Eiaha e haapeapea roa ino no te vahi i reira te hoê taata tiavaruhia e parahi ai i te Piha a te Basileia. Ua faaitoito noa teie vea i te mau metua Kerisetiano o te manaˈo ra e mea tano, ia horoa i te tauturu pae varua i ta raua tamarii tiavaruhia o te noho noa ra i te fare. E nehenehe atoa raua e faatere i ta ˈna haapiiraa Bibilia aita anaˈe i naea to ˈna matahiti. Ta Te Pare Tiairaa ïa o te 1 no Atopa 2001, api 16 e tae atu i te api 18, i faaite. E fanaˈo ïa tera tamarii i te mau faaitoitoraa titauhia no te taui i to ˈna haerea.

I te Piha a te Basileia, e au ra e mea tano ia parahi muhu ore noa te hoê tamarii tiavaruhia aitâ i naea te matahiti i pihaiiho i to ˈna mau metua. Aita e faaheporaa ia parahi te hoê taata tiavaruhia i muri roa. E nehenehe ïa te hoê tamarii tiavaruhia e parahi e to ˈna ra mau metua noa ˈtu ihea raua e parahi ai. Te hinaaro nei na metua e tauturu i ta raua tamarii i te pae varua. Mea ohie aˈe ïa ia na reira tei pihaiiho anaˈe o ˈna ia raua.

Hoê â anei no te hoê tamarii tiavaruhia o te ore e noho faahou ra e to ˈna mau metua? I na mua ˈˈe, ua faataa maitai ta tatou mau papai i te haerea o te hoê Kerisetiano no nia i te amuiraa ˈtu e te hoê melo utuafare tiavaruhia aita e noho ra i te fare. a E nehenehe râ te hoê taata tiavaruhia e parahi muhu ore noa e to ˈna ra utuafare i te mau putuputuraa. Mea taa ê roa te reira i te imi-noa-raa i te amui atu ia ˈna ei melo utuafare. E haerea tano anei to te mau melo taiva ore o te utuafare i nia i to ratou fetii tiavaruhia? Te tutava ra anei ratou i te pee i te aˈoraa Bibilia no nia i te amuiraa ˈtu ia ˈna? Mai te peu e e, aita ïa e faufaa ia haapeapea.—Kor. 1, 5:11, 13; Ioa. 2, 11.

Eiaha e haapeapea ia parahi te hoê taata tiavaruhia i pihaiiho i te hoê melo o to ˈna utuafare aore ra o te amuiraa a faaite noa ˈi i te haerea e tano. Eiaha ïa e tuu i te mau faatureraa no nia i te vahi e parahi ai te hoê taata tiavaruhia. Ia au i te huru tupuraa, e nehenehe te reira e faatupu i te peapea. E nafea ïa? E mea tia ia tutava te feia atoa i tae mai i te putuputuraa, tae noa ˈtu te fetii taiva ore, i te faatura i te mau faaueraa tumu Bibilia no nia i te tiavaruraa. Eiaha atoa te reira ia riro ei turoriraa no te mau taeae.