taata o te ore e mǎtaˈu ra ia Iehova e faaohipa i te ite atoa e vai ra ia ˈna no te faahanahana i te Atua Poiete.

5:3—No te aha e parauhia ˈi te hoê vahine taiata ‘e vahine ê’? Te faataa ra te Maseli 2:16, 17 i te hoê “vahine ê” mai te hoê taata ‘i moe ia ˈna te faufaa a to ˈna ra Atua.’ Ua parauhia te hoê taata o tei haamori i te mau atua haavare aore ra o tei faataa ê ia ˈna i te Ture a Mose, oia atoa te hoê vahine taiata, e taata ê ïa.—Ieremia 2:25; 3:13.

7:1, 2, MN—Eaha tei taaihia i “ta ˈu nei  parau” e i “ta ˈu [mau faaueraa]”? Hau atu i te mau haapiiraa bibilia, ua taaihia te reira i te ture, aore ra faatureraa utuafare, i haamauhia e te mau metua no te maitai o te utuafare. Te titauhia ra ia farii te feia apî i te reira oia atoa te mau haapiiraa o te Bibilia no ǒ mai i to ratou mau metua ra.

8:30, MN—O vai te “rave ohipa aravihi”? Te parau ra te paari faataatahia e e rave ohipa aravihi oia. Hau atu â i te faaohiparaahia i roto i te mau papai no te haamaramarama i te mau huru o te paari, te faataa ra teie faataata-taipe-raa i te Tamaiti fanau tahi a te Atua ra o Iesu Mesia, hou a riro mai ai ei taata. Na mua roa ˈˈe i to ˈna fanau-taata-raahia mai, ‘ua haamata oia i ta ˈna ohipa i te Atua ra.’ (Maseli 8:22) Ei “rave ohipa aravihi,” ua haa puai oia e to ˈna Metua i te roaraa o te poieteraa o te mau mea atoa.—Kolosa 1:15-17.

9:17—Eaha “te pape eiâhia ra,” e no te aha ‘mea maaro ai’? I te mea e mea au roa na te Bibilia ia faaau i te taatiraa i roto i te faaipoiporaa i te inuraa i te pape tahe ra no roto mai i te hoê apoo, te faahohoˈa ra te pape eiâhia ra i te mau taatiraa morare ore huna. (Maseli 5:15-17) E horoa te manaˈo ra e rave huna i te taatiraa morare ore i te huru maaro i taua mau pape ra.

Haapiiraa no tatou:

1:10-14. Eiaha tatou e hema i te mau haerea iino o te feia rave hara na roto i ta ratou mau parau fafau ia onahia.

3:3, MN. Ia haafaufaa rahi tatou i te aau maitai e te parau mau e ia faaite roa ˈtu tatou mai ta tatou e hinaaro i te hoê fifi arapoa faufaa roa e tia ˈi. E mea tia atoa ia haamau roa tatou i teie mau huru maitatai i roto i to tatou aau—ma te faariro i te reira ei tuhaa faufaa roa no tatou.

4:18. Mea haere mǎrû noa mai te ite pae varua. No te maramarama noa, e mea maitai ia tamau tatou i te faaite i te haehaa e te mǎrû.

5:8. E mea tia ia atea ê noa tatou i te mau huru mana morare ore atoa, no roto mai anei i te upaupa, te faaanaanataeraa, te Internet, aore ra te mau buka e vea.

5:21. E mono anei te hoê taata e here ra ia Iehova i to ˈna taairaa maitai e te Atua mau no te tahi noa taime navenave? Eita iho â! Te faaitoitoraa puai roa ˈˈe no te tapea i te viivii ore pae morare, o te ite-maite-raa ïa e e hiˈo Iehova i to tatou haerea e e tia ˈtu tatou i mua ia ˈna.

6:1-5. Auê ïa aˈo maitai roa ta tatou no nia i te ‘tautururaa,’ aore ra te fariiraa i te hoê faaauraa paari ore i te pae moni e o vetahi ê i roto i teie mau irava e! Mai te peu e, i muri aˈe i te  hiˈopoa-maitai-raa, e au ra e mea paari ore ta tatou raveraa, e mea tia ‘ia onoono maite’ tatou i te ani tamau i ‘to tatou hoa’ e ia rave i tei maraa ia tatou no te faatitiaifaro i te tupuraa.

6:16-19. I roto i teie na tuhaa tumu e hitu te vai nei fatata te mau huru haerea ino atoa. Ia faatupu tatou i te riri i te reira e tia ˈi.

6:20-24. E nehenehe te haamataroraa na roto i te mau Papai e paruru i te hoê taata i te marei o te taatiraa morare ore. Eiaha te mau metua e tâuˈa ore i te horoaraa i tera haamataroraa.

7:4. Ia poihere tatou i te paari e te maramarama e tia ˈi.

MASELI NO TE ARATAI IA TATOU

(Maseli 10:1–29:27)

Mea taa maitai te mau faahitiraa o te toea o ta Solomona mau maseli. Ma te faataahia na mua roa ei taa-ê-raa, turua, e faaauraa, e horoa te reira i te mau haapiiraa puai mau i te pae o te haerea, te paraparau, e te huru aau.

E haamahitihiti te mau pene 10 e tae atu i te 24 i te faufaaraa o te mǎtaˈu faatura ia Iehova. Ua haaputuhia te mau maseli i roto i te mau pene 25 e tae atu i te 29 e “te mau taata no te arii o Iuda ra o Hezekia.” (Maseli 25:1) E haapii teie mau maseli ia turui atu i nia ia Iehova e te tahi atu mau haapiiraa faufaa roa.

Uiraa bibilia pahonohia:

10:6—E nafea ‘e tapoˈihia ˈi te vaha o te paieti ore e te ino’? E nehenehe te reira i roto i te auraa e ma te paraparau aminamina, e huna te paieti ore i ta ratou opuaraa ino no te rave ino ia vetahi ê. Aore ra paha i te mea e e ririhia iho â te paieti ore, e haamamû te au ore o vetahi ê ia ratou.

10:10—E nafea “tei amoamo i te mata” e faatupu ai i te ino? Eita noa paha ‘te taata faufaa ore e parau vavi’ e tamata atoa ra oia i te huna i to ˈna mau manaˈo turai ma te hautiuti i te tino, mai ‘te amoamoraa i te mata.’ (Maseli 6:12, 13) E nehenehe teie huru haavare e riro ei tumu o te hepohepo rahi o te feruriraa o te taata ta ˈna i na reira.

10:29—Eaha “te eˈa o Iehova”? No nia te reira i te haaraa a Iehova e te huitaata e eiaha râ i te huru oraraa e mea maitai ia pee tatou. Te mau haaraa a te Atua e te taata, oia ïa te panoonoo ore no te hapa ore e te ino râ no te paieti ore.

11:31—No te aha e mea tia ˈi ia faautuahia ˈtu â te paieti ore i te taata parau-tia? Te faautuaraa i ǒ nei, o te aˈoraahia ïa te taata taitahi. Ia hape te taata parau-tia, te faautuaraa no ta ˈna mau hape, o te aˈoraa ïa. E hara te paieti ore ma te opua mau e eita oia e fariu ê no te rave i te mea maitai. No reira, e au ia faautua-hua-hia oia.

12:23—E nafea te hoê taata ‘e vaiiho maite ai i te ite’? Te vaiiho-maite-raa i te ite, e ere ïa e eiaha roa ˈtu te hoê taata e faaite atu. Teie râ te auraa, e faaite te hoê taata i te ite ma te paari, eiaha ma te faaiteite atu na roto i te faaahaaharaa.

14:17, MN—E nafea ‘te taata [aravihi i te feruri] e ririhia ˈi’? Te parau Hebera i hurihia ei “aravihi i te feruri,” e nehenehe ïa no te haroaroaraa aore ra feruriraa ino. E ririhia iho â te hoê taata manaˈo ino. Hoê â râ no te taata haroaroa o te faaohipa ra i to ˈna aravihi i te feruri e o te maiti ra ‘eiaha e riro i to teie nei ao.’—Ioane 15:19.

18:19—E nafea ‘te hoê taeae i riri e au ai i te hoê oire etaeta’? Mai te hoê oire etaeta e haaatihia ra, e patoi etaeta paha te hoê taata i te farii i te tahi faaafaroraa. E nehenehe te mau mârôraa i rotopu ia ˈna e te taata hapa e riro ohie ei haafifiraa mai “te eˈa auri o te pare ra.”

Haapiiraa no tatou:

10:11-14. Ia patu ta tatou mau parau, e mea tia ia î to tatou feruriraa i te ite mau, ia turaihia to tatou aau e te here, e ia aratai te paari i to tatou vaha.

 10:19; 12:18; 13:3; 15:28; 17:28. Ia feruri tatou hou e paraparau ai e tia ˈi, e eiaha e faahiti rahi roa i te parau.

11:1; 16:11; 20:10, 23. Te hinaaro ra Iehova e e haerea tia to tatou i roto i ta tatou mau tapihooraa.

11:4. E mea maamaa ia tapi i te taoˈa materia a tâuˈa ore ai i te haapii ia ˈna iho, te haere i te putuputuraa, te pure, e te taviniraa.

13:4. Eita e navai ia “hinaaro” e amo i te hoê hopoia i roto i te amuiraa aore ia hinaaro e ora i roto i te ao apî. E mea tia ia haa e ia tutava maite tatou i te faaî i te mau titauraa.

13:24; 29:15, 21. Eiaha te hoê metua here e faaherehere i ta ˈna tamarii aore ra e tapoˈi i ta ˈna mau hapa. E haa râ te hoê metua tane no te aˈo e no te tinai i tera mau hapa hou te reira e mau roa ˈi.

14:10. I te mea e eita mau â e nehenehe e faaitehia to tatou huru aau hohonu roa ˈˈe i te mau taime atoa, eita atoa e taa-noa-hia e te feia mataitai, e taotiaraa to te tamahananaraa o te aau ta vetahi ê e nehenehe e horoa. E mea tia ia faaoromai paha tatou i te tahi mau fifi ma te turui noa i nia ia Iehova.

15:7. Eiaha tatou e faaite oioi i te mau mea atoa ta tatou i ite i te hoê taata, mai te hoê taata faaapu o te ore e ueue pauroa i ta ˈna mau huero i roto i te hoê vahi anaˈe. E haapurara mǎrû noa te taata paari i to ˈna ite i te hoê taime e hinaarohia ˈi.

15:15; 18:14. E tauturu mai te tapearaa i te hoê feruriraa maitai ia ite i te oaoa, i roto atoa i te mau tupuraa ahoaho.

17:24. Taa ê atu i “te maamaa,” o te ore e haamau i te mata e te feruriraa i nia i te mau mea faufaa, e mea tia ia imi tatou i te maramarama e nehenehe atu ai tatou e ohipa ma te paari.

23:6-8. Eiaha tatou e haavarevare i te faaite i te farii maitai.

27:21. E faaite mai te arueraa o vai tatou. E faaitehia te haehaa mai te peu e e turai te arueraa ia tatou ia ite i ta tatou aitarahuraa ia Iehova e e faaitoito mai ia tamau i te tavini ia ˈna. Te faaitehia ra te hoê erereraa i te haehaa ia paturu te arueraa i te hoê manaˈo faateitei.

27:23-27. Ma te faaohipa i te hoê hohoˈa o te oraraa o te hoê tiai mamoe aua, te haamahitihiti ra teie mau maseli i te faufaaraa ia mauuruuru noa i te hoê oraraa ohie no roto mai i te haa-puai-raa. E mea tia iho â ia tiaturi tatou i te Atua. *

28:5. Mai te peu e e “imi” tatou “ia Iehova” na roto i te pure e te haapiiraa i ta ˈna Parau, “e haapao ïa [tatou] i te mau mea atoa ra” e hinaarohia no te tavini ia ˈna ma te fariihia mai.

NA “POROI PUAI”

(Maseli 30:1–31:31)

E faaoti te buka bibilia o te Maseli e na “poroi puai” e piti. (Maseli 30:1; 31:1, MN) Ma te faaohipa i te mau faaauraa o te turai i to tatou feruriraa, e faahohoˈa te poroi a Agura i te nounou mahâ ore, e e faaite te reira i te mau raveraa papu a te hoê taata o te nehenehe e faahema i te hoê paretenia. * E faaara atoa te reira no nia i te faarahiraa ia ˈna iho e te paraparau iria.

E aˈo papu to roto i te poroi puai a Lemuela no roto mai i to ˈna metua vahine no nia i te inuraa i te uaina e te ava paari oia atoa te haavaraa ma te parau-tia. E hope te faataaraa o te hoê vahine maitai e teie faahitiraa: “E horoahia ˈtu tei ravehia e tana rima, e haamaitai mai tei ravehia e ana.”—Maseli 31:31.

A fanaˈo i te paari, a farii i te aˈo, a atuatu i te mǎtaˈu i te Atua, a turui i nia ia Iehova. Auê ïa haapiiraa faufaa ta te mau maseli faaurua e! Na roto i te mau ravea atoa, e faaohipa anaˈe i te reira aˈo e e ite anaˈe ïa i te oaoa o “te taata mǎtaˈu ia Iehova ra.”—Salamo 112:1.

[Nota i raro i te api]

[Hohoˈa i te api 4]

O Iehova te Tumu o te taatoaraa o te ite mau