Ravea 4

A maiti i to oe mau hoa ma te paari

EAHA TA TE BIBILIA E HAAPII RA? “O tei amui atoa to ˈna haerea i to te feia paari ra, e paari atoa ïa.”—Maseli 13:20.

EAHA TE FIFI? E tauturu to tatou mau hoa ia tatou ia mauruuru aore ra eita roa ˈtu. E ohipa to ratou haerea e huru paraparau i nia i ta tatou hiˈoraa i te oraraa.—Korinetia 1, 15:33.

A hiˈo na i te aamu Bibilia o na 12 taata tei hoˈi mai mai to ratou tere hiˈopoa i Kanaana. ‘Ua faaino haere te rahiraa o ratou i taua fenua ta ratou i hiˈo haere ra na roto i te tamarii a Iseraela ra.’ Noa ˈtu e e piti taata tei paraparau maitai no nia ia Kanaana ei “fenua maitai rahi roa,” ua riro te nunaa i te huru feruriraa tano ore o na manu ahuru. Te na ô ra te faatiaraa e “oto anaˈe ihora te taata i te reira rui. Ua amuamu anaˈe ihora te tamarii atoa a Iseraela.”—Numera 13:30–14:9.

I teie atoa mahana, mea rahi te taata ‘ohumu e te mauruuru ore.’ (Iuda 16) E mea fifi ia mauruuru noa e te mau hoa aita e mauruuru hanoa.

EAHA TE RAVE? A hiˈopoa i ta oe mau aparauraa e to oe mau hoa. Te faateitei noa ra anei ratou ia ratou no ta ratou mau taoˈa? Aore ra te mutamuta noa ra anei no te mea aita ta ratou te tahi ohipa? E teihea huru hoa oe no ratou? Te turai ra anei oe ia ratou ia riro mai ia oe? Aore ra te faaitoito ra anei oe ia ratou ia mauruuru i ta ratou e fanaˈo nei?

A hiˈo na ia Davida, te riro mai ei arii, e ia Ionatana te tamaiti a te arii Saula. I tapuni haere na Davida na te medebara no to te arii Saula hinaaro e haapohe ia ˈna no to ˈna pohehae ia riro mai oia ei arii. I te tanoraa mau, o Ionatana te mono i to ˈna metua. Ei hoa piri roa, ua farii oia e ua maiti te Atua ia Davida ei arii e ua oaoa i te turu i to ˈna hoa.—Samuela 1, 19:1, 2; 20:30-33; 23:14-18.

Tera te hoa e hinaarohia! Te hoa e mauruuru noa e o te hinaaro i to oe maitai. (Maseli 17:17) Mea papu e ia noaa ia oe te hoa mai tera, ia faaite atoa ïa oe i taua mau huru maitatai ra.—Philipi 2:3, 4.

[Hohoˈa i te api 7]

E tauturu anei to oe mau hoa ia oe ia mauruuru aore ra eita roa ˈtu?