TAU matahiti i teie nei, e oraraa fanaˈo to Roald raua Elsebeth i Bergen, te piti o te oire rahi roa ˈˈe o Norevetia. Fatata to raua e 50 matahiti. I apiti tamau na raua e ta raua na tamarii, o Isabel raua Fabian, i te mau ohipa a te amuiraa. E matahiapo Roald, e pionie Elsebeth e e taata poro itoito Isabel raua Fabian.

I Tetepa 2009 râ, ua faaoti te utuafare e rave i te tahi mea taa ê: e poro no te hoê hebedoma i te hoê tuhaa fenua aita e amuiraa. Tere atura ïa Roald, Elsebeth e o Fabian, 18 matahiti i tera taime, i Nordkyn. E fenua tuati teie o te tuhaa fenua o Finnmark, i te pae apatoerau o Norevetia. I te oire iti o Kjøllefjord, ua poro ratou e te tahi atu mau taeae e tuahine tei haere atoa i ǒ no te poro. Te haamanaˈo ra Roald: “A haamata ˈi tera hebedoma, ua oaoa vau i te faanahoraa i ta ˈu ohipa no te apiti i teie taviniraa taa ê no te hoê hebedoma taatoa.” I tera noa râ hebedoma, ua haapeapea ˈtura Roald. Eaha tei tupu?

Te faatia ra Roald: “Ma te manaˈo-ore-hia, ua ani mai Mario, te hoê pionie no Finnmark, e ua ineine anei matou i te haere i te hoê oire o Lakselv te iˈoa no te tauturu i te hoê amuiraa e 23 taata poro.” Ua maere roa Roald i tera aniraa manaˈo-ore-hia. Te faataa ra oia: “Ua feruri iho â mâua Elsebeth i te neheneheraa e haere e tavini i te vahi e hinaaro-rahi-hia te tauturu ia faarue te tamarii i te fare, eiaha râ i teie nei.” A poro ai râ tau mahana i tera tuhaa fenua aita e amuiraa, ua ite Roald e te hinaaro ra te taata e haapii no nia ia Iehova. Te hinaaro ra ratou i te tauturu i tera iho â taime. Te haamanaˈo ra o ˈna: “Ua haapeapea mau tera aniraa ia ˈu e aita aˈera to ˈu taoto i topa.” Afai atura Mario ia Roald e i to ˈna utuafare i Lakselv, fatata e 240 kilometera i te pae apatoa o Kjøllefjord. Ua hinaaro Mario ia ite mata roa ˈtu ratou i te amuiraa iti no ǒ.

I Lakselv, ua haamataitai atu o Andreas, hoê o na matahiapo e piti no ǒ, i te mataeinaa e te Piha a te Basileia. Ua farii te amuiraa ia ratou ma te mahanahana. Ua parau ratou ia Roald raua Elsebeth e e oaoa ratou ia haere to raua utuafare i ǒ no te tauturu ia ratou i roto i te ohipa a te Basileia. Ma te mata ataata, ua parau o Andreas e ua faanaho ê na oia i te hoê aparauraa no te hoê ohipa na Roald raua Fabian! E nafea teie utuafare?

Ua manaˈo na mua Fabian: “Aita vau e hinaaro ra e haere mai i ǒ nei.” E faarue i to ˈna mau hoa rahi, hoê â hoi ratou i te paariraa i roto i te amuiraa e e haere e ora i roto i te hoê oire nainai. Aita o ˈna i au i tera manaˈo. Aita atoa ta ˈna tau haapiiraa no te riro ei taata tamaumau uira i oti. I te aniraahia râ te manaˈo o Isabel (21 matahiti i tera taime), ua parau o ˈna: “Tera iho â ta ˈu i hinaaro noa na e rave!” Te parau nei râ Isabel: “A feruri maite noa ˈi au i te reira, ua matara mai iho â, ‘E manaˈo maitai mau anei? E mihi anei au i to ˈu mau hoa? Ia faaea noa anei au i roto i ta ˈu amuiraa, mea nahonaho maitai hoi?’” Eaha ta Elsebeth i manaˈo i tera aniraa? “No ˈu, te tono ra Iehova i to matou utuafare,” ta ˈna ïa e parau ra. “Ua manaˈo atoa râ vau i to matou fare, no faaapî-noa-hia ˈtura hoi, e i te mau taihaa atoa i roto tei noaa ia matou i na 25 matahiti i mairi.”

I te hoperaa te hebedoma taa ê, ua hoˈi Roald e to ˈna utuafare i Bergen. Ua manaˈonaˈo noa ratou i to ratou mau taeae e tuahine i Lakselv, fatata e 2 100 kilometera i te atea. Te parau ra Elsebeth: “Ua pure noa vau ia Iehova, e ua hapono tamau vau i te hohoˈa i te mau hoa ta matou i farerei i ǒ a faatia ˈtu ai i te mau ohipa i tupu. E ua na reira atoa mai ratou.” Te na ô ra Roald: “I titauhia maa taime no te farii i te manaˈo e reva. E mea tia atoa ia feruri au e e nehenehe anei ta matou e amo i ta matou mau haamâuˈaraa. E nafea hoi matou? Ua pure noa vau ia Iehova e ua tauaparau e to ˈu utuafare e te mau taeae feruriraa paari.” Te haamanaˈo ra Fabian: “Hau atu â vau i te feruri i te reira, hau atu â vau i te taa e aita ta ˈu e tumu maitai no te parau, aita. Ua pure noa vau ia Iehova e ua puai mǎrû noa ˈtura to ˈu hinaaro e reva.” E o Isabel? No te faaineine ia ˈna mai te peu e e reva iho â, rave aˈera o ˈna i te taviniraa pionie. I muri iho i na ono avaˈe taviniraa pionie, i reira o ˈna i te faataaraa i te taime rahi no ta ˈna iho haapiiraa Bibilia, ua ineine o ˈna no tera tere.

A hinaaro atu â ˈi e tavini i te vahi e hinaaro-rahi-hia te taata poro, ua faaitoito te utuafare ia raea ta ratou fa. Noa ˈtu e mea au roa na Roald ta ˈna ohipa aufau-maitai-hia, ua ani o ˈna ia faaea i te ohipa hoê matahiti i te maoro. Ua parau atu râ ta ˈna paoti ia ohipa e piti noa hebedoma i nia e ono. Te parau ra Roald: “Noa ˈtu e ua topa roa ta ˈu moni avaˈe, te maitai noa ra matou.”

Te faatia ra Elsebeth: “Ua ani mai ta ˈu tane ia imi i te hoê fare i Lakselv e ia horoa tarahu i to matou fare i Bergen. Ua titau te reira i te taime e te tutavaraa rahi, ua tia râ ia matou. Aita i maoro, ua ite mai te tamarii i te tahi ohipa afa mahana, e ua tauturu mai raua ia aufau i te mau haamâuˈaraa no te maa e te faurao.”

Te na ô ra Isabel: “I te mea e haere matou i te hoê oire nainai, te fifi rahi roa ˈˈe no ˈu, o te iteraa mai ïa i te ohipa no te amo i ta ˈu mau haamâuˈaraa ei  pionie. I te tahi taime, e au ra e aita e ravea.” Ma te rave i te mau ohipa rii afa mahana, e iva i te matahiti matamua, ua tia ia Isabel ia amo i ta ˈna mau haamâuˈaraa. E o Fabian? “No te faaoti i ta ˈu tau haapiiraa ei taata tamaumau uira, i titauhia na ia ohipa vau ei taata haapii i tera toroa. Ta ˈu ïa i rave i Lakselv. I muri aˈe, ua noaa ia ˈu ta ˈu parau tuite e ua itea ia ˈu te hoê ohipa afa mahana ei taata tamaumau uira.”

Ua hinaaro atoa Marelius raua Kesia e tavini i te vahi e hinaaro-rahi-hia te taata poro. Te na ô ra Marelius, e 29 matahiti to ˈna i teie nei: “I te tairururaa, ua turai mai te mau oreroraa parau e uiuiraa manaˈo no nia i te taviniraa pionie ia feruri e nafea ia tavini rahi atu â.” No Kesia râ, e 26 matahiti to ˈna i teie nei, e tautooraa te manaˈo e faarue i to ˈna utuafare fetii. Te parau ra o ˈna: “Ua mǎtaˈu vau i te manaˈo e faarue i te feia ta ˈu e here ra.” Hau atu â, e ohipa taime taatoa ta Marelius no te aufau i te tarahu o to raua fare. Te na ô ra o ˈna: “Maoti te tauturu a Iehova e te pure e rave rahi no te ani i ta ˈna tauturu no te rave i te mau tauiraa, ua tia ia mâua ia haere.” Ua faataa na mua raua i te taime rahi aˈe no te haapiiraa Bibilia, ua hoo i to raua fare, ua faarue i ta raua ohipa e ua haere i te oire no Alta, i te pae apatoerau o Norevetia, i Atete 2011. I ǒ, no te amo i ta raua mau haamâuˈaraa ei pionie, ua ohipa Marelius ei taata haapao faufaa e o Kesia i roto i te hoê fare toa rahi.

Ua putapû Knut raua Lisbeth, e 30 tiahapa matahiti to raua i teie nei, i te mau aamu o te Annuaire no nia i te feia e tavini ra i te vahi e hinaaro-rahi-hia te taata poro i te Basileia. Te parau ra Lisbeth: “Ua haaferuri mai tera mau faatiaraa ia mâua no nia i te haereraa e tavini i te hoê fenua ê. Ua taiâ râ vau, eita e tae i te hoê taata mai ia ˈu ia na reira.” Ua faaitoito noa râ raua ia raea ta raua fa. Te na ô ra Knut: “Hoo atura mâua i to mâua fare tahua e no te haaputu i te moni, haere aˈera mâua e ora i to ˈu mama ra. I muri aˈe, no te tamata i te taviniraa i te hoê tuhaa fenua ê, ua haere mâua i roto i te hoê amuiraa reo Beretane i Bergen hoê matahiti i te maoro, e ua ora mâua i to Lisbeth ra mama.” Aita i maoro, ua taa ia Knut raua Lisbeth e ua ineine raua no te reva i: Ouganda. E hoˈi raua i Norevetia e piti avaˈe i te matahiti hoê no te ohipa. E moni ïa ta raua no te ora e no te poro i te taime taatoa i Ouganda no te toea o te matahiti.

Eaha tei tupu no teie mau rave ohipa itoito? Te parau ra Roald: “E taime rahi aˈe ta matou e faataa i ǒ nei ei utuafare ia faaauhia i Bergen. Ua piri roa to matou mau taairaa. E haamaitairaa mau â ia ite i ta mâua mau tamarii ia haere i mua i te pae varua.” Ua na ô â oia: “Aita matou e tapitapi faahou ra i te mau mea materia. E ere te reira i te mea faufaa roa mai ta matou i manaˈo na.”

 Ua ite Elsebeth i te faufaaraa ia haapii i te tahi atu reo. No te aha? I roto i te tuhaa fenua o te amuiraa no Lakselv, e taio-atoa-hia te oire iti no Karasjok, te oire pu o te mau Samis—te feia tumu o te mau tuhaa fenua i te pae apatoerau o Norevetia, Tuete, Filelane e Rusia. Ia putapû te aau o te taata e ora ra i ǒ, ua haapii Elsebeth i te reo Sami. I teie nei, e nehenehe ta ˈna e tauaparau rii i roto i tera reo. Te au ra anei oia i ta ˈna tuhaa fenua apî? Te na ô ra oia ma te oaoa: “E ono haapiiraa Bibilia ta ˈu. Ua oaoa roa vau i te tavini i ǒ nei!”

E pionie e e tavini tauturu o Fabian i teie nei. Te faatia ra o ˈna e ua tauturu raua Isabel e toru taurearea o ta ratou amuiraa apî o te hinaaro i te faaitoitoraa no te apiti atu â i te mau ohipa a te amuiraa. Mea itoito ratou tootoru i teie nei i roto i te taviniraa. E piti o ratou tei bapetizo e tei rave i te taviniraa pionie tauturu i Mati 2012. Ua haamauruuru hoê o te feia apî tei haamata i te paruparu i te pae varua ia Fabian raua Isabel no te tautururaa ia ˈna ia tapea maite i roto i te parau mau. Te na ô ra Fabian: “Ua putapû roa vau i ta ˈna i parau mai. Auê hoi te oaoa ia tauturu i te hoê taata!” Te tapao ra Isabel: “I roto i teie taviniraa, ‘ua tamata iho â vau e ua ite au i te maitai o Iehova.’” (Sal. 34:8) Te na ô faahou ra oia: “Tavini i ô nei, hope te au!”

E oraraa ohie to Marelius raua Kesia i teie nei, e oraraa fanaˈo râ. E 41 taata poro i teie nei ta te amuiraa no Alta, i reira hoi raua i te haereraa. Te parau ra Marelius: “A hiˈo ai i muri, mea faaitoito mau ia ite e ua taui roa to mâua oraraa. Te haamauruuru nei mâua ia Iehova i tia ˈi ia mâua ia tavini i ǒ nei ei pionie. Aita e mea hoona ˈtu â.” Te na ô ra Kesia: “Ua haapii au ia tiaturi atu â ia Iehova, e ua haapao mai iho â oia. Ua tauturu atoa mai te ora-atea-raa i to ˈu utuafare fetii ia haafaufaa roa ˈtu â i te mau taime e amui ai matou. Aita roa ˈtu vau i tatarahapa i ta mâua faaotiraa.”

Mea maitai anei o Knut raua Lisbeth i Ouganda? Te faatia ra Knut: “Aita mâua i matau oioi i te huru oraraa e te taˈere apî. Te pape, te uira, te mauiui opu—tera to mâua mau fifi i te tahi mau taime. Teie râ, e noaa noa mai ta mâua haapiiraa Bibilia!” Te na ô ra Lisbeth: “Afa hora noa i to mâua vahi faaearaa, te vai ra te mau tuhaa fenua aitâ te parau apî maitai i porohia ˈtura. A haere ai râ i ǒ, e itehia te mau taata e taio ra i te Bibilia e o te ani mai ia haapii ia ratou. Aita e nehenehe e faaau i te oaoa ia haapii i teie mau taata haehaa te poroi Bibilia!”

Auê to tatou Aratai, te Mesia ra o Iesu, i te oaoa i te ite e te ravehia ra te ohipa pororaa ta ˈna i haamata i roto i te mau tuhaa fenua rahi atu â! Oia mau, te oaoa rahi nei te mau tavini atoa a te Atua i te horoa ia ratou iho no te haapao i ta Iesu faaueraa “e faariro i te mau fenua atoa ei pǐpǐ.”—Mat. 28:19, 20.