1. Te ora nei tatou i teihea anotau?

 TE ORA nei tatou i te roaraa o “te ati rahi.” Mai 1914 mai â, a haamata ˈi te “anotau hopea,” ua ino roa ˈtu â te mau huru tupuraa. (Tim. 2, 3:1-5) E nehenehe tatou e haapapu e e ino roa ˈtu â te mau huru tupuraa a teie nei ao, no te mea te na ô ra te hoê parau tohu Bibilia: ‘E te mau taata iino e te feia haavare ra, e tupu â to ratou ino e e rahi atu â.’—Tim. 2, 3:13.

2. Eaha ta te taata e rave rahi e rave no te faaanaanatae ia ratou? (A hiˈo i te hohoˈa matamua.)

² No te faaanaanatae ia ratou, e rave rahi taata i teie mahana o te mataitai ra aore ra o te rave ra i te ohipa iino mau, aore ra i te mau peu morare ore, e tei ô atoa i roto te mau peu tahutahu e te mau peu demoni. Ei hiˈoraa, e farii-noa-hia te ohipa iino mau e te mau peu morare ore i nia i te Internet, oia atoa i roto i te mau porotarama afata teata, te mau hohoˈa teata, te mau buka e te mau papai. E ua  farii-roa-hia teie haerea o te faahuru ê ia vetahi ê, e oia atoa i te tahi mau vahi, ua farii ïa te ture. E ere râ i te auraa e e farii Iehova i tera huru haerea.—A taio i te Roma 1:28-32.

3. Eaha te huru o te taata e rave rahi a ite ai i te feia o te ora ra ia au i te mau ture aveia a te Atua?

³ I te senekele matamua, i pinepine na te taata i te mataitai atoa i te ohipa iino mau e te mau peu morare ore no te faaanaanatae ia ratou. Aita râ te mau pǐpǐ a Iesu i na reira, no te mea ua ora ratou ia au i te mau ture aveia a te Atua. Ua huru ê ïa te taata i ati aˈe ia ratou. Eaha ïa te faahopearaa? Ua faaooohia e ua hamani-ino-hia te mau Kerisetiano. (Pet. 1, 4:4) I teie mahana, e huru ê atoa te taata a ite ai i te feia o te ora ra ia au i te mau ture aveia a te Atua. No reira te Bibilia e faaara ˈi ia tatou e “e hamani-ino-atoa-hia” te feia o te pee ra i te hiˈoraa o te Mesia ra o Iesu.—Tim. 2, 3:12.

4. No te aha e ore ai tatou e nounou i teie nei ao?

⁴ Mai te peu e te hinaaro ra tatou e rave i te hinaaro o te Atua, eiaha ïa tatou e nounou ‘i teie nei ao, e te mau mea atoa a teie nei ao.’ (A taio i te Ioane 1, 2:15, 16.) O Satani, “te atua o teie nei ao,” te faatere i te ao. Te faaohipa ra oia i te mau haapaoraa, te mau hau faatere, te mau faanahonahoraa tapihooraa e te mau ravea haapuroro no te haavarevare i te taata. (Kor. 2, 4:4; Ioa. 1, 5:19) Eita tatou e hinaaro ia faaterehia tatou e teie nei ao, no reira ïa tatou e ape ai i te amuimuiraa ino. Te faaara maitai ra te Bibilia ia tatou: ‘Eiaha e vare, e ino te peu maitatai i te amuimuiraa ino.’—Kor. 1, 15:33.

5, 6. E titauhia ia tatou ia ore e amuimui e o vai ma, e no te aha?

⁵ No te tapea maite i ta tatou taairaa e o Iehova, eita ïa tatou e amuimui i te feia o te rave ra i te mau ohipa iino. E ô atoa i roto i teie amuimuiraa te taata o te haamori ra ia Iehova e inaha, o te maiti ra i te auraro ore ia ˈna. Ia hara ratou e ia ore ratou e tatarahapa, e faaea ïa tatou i te amuimui ia ratou ra.—Roma 16:17, 18.

⁶ E hinaaro iho â te taata e auhia e ta ratou mau hoa e ia fariihia e ratou. No reira, ia amuimui tatou e te feia e auraro ore i te Atua, e nehenehe tatou e hema a pee ai ia ratou. Ei hiˈoraa, ia amuimui noa tatou e te feia e rave ra i te mau peu taatiraa tia ore, e nehenehe tatou e riro mai ia ratou ra. Tera ïa ta te tahi mau taeae e tuahine i ite. Ua tiavaruhia te feia tei ore e tatarahapa. (Kor. 1, 5:11-13) Noa ˈtu e ua tatarahapa ratou, e nehenehe ratou e ite i te hoê â tupuraa mai ta Petero i faahiti.—A taio i te Petero 2, 2:20-22.

7. E titauhia ia tatou ia faahoa e o vai ma?

⁷ Noa ˈtu e te hinaaro ra tatou e faaite i te  maitai i te taata atoa, eiaha tatou e faahoa e te feia e auraro ore i te Atua. Eita ïa e tano ia haamatau te hoê Ite no Iehova i te hoê taata o te ore e tavini ra ia Iehova ma te taiva ore. E mea faufaa aˈe ia fanaˈo tatou i te farii maitai a te Atua i ta te feia o te ore e here ra ia ˈna. E faahoa noa ïa tatou e te feia e rave ra i te hinaaro o te Atua. Ua na ô Iesu: “O tei haapao atoa i te hinaaro o te Atua ra, o to ˈu ïa taeae, o to ˈu ïa tuahine, o to ˈu hoi ïa metua vahine.”—Mar. 3:35.

8. Mea nafea te amuimuiraa ino i haafifi ai i te mau Iseraela?

⁸ E faahopearaa ino mau te amuimuiraa ino. A hiˈo na i tei tupu no te mau Iseraela. Hou a tae ai ratou i te Fenua tǎpǔhia, ua faaara mai Iehova ia ratou no nia i te feia o tei ora aˈena i ǒ. Ua parau oia: “Eiaha oe e piˈo i raro i te mau atua no ratou ra, eiaha e haamori atu ia ratou, eiaha hoi oe e rave mai ta ratou e rave ra, e haamou roa râ oe ia ratou, e haaparari roa i ta ratou mau tii. O to outou Atua ra o Iehova ta outou e haamori.” (Exo. 23:24, 25) Aita râ te rahiraa o te mau Iseraela i faaroo i te mau faaueraa a te Atua. Ua taiva ïa ratou ia ˈna. (Sal. 106:35-39) Eaha ïa te faahopearaa? I muri aˈe, ua faarue Iehova i te nunaa o Iseraela e ua maiti râ oia i te amuiraa Kerisetiano ia riro mai ei nunaa no ˈna.—Mat. 23:38; Ohi. 2:1-4.

9. No te aha e mea tia ia haapao maitai tatou i te mau ravea haapuroro o teie nei ao?

⁹ Mea rahi te ravea haapuroro o teie nei ao, mai te mau porotarama i te afata teata, te mau reni Internet e te mau buka, o te nehenehe e haafifi i to tatou taairaa e o Iehova. Aita roa ˈtu teie mau huru ravea i faanahohia no te tauturu i te mau Kerisetiano ia tiaturi ia Iehova e i ta ˈna mau parau fafau. E titauhia râ te reira ia tiaturi te taata i te ao ino a Satani. E mea tia ïa ia haapao maitai tatou i ta tatou e mataitai, e taio aore ra e faaroo, ia ore te reira e faatupu i ‘te hinaaro o teie nei ao’ i roto i to tatou aau.—Tito 2:12.

10. Eaha te faahopearaa no te mau ravea haapuroro o teie nei ao?

¹⁰ Fatata te ao a Satani e ta ˈna mau ravea haapuroro iino i te haamouhia. Te parau mai ra te Bibilia: “E te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu.” (Ioa. 1, 2:17) Oia atoa, ua himene te fatu salamo: “Area te feia mǎrû ra, e parahi ïa i te fenua, e oaoa ratou i te rahi o te hau ra.” Eaha ïa te maororaa? “E parahi te feia parau-tia i nia i te fenua, e parahi tamau â ratou i reira.”—Sal. 37:9, 11, 29

11. E nafea Iehova e tauturu ai ia tatou ia vai taiva ore noa ia ˈna?

¹¹ Te mea taa ê râ i te ao a Satani, te tauturu mai ra te faanahonahoraa a Iehova ia ora tatou i te hoê haerea o te aratai ra ia tatou i te ora mure ore. Ua pure Iesu ia Iehova: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioa. 17:3) Te faaohipa ra Iehova i ta ˈna faanahonahoraa no te horoa mai i te mau ravea atoa ia tatou ia ite ia ˈna. Ei hiˈoraa, te vai  ra e rave rahi vea, buka rairai, buka, video e te vai atoa ra te api Internet o te tauturu ra ia tatou ia tamau i ta tatou taviniraa i te Atua. Ua faanaho atoa te faanahonahoraa a te Atua i te mau putuputuraa i te mau hebedoma atoa na roto hau atu 110 000 amuiraa na te ao atoa nei. E puaihia to tatou faaroo ia Iehova e i ta ˈna mau parau fafau maoti te mau haapiiraa atoa no roto mai i te Bibilia ta tatou e hiˈopoa i ta tatou mau putuputuraa e te mau tairururaa rahi.—Heb. 10:24, 25.

12. A faataa na i te faaueraa Bibilia ia faaipoipo ‘ia au noa i te Fatu.’

¹² No te mau Kerisetiano o te hinaaro ra e faaipoipo, e titauhia ia haapao maitai ratou i te maitiraa i te taata e apiti ai ratou. Te faaara ra te Parau a te Atua ia tatou: “Eiaha outou ia amui-au-ore-hia i te feia faaroo ore ra: eaha to te parau-tia auraa i te parau-tia ore? e eaha to te maramarama auraa i te pouri?” (Kor. 2, 6:14) Ia au i te aˈoraa Bibilia, e mea tia i te mau tavini a te Atua ia faaipoipo ‘ia au noa i te Fatu,’ oia hoi, ia faaipoipo noa ratou e te hoê taata o tei pǔpǔ, o tei bapetizo e o te ora ra ia au i te mau ture aveia a Iehova. (Kor. 1, 7:39) Ia faaipoipo outou e te hoê taata mai teie, oia hoi te hoê taata o te here ra ia Iehova, e tauturu ïa to outou apiti ia vai taiva ore outou i te Atua.

13. Eaha te faaueraa ta te Atua i horoa mai i te mau Iseraela no nia i te faaipoiporaa?

¹³ Ua ite Iehova i te mea maitai roa ˈˈe no tatou, e aita ta ˈna aˈoraa ia faaipoipo ‘ia au noa i te Fatu’ i te mea apî. Ei hiˈoraa, a tapao na i ta Iehova i parau atu i te mau Iseraela no nia i te taata o tei ore e tavini ia ˈna. Ua faaohipa Iehova ia Mose no te horoa mai i teie faaueraa: “Eiaha oe e faaipoipo ia ratou; eiaha oe e horoa i to tamahine i ta ˈna ra tamaiti, eiaha hoi oe e rave i ta ˈna ra tamahine na ta oe ra tamaiti. E riro hoi ratou i te faafariu ê i to mau tamarii ia ore ia pee mai ia ˈu, ia haamori i te mau atua ěê ra, tupu ihora te riri o Iehova ia outou, pohe ihora oe i reira ra.”—Deut. 7:3, 4.

14, 15. Eaha te faahopearaa ta Solomona i ite a faaroo ore ai oia i te faaueraa a Iehova?

¹⁴ I muri iti noa ˈˈe i to Solomona riroraa ei arii no Iseraela, ua pure oia ia Iehova no te ani i te paari e ua pahonohia ta ˈna pure. No reira Solomona i riro ai ei faatere paari o te hoê nunaa o tei manuïa rahi. Ua maere roa te arii vahine o Seba i te paari o Solomona i parau ai ia ˈna: “Ua hau ê atura to oe paari e to oe mana i tei faaitehia mai ia ˈu nei.” (Arii 1, 10:7) Tera râ, te haapii atoa ra te hiˈoraa o Solomona i te faahopearaa ta te hoê taata e ite ia faaroo ore oia i te mau faaueraa a te Atua ia faaipoipo atu e te hoê taata o te ore e tavini ra ia Iehova.—Koh. 4:13.

 ¹⁵ Noa ˈtu e ua haamaitai Iehova ia ˈna, ua faaroo ore Solomona i te faaueraa papu ta te Atua i faaite atu. ‘Ua here te arii ra o Solomona i te vahine ěê e rave rahi,’ aita râ hoi ratou i tavini ia Iehova. E 700 vahine faaipoipo e e 300 vahine tavini ěê ta ˈna. Eaha ïa te faahopearaa? A paari ai Solomona, ua “faafariu-ê-hia ihora tana aau . . . a pee atu ai i te mau atua ěê; aita aˈera tana aau i au i to ˈna Atua ia Iehova.” (Arii 1, 11:1-6) Ua turai mai te amuimuiraa ino ia ore faahou oia e tavini ia Iehova ma te taiva ore. Tera ta Solomona i ite e e nehenehe te taata atoa e ite i te hoê â tupuraa. No reira, eiaha roa tatou e manaˈo ia faaipoipo atu i te hoê taata o te ore e here ia Iehova.

16. Eaha te aˈoraa ta te Bibilia e horoa mai i te hoê tavini a Iehova e ua faaipoipo e te hoê taata e tiaturi ore i te Atua?

¹⁶ E nafea ïa ia riro ai te hoê taata ei tavini ia Iehova e ua faaipoipo oia e te hoê taata e tiaturi ore i te Atua? Te parau ra te Bibilia: “O outou atoa hoi, e te mau vahine, e auraro maite i ta outou mau tane ra; e aore te tahi pae i faaroo i te parau ra, ia noaa mai ratou i te haapao maitai o ta ratou mau vahine, eiaha ˈtu â te parau.” (Pet. 1, 3:1) Hoê â no te hoê tane e aita ta ˈna vahine e haamori ra ia Iehova. Ia au i te Parau a te Atua, teie te mea papu: ia riro outou ei tane maitai aore ra ei vahine maitai, e ia faaohipa i te mau ture aveia a te Atua i roto i to outou faaipoiporaa. Ia  ite to outou apiti e e ua taui outou no te maitai, peneiaˈe e hinaaro atoa oia e haamori ia Iehova. E rave rahi hoa faaipoipo o tei ite i teie tupuraa.

17, 18. Eaha tei tauturu ia Noa ia ora i te diluvi, e eaha tei tauturu i te mau Kerisetiano o te senekele matamua ia ora i te haamouraa a Ierusalema?

¹⁷ E nehenehe te amuimuiraa ino e turai ia tatou ia faaroo ore ia Iehova. Area te amuimuiraa maitai, e nehenehe te reira e tauturu ia outou ia vai taiva ore. E hiˈoraa maitai Noa no tatou. Ua ora oia i te hoê anotau ‘e ino rahi to te taata o te fenua nei’ e “ua ino anaˈe te mau opuaraa atoa o te aau i te mau mahana atoa ra.” (Gen. 6:5) No te ino rahi o te taata i faaoti ai Iehova i te haamou i te ao ino. Ua taa ê râ o Noa. Te pii mai ra te Bibilia ia ˈna ‘taata parau-tia’ no te mea ua au to ˈna haerea e te Atua mau.—Gen. 6:7-9.

¹⁸ Eita Noa i amuimui e te feia i ore e here ia Iehova. Ua haa rahi noa oia e to ˈna utuafare no te patu i te araka e ua matau-atoa-hia Noa ei ‘taata poro i te parau-tia’. (Pet. 2, 2:5) E amuimuiraa maitai to Noa, ta ˈna vahine, ta raua na tamaiti e toru e ta ratou vahine a amuimui ai te tahi i te tahi. I rave noa na ratou i te mau ohipa ta te Atua i au. No reira i faaorahia ˈi ratou i te diluvi. E huaai tatou pauroa na ratou. E haamauruuru ïa tatou a ite ai e ua vai taiva ore Noa e to ˈna utuafare ia Iehova no te mea ua ape ratou i te amuimuiraa ino. Mai te mau Kerisetiano o te senekele matamua, aita ratou i amuimui e te feia i ore e here ia Iehova. Ua faaroo ratou ia Iehova e ua ora ïa i te haamouraa o Ierusalema i te matahiti 70.—Luka 21:20-22.

19. O vai te tauturu mai ia tatou ia vai taiva ore ia Iehova?

¹⁹ Mai ia Noa e to ˈna utuafare, e te mau Kerisetiano o te senekele matamua, eiaha ïa tatou e amuimui i te feia e ore e here ra ia Iehova. E mirioni taeae e tuahine taiva ore o ta tatou e nehenehe e maiti ia riro mai ei hoa no tatou. E tauturu mai ratou “ia mau papu i te faaroo” i te roaraa o teie anotau fifi mau. (Kor. 1, 16:13; Mas. 13:20) A feruri na, auê ïa oaoa ia ora mai i te hopea o teie nei ao iino e ia ora i roto i te ao apî a Iehova! No reira mea faufaa roa ia ape tatou i te amuimuiraa ino i teie nei â!