1. (a) Eaha te hopoia ta te Atua i horoa ia Adamu? (b) Mai reira mai, mea nafea te nunaa o te Atua i faaohipa ˈi i te ô o te parau?

 UA HOROA te Atua ra o Iehova i te taata te ô o te parau. I roto i te ô i Edene, ua horoa te Atua i te hopoia ia Adamu, te horoaraa ïa i te iˈoa a te mau animara atoa. Ua horoa Adamu i te iˈoa e auraa to te reira no te mau animara taitahi. (Gen. 2:19, 20) Mai reira mai, ua faaohipa te nunaa o te Atua i te ô o te parau no te arue ia Iehova e no te faaite ia vetahi ê no nia ia ˈna. Aita i maoro aˈenei, ua faaohipa te nunaa o te Atua i teie ô no te huri i te Bibilia ia nehenehe hau atu â taata e haapii no nia ia Iehova.

2. (a) Eaha te mau faaueraa tumu faufaa ta te mau melo o te Tomite Huriraa i te Bibilia a te ao apî e pee ra i roto i ta ratou ohipa? (b) Eaha ta tatou e hiˈopoa mai i roto i teie tumu parau?

² Te vai ra e tausani huriraa Bibilia. Mea tano aˈe râ te tahi huriraa Bibilia i te tahi atu. No te huri i te Bibilia ma te tano, ua faaoti te Tomite Huriraa i te Bibilia a te ao apî ia pee i na faaueraa tumu faufaa e toru: (1) Ia faahanahanahia to te  Atua iˈoa e ia faaohipahia te reira i roto i ta ˈna Parau e rave rahi taime mai te reo tumu. (A taio i te Mataio 6:9.) (2) Ia huri-maite-hia te poroi o te reo tumu, te mau pereota atoa mai te peu e e nehenehe. Mai te peu râ aita e nehenehe, a huri i te auraa tano. (3) Ia faaohipahia te hoê parau mea ohie ia taio e ia taa. * (A taio i te Nehemia 8:8, 12.) Ua pee te feia huri o te Huriraa i te Bibilia a te ao apî i teie na faaueraa tumu faufaa e toru na roto hau atu 130 reo taa ê. I roto i teie tumu parau, e hiˈopoa anaˈe e nafea teie mau faaueraa tumu faufaa e faaohipahia ˈi no te neneiraa faaapîhia o te Huriraa o te ao apî tei matara i 2013 e te huriraa o te reira na roto i te tahi atu mau reo.

3, 4. (a) Te itehia ra na reta Hebera e maha ihea? (b) Eaha ta te rahiraa huriraa Bibilia i rave no nia i te iˈoa o te Atua?

³ Ua papaihia te iˈoa o te Atua ma na reta Hebera e maha. Ua itehia taua mau reta ra i roto e rave rahi papai Hebera tahito mai te mau otaro o te miti Pohe. Te vai atoa ra te reira i roto i te tahi mau papai, te Septante, na roto i te reo Heleni i neneihia e 200 matahiti hou te Mesia e tae atu i 100 matahiti i muri aˈe i te Mesia. Ua maere roa te rahiraa o te taata i to ratou iteraa e e rave rahi taime i itehia ˈi te iˈoa o te Atua i roto i te mau papai tahito.

⁴ Mea titauhia ia itehia te iˈoa o te Atua i roto i te Bibilia. Noa ˈtu râ, e rave rahi huriraa aita e faaohipa ra i te reira. Ei hiˈoraa, piti matahiti noa i muri aˈe i te papairaahia te Bibilia Les Écritures grecques chrétiennes. Traduction du monde nouveau, ua matara mai te hoê neneiraa faaapîhia o te American Standard Version. I 1901, ua faaohipa te American Standard Version i te iˈoa o te Atua. Area râ te neneiraa faaapîhia o te American Standard Version o tei matara i 1952, aita ïa. No te aha? No te feia o tei huri i te reira, “e ere i te mea tia” ia faaohipa i te iˈoa o te Atua. Ua na reira atoa e rave rahi huriraa, na roto i te reo Beretane e na roto atoa i te tahi atu mau reo.

5. No te aha mea faufaa ia faaohipa i te iˈoa o te Atua i roto i te Bibilia?

⁵ E mea faufaa anei ia faaohipa te feia huri i te iˈoa o te Atua aore ra aita? E! Te hinaaro ra Iehova, te Tumu o te Bibilia, ia ite te taata i to ˈna iˈoa. E titauhia i te hoê taata huri maitai ia taa eaha ta te hoê taata papai e hinaaro ra a manaˈo atu ai e e nehenehe te reira e ohipa ˈi i nia i ta ˈna mau faaotiraa i te pae o te huriraa. E rave rahi irava Bibilia o te faaite ra e e mea faufaa te iˈoa o te Atua e e mea tia ia faahanahanahia te reira. (Exo. 3:15; Sal. 83:18;  148:13; Isa. 42:8; 43:10; Ioa. 17:6, 26; Ohi. 15:14) Ua faaurua Iehova i te mau taata papai Bibilia ia faaohipa i to ˈna iˈoa tausani taime i roto i te mau papai tahito. (A taio i te Ezekiela 38:23.) No reira, ia tatara te feia huri i te iˈoa o te Atua, aita ratou e faatura ra ia Iehova.

6. No te aha ua tuuhia te iˈoa o te Atua i na vahi e ono i roto i te Huriraa o te ao apî o tei hiˈopoa-faahou-hia?

⁶ I teie mahana, e rave rahi atu â haapapuraa o te faaite ra e e mea tia ia faaohipahia to Iehova iˈoa. I roto i te Bibilia Huriraa o te ao apî faaapîhia o tei matara i 2013, e 7 216 taime i te faaohiparaahia te iˈoa o te Atua, oia hoi e 6 atu â vahi te tuuraahia te reira ia faaauhia te huriraa tahito. E 5 o te reira, ua tuuhia te iˈoa o te Atua no te mea ua itehia te reira i roto i te mau otaro o te miti Pohe * o tei nenei-apî-hia. E itehia te iˈoa o te Atua i teie na vahi e pae i roto i te Samuela 1, 2:25; 6:3; 10:26; 23:14, 16. E te ono, ua tuuhia i roto i Te mau tavana 19:18 no te tahi hiˈopoa-maite-raa o te mau papai tahito Bibilia papu.

7, 8. Eaha te auraa o te iˈoa o Iehova?

⁷ No te mau Kerisetiano mau, e mea faufaa ia taa maitai i te auraa o te iˈoa o te Atua, oia hoi “Na ˈna e faariro.” * I na mua ˈˈe, ua faataa ta tatou mau papai i te auraa o te iˈoa o te Atua a faaohipa ˈi i te Exodo 3:14 o te na ô ra: “Te vai nei au o vau e vai nei.” Ua faataa te Bibilia o tei faaapîhia e tei matara i 1984 e e faariro Iehova ia ˈna ia au i tei hinaarohia no te faatupu roa i ta ˈna mau opuaraa. * Teie râ, te faataa ra te Bibilia faaapîhia o tei matara i 2013: “Aita râ te iˈoa ra Iehova i taai-noa-hia i ta ˈna e maiti i te riro. E faariro atoa oia i te melahi e te taata mai ta ˈna atoa e hinaaro ia riro ratou ia tupu ta ˈna opuaraa.”

⁸ Ua faariro Iehova i ta ˈna i poiete mai ta ˈna e hinaaro. Ei hiˈoraa, ua faariro te Atua ia Noa ei taata hamani i te araka, ia Bezaleela ei taata rimaî aravihi, ia Gideona ei aito rahi e ia Paulo ei mitionare. E auraa mau râ to te iˈoa o te Atua no to ˈna nunaa. No reira ïa te Tomite Huriraa i te Bibilia a te ao apî i tuu ai i te iˈoa o te Atua i roto i teie huriraa.

9. Eaha te hoê tumu e haafaufaahia ˈi te huriraa o te Bibilia na roto i te tahi atu mau reo?

⁹ E rave rahi atu â huriraa Bibilia o tei tatara i to te Atua iˈoa. Ua faaohipa râ ratou i te tiaraa iˈoa “fatu” aore ra te iˈoa o te tahi atu atua. Teie hoê tumu faufaa i hinaaro rahi ai te Tino aratai ia fanaˈo te taata o te mau reo atoa i te hoê Bibilia o te faahanahana ra i to te Atua iˈoa. (A taio i te Malaki 3:16.) No reira, te faahanahanahia ra to Iehova iˈoa i roto i te mau neneiraa o te Huriraa o te ao apî na roto hau atu 130 reo.

10, 11. Eaha te tahi mau fifi i itehia a hurihia ˈi te Bibilia Huriraa o te ao apî na roto i te tahi atu mau reo?

¹⁰ Ua itehia te tahi mau fifi a hurihia ˈi te Bibilia Huriraa o te ao apî mai te reo  Beretane i te tahi atu mau reo. Ei hiˈoraa, ua faaohipa te neneiraa reo Beretane i te taˈo Hebera “Sheol” i roto i te Koheleta 9:10 e i roto i te tahi atu mau irava. Ua faaohipa atoa te tahi atu mau Bibilia Beretane i tera taˈo. Aita râ e nehenehe e faaohipa i teie taˈo i roto i e rave rahi reo no te mea aita te rahiraa o te feia taio o teie mau reo e taa ra i te taˈo Hebera “Sheol.” Aita teie taˈo i roto i ta ratou mau titionare e no vetahi, o te iˈoa teie o te hoê vahi. No reira, ua fariihia te feia huri ia huri i te taˈo Hebera “Sheol” o te tuea i te taˈo Heleni “Hades” ei “apoo.” E huriraa papu teie e te mea ohie aˈe ia taa.

¹¹ Mea fifi atoa ia huri i te taˈo Hebera e Heleni ei “varua” na roto i te tahi mau reo. I roto i teie mau reo, te auraa o te taˈo “varua,” o te hoê ïa tupapau aore ra te hoê varua o tei haere i rapae i te hoê tino pohe o te hoê taata. Ia ore te reira e fifihia, ua farii te feia huri ia huri i te taˈo “varua” ia au i te tupuraa. Te itehia ra te hoê faataaraa o te mau auraa rau o te taˈo “varua” i roto i te appendice o te Bibilia Les Saintes Écritures. Traduction du monde nouveau (avec notes et références). Ua tuuhia te mau nota i roto i te neneiraa o te Bibilia faaapîhia no te ite atu â no nia i te mau taˈo Hebera e Heleni ia taio-maitai-hia e ia taa-maitai-hia te tumu parau Bibilia.

12. Eaha te tahi atu mau tauiraa i ravehia i roto i te Bibilia no 2013 tei hiˈopoa-faahou-hia?

¹² Ua haapapu te mau uiraa a te feia huri i te tahi atu mau taa-ore-raa o te mau papai tumu Bibilia. No reira i Tetepa 2007, ua  farii te Tino aratai ia hiˈopoa-faahou-hia te Bibilia Beretane. E tausani uiraa a te feia huri Bibilia tei hiˈopoahia i te roaraa o teie ohipa. Ua tauihia te mau parau mea tahito ma te mau parau mea matauhia i teie mahana. Mea ohie aˈe ia taio e ia taa i te Bibilia a tapea-noa-hia ˈi te tanoraa. E ere i te mea maoro, ua tauturu atoa te huriraa i rave-aˈena-hia na roto i te tahi atu mau reo no te haamaitai i te Bibilia Beretane.—Mas. 27:17.

13. Eaha te manaˈo o vetahi no nia i te Bibilia no 2013 tei faaapîhia?

¹³ Eaha te manaˈo o vetahi no nia i te Bibilia Beretane te Huriraa o te ao apî tei faaapîhia? Ua hapono mai to tatou mau taeae e tuahine e tausani rata ei tapao no to ratou mauruuru i te pu rahi a te mau Ite no Iehova no Brooklyn, i New York. Ua tuea te manaˈo o te rahiraa o ratou i ta te hoê tuahine i papai: “E afata piru te Bibilia o tei î i te mau taoˈa faahiahia mau. Ia taiohia te mau parau a Iehova ma te ohie e ma te faaohipa i te Bibilia no 2013 tei faaapîhia, e nehenehe te reira e faaauhia i te hiˈopoaraa i te mau piru atoa, ma te hiˈopoa i te huru, te maramarama, te û e te nehenehe o te reira. Ua faaite te mau Papai i te hoê parau ohie ia taa e o tei tauturu ia ˈu ia riro mai ei taata matau-aˈe-hia e Iehova, mai te hoê papa o te tauahi ra ia ˈu a taio mai ai oia i ta ˈna mau parau.”

14, 15. Eaha te manaˈo o te taata no nia i te Huriraa o te ao apî na roto i te tahi atu mau reo?

¹⁴ Ua mauruuru atoa te feia o te paraparau ra na roto i te tahi atu mau reo ê i te reo Beretane no te Bibilia Huriraa o te ao apî. Ua parau te hoê taata ruhiruhia no Sofia, i Bulgarie no nia i te Bibilia Bulgarie: “Ua taio vau i te Bibilia e rave rahi matahiti. Tera râ, a tahi ra vau i taa ˈi i te hoê huriraa mea ohie aˈe ia taa. Ua putapû roa to ˈu aau.” Ua papai atoa te hoê tuahine no Albanie: “Mea faahiahia roa te Parau a te  Atua na roto i te reo Albanie! Auê te fanaˈoraa taa ê ia paraparau mai Iehova ia matou na roto i to matou reo!”

¹⁵ I roto i te rahiraa fenua, mea moni aore ra mea fifi roa ia fanaˈo i te hoê Bibilia. E haamaitairaa rahi ia fanaˈo tatou i te hoê Bibilia! Te na ô ra te hoê faaiteraa no Rwanda: “Aita te taata e rave rahi o tei haapii i te Bibilia e te mau taeae i haere i mua i te pae varua no te mea aita ta ratou e Bibilia. Aita ta ratou e nehenehe e hoo mai i te Bibilia a te ekalesia. I te tahi taime, aita ratou e taa maitai i te auraa o te tahi mau irava. Ua haafifi te reira ia ratou ia haere i mua i te pae varua.” A matara mai ai te Huriraa o te ao apî na roto i to ratou reo, ua parau te hoê utuafare no Rwanda e maha tamarii taurearea ta raua: “Ua mauruuru roa vau ia Iehova e i te tavini haapao maitai e te paari i te fanaˈoraa i teie Bibilia. Mea veve roa matou e aita ta matou e moni no te hoo mai i te mau Bibilia no te mau melo utuafare atoa. I teie nei râ, e Bibilia ta matou taitahi. No te faaite i to matou mauruuru ia Iehova, e taio amui matou i te Bibilia i te mau mahana atoa.”

16, 17. (a) Eaha ta Iehova e hinaaro ra no to ˈna nunaa? (b) Te titauhia ra ia tatou ia faaitoito i te rave i te aha?

¹⁶ E fanaˈo te mau reo atoa i mua nei i te Bibilia te Huriraa o te ao apî tei faaapîhia. Te tamata ra Satani e tapea i teie ohipa. Ua ite râ tatou e te hinaaro ra Iehova ia faaroo to ˈna nunaa atoa ia paraparau oia ia ratou na roto i te hoê parau mea papu e mea ohie ia taa. (A taio i te Isaia 30:21.) Fatata ‘e î te fenua i te ite ia Iehova, mai te vairaa miti e î i te miti.’—Isa. 11:9.

¹⁷ Ia faaitoito anaˈe i te faaohipa i te mau ô atoa ta Iehova i horoa, oia atoa teie huriraa Bibilia o te faahanahana ra i to ˈna iˈoa. A vaiiho ia ˈna e paraparau ia oe i te mau mahana atoa na roto i ta ˈna Parau. E faaroo maite oia i ta tatou mau pure atoa. E tauturu mai teie aparauraa ia ite atu â o vai Iehova e e rahi atu â to tatou here no ˈna.—Ioa. 17:3.