1, 2. (a) Eaha te tupu ia aupuru-maitai-hia te mamoe? (b) No te aha te taata e rave rahi i te tau o Iesu i au ai i te mamoe aore e tiai?

 E MAITAI mai te mau mamoe e tiai î i te here anaˈe ta ratou. Ia au i te hoê buka no nia i te faaamuraa mamoe, eita e navai ia faatamaa noa te tiai mamoe i te nǎnǎ. Mea faufaa râ ia aupuru oia i te mamoe taitahi. E oraora maitai ïa te nǎnǎ taatoa. Aita anaˈe, e paruparu e e maˈihia ratou.

² E maitai atoa te amuiraa taatoa ia haapao e ia aupuru te tiai Kerisetiano i te mamoe taitahi a te Atua. A haamanaˈo na e ua aroha Iesu i te nahoa no te mea “ua purara ratou e ua faarue-taue-hia, mai te mamoe tiai ore.” (Mat. 9:36) No te aha mai tera ˈi ratou? No te ino, te etaeta e te haavare o te feia i haapii i te ture a te Atua i te nunaa. Aita tera mau aratai i here e i aupuru i te nunaa, ua tuu atu râ i te “hopoia teimaha” i nia i to ratou tapono.—Mat. 23:4.

3. Ia haamanaˈo te mau matahiapo i te aha a haapao ai i te mamoe?

³ E hopoia rahi ta te mau matahiapo i teie mahana. Na Iehova e na Iesu te mamoe ta ratou e haapao ra. ‘Ua hoo hia te mamoe i te hoo rahi’ ta Iesu, “te tiai mamoe maitai,” i aufau e to ˈna iho “toto taoˈa.” (Ioa. 10:11; Kor. 1, 6:20, Te Bibilia Moˈa V.C.J.S., 1976; Pet. 1, 1:18, 19) No to ˈna here rahi i te mamoe i horoa ˈi o ˈna i to ˈna ora no ratou. E mea tia ia haamanaˈo noa te mau matahiapo e o Iesu Mesia, “te tiai mamoe rahi,” to ratou tiaau. E hopoia ïa ta ratou i mua ia ˈna.—Heb. 13:20.

4. Eaha ta tatou e hiˈopoa mai?

⁴ E nafea ïa te mau matahiapo e haapao ai i te  mamoe? Te faaitoitohia ra te mau melo o te amuiraa ‘ia faaroo i to ratou mau aratai.’ I te tahi aˈe pae, te faauehia ra te mau matahiapo eiaha ia “faahepo i nia iho i te tufaa a te Atua.” (Heb. 13:17; a taio i te Petero 1, 5:2, 3.) E nafea ïa te mau matahiapo e aratai ai ma te faahepo ore i te nǎnǎ a faaea noa ˈi i roto i te mau otia o to ratou tiaraa horoahia mai e te Atua?

5. Eaha ta te Isaia 40:11 e haapii maira no nia ia Iehova?

⁵ Ua parau te peropheta Isaia no nia ia Iehova: “E faaamu oia i ta ˈna nǎnǎ mai te tiai mamoe ra; e haaputu oia i te mau fanauˈa rii i roto i tana rima, e ei roto ratou i tana ouma ia hopoi; e aratai rii maite oia i te mau maiaa faaote pinia ra.” (Isa. 40:11) Te faataa ra teie irava e nafea Iehova e haapao ai i te mau hinaaro o te mau melo o te amuiraa tei paruparu aore ra o te hema ohie. Mai te hoê tiai tei ite i te hinaaro taa ê o te mamoe taitahi e o te tauturu oioi atu, ua ite Iehova i te mau hinaaro o te Kerisetiano taitahi e te oaoa nei oia i te tauturu atu. Mai te hoê tiai o te tuu i te hoê pinia mamoe i roto i to ˈna tufetu ahu, e tamahanahana e e haapao roa ˈtu â Iehova ia tatou a faaruru ai tatou i te fifi rahi. O ˈna hoi “te tumu o te aroha.”—Kor. 2, 1:3, 4.

6. E nafea te hoê matahiapo e pee ai i te hiˈoraa o Iehova?

⁶ E hiˈoraa faahiahia mau â Iehova no te hoê tiai mamoe pae varua! Mai ia Iehova, ia haapao maite oia i te mau hinaaro o te mau mamoe e tia ˈi. Ia ite o ˈna eaha te mau fifi ta ratou e faaruru ra, e taa ia ˈna afea e e nafea ia faaitoito e ia tauturu atu. (Mas. 27:23) Mea faufaa ïa ia faataa o ˈna i te taime no te tauaparau e to ˈna mau hoa haamori. Ma te ore e faaô ia ˈna i roto i to ratou oraraa, e haapao o ˈna i ta ˈna e ite ra e e faaroo ra i roto i te amuiraa a rave atu ai i te taime no te ‘tauturu i te feia paruparu’ ma te here.—Ohi. 20:35; Tes. 1, 4:11.

7. (a) I te tau o Ezekiela e Ieremia, ua haapao-maitai-hia anei ta te Atua mau mamoe? A faataa. (b) Eaha te haapiiraa e huti mai a faautua ˈi Iehova i te mau tiai mamoe pae varua taiva?

⁷ A hiˈo na i te haerea o te mau tiai ta te Atua i faautua i te tau o Ezekiela e Ieremia. Ua na reira Iehova no te mea aita ratou i haapao maite i ta ˈna mau mamoe. Aita anaˈe e taata no te haapao i te mau mamoe, e haru-ohie-noa-hia ratou e e purara. Ua faaamu teie mau tiai ia ratou iho, eiaha râ i te mau mamoe o ta ratou i rave ino. (Ezk. 34:7-10; Ier. 23:1) Ua faautua te Atua i te mau tia faatere o te Amuiraa faaroo Kerisetiano no te hoê â tumu. Te haapapu atoa râ te reira i te faufaaraa ia haapao maitai e ia here i ta Iehova nǎnǎ.

8. E nafea te mau matahiapo e pee ai i te hiˈoraa maitai roa o Iesu a horoa ˈi i te aˈoraa?

⁸ No te huru tia ore o te taata, eita paha vetahi i roto i te amuiraa e taa oioi i ta Iehova e titau ra ia ratou. Ua rave paha ratou i te tahi mea o te ore e tu ra i te aˈoraa Bibilia aore ra o te faaite ra e aitâ ratou i riro atura ei Kerisetiano feruriraa paari. Ia aha te mau matahiapo? E mea tia ia pee ratou i te faaoromai o Iesu. E pinepine hoi ta ˈna mau pǐpǐ i te mârô no te ite o vai te rahi aˈe i roto i te Basileia. Ua tamau râ Iesu i te haapii e i te horoa ˈtu i te aˈoraa î i te here no  nia i te haehaa. (Luka 9:46-48; 22:24-27) Ma te horoi i to ratou avae, ua faaite oia eaha te haehaa. Te hoê ïa huru maitai e titauhia ia faaite te mau matahiapo.—A taio i te Ioane 13:12-15; Pet. 1, 2:21.

9. Eaha te huru feruriraa ta Iesu i faaitoito i ta ˈna mau pǐpǐ ia faaite?

⁹ Mea taa ê to Iesu manaˈo o te hoê tiai i to Iakobo e Ioane. Ua hinaaro na aposetolo i te hoê tiaraa teitei i roto i te Basileia. Ua faaafaro râ Iesu i to raua huru feruriraa ma te parau: “Ua ite outou e, te faahepo nei te hui mana o te Etene ia ratou, e te feia rarahi ra te mana ra ïa i nia iho ia ratou. Eita râ e tia ia na reira i roto ia outou; o te hinaaro râ i te faarahi i roto ia outou na, ia riro ïa oia ei tavini no outou e tia ˈi.” (Mat. 20:25, 26) E mea tia ia patoi te mau aposetolo i te hinaaro e “faahepo” aore ra e faatere i to ratou mau hoa.

10. (a) No Iesu, e nafea te mau matahiapo e haapao ai i te nǎnǎ? (b) Eaha te hiˈoraa ta Paulo i vaiiho mai?

¹⁰ Te hinaaro nei Iesu ia pee te mau matahiapo i to ˈna hiˈoraa a haapao ai ratou i te nǎnǎ. Ia ineine ratou i te tavini, eiaha râ i te faatere, i to ratou mau hoa Kerisetiano e tia ˈi. Ta te aposetolo Paulo ïa i rave ma te haehaa. Ua na ô oia i te mau matahiapo o te amuiraa i Ephesia: “Ua ite outou i te huru o to ˈu parahiraa i ǒ outou nei, mai te mahana matamua mai â a tipae mai ai au i Asia nei ra, i te haamoriraa i te Fatu ma te haehaa.” Ua hinaaro Paulo ia tauturu tera mau matahiapo ia vetahi ê ma te aau tae e te haehaa. Ua parau oia: “Aita e mea toe ia ˈu i te faaite atu ia outou na, e ia na reira atoa outou i te rave i te ohipa, e e tauturu atu hoi outou i te feia paruparu e tia ˈi.” (Ohi. 20:18, 19, 35) Ua faaite Paulo i to Korinetia e e ere o ˈna i te fatu o to ratou faaroo. E tauturu haehaa râ no to ratou oaoa. (Kor. 2, 1:24) E hiˈoraa maitai Paulo o te haehaa e te itoito no te mau matahiapo i teie mahana.

11, 12. E nafea te hoê matahiapo e nehenehe ai e tauturu i te hoê taeae ia rave i te hoê faaotiraa?

¹¹ E mea tia ia ‘tapea maite te hoê matahiapo i te parau mau i haapiihia ˈtu ia ˈna.’ (Tito 1:9) E na reira râ o ˈna “ma te aau mǎrû.” (Gal. 6:1) Ei hiˈoraa, eita te hoê tiai mamoe maitai e faahepo i te hoê taeae ia pee i te tahi haerea. E tauturu râ o ˈna ia ˈna ia rave i te mau faaotiraa niuhia i nia i to ˈna here ia Iehova e i to ˈna hinaaro i ta ˈna Parau. E nafea? Ma te faataa ˈtu i te tahi mau aˈoraa Bibilia aore ra i te tahi tumu parau i roto i ta tatou mau papai. Ma te faaitoito atu ia feruri e nafea te faaotiraa ta ˈna e rave e ohipa ˈi i nia i to ˈna mau taairaa e o Iehova. Ma te haamanaˈo atu i te faufaaraa ia imi i ta te Atua aratairaa na roto i te pure hou a rave ai i te hoê faaotiraa. (Mas. 3:5, 6) Ia oti, e vaiiho te matahiapo ia ˈna ia rave i ta ˈna iho faaotiraa.—Roma 14:1-4.

¹² Ia niuhia te mau aratairaa a te mau tiaau Kerisetiano i nia noa i te mau Papai. Mea faufaa roa ïa ia faaohipa maitai e ia turu ratou i te Bibilia. Ma te na reira, eita te mau matahiapo e faaohipa i to ratou tiaraa ma te tano ore. E ere na ratou te mamoe. Na te melo taitahi o te amuiraa e amo i ta ˈna iho hopoia i mua ia Iehova e Iesu no te mau faaotiraa ta ˈna e rave.—Gal. 6:5, 7, 8.

13, 14. Ei hiˈoraa te hoê matahiapo no te nǎnǎ i roto i teihea mau tuhaa?

¹³ I muri aˈe i te aˈoraa i te mau matahiapo ia ore e ‘faahepo i nia iho’ i te amuiraa, ua faaue te aposetolo Petero ia ratou ia riro ei “aveia” aore ra hiˈoraa no te nǎnǎ. (Pet. 1, 5:3) E nafea ïa? A hiˈo na i na huru maitatai e titauhia ra i te hoê taeae e hinaaro ra e tavini ei matahiapo. A tahi, ia riro o ˈna ei taeae “haapao maitai.” Te auraa ïa e e taa maitai ia ˈna te mau aratairaa Bibilia e ua ite o ˈna e nafea ia faaohipa i te reira i roto i to ˈna iho oraraa. Te piti, ia riro o ˈna ei taeae o te “aˈo maitai i to ˈna iho utuafare ma te tura.” E utuafare anaˈe ta ˈna, e mea tia ia riro o ˈna ei tane faaipoipo e metua tane hiˈoraa maitai. No te aha? Aita anaˈe o ˈna i “ite i te aˈo i to ˈna iho utuafare, eaha e tia ˈi ia ˈna ia tiai i te ekalesia [aore ra amuiraa] o te Atua?” (Tim. 1, 3:1, 2, 4, 5) E tiaturi te mau melo o te amuiraa i te mau matahiapo e faaite ra i tera na huru maitatai.

¹⁴ Mai ia Iesu, e horoa ˈtoa te mau matahiapo i te hiˈoraa maitai i roto i te pororaa. E tuhaa faufaa te pororaa i te parau apî maitai o te Basileia i roto i to Iesu oraraa i te fenua nei. Ua faaite o ˈna i ta ˈna mau pǐpǐ e nafea ia rave i tera ohipa. (Mar. 1:38; Luka 8:1) I teie mahana, mea mahanahana mau â ia poro e te mau matahiapo e ia ite i to ratou itoito rahi no teie ohipa faaoraraa e e nafea ratou e haapii ai ia vetahi ê! Te faaohipa nei te mau matahiapo i to ratou taime e itoito no te poro i te parau apî maitai noa ˈtu e e porotarama î maitai ta ratou. Te turai ra te reira i te amuiraa ia faaite i te hoê â itoito rahi. E horoa atoa te mau matahiapo i te hiˈoraa maitai ma te faaineine e te apiti i te mau putuputuraa e ma te tamâ e te atuatu i te Piha a te Basileia.—Eph. 5:15, 16; a taio i te Hebera 13:7.

15. Eaha te tahi mau tumu e haere ai te mau matahiapo e hiˈo i te mau Kerisetiano no te faaitoito ia ratou?

¹⁵ E tauturu oioi te hoê tiai maitai i te mamoe tei pepe aore ra tei maˈihia. Oia atoa, e tauturu oioi te mau matahiapo i te melo o te amuiraa e mauiui ra aore ra e hinaaro ra i te aˈoraa e te faaitoitoraa. E hinaaro paha te Kerisetiano ruhiruhia e tei maˈihia i te tauturu no to ratou mau hinaaro o te mau mahana atoa. Mea faufaa atoa râ ia fanaˈo ratou i te faaitoitoraa e te tamahanahanaraa a te Bibilia. (Tes. 1, 5:14) Te faaruru nei paha te feia apî o te amuiraa i te fifi mai te  aroraa i “te mau hinaaro o te apîraa.” (Tim. 2, 2:22) E tauturu te mau matahiapo i te mau melo atoa o te amuiraa ma te faanaho i te hoê farereiraa no te faaitoito atu. E taa ïa ia ratou te mau fifi o to ratou mau taeae a faaitoito atu ai maoti te mau aˈoraa Bibilia tano maitai. Ia haapao-oioi-hia te reira, e faatitiaifaro-oioi-hia e rave rahi fifi.

16. Ia aha te mau matahiapo ia fifi roa mai te hoê melo o te amuiraa?

¹⁶ Ia aha te mau matahiapo ia fifi roa mai te hoê melo o te amuiraa a ino atu ai to ˈna mau taairaa e o Iehova? Ua parau te taata papai Bibilia o Iakobo: “Te pohe ra anei te hoê o outou i te maˈi? e tii oia i te mau peresibutero o te ekalesia ra [aore ra matahiapo o te amuiraa], e na ratou e pure ia ˈna, ma te faatahinu ia ˈna i te monoˈi i te iˈoa o te Fatu ra [Iehova]. E e ora taua maˈi ra i te pure faaroo, e na te Fatu oia e faatia i nia; e i rave na oia i te hara ra, e faaorehia ta ˈna hara.” (Iak. 5:14, 15) E haere oioi te mau matahiapo e tauturu i te hoê Kerisetiano tei ‘maˈihia’ i te pae varua noa ˈtu aita o ˈna i haere mai e hiˈo ia ratou. Mea faufaa ia pure te mau matahiapo no to ratou mau taeae e i pihai iho ia ratou, oia atoa ia tauturu ia ratou i te mau taime fifi. Mea na reira ratou e riro ai ei tiai maitai o te faaitoito i te tahi atu ia tamau i te tavini ia Iehova ma te oaoa.—A taio i te Isaia 32:1, 2.

17. Eaha te itehia ia pee te mau matahiapo i “te tiai mamoe rahi”?

¹⁷ Te tutava nei te mau tiai Kerisetiano i te pee i te “tiai mamoe rahi” ra o Iesu Mesia i roto i te mau mea atoa ta ratou e rave ra i roto i te faanahonahoraa a Iehova. E tauturu teie mau taeae haapao maitai i te nǎnǎ ia puai mai i te pae varua e ia tavini i te Atua ma te taiva ore. Te mauruuru mau nei tatou i to tatou mau tiai mamoe î i te here e i to tatou Tiai mamoe otahi ra o Iehova.