Ua au roa te taata i te hoê hohoˈa teata muhu ore (A Trip Down Market Street) no nia i te oraraa i San Francisco, i Marite, i te omuaraa o te mau matahiti 1900. Ua patahia te purumu rahi tei î i te taata maoti te hoê matini taviriraa tei tuuhia i mua mai i te hoê pereoo uta taata hutihia e te niuniu. I itehia na i roto te mau pereoo hutihia e te puaahorofenua, te mau pereoo no tera ra tau, te feia hoohoo e te mau tamaroa o te hoo atu i te vea.

Mea putapû mau teie hohoˈa teata no te mea ua tavirihia paha te reira i Eperera 1906. Tau mahana i muri aˈe, i te 18 no Eperera, ua aueue te fenua i ǒ e ua ura ˈtura te oire i te auahi. E tausani taata tei pohe e fatata tera tuhaa o te oire i te mou. Ua patahia paha vetahi o ratou i roto i tera hohoˈa. Ua parau Scott Miles, e fetii o te hoê taata tei taviri i te hohoˈa: “Aita te feia i patahia i ite eaha ta ratou e faaruru. Mea aroha roa.”

E nehenehe e huti i te hoê haapiiraa no tatou i teie mahana. Te aroha atoa nei tatou i to tatou taata-tupu. I te mau mahana atoa, te ohipa noa ra ratou ma te ore e ite e e ati to mua: te haamouraa o teie nei ao e to te reira huru oraraa. Mea taa ê te reira i te hoê aueueraa fenua manaˈo-ore-hia. No te aha? E taime poto te toe nei no te faaara i te taata-tupu e ua fatata te mahana haavaraa a Iehova. Peneiaˈe te faataa nei oe maa taime i te hopea hebedoma taitahi no te poro na te mau fare. E nehenehe anei râ oe e rave hau atu â no te faaara ia vetahi ê?

E hiˈoraa faahiahia mau Iesu. I poro na oia i te mau taata atoa, i te hoê telona i nia i te purumu aore ra i te hoê vahine i te hoê apoo pape a faafaaea ˈi i te avatea. (Luka 19:1-5; Ioa. 4:5-10, 21-24) Ua ineine atoa Iesu i te taui i ta ˈna i faanaho no te haapii atu i te taata noa ˈtu e e taime faafaaearaa. No to ˈna aroha i to ˈna taata-tupu, ua rave Iesu i te taime no te haapii ia ratou. (Mar. 6:30-34) E nafea ia pee i te manaˈo ru o Iesu?

Te ora nei Melika i roto i te hoê fare tahua paruru-maitai-hia. E piahi no te fenua ěê te rahiraa e ora ra i ǒ. E numera niuniu tapura-ore-hia ta ratou e aita to ratou iˈoa i papaihia i te piha  tomoraa. Te oaoa nei ïa o ˈna i te tauaparau no nia i te Bibilia e o ratou i roto i te piha tomoraa aore ra i te matini utaraa taata. Te na ô ra oia, “O ta ˈu tuhaa fenua tera.” E rave Melika i te mau papai reo ěê ia ˈna ra e mea rahi tei farii i te mau api parau e vea. E faaite atoa ˈtu o ˈna e e nehenehe e hiˈo i te www.dan124.com. Ua haamata oia e rave rahi haapiiraa Bibilia.

Te na reira atoa nei Sonia o te ohipa nei i roto i te hoê fare maˈi. Ta ˈna fa, o te pororaa ïa i ta ˈna mau hoa ohipa atoa. E faaroo na mua oia i to ratou mau hinaaro e i ta ratou e anaanatae ra. E i te taime tamaaraa e imi oia ia ratou taitahi no te aparau no nia i te Bibilia. Ma te na reira, ua haamata Sonia e piti haapiiraa Bibilia. Ua faaoti atoa oia e faaohipa i te tahi o ta ˈna mau taime faafaaearaa no te tauaparau e te feia e tiai ra i roto i te piha tomoraa o te fare maˈi.

Ia au i te hoê taata tei ora mai i te aueueraa fenua i 1906, o te ati teie “o tei ore i tairi aˈenei i te hoê fenua aore ra oire.” Eita râ te mau ati atoa e nehenehe e faaauhia i te mahana tahooraa o te fatata i te haamou i “te feia [atoa] aore i ite i te Atua.” (Tes. 2, 1:8) Te hinaaro mau nei Iehova ia taui te taata i to ratou huru feruriraa e aau a farii atu ai i te poroi faaararaa ta to ˈna mau Ite e faaite ra.—Pet. 2, 3:9; Apo. 14:6, 7.

E faaara i te taata e e anotau fifi mau teie, o ta oe ïa fanaˈoraa taa ê. Mea faufaa ia faaea ratou i te haapao noa i to ratou mau hinaaro miimii a tavini atu ai ia Iehova. (Zeph. 2:2, 3) E tia anei ia oe ia faaohipa i te mau taime atoa no te poro i to mau hoa ohipa, te feia tapiri e te feia ta oe e farerei ra i te mau mahana ˈtoa? E faaara ˈtu â anei oe ia vetahi ê?