Iesu Mesia—Te puai o ta ˈna poroi

“Oia mau, te haapapuraa vai maoro roa ˈˈe o te taata feruriraa paari no Kaperenaumi, oia hoi te haaputapû noâ ra oia i te aau e te feruriraa.” a—TAATA PAPAI O GREGG EASTERBROOK.

E MANA to te mau parau. E nehenehe te mau parau paari maiti-maitai-hia e haaputapû i te aau, e horoa i te tiaturiraa, e e taui i te taata. Ta Iesu Mesia anaˈe te parau mana roa ˈˈe. I muri aˈe, ua papai te hoê tei faaroo roa i ta Iesu Aˈoraa matau-maitai-hia i nia i te mouˈa: “E ia faaoti aˈera Iesu i teie nei parauraa, ua maere anaˈe ihora te taata atoa i te huru o ta ˈna parau.”—Mataio 7:28.

I teie mahana atoa, ua matau te taata e ati aˈe te ao e rave rahi parau a Iesu. Teie te tahi mau hiˈoraa o ta ˈna mau parau faufaa rahi.

“E ore e tia ia faaroo i te Atua e te Mamona.”—Mataio 6:24.

“E te mau mea atoa ta outou i hinaaro ia vetahi ê ra, e na reira atoa ˈtu outou ia ratou.”—Mataio 7:12.

“E hopoi . . . ta Kaisara ia Kaisara ra, e ta te Atua ra, e hopoi â ïa i te Atua ra.”—Mataio 22:21.

“E mea maitai i te horoa ˈtu i te rave mai.”—Ohipa 20:35.

Aita noa râ Iesu i parau i te mau parau faahiahia. Mea puai ta ˈna poroi. I faaite e i haapii na hoi te reira i te parau mau no nia i te Atua, i te auraa mau o te oraraa, e te ravea e ore roa ˈi te mauiui o te huitaata: te Basileia o te Atua. A hiˈopoa ˈi tatou i teie poroi i te mau api i muri nei, e ite tatou no te aha Iesu e ‘haaputapû noâ ˈi i te aau e te feruriraa’ o e mirioni taata.

[Nota i raro i te api]