1, 2. (a) O vai te ite rahi roa ˈˈe o Iehova? (b) Eaha te auraa o te iˈoa Iesu? E eaha ta ˈna i rave no te tauturu i te mau ati Iuda ia fanaˈo faahou i ta Iehova farii maitai?

 A HAAVAHIA ˈI Iesu, ua parau o ˈna ma te itoito i te tavana Roma o Ponotio Pilato: “I fanau mai ai au, e i haere mai ai hoi au i te ao nei, e faaite i te parau mau.” (A taio i te Ioane 18:33-37.) E rave rahi matahiti i muri aˈe, ua parau te aposetolo Paulo no Iesu e o ˈna te ite o tei faaite i te “faˈiraa parau maitai i te aro o Ponotio Pilato.” (Tim. 1, 6:13) Na Satani e faatere ra i teie nei ao tei î i te riri. No te tamau noa i te horoa i te faaiteraa, e mea tia ia itoito tatou mai ia Iesu, “te ite mau e te parau mau.”—Apo. 3:14.

² I na mua ˈˈe, e ite no Iehova te mau ati Iuda atoa. O Iesu râ te riro mai ei ite rahi roa ˈˈe. (Isa. 43:10) Hou Iesu a fanauhia ˈi, ua parau te hoê melahi i to ˈna metua tane faaamu o Iosepha: “E te tamaiti ta ˈna e fanau, o ta oe ïa e topa ˈtu ia Iesu; e faaora hoi oia i to ˈna taata i ta ratou hara.” (Mat. 1:20, 21) Na roto i te reo Hebera, o “Iehova te faaora” te auraa o te iˈoa Iesu. E faaohipa Iehova ia Iesu no te faaora i te huitaata i te hara e te pohe. Ua parau Iesu i te mau ati Iuda ia tatarahapa i ta ratou mau hara no te fanaˈo faahou  i ta Iehova farii maitai. (Mat. 10:6; 15:24; Luka 19:10) Ua poro o ˈna i te Basileia o te Atua. Ua papai Mareko: “Haere atura Iesu i Galilea, i te parau haerea i te parau maitai o te basileia o te Atua. Na ô atura, Ua tae i te tau, te fatata mai nei te basileia o te Atua; a tatarahapa, a faaroo mai i te evanelia nei.” (Mar. 1:14, 15) Ma te itoito rahi, ua poro Iesu. E ma te itoito, ua faahapa atoa o ˈna i te mau tia haapaoraa ati Iuda puai mau. No reira atoa hoi ratou i haapohe ai ia ˈna.—Mar. 11:17, 18; 15:1-15.

3. Eaha tei tupu e toru mahana i muri aˈe i to Iesu poheraa?

³ E toru mahana i muri aˈe i to Iesu pohe ino mau, ua tupu te tahi mea maere mau. Ua faatia faahou mai Iehova ia Iesu eiaha e te hoê tino taata, e te hoê tino varua râ. (Pet. 1, 3:18) No te haapapu i ta ˈna mau pǐpǐ e ua faahoˈihia mai oia i te ora, ua rave o ˈna i te hoê tino taata. I tera iho â mahana a faatia-faahou-hia ˈi oia, e pae taime to ˈna faaiteraa ia ˈna i te mau pǐpǐ taa ê.—Mat. 28:8-10; Luka 24:13-16, 30-36; Ioa. 20:11-18.

4. Eaha tei tupu a faaite ai Iesu ia ˈna i ta ˈna mau pǐpǐ, e eaha ta ˈna i faaue ia ratou ia rave?

⁴ A faaite ai Iesu ia ˈna i te paeraa o te taime, ua putuputu ta ˈna mau aposetolo e te tahi atu. I reira, ua tauturu o ˈna ia ratou ia taa e ua tohuhia to ˈna pohe e tia-faahou-raa i roto i te mau Papai. I te hopea o teie putuputuraa faufaa, ua parau Iesu i ta ˈna mau pǐpǐ eaha te titauhia ia rave ratou. Ua faaite o ˈna e e “poro-haere-hia te tatarahapa e te faaoreraa i te hara i to ˈna ra iˈoa, na Ierusalema ˈtu nei â, e ati noa ˈˈe te mau fenua atoa e tia ˈi.” Faaue aˈera Iesu ia ratou: “Ei ite outou i teie nei mau parau.”—Luka 24:44-48.

5, 6. (a) E riro ta Iesu mau pǐpǐ ei ite no vai? (b) E faaite ta Iesu mau pǐpǐ i te aha?

⁵ Ua taa maitai ïa i te mau aposetolo i ta Iesu i faaue i to ˈna faraa ˈtu ia ratou no te taime hopea e 40 mahana i muri iho. Ua parau o ˈna: “Ei ite hoi outou no ˈu i Ierusalema nei e Iudea atoa hoi e ati noa ˈˈe, e Samaria, e tae noa ˈtu i te hopea o te fenua.” (Ohi. 1:8) E ati Iseraela te mau pǐpǐ e e ite no Iehova aˈena ratou. I teie nei, e riro ratou ei ite no Iesu atoa. Eaha te auraa?

⁶ E haamata ratou i te faaite e te faaohipa ra Iehova i teie nei ia Iesu no te faaora i te huitaata. E ravea faaoraraa rahi aˈe teie i ta Iehova i rave na no te faaora i te mau Iseraela i tahito ra. Maoti te pohe e te tia-faahou-raa o Iesu Mesia e nehenehe ai te taata e tiamâ mai i te hara e te pohe. A faatavaihia ˈi te mau pǐpǐ a Iesu i te varua moˈa i te Penetekose 33, ua haamata ratou i te faaite haere i te mau “ohipa maere a te Atua,” ia au ïa i te huriraa Bibilia a Te Faufaa Api. Mea rahi te taata o tei faaroo i teie poroi tei tatarahapa, tei faatupu i te faaroo i te tusia o Iesu e tei bapetizohia. I nia i te raˈi, ua fanaˈo Iesu tei faatiahia mai i te hoê tiaraa apî. E te faaohipa ra Iehova ia ˈna no te faaora e tausani taata i nia i te fenua.—Ohi. 2:5, 11, 37-41.

7. Eaha ta te mau mea i tupu i te Penetekose 33 i haapapu?

⁷ Ua haapapu te mau mea i tupu i te Penetekose 33 e ua farii Iehova i te tusia tia roa o Iesu ei hoo no te faatiamâ mai i te taata i te hara. (Heb. 9:11, 12, 24) Ua  faataa Iesu e ua haere mai o ˈna no te “horoa i to ˈna ora ei hoo no te taata e rave rahi.” (Mat. 20:28) O te mau ati Iuda noa anei te fanaˈo i te mau haamaitairaa o teie hoo? E ere, e “hopoi ê atu [te hoo] i te hara o te ao.” O to te Atua hinaaro ‘ia ora te taata atoa.’—Ioa. 1:29; Tim. 1, 2:4-6.

8. Eaha tei tauturu i te mau pǐpǐ matamua a Iesu ia tamau noa i te faaite ia ˈna, e eaha ta ratou i rave?

⁸ Ma te itoito, ua tamau noa te mau pǐpǐ matamua a Iesu i te faaite ia ˈna. Eaha tei tauturu ia ratou? Aita ratou i na reira ma to ratou iho puai. Ua ani râ ratou ia Iehova i to ˈna varua moˈa ia itoitohia ratou no te horoa noa i te faaiteraa. (A taio i te Ohipa 5:30-32.) E 27 matahiti i muri aˈe i to te mau pǐpǐ a Iesu haamataraa i te horoa i te faaiteraa, ua poro ratou i “te parau mau i te evanelia” i te mau ati Iuda e te mau taata o te mau nunaa atoa “i raro aˈe i teie nei raˈi.”—Kol. 1:5, 23.

9. Mai tei tohuhia, eaha tei tupu i te amuiraa Kerisetiano?

⁹ A nuu noa ˈtu ai râ te tau, ua haamata te mau melo o te amuiraa i te haapii i te mea hape i te tahi atu. (Ohi. 20:29, 30; Pet. 2, 2:2, 3; Iuda 3, 4) E i muri aˈe, ua haaviivii teie mau orometua haavare i te amuiraa taatoa. Ua tohu Iesu e e ite-noa-hia teie ohipa apotata e tae roa i te ‘hopea o teie nei ao.’ (Mat. 13:37-43) I Atopa 1914, ua faaarii Iehova ia Iesu i nia i te huitaata. Ua haamata te “anotau hopea” o te ao a Satani i tera taime.—Tim. 2, 3:1.

10. (a) Eaha te taio mahana ta te mau Kerisetiano faatavaihia i poro noa na? (b) Eaha tei tupu i Atopa 1914, e mea nafea tatou i te iteraa?

¹⁰ Hau atu e 30 matahiti hou te avaˈe no Atopa 1914, ua haamata te mau Kerisetiano faatavaihia i te poro e e haamata te Basileia o te Atua i te faatere i tera taio mahana faufaa. O ta ratou ïa i maramarama maoti te parau tohu a Daniela no nia i te hoê tumu raau teitei mau o tei tâpûhia e o tei tupu faahou i muri aˈe i te hoê area tau. (Dan. 4:16) Ua faataa Iesu i te hoê tapao o te tauturu i ta ˈna mau pǐpǐ ia ite e ua riro mai o ˈna ei Arii e ua haamata te anotau hopea. Te haapapu  ra te mau tupuraa mai 1914 mai â e e Arii Iesu. (Mat. 24:3, 7, 14; Luka 21:24) I teie mahana, i roto i te mau “ohipa maere a te Atua” ta tatou e poro nei, te vai atoa ra te parau e ua faariro Iehova ia Iesu ei Arii o te Basileia i 1914.

11, 12. (a) Eaha tei tupu i 1919? (b) Eaha tei ite-maitai-hia i 1935? (A hiˈo i te hohoˈa matamua.)

¹¹ I 1914, a riro mai ai Iesu Mesia ei Arii, ua haamata o ˈna i te faatiamâ mai i ta ˈna mau pǐpǐ faatavaihia ia “Babulonia rahi,” oia hoi i te haapaoraa hape. (Apo. 18:2, 4) I 1919, i muri iti noa ˈˈe i te hopea o te Tamaˈi rahi Matamua, e tiamâraa rahi aˈe to te feia faatavaihia no te poro na te ao atoa. Ua faaite haere ratou i te mana faaora o te hoo e i te parau apî oaoa o te Basileia o te Atua. Ei faahopearaa, e tausani atu â taata tei haapii i te parau mau e tei faatavaihia no te riro ei arii apiti a te Mesia i nia i te raˈi.

¹² I 1935, ua ite-maitai-hia e ua haamata aˈena te Mesia i te haaputu i ta ˈna mau “mamoe ê atu.” I teie mahana, e mirioni mamoe ê atu na te ao atoa. Te pee nei ratou e te feia faatavaihia i te hiˈoraa itoito o te Mesia e te horoa nei i te faaiteraa i te tahi atu. Te tiaturi atoa nei te mau mamoe ê atu e o te tusia o Iesu te ravea otahi e ora ˈi ratou. Ua ite ratou e ma te tamau noa i te poro e te faaohipa i to ratou ora no te faaoaoa ia Iehova e nehenehe ratou e ora ˈtu i “te ati rahi” e e ora i roto i te ao apî a te Atua.—Ioa. 10:16; Apo. 7:9, 10, 14.

13. Ei Ite no Iehova, eaha ta tatou e faaoti papu i te rave? E e nafea e pee ai i te hiˈoraa o te mau Kerisetiano matamua?

¹³ E fanaˈoraa taa ê mau ia faaite ia vetahi ê i te mau “ohipa maere” ta Iehova i rave e i ta ˈna i fafau no a muri aˈe. E ere iho â i te mea ohie ia rave noa i teie ohipa. E patoi mai paha te taata i ta tatou poroi aore ra e hamani ino atoa mai. E nehenehe ïa tatou e pee i te hiˈoraa o te aposetolo Paulo e to ˈna mau hoa. Ua parau Paulo: “I itoito â matou i to matou Atua, i te parauraa ˈtu ia outou i te evanelia a te Atua, i roto â i te mârô rahi.” (Tes. 1, 2:2) E mea tia ia tapea i ta tatou i euhe a pûpû ai ia tatou ia Iehova. E hinaaro tatou e vai taiva ore ia Iehova a ‘pau roa ˈi’ te ao a Satani. (Isa. 6:11) Eita e haere ma to tatou iho puai. Mai te mau Kerisetiano matamua, e mea tia ia ani tatou ia Iehova i to ˈna varua moˈa no te fanaˈo i te “mana rahi maitai.”—A taio i te Korinetia 2, 4:1, 7; Luka 11:13.

14, 15. (a) Mai te aha te huru o te taata i nia i te mau Kerisetiano matamua? Eaha te faaitoitoraa a Petero? (b) Eaha te haamanaˈo a hamani-ino-hia ˈi tatou no te mea e Ite no Iehova tatou?

 ¹⁴ I teie mahana, e mirioni taata te parau nei e e Kerisetiano ratou. Te rave nei râ ratou i ta te Atua e riri ra e aita o ˈna e farii ra ia ratou. (Tito 1:16) I te senekele matamua, aita te rahiraa o te taata i haamori i te Atua mai ta ˈna i hinaaro. Inaha, i ririhia na te mau Kerisetiano mau i taua tau ra e te taata e rave rahi. No te faaitoito i taua mau Kerisetiano ra, ua parau atu te aposetolo Petero: “E ia faainohia outou i te iˈoa o te Mesia ra, e ao to outou.” No te aha ratou e oaoa ˈi? No te mea te fanaˈo ra ratou i ta te Atua farii maitai e i to ˈna varua moˈa.—Pet. 1, 4:14.

¹⁵ I teie mahana, ‘te faainohia ra anei te mau Ite no Iehova i te iˈoa o te Mesia’? E, eiaha noa no te mea te faaite nei tatou ia Iehova. No te mea atoa râ e te paraparau nei tatou no nia ia Iesu e te poro nei e e Arii o ˈna o te Basileia o te Atua. Ua hamani-ino-atoa-hia Iesu no te mea e ite no Iehova o ˈna. Ua parau o ˈna i te feia i patoi ia ˈna: “I haere mai nei au ma te iˈoa o tau Metua, e aore outou i ite mai ia ˈu.” (Ioa. 5:43) No reira, a hamani ino ai te taata ia oe no ta oe pororaa, a haamanaˈo e te fanaˈo nei oe i ta te Atua farii maitai e i to ˈna varua moˈa.

16, 17. (a) Eaha te manaˈo o te nunaa o Iehova na te ao nei i te ohipa pororaa? (b) Eaha ta oe e faaoti papu i te rave?

¹⁶ A haamanaˈo atoa e na te ao atoa nei, mea rahi te taata te haere maira i roto i te parau mau. Noa ˈtu ihea tatou e ora ˈi, i te mau tuhaa fenua atoa e poro-pinepine-hia ra, te vai ra te taata o te farii i te horoa i te tariˈa faaroo i ta tatou poroi nehenehe mau. E hoˈi anaˈe ïa e farerei i te feia tei faaite i te anaanatae e e tamata anaˈe i te haapii ia ratou i te Bibilia. I muri iho, e tauturu anaˈe ia ratou ia ite o vai Iehova ia nehenehe ratou e pûpû i to ratou ora i te Atua a bapetizo atu ai. Eaha to oe manaˈo i teie ohipa? A 60 tiahapa matahiti i teie nei to Sarie, i Afirika Apatoa, riroraa ei Ite no Iehova. Te na ô ra o ˈna: “Ua mauruuru roa vau i te tusia taraehara o Iesu, ua nehenehe hoi au e fanaˈo i te taairaa piri roa e o Iehova, te Arii o te ao taatoa, e e faaite i to ˈna iˈoa hanahana.” Ua tauturu raua ta ˈna tane ra o Martinus i ta raua na tamarii e toru e i te taata e rave rahi ia riro ei tavini a Iehova. Te na ô nei â o ˈna: “Aita ˈtu ohipa te horoa mai nei i te oaoa rahi. E maoti to ˈna varua moˈa, te horoa nei Iehova ia tatou paatoa te puai hinaarohia no te tamau â i teie ohipa e ora ˈi te taata.”

¹⁷ Ua bapetizohia anei tatou aore ra aita, e mea tia ia mauruuru tatou i te fanaˈoraa taa ê e putuputu e te mau Ite no Iehova. A tamau ïa i te horoa i te faaiteraa ma te itoito rahi e to Iehova nunaa na te ao nei e i te vai viivii ore noa i te ao a Satani. Ma te na reira, e faahanahana oe i to tatou Metua î i te here i te raˈi ra o Iehova. E tia hoi tatou no ˈna.