Te ohipa a te varua moˈa e tupu ai te opuaraa a Iehova

“Te parau no roto i to ˈu nei vaha . . . e noaa hoi te mea i faaue atu ai au.”—ISA. 55:11.

1. A faataa i te taa-ê-raa i rotopu i te hoê tapura ohipa e te hoê opuaraa.

 A FERURI na e te faaineine ra e piti taata e haere i te hoê vahi na nia i te pereoo. Ua tapao te hoê i te mau purumu atoa i nia i te hohoˈa fenua. Area te tahi atu, ua taa maitai ia ˈna ihea o ˈna e haere ai e ua manaˈo oia i te mau purumu rau. Ua ineine oia i te faatano i to ˈna tere ia au i te mau tupuraa. Te faaite maitai ra teie na huru raveraa e piti i te taa-ê-raa i rotopu i te hoê tapura ohipa e te hoê opuaraa. E nehenehe e faaau i te hoê tapura ohipa i te tapaoraa i te mau purumu atoa, e te hoê opuaraa i te manaˈoraa i te hoê fa, ma te ore râ e haamau i te hoê huru raveraa taa ê e raea ˈi te reira.

2, 3. (a) Ua taaihia te opuaraa a Iehova i te aha, e mea nafea oia i te haaraa i to Adamu raua Eva hararaa? (b) No te aha ia ite e ia haa ˈi tatou ia au i te huru raveraa a te Atua no te faatupu i ta ˈna opuaraa?

² No te faatupu i to ˈna hinaaro, aita Iehova i haamau i te hoê tapura ohipa o te ore e taui, i te hoê râ opuaraa e tupu i te roaraa o te tau. (Eph. 3:11) Ua taaihia teie opuaraa i ta ˈna i manaˈo i te omuaraa no te huitaata e te fenua, oia hoi ia riro ei paradaiso i reira te taata tia roa e ora ˈi ma te hau e te oaoa e a muri noa ˈtu. (Gen. 1:28) I to Adamu raua  Eva hararaa, ua rave Iehova i te mau faanahoraa ia tupu ta ˈna opuaraa. (A taio i te Genese 3:15.) Ua faataa Iehova e e horoa mai ta ˈna vahine taipe i te hoê “huaai,” aore ra huero, oia hoi ta ˈna Tamaiti, o te haamou ia Satani, te tumu o te ino e o te faaore roa i te reira.—Heb. 2:14; Ioa. 1, 3:8.

³ Aita e mana i te raˈi aore ra i te fenua e tia ia tapea i te Atua ia ore ia faatupu i ta ˈna opuaraa. (Isa. 46:9-11) No te aha hoi? No te mea te ohipa ra to ˈna varua moˈa. Te haapapu ra teie puai rahi e e tupu iho â ta ˈna opuaraa. (Isa. 55:10, 11) Ia ite e ia haa tatou ia au i ta ˈna huru raveraa no te faatupu i ta ˈna opuaraa e tia ˈi. Ua taaihia to tatou oraraa a muri aˈe i te reira. Hau atu â, e haapuai te iteraa e nafea Iehova e faaohipa ˈi i to ˈna varua moˈa, i te faaroo. E hiˈopoa anaˈe i te ohipa a te varua i tahito, i teie nei, e a muri aˈe, e tupu ai te opuaraa a Iehova.

Te ohipa a te varua moˈa i tahito

4. Mea nafea to Iehova faaite-riirii-raa i ta ˈna opuaraa?

⁴ I tahito ra, ua faaite riirii Iehova i ta ˈna opuaraa. I te omuaraa, aita i itehia o vai te Huero fafauhia, e “parau aro” moˈa hoi. (Kor. 1, 2:7) E 2 000 matahiti i muri aˈe noa to Iehova faahiti-faahou-raa i te parau o te huero. (A taio i te Genese 12:7; 22:15-18.) Ua horoa Iehova ia Aberahama i te hoê parau fafau e tupuraa rahi. Te faaite maitai ra te parau “i to oe na huaai,” aore ra huero, e e taata no roto mai ia Aberahama taua Huero ra. Ua papu maitai ia tatou e te anaanatae ra Satani i te faaiteraahia teie parau. Ma te feaa ore, ua hinaaro mau teie Enemi e haamou aore ra e haaviivii i te opu fetii o Aberahama no te haafifi i te opuaraa a te Atua. Aita râ te reira i tupu, te ohipa ra hoi te varua itea ore o te Atua. E nafea?

5, 6. Mea nafea to Iehova faaohiparaa i to ˈna varua no te paruru i te mau taata no roto mai ia Aberahama e tae atu ai i te Huero?

⁵ Ua faaohipa Iehova i to ˈna varua no te paruru i te mau taata no roto mai ia Aberahama e tae atu ai i te Huero. Ua na ô Iehova ia Aberama (Aberahama): “O vau to oe paruru.” (Gen. 15:1) E parau fafau mau teie. A hiˈo na i tei tupu i 1919 hou to tatou tau, i to Aberahama raua Sara purutiaraa i Gera. Aita Abimeleka, arii o Gera, i ite e e vahine Sara na Aberahama e ua rave oia ia Sara ma te opua e faaipoipo ia ˈna. Ua opua huna anei Satani i teie ohipa, ia ore Sara e fanau i te huero o Aberahama? Aita te Bibilia e haapapu ra. Te faaite nei râ e ua ohipa mai Iehova. Ua faaara oia ia Abimeleka na roto i te taoto eiaha e rave ia Sara.—Gen. 20:1-18.

⁶ E ere a tahi ra Iehova i paruru e i faaora ˈi ia Aberahama e to ˈna fetii. (Gen. 12:14-20; 14:13-20; 26:26-29) No nia ia Aberahama e to ˈna huaai, ua tia i te papai salamo ia parau: “Aore [Iehova] i horoa noa ˈtu ia ratou ia hamani-ino-hia e te taata ra; e e hui arii hoi tei aˈohia mai e ana ia ratou: na ô maira, Eiaha e tiaia [aore ra hauti] noa ˈtu i tei faatahinuhia e au ra, e eiaha e hamani ino i ta ˈu ra mau peropheta.”—Sal. 105:14, 15.

7. Ua aha Iehova no te paruru i te nunaa Iseraela?

⁷ Maoti to ˈna varua, ua paruru Iehova i te nunaa Iseraela i tahito, i roto ia ratou e fanauhia ˈi te Huero fafauhia. Na roto i to ˈna varua, ua horoa Iehova na Iseraela i ta ˈna Ture, o tei paruru i te haamoriraa mau e i te mau ati Iuda i te viivii i te pae varua, morare, e pae tino. (Exo. 31:18; Kor. 2, 3:3) I te tau o te mau tavana, maoti te varua o Iehova, ua tia i te tahi mau taata ia faaora ia Iseraela i to ratou mau enemi. (Tav. 3:9, 10) I te roaraa o te mau senekele e tae roa ˈtu i te fanauraa o Iesu, te tuhaa matamua o te Huero  o Aberahama, ua ohipa te varua moˈa no te paruru ia Ierusalema, Betelehema, e te hiero, ia tupu te mau parau tohu no nia ia Iesu.

8. Eaha te faaite ra e ua ohipa roa te varua moˈa i roto i te oraraa e te taviniraa a te Tamaiti a te Atua?

⁸ I roto i te oraraa e taviniraa a Iesu, ua ohipa roa te varua moˈa. I roto i te opu o te paretenia Maria, ua faatupu te varua moˈa i te tahi ohipa otahi roa. Ua nehenehe atura te hoê vahine tia ore e tô e e fanau mai i te hoê Tamaiti tia roa, o te ore e raea i te utua pohe. (Luka 1:26-31, 34, 35) I muri aˈe, ua paruru te varua i te tamaroa iti Iesu i te pohe. (Mat. 2:7, 8, 12, 13) I te 30raa o to Iesu matahiti, ua faatavai te Atua ia ˈna i te varua moˈa, ma te faatoroa ˈtu no te fatu i te terono o Davida e ma te tono atu e poro. (Luka 1:32, 33; 4:16-21) Na roto i te varua moˈa, ua tia ia Iesu ia faatupu i te mau semeio, mai te faaoraraa i te maˈi, te faatamaaraa i te nahoa taata, e te faatiaraa mai i te feia pohe. Te faaite atea ra teie mau semeio i te mau haamaitairaa ta tatou e tiai i raro aˈe i te faatereraa arii a Iesu.

9, 10. (a) Mea nafea te varua moˈa i ohipa ˈi i nia i te mau pǐpǐ a Iesu i te senekele matamua? (b) Eaha te tahi mea apî no nia i te tupuraa faahiahia o te opuaraa a Iehova tei faaitehia i te senekele matamua?

⁹ Mai te Penetekose 33, ua faaohipa Iehova i to ˈna varua no te faatavai i te piti o te tuhaa o te huero o Aberahama, e rave rahi hoi o ratou e ere i te huaai o Aberahama. (Roma 8:15-17; Gal. 3:29) Ua ohipa mau te varua moˈa i nia i te mau pǐpǐ a Iesu i te senekele matamua, a nehenehe ai ratou e poro ma te itoito roa e e faatupu i te mau semeio. (Ohi. 1:8; 2:1-4; Kor. 1, 12:7-11) Maoti taua mau ô semeio ra, ua faaite te varua moˈa i te tahi mea apî no nia i te tupuraa faahiahia o te opuaraa a Iehova. Aita Iehova e faaohipa faahou ra i te faanahoraa tahito no nia i te haamoriraa i roto i te hiero i Ierusalema e rave rahi senekele i te maoro. O te amuiraa Kerisetiano haamau-apî-hia ta ˈna e haamaitai ra i teie nei. E mai reira mai Iehova i te faaohiparaa i taua amuiraa faatavaihia ra no te faatupu i ta ˈna opuaraa.

¹⁰ Ua faaohipa Iehova i to ˈna varua moˈa i tahito ra ia tupu iho â ta ˈna opuaraa, ma te paruru, te horoa i te mana, e te faatavai. E i teie nei mahana? E nafea Iehova e faaohipa ˈi i to ˈna varua no te turu i ta ˈna opuaraa? Mea faufaa ia ite tatou, te hinaaro ra hoi tatou e haa ia au i to ˈna varua. E hiˈopoa anaˈe e maha ravea e faaohipa ˈi Iehova i to ˈna varua i teie mahana.

Te ohipa a te varua moˈa i teie nei

11. Eaha te faaite ra e e tauturu te varua moˈa i te nunaa o te Atua ia vai mâ, e e nafea oe e faaite ai e te ohipa puai ra te varua i roto i to oe oraraa?

¹¹ Na mua roa, e tauturu te varua moˈa i te nunaa o te Atua ia vai mâ. I te pae morare e vai mâ ˈi te feia e tavini ra ia ˈna ia au i to ˈna hinaaro e o te faufaahia i ta ˈna opuaraa. (A taio i te Korinetia 1, 6:9-11.) I rave na hoi vetahi tei riro mai ei Kerisetiano mau i te mau peu faufau mai te poreneia, te faaturi, e te peu mahu. E nehenehe te mau hinaaro o te faatupu i te mau ohipa hara e aˈa roa. (Iak. 1:14, 15) Ua “horoihia” râ ratou, no te mea ua taui ratou i to ratou huru oraraa ia farii te Atua ia ratou. Maoti te aha e tia ˈi i te hoê taata e here ra i te Atua ia haavî i te umeraa e rave i te mau hinaaro tia ore? ‘Te varua o to tatou Atua,’ ia au i te Korinetia 1, 6:11. Ma te vai mâ noa i te pae morare e faaite ai oe e te ohipa puai ra teie varua i roto i to oe oraraa.

12. (a) Ia au i te orama a Ezekiela, e nafea Iehova e aratai ai i ta ˈna faanahonahoraa? (b) E nafea oe e faaite ai e te ohipa ra oe ia au i te varua?

¹² Te piti, te faaohipa ra Iehova i to ˈna  varua no te aratai i ta ˈna faanahonahoraa i te vahi ta ˈna e hinaaro. I roto i te orama a Ezekiela, te faahohoˈahia ra te tuhaa i te raˈi o ta Iehova faanahonahoraa i te hoê pereoo i nia i te raˈi e tere noa ra no te faatupu i te opuaraa a Iehova. Eaha te turai i te pereoo ia tere i te tahi vahi? Te varua moˈa. (Ezek. 1:20, 21) E piti tuhaa to te faanahonahoraa a Iehova, hoê i te raˈi e te tahi i te fenua. Mai te peu e te arataihia ra te tuhaa i te raˈi e te varua moˈa, hoê â ïa huru no te tuhaa i te fenua. Ma te auraro maite i te aratairaa a te tuhaa i te fenua o te faanahonahoraa a te Atua, te faaite ra oe e te pee maite ra oe i te pereoo o Iehova i nia i te raˈi e te ohipa ra ia au i to ˈna varua moˈa.—Heb. 13:17.

13, 14. (a) O vai ma “teie nei ui” ta Iesu i faahiti? (b) A faataa i te ohiparaa a te varua moˈa no te faatano i to tatou maramaramaraa i te pue parau mau Bibilia. (A hiˈo i te tumu parau “Te pee ra anei oe i te mau haamaramaramaraa faatanohia?”)

¹³ Te toru, te faaohipa ra Iehova i to ˈna varua moˈa no te tauturu ia tatou ia maramarama i te pue parau mau Bibilia. (Mas. 4:18) Ua faaohipa maoro “te tavini haapao maitai e te paari” i teie vea ei ravea matamua no te faaite riirii i te pue parau mau Bibilia. (Mat. 24:45) A hiˈo na i to tatou maramaramaraa i te feia o “teie nei ui” ta Iesu i faahiti. (A taio i te Mataio 24:32-34.) Te manaˈo ra Iesu i teihea ui? Ia au i te tumu parau “Te vairaa mai o te Mesia—eaha ïa te auraa no oe?,” te manaˈo ra oia i ta ˈna mau pǐpǐ, tei fatata i te faatavaihia i te varua moˈa, eiaha râ i te feia ino. a O te mau pǐpǐ faatavaihia a Iesu, to te senekele matamua e to teie tau, te ite i te tapao e te haroaroa atoa i to ˈna auraa, oia hoi “tei te pae uputa” Iesu.

¹⁴ Eaha ïa no tatou te auraa o teie haamaramaramaraa? Eita tatou e nehenehe e numera i te roaraa mau o “teie nei ui.” Ia haamanaˈo râ tatou e rave rahi mea no nia i te parau “ui”: O te feia ïa ua rau te matahiti o te ora ra i te roaraa o te hoê area tau taa maitai. E ere i te hoê tau roa roa e e hopea to te reira. (Exo. 1:6) Eaha ïa no tatou te auraa o ta Iesu parau no “teie nei ui”? No Iesu, hou te feia faatavaihia tei ite i te haamataraa o te tapao i 1914 e pohe ai, te ora atoa ra te tahi atu feia faatavaihia o te ite i te haamataraa  o te ati rahi. E haamataraa e e hopea atoa ïa to taua ui ra. Te faaite maitai ra te tupuraa o te mau tuhaa rau o te tapao e ua piri roa te ati rahi. Ma te ara noa e e tau ru teie, te faaite ra oe e te pee maite ra oe i te mau faatanoraa i to tatou maramaramaraa i te parau mau Bibilia e i te aratairaa a te varua moˈa.—Mat. 24:42.

15. Eaha te faaite ra e maoti te varua moˈa e tia ˈi ia tatou ia poro i te evanelia?

¹⁵ Te maha, maoti te varua moˈa e tia ˈi ia tatou ia poro i te evanelia. (Ohi. 1:8) Maoti noa te reira e porohia ˈi te evanelia e ati aˈe te ao nei, e ere anei? I manaˈo atoa na paha oe, ‘Eita roa ˈtu vau e tae e poro na te mau fare!’ no te mamahu aore ra te taiâ iti rahi. I teie nei râ, mea itoito roa oe i roto i taua ohipa ra. b E rave rahi Ite no Iehova haapao maitai tei poro tamau noa ˈtu te patoiraa aore ra te hamani-ino-raa. No to te Atua varua moˈa e upootia ˈi tatou i nia i te mau fifi uˈana e e rave ai i te mau mea e ore e tia i to tatou iho puai. (Mika 3:8; Mat. 17:20) Ma te apiti maite i te pororaa, e faaite oe e te pee ra oe i te aratairaa a taua varua ra.

Te ohipa a te varua moˈa a muri aˈe

16. No te aha tatou e tiaturi ai e e paruru Iehova i to ˈna nunaa i te roaraa o te ati rahi?

¹⁶ A muri aˈe, e faaohipa Iehova i to ˈna varua moˈa ma te maere mau no te faatupu hope roa i ta ˈna opuaraa. A feruri na i te parau o te parururaa. Mai ta tatou i ite mai nei, ua faaohipa Iehova i to ˈna varua i tahito ra no te paruru i te taata taitahi e te nunaa taatoa o Iseraela. No reira tatou e tiaturi atoa ˈi e e faaohipa oia i tauâ varua puai ra no te paruru i to ˈna nunaa i te roaraa o te ati rahi e piri maira. Aita e faufaa ia manaˈonaˈo noa e nafea Iehova e haapao ai ia tatou i reira. E tiatonu râ tatou i te tau a muri aˈe ma te tiaturi e eita roa e moe ia Iehova te feia e here ra ia ˈna. E fanaˈo mau ratou i to ˈna varua moˈa.—Par. 2, 16:9; Sal. 139:7-12.

17. E nafea Iehova e faaohipa ˈi i to ˈna varua moˈa i roto i te ao apî?

¹⁷ E nafea Iehova e faaohipa ˈi i to ˈna varua moˈa i roto i te ao apî e piri maira? Maoti taua varua ra e papaihia ˈi te mau otaro apî o te heheuhia i tera tau. (Apo. 20:12) Eaha to roto? Te mau titauraa atoa ïa a Iehova no tatou i te roaraa tausani matahiti. Te hinaaro ru ra anei oe e hiˈopoa i tera mau otaro? Te tiai ru nei tatou i tera ao apî. Mea faahiahia roa te oraraa i tera tau haamaitaihia a faaohipa ˈi Iehova i to ˈna varua moˈa no te faatupu i ta ˈna opuaraa no te fenua e te huitaata.

18. E faaoti papu oe e aha?

¹⁸ Eiaha roa ia moe ia tatou e e tupu iho â te opuaraa a Iehova i te roaraa o te tau, no te mea te faaohipa ra oia i to ˈna varua moˈa, te puai rahi roa ˈˈe i te ao taatoa. Ua taaihia oe i tera opuaraa. No reira, a faaoti papu e ani ia Iehova i to ˈna varua e e ohipa ia au i ta ˈna aratairaa. (Luka 11:13) E nehenehe ïa oe e tiaturi e ora e a muri noa ˈtu i roto i te paradaiso i te fenua, mai ta Iehova i opua no te huitaata.

[Nota i raro i te api]

Te haamanaˈo ra anei outou?

• Mea nafea Iehova i te faaohiparaa i to ˈna varua moˈa i tahito ra no te faatupu i ta ˈna opuaraa?

• E nafea Iehova e faaohipa ˈi i to ˈna varua i teie nei?

• E nafea Iehova e faaohipa ˈi i to ˈna varua a muri aˈe no te faatupu hope roa i ta ˈna opuaraa?

[Uiraa haapiiraa]

[Tumu parau tarenihia i te api 18]

Te pee ra anei oe i te mau haamaramaramaraa faatanohia?

Te tamau ra Iehova i te haamaramarama i te pue parau mau Bibilia no to ˈna nunaa. Eaha te tahi mau faatanoraa tei piahia i roto i Te Pare Tiairaa?

▪ Teihea haapiiraa ta te parabole o te faahopue a Iesu e horoa ra no nia i te tupuraa pae varua? (Mat. 13:33)—1 no Tiurai 2008, api 29-30.

▪ Eaha te auraa e haamori ia Iehova “ma te varua”? (Ioa. 4:24)—15 no Tiurai 2002, api 15.

▪ Te haamori ra te feia rahi roa i roto i teihea aua o te hiero? (Apo. 7:15)—1 no Me 2002, api 30-31.

▪ Afea te faataa-ê-raa te mamoe e te puaaniho e tupu ai? (Mat. 25:31-33)—15 no Atopa 1995, api 18-28.