Ta Iesu i haapii no nia i te Basileia o te Atua

“Haere atura oia na roto i te mau oire e te mau oire rii atoa, i te poro haerea i te parau maitai ra i te basileia o te Atua.”—LUKA 8:1.

MEA au roa iho â na tatou ia paraparau no nia i te mau mea faufaa no tatou. Ua parau hoi Iesu, “no te î o te aau . . . i parau ai te vaha.” (Mataio 12:34) Ia au i ta ˈna i parau i te roaraa o ta ˈna taviniraa, e mea faufaa roa te Basileia o te Atua no ˈna.

Eaha te Basileia o te Atua? O te hoê ïa faatereraa a te hoê arii. Na te Atua i haamau i teie Basileia. Ua poro haere Iesu i te Basileia o te Atua, te manaˈo tumu hoi o ta ˈna poroi. I roto i na Evanelia e maha, ua hau atu i te 110 taime te Basileia i te faahitiraahia. Aita Iesu i haapii vaha noa. Ua faaite roa ta ˈna mau haaraa eaha te Basileia o te Atua e ta te reira ohipa.

O vai te Arii? Aita te Arii o te Basileia o te Atua i maitihia e te taata, na te Atua iho râ. I to ˈna haapiiraa ˈtu, ua faaite Iesu e o ˈna te Arii ta te Atua i maiti.

Ua ite Iesu e ua faaite atea te mau parau tohu Bibilia e e faatere te Mesia fafauhia i te hoê Basileia e a muri noa ˈtu. (Samuela 2, 7:12-14; Daniela 7:13, 14; Mataio 26:63, 64) Ua parau roa ˈtu Iesu e o ˈna te Mesia i tohuhia. Ua ite ïa oia e o ˈna te Arii faatoroahia e te Atua. (Ioane 4:25, 26) No reira oia i parau noa ˈi “to ˈu basileia.”—Ioane 18:36.

Ua haapii Iesu e e faatere atoa vetahi atu e o ˈna i roto i te Basileia. (Luka 22:28-30) Ua parau oia no teie mau arii apiti e “nǎnǎ iti,” e numera taotia hoi to ratou. Ua na ô atu hoi oia: “E mea hinaaro na to outou Metua i te horoa mai i te basileia no outou.” (Luka 12:32) Ia au i te buka Bibilia hopea, 144 000 ratou te faatere e te Mesia.—Apokalupo 5:9, 10; 14:1.

Teihea roa te Basileia? “E ere i to teie nei ao to ˈu basileia,” ta Iesu i parau ia Ponotio Pilato tia faatere Roma. (Ioane 18:36) Aita te Basileia Mesia o te Atua e faatere mai na roto i te mau tia faatere taata. Ua faahiti pinepine Iesu i te Basileia o te Atua mai “te basileia o te ao.” a (Mataio 4:17; 5:3,  10, 19, 20) Tei te raˈi ïa te Basileia o te Atua.

Ia ˈna i nia i te fenua, ua tiai maite Iesu e hoˈi i nia i te raˈi. No reira oia i parau ai e e ‘haamaitai oia i te hoê vahi,’ ia nehenehe to ˈna mau arii apiti e faatere e o ˈna.—Ioane 14:2, 3.

Eaha ta te Basileia e rave? Ua haapii atu Iesu i te taata ia pure i te Atua: “Ia tae to oe ra hau. Ia haapaohia to oe hinaaro i te fenua nei, mai tei te ao atoa na.” (Mataio 6:9, 10) Te haapaohia ra to te Atua hinaaro i te raˈi. Maoti te Basileia te opuaraa a te Atua e tupu ai i te fenua. E tauiraa rahi ïa ta te reira e hopoi mai.

Eaha te tauiraa rahi ta te Basileia e hopoi mai i te fenua? Ua haapii Iesu e e faaore te Basileia o te Atua i te ino ma te haamou i te feia e onoono ra i te na reira. (Mataio 25:31-34, 46) O te hopea ïa o te mau ohipa piˈo e ino atoa. Ia au ia Iesu, e î te fenua i te taata “mǎrû,” “parau-tia,” “aroha,” “mâ te aau,” e te “faatupu i te parau hau.”—Mataio 5:5-9.

E ora anei teie mau taata taiva ore i nia i te hoê fenua viivii? Eita roa ˈtu! Ua fafau Iesu e e ite te fenua i te mau tauiraa faahiahia i raro aˈe i te Basileia o te Atua. Ua na ô te taata tei haapohehia i pihai iho ia Iesu ia ˈna: “E te Fatu, e haamanaˈo mai oe ia ˈu ia tae oe i to oe ra basileia.” Pahono atura Iesu: “Ei paradaiso ïa oe e o vau atoa . . . oia mau ta ˈu e parau atu ia oe nei.” (Luka 23:42, 43) E faariro mau te Basileia o te Atua i teie fenua ei paradaiso, tei tuea i te ǒ i Edene.

Eaha ˈtu â ta te Basileia e rave no te huitaata? Aita Iesu i fafau noa i ta te Basileia e rave, ua faaite roa râ oia. I te fenua, ua  faaora semeio Iesu e rave rahi taata. O ta ˈna ïa e rave i nia i te hoê faito rahi ia faatere mai oia. Te faatia ra te Evanelia faaurua: “Haere atura Iesu na Galilea atoa e ati aˈe, i te haapiiraa i roto i to ratou mau sunago ra, e te aˈoraa i te parau maitai o te basileia, e te faaoraraa i te mau maˈi e te mau pohe atoa o te taata.”—Mataio 4:23.

Ua rau ta Iesu faaoraraa. Ua faaaraara oia i te mata o te hoê matapo fanau. (Ioane 9:1-7, 32, 33) Ua faaora oia i te hoê taata tei roohia i te maˈi hairiiri o te lepera ma te tapea ˈtu ia ˈna. (Mareko 1:40-42) I te afairaahia mai “te hoê taata turi e te vava” ia ˈna ra, ua faaite Iesu e ua tia ia ˈna ia ‘faaroo faahou te turi e ia parau faahou te vava.’—Mareko 7:31-37.

E mana atoa to te Arii faatoroahia e te Atua i nia i te pohe. Ia au i te Bibilia, e toru faatia-faahou-raa ta Iesu i rave: te tamaiti otahi a te hoê vahine ivi, te hoê potii 12 matahiti, e to ˈna hoa here o Lazaro.—Luka 7:11-15; 8:41-55; Ioane 11:38-44.

Na roto i te aposetolo Ioane, ua tohu Iesu i te a muri aˈe faahiahia e tiai ra i te mau tino huiraatira o te Basileia o te Atua: “Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ˈna, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito.” (Apokalupo 1:1; 21:3, 4) A feruri na i te hoê ao aore e oto, mauiui, e pohe! I reira e tupu hope roa ˈi te pure, oia hoi e haapao-roa-hia te hinaaro o te Atua i te fenua nei mai i te raˈi atoa.

Afea te Basileia o te Atua e tae mai ai? Ua haapii Iesu e e tuati te haamataraa o ta ˈna faatereraa ei Arii e te hoê anotau taa ê ta ˈna i parau to ˈna “taeraa mai,” aore ra vairaa mai. Ma te hoê parau tohu, ua faaite Iesu afea to ˈna vairaa mai ei Arii e haamata ˈi. E tapaohia taua anotau ra e te mau arepurepuraa e ati aˈe te ao, oia atoa te tamaˈi, te oˈe, te aueueraa fenua, te maˈi pee, e te maraaraa o te ino. (Mataio 24:3, 7-12; Luka 21:10, 11) E ite-maitai-hia iho â tera e te tahi atu mau tupuraa ta Iesu i tohu mai 1914, matahiti o te Tamaˈi rahi matamua. Te faatere nei ïa Iesu ei Arii. Fatata roa te Basileia i te tae mai, a haapaohia ˈi te hinaaro o te Atua i te fenua. b

Eaha te auraa o te taeraa mai o te Basileia o te Atua no oe? Tei to oe ïa huru i mua i ta Iesu poroi.

[Nota i raro i te api]