Te Basileia o te Atua—e huru o te aau anei?

“Ei aau faaroo to tatou e tae mai ai te Basileia o te Atua,” ta te pâpa Benoît XVI ïa i faahiti i roto i ta ˈna buka Iesu no Nazareta (Farani). Te Basileia o te Atua no vetahi, e tauiraa ïa e tupu i roto i te hoê taata ia farii oia ia Iesu Mesia e ia faahotu i te faaroo. Tera iho â anei? ‘To roto noa anei i to outou aau’ te Basileia?

MEA faufaa roa te Basileia no Iesu. Tera hoi “te manaˈo tumu o ta Iesu pororaa,” ta te pâpa Benoît ïa i faahiti. I te roaraa o ta ˈna taviniraa e 3 matahiti e te afa, ua poro haere Iesu i “te parau maitai o te basileia.” (Mataio 4:23) Na roto i ta ˈna mau haapiiraa e semeio, ua faataa maitai Iesu e e ere te Basileia i te fariiraa e te faarooraa te taata i te Atua. Ua taaihia râ i te hoê faatereraa, haavaraa, e te haamaitairaa mure ore.

Faatereraa e haavaraa

I te hoê mahana i te pae hopea o ta Iesu taviniraa, ua haere atu te mama o Iakobo e o Ioane, na pǐpǐ piri roa a Iesu, ia ˈna ra. Teie ta ˈna i ani: “Ia tae i to oe ra basileia, ia parahi te hoê o tau pue tamarii nei i to rima atau, e te hoê i to rima aui.” (Mataio 20:21) Papu maitai, aita te mama e faahiti ra i te tahi mea i roto i te aau o ta ˈna na tamaiti. Ua taa ia ˈna e ua taaihia te Basileia i te faatereraa e o Iesu, e ua hinaaro oia ia fanaˈo atoa ta ˈna na tamaiti i te tahi hopoia. Ua fafau iho â Iesu i ta ˈna na aposetolo taiva ore 11 e e ‘parahi ratou i nia i te terono i te haavaraa’ e o ˈna i roto i to ˈna Basileia. (Luka 22:30) No ta ˈna mau pǐpǐ, e faatereraa mau ïa, e tiaauraa, te Basileia o Iesu.

E no te rahiraa o te taata i te tau o Iesu, e tauiraa atoa anei i roto i te taata te Basileia? Aore ra te tiai ra anei ratou i te tahi mea ê atu? Hou rii i te oroa Pasa i te matahiti 33 o to tatou tau, i to Iesu tomoraa i Ierusalema na nia i te hoê fanauˈa asini, ua farii popou te nahoa ia ˈna e ua pii vetahi: “Hosana te Tamaiti a Davida.” (Mataio 21:9) No te aha ratou i pii ai? E au ra e ua taa ia ratou e o Iesu te Mesia fafauhia e e horoa te Atua ia ˈna i te hoê Basileia mure ore, “te terono o to ˈna ra metua o Davida.” Te tiai ru ra ratou i te faaoraraa, te hau, e te parau-tia ta te Basileia e hopoi mai.—Luka 1:32; Zekaria 9:9.

Haamaitairaa mure ore

Ua ite atoa te feia tei ore i anaanatae roa i ta Iesu taviniraa i ta ˈna haapiiraa no nia i te Basileia. Hou Iesu a haapohehia ˈi, ua taparu te taata ohipa ino tei patǐtǐhia i pihai iho ia ˈna: “E te Fatu, e haamanaˈo mai oe ia ˈu ia tae oe i to oe ra basileia.” Eaha ta Iesu i pahono? Ua haapapu atu oia: “Ei paradaiso ïa oe e o vau atoa.”—Luka 23:42, 43.

Ua papu maitai i tera taata eiâ e e faatiahia mai Iesu. E i muri aˈe roa oia e fanaˈo ai aore ra e parahi ai i roto i te hoê Basileia. E noaa iho â ia Iesu te mana no te faatia faahou mai e no te tauturu i tera taata, e e mirioni atu â, ia taui. To ˈna ïa hinaaro. E  haamaitai mau â Iesu, ei Arii i te raˈi, i te huitaata e ati aˈe te fenua e a muri noa ˈtu maoti te Basileia.—Ioane 5:28, 29.

Basileia i rotopu ia ratou

Aita anei Iesu i parau: “Tei rotopu te basileia o te Atua ia outou”? Ia au ïa i te Luka 17:21 a te Traduction du monde nouveau. Te parau ra te tahi mau huriraa Bibilia mai Te Bibilia Moˈa ra, e “te basileia o te Atua tei roto ïa ia outou,” area te tahi atu mai te Bible de Crampon (1905), “tei rotopu ïa ia outou.” Eaha ïa te auraa o ta Iesu parau?

Ia au i te mau irava tapiri, o te hoê pǔpǔ faaroo ati Iuda parauhia Pharisea ta Iesu i parau atu. Mea ê roa ta ratou tiairaa no nia i te Mesia e to ˈna Basileia. No ratou, e haere mai te Mesia “na roto i te mau ata o te raˈi” ei Arii hanahana no te faatiamâ i te mau ati Iuda i to Roma e no te haamau faahou i te basileia o Iseraela. (Daniela 7:13, 14) Ua haapapu râ Iesu i to ratou hape ma te parau: “E ore te basileia o te Atua e tupu faaite hua mai.” E ua na ô atoa: “Inaha hoi te basileia o te Atua tei roto [“rotopu,” MN] ïa ia outou.”—Luka 17:20, 21.

Noa ˈtu ta Iesu mau haapiiraa e semeio tei faaite maitai e o ˈna te Arii fafauhia o tera Basileia, ua patoi roa ˈtu â te mau Pharisea manaˈo ino o tei ere i te faaroo mau i tera Arii. Aita ratou i tiaturi e o Iesu te Mesia. No reira oia i faataa roa ˈi: Te Basileia, e tiahia ra e to ˈna Arii maitihia, ‘tei rotopu ïa ia ratou.’ Aita oia i ani atu ia hiˈo i roto ia ratou iho. a Te tia noa ra Iesu e ta ˈna mau pǐpǐ i mua ia ratou. Ua parau oia: “Tei ǒ nei te basileia o te Atua.”—Luka 17:21, Contemporary English Version.

A haafaufaa i te Basileia

Aita te Basileia o te Atua e vai ra i roto i te aau o te taata hara. Ia haafaufaa râ tatou i te Basileia. Na roto i ta ˈna mau haapiiraa e semeio, ua faaitoito Iesu i te feia e faaroo ra ia ˈna ia faatupu i te faaroo mau i te hoê faatereraa parau-tia o te hopoi mai i te hau e te ino ore. Ua hinaaro oia ia faahotu ratou i te faaroo o te haamaitai i to ratou oraraa. Ua haapii hoi oia ia ratou ia pure: “E to matou Metua i te ao ra, ia raa to oe iˈoa. Ia tae to oe ra basileia. Ia haapaohia to oe hinaaro i te fenua nei mai tei te raˈi atoa.” (Luka 11:2) Mea rahi o tei faaroo ia ˈna tei putapû i ta ˈna mau parau e tei faatupu i te faaroo, a pee atu ai ia Iesu no te fanaˈo i te mau haamaitairaa a te Basileia o te Atua.

E hinaaro anei oe i tera huru faaroo? Ia aha ïa oe no te haapapu i tera faaroo? A haamanaˈo i ta Iesu i parau i to ˈna pureraa i to ˈna Metua: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) No te aha e ore ai e farii i te haapii i te Bibilia e te mau Ite no Iehova, tei horoa ˈtu i teie vea? E nehenehe ïa oe e taui e e noaa atoa ia oe te tiaturiraa i te hoê faatereraa parau-tia, te hoê Basileia o te hopoi mai i te hau e te ino ore no te taatoaraa.

[Nota i raro i te api]

[Parau iti faaôhia i te api 11]

To roto anei te Basileia o te Atua i te aau o te feia etaeta aroha ore tei patoi ia Iesu?