TE FAAITE maitai ra te tupuraa i faahiti ai Iesu i te mau parau i nia nei i te fa o to ˈna oraraa. I te poipoi taatoa, i haere na oia e ta ˈna mau pǐpǐ na te oire mouˈa o Samaria. (Ioane 4:6) Ua manaˈo te mau pǐpǐ e ua poia Iesu a pûpû atu ai i te tahi maa na ˈna. (Ioane 4:31-33) Haapapu atura Iesu i te fa o to ˈna oraraa. Mea faufaa aˈe no ˈna i te rave i ta te Atua ohipa i te tamaa. Ma ta ˈna mau parau e ohipa, ua ora Iesu no te rave i ta te Atua i hinaaro no ˈna. Eaha ïa te auraa?

Te faataa ra te Bibilia i ta Iesu ohipa: “Haere atura Iesu na Galilea atoa e ati aˈe, i te haapiiraa . . . e te aˈoraa i te parau maitai o te basileia.” (Mataio 4:23) Aita noa oia i poro i te Basileia o te Atua. Ua haapii atoa oia i te taata. Te auraa ïa, e haapii atu, e faataa ˈtu, e e haapapu atu maoti te haaferuriraa. O te Basileia te manaˈo tumu o ta Iesu poroi.

I roto i ta ˈna taviniraa, ua haapii atu Iesu eaha te Basileia o te Atua e ta te reira e rave. A tapao na i teie mau parau no nia i te Basileia e te mau irava Bibilia e faaite ra i ta Iesu i parau.

• E faatereraa i te raˈi te Basileia o te Atua, e o Iesu ta Iehova i faatoroa ei Arii.—MATAIO 4:17; IOANE 18:36.

• E faaraa te Basileia i te iˈoa o te Atua e e faatupu i to ˈna hinaaro i te fenua nei mai i te raˈi atoa.—MATAIO 6:9, 10.

• Ua parau Iesu i te taata ohipa ino: “Ei paradaiso oe e o vau atoa.” I raro aˈe i te Basileia o te Atua, e riro te fenua atoa ei paradaiso.—LUKA 23:42, 43, Traduction du monde nouveau.

• E fatata te Basileia o te Atua i te tae mai e e haapao i te hinaaro o te Atua no te fenua. a—MATAIO 24:3, 7-12.

Ua matau-na-mua-hia Iesu ei “Orometua.” (Ioane 13:13) I roto râ i ta ˈna taviniraa e toru matahiti e te afa, ua faatupu atoa oia e rave rahi semeio, no e piti aˈe tumu. A tahi, ua haapapu te reira e ua tonohia oia e te Atua. (Mataio 11:2-6) Te piti, ua faaite te reira eaha ta ˈna e rave ei Arii o te Basileia o te Atua i nia i te hoê faito rahi a muri aˈe. A tapao na i te tahi o ta ˈna mau semeio.

• Ua tamǎrû oia i te miti e i te mataˈi.—MAREKO 4:39-41.

• Ua faaora oia i te feia maˈi, oia atoa te matapo, te turi, e te pirioi.—LUKA 7:21, 22.

• Ua faarahi oia i te maa ia tamaa te nahoa i poia.—MATAIO 14:17-21; 15:34-38.

• E toru aˈe taime to ˈna faatia-faahou-raa i tei pohe.—LUKA 7:11-15; 8:41-55; IOANE 11:38-44.

Auê te au e ia ora i te fenua a faatere ai teie Arii puai!

Aita e taata aravihi aˈe i te Tamaiti iho a te Atua, matauhia ei Iesu Mesia, no te haapii atu no nia ia Iehova. Ei ‘tumu o te mau mea atoa i hamanihia,’ mea maoro aˈe Iesu i pihai iho ia Iehova i nia i te raˈi ia faaauhia i te tahi atu varua. (Apokalupo 3:14) A feruri na i ta ˈna fanaˈoraa taa ê e apo i te huru feruriraa o to ˈna Metua e e haapii i to ˈNa hinaaro, eˈa, e ta ˈNa mau ture aveia.

Ua parau Iesu ma te tano: “Aore roa te hoê i ite i te Tamaiti maori râ o te Metua; aore hoi te hoê i ite i te Metua, maori râ o te Tamaiti, e o ta te Tamaiti i hinaaro i te faaite atu.” (Luka 10:22) Ei taata i te fenua, ua faaite Iesu ma te aau tae i te huru o to ˈna Metua. Mea otahi ta ˈna huru paraparau e haapiiraa, ua faaohipa hoi oia i ta ˈna i ite i roto i te ao varua e i mua i te aro hanahana o te Atua Teitei roa ˈˈe.—Ioane 8:28.

E nehenehe e faaauhia te ohipa ta Iesu i rave no te faaite i to ˈna Metua i ta te hoê mauhaa e taui i te faito uira e rave. E faatano mai tera mauhaa i te faito uira ia nehenehe te taata e faaohipa. I te fenua, ua rave Iesu i ta ˈna i ite i nia i te raˈi no nia i to ˈna Metua e ua faatano i te taata hara ia nehenehe ratou e taa oioi e e faaohipa ohie.

A hiˈo na e piti ravea faufaa i faaite ai Iesu i to ˈna Metua.

• I roto i ta ˈna haapiiraa, ua faaite Iesu i te parau mau no nia ia Iehova—to ˈNa iˈoa, ta ˈna opuaraa, e to ˈna mau eˈa.—IOANE 3:16; 17:6, 26.

• Ua faaite ta Iesu mau ohipa i te huru faahiahia rahi o Iehova. Ua pee oia ma te tia roa i te huru o to ˈna Metua i tia ˈi ia ˈna ia parau: ‘Ia hinaaro noa ˈtu outou e ite i te huru o to ˈu Metua, a hiˈo noa mai ia ˈu.’—IOANE 5:19; 14:9.

E faahiahia tatou i te huru oraraa o Iesu. E hoona-rahi-hia tatou ia hiˈopoa no te aha oia i pohe ai e ia haa ia au i ta tatou i haapii.