Te ô î i te here a te Atua
Te ô î i te here a te Atua
“Ia tupu atoa hoi te aroha i te parau-tia, e tae noa ˈtu i te ora mure ore.”—ROMA 5:21.
1, 2. Teihea ô e piti e faataahia ra, e teihea râ tei hau ê?
IA AU i te hoê orometua i te haapiiraa tuatoru no Melbourne i Auteralia, e ô faufaa vai maoro te mau ture a te Hau emepera Roma no te totaiete taata. Ia au râ i te Bibilia, ua horoa mai te Atua i te hoê ô faufaa hau ê î i te here. Oia hoi ia tiahia e ia fariihia te taata i te aro o te Atua ma te tiaturi e ora e a muri noa ˈtu.
2 Ua taaihia ta te Atua horoaraa i tera ô i ta ˈna parau-tia. I roto i te Roma pene 5, aita te aposetolo Paulo i faataa i te reira ma te tatara i te mau tuhaa rii o te ture. Ua omua râ oia na roto i teie haapapuraa faahiahia: “Ua tiahia tatou i te faaroo, e hau to tatou i te Atua ra, i to tatou Fatu ia Iesu Mesia.” E here atoa ˈtu te feia tei fanaˈo i te ô a te Atua ia ˈna. O Paulo atoa ïa, tei papai e ua niniihia mai ‘to te Atua hinaaro,’ aore ra here, i roto i to tatou aau maoti te varua moˈa.—Roma 5:1, 5.
3. Eaha te mau uiraa e puta mai?
3 No te aha râ e titauhia ˈi teie ô î i te here? E nafea te Atua e pûpû ai i te reira ma te tia e no te maitai o te taata atoa? E ia aha te taata no te fanaˈo i te reira? E ite mai tatou i te mau pahonoraa tano o te haafaufaa ra i te here o te Atua.
Te here o te Atua e te hara
4, 5. (a) Mea nafea Iehova i faaite ai i to ˈna here rahi? (b) Te iteraa i te aha e taa ˈi ia tatou te Roma 5:12?
4 No to ˈna here rahi i tono mai ai Iehova i ta ˈna Tamaiti fanau tahi e tauturu i te taata. Ua na ô Paulo: “Ua faarahi . . . te Atua i to ˈna aroha ia tatou nei, i te mea te vai taata hara noa nei â tatou, i pohe ai te Mesia no tatou.” (Roma 5:8) A feruri na i teie parau: “Te vai taata hara noa nei â tatou.” Mea faufaa ïa ia taa i te taata atoa mea nafea tatou i hara ˈi.
5 Ua faataa papu Paulo: “No te taata hoê ra i ô mai ai te ino [aore ra hara] i te ao nei, e no te ino [aore ra hara] hoi te pohe; e ua taea-atoa-hia te taata atoa e te pohe i te mea ua hara paatoa.” (Roma 5:12) E nehenehe tatou e taa i te reira no te mea ua haapapai Iehova i te omuaraa o te oraraa o te taata. Ua poiete oia e piti taata, Adamu raua Eva. E Atua Poiete tia roa oia. Na taata matamua, to tatou tupuna, atoa ïa. Ua horoa oia i te hoê noa opaniraa ma te faaara ˈtu e ia ore raua e faaroo i tera ture, e faautua-pohe-hia raua. (Gen. 2:17) Ua faaoti râ raua e hara ma te ofati i te opaniraa au noa a te Atua, a patoi atu ai ia ˈna ei Iriti ture e ei Arii.—Deut. 32:4, 5.
6. (a) No te aha te huaai o Adamu i pohe ai hou te Atua a horoa ˈi i te Ture a Mose e mai reira mai? (b) Eaha te faaauhia i te hoê maˈi no roto mai i te metua?
6 I muri aˈe noa to Adamu hararaa i tamariihia ˈi oia, a raea ˈtu ai to ˈna huaai atoa e te hara e te mau faahopearaa o te reira. Parau mau, aita ratou i hara ma te ofati i te ture a te Atua mai ia Adamu e aitâ te ture a Mose i horoahia ˈtura. (Gen. 2:17) Teie râ, ua raea to Adamu huaai e te hara. No reira, ua mana te hara e te pohe e tae roa i te tau a horoa ˈi te Atua ia Iseraela i te ture, o te haapapu ra e e taata hara ratou. (A taio i te Roma 5:13, 14.) E nehenehe te faahopearaa o te hara e faaauhia i te tahi maˈi no roto mai i te metua. E roohia te tahi mau tamarii o te hoê utuafare i tera maˈi, eiaha râ pauroa. E ere râ mai te reira no te hara. Ua raea tatou paatoa e te hara a Adamu e no reira tatou pauroa e pohe ai. E matara anei tatou i teie tupuraa ino?
Ta te Atua i horoa na roto ia Iesu Mesia
7, 8. E nafea te faahopearaa o te haerea o na toopiti taata tia roa e taa ê ai?
7 Ma te here, ua faanaho Iehova i te hoê ravea e tiamâ ˈi te taata i te hara. Maoti ïa te tahi atu taata tia roa, te Adamu hopea, ia au i ta Paulo faataaraa. (Kor. 1, 15:45) Mea taa ê râ te faahopearaa o te haerea o na toopiti taata tia roa. E nafea?—A taio i te Roma 5:15, 16.
8 Ua papai Paulo: “Eita . . . tei horoa-noa-hia mai e au i t[e] hara.” Ua hara Adamu e ua tano to ˈna faautuaraahia i te pohe. E ere râ o ˈna anaˈe tei pohe. Te taio ra tatou: “E rave rahi tei pohe i te hara a t[aua] taata hoê ra.” No te mea ua hara paatoa te huaai o Adamu, e pohe iho â ratou. O tatou atoa ïa. Mea mahanahana râ te iteraa e e ohipa ê ta Iesu taata tia roa e faatupu. Eaha ïa? Te pahono ra Paulo e “ua taea-atoa-hia te taata atoa i te tia ia ora.”—Roma 5:18.
9. Eaha te auraa e tiahia te taata e te Atua ia au i te Roma 5:15, 16?
9 Eaha te auraa o na parau “ia tiahia” na roto i te reo Heleni? Ua papai te hoê taata huri Bibilia: “E faaauraa te reira i te ture o tei taaihia i te parau-tia. Te faahiti ra ïa i te tauiraa te tiaraa o te hoê taata i te aro o te Atua, eiaha râ te tauiraa o to ˈna rotoraa . . . Te faaauhia ra te Atua i te hoê haava o te faaoti e haamaitai i te taata hara tei tia ˈtu i mua i ta ˈNa haavaraa, ei auraa parau, no te parau-tia ore. E faaore te Atua i ta ˈna hara.”
10. Ua aha Iesu e tiahia ˈi te taata?
10 Maoti te aha e faaorehia ˈi te hara a te taata parau-tia ore e “te Haava [parau-tia] i to te ao atoa”? (Gen. 18:25) Na mua roa, ua tono mai te Atua i ta ˈna Tamaiti fanau tahi i te fenua no to ˈna here. Ua rave hope roa Iesu i te hinaaro o to ˈna Metua noa ˈtu te mau faahemaraa, faaoooraa e faainoraa. Ua tapea oia i to ˈna taiva ore e tae roa ˈtu i te poheraa i nia i te pou haamauiuiraa. (Heb. 12:2) Ma te horoa i to ˈna ora taata tia roa ei tusia, ua pûpû Iesu i te hoo o te faatiamâ, aore ra faaora, i te huaai o Adamu i te hara e te pohe.—Mat. 20:28; Roma 5:6-8.
11. Ua faito te hoo i te aha?
11 Ua faahiti Paulo i te “hoo” i roto i te tahi atu rata. (Tim. 1, 2:6) Ia au i te reo Heleni tumu, e faito maitai tera hoo i tei ere. Eaha tei ere? No Adamu i raea ˈi e miria taata, to ˈna hoi huaai, e te hara e te pohe. E nehenehe iho â Iesu ei taata tia roa e huaaihia, e miria taata tia roa. a No reira i manaˈohia ˈi e te ora o Iesu e o to ˈna huaai, o te tusia ïa tei faito i te ora o Adamu e o to ˈna huaai hara. Aita râ te Bibilia e parau ra e to roto atoa te huaai o Iesu i tera hoo. Te haapapu ra te Roma 5:15-19 e na te pohe o “te taata hoê” e faatiamâ. Ua faito ïa to Iesu ora tia roa i to Adamu. O Iesu Mesia anaˈe te mea faufaa roa. No “te parau-tia a te taata hoê” ra o Iesu, to ˈna auraro e taiva ore e tae roa ˈtu i te pohe, i nehenehe ai te taata atoa e fanaˈo i te ô a te Atua e te ora. (Kor. 2, 5:14, 15; Pet. 1, 3:18) Mea nafea ïa?
Faaoreraa i te hara maoti te hoo
12, 13. No te aha tei tiahia e te Atua e hinaaro mau ai i to ˈna aroha e here?
12 Ua farii te Atua ra o Iehova i te tusia taraehara o ta ˈna Tamaiti. (Heb. 9:24; 10:10, 12) E taata hara noa râ te mau pǐpǐ a Iesu i te fenua, ta ˈna atoa mau aposetolo taiva ore. Ua tutava ratou i te haapae i te ino, aita râ i manuïa i te mau taime atoa. No te aha? No te mea ua raea ratou e te hara. (Roma 7:18-20) E nehenehe râ te Atua e rave i te tahi mea e ua na reira oia. Ua farii oia i te “hoo” ta ˈna i ineine i te faaohipa no te maitai o ta ˈna mau tavini i te fenua.
13 E ere no te mau ohipa maitai a te mau aposetolo e te tahi atu i faaohipa ˈi te Atua i te hoo no ratou. No to te Atua râ aroha e here rahi. Ua faaoti oia e faaore i te faahaparaa e vai ra i nia i te mau aposetolo e te tahi atu, a tiamâ ˈtu ai ratou i te hara. Ua haapapu Paulo: “I ora hoi outou i te aroha mau i te faaroo; e ere hoi ïa i to outou iho: e mea horoahia mai ïa e te Atua.”—Eph. 2:8.
14, 15. Eaha te haamaitairaa a te feia e tiahia e te Atua? Ia aha noa râ ratou?
14 Ia faaore te Manahope i ta te taata hara no ǒ mai ia Adamu e ta ˈna iho i rave, e ô hau ê ïa! Mea rahi te hara ta te taata i rave hou a riro ai ei Kerisetiano. Maoti râ te hoo e faaore ai te Atua i te reira. Ua papai Paulo: “Tei horoa-noa-hia maira, ia tiahia maira ïa i te hara atoa e rave rahi.” (Roma 5:16) Mea titauhia ia haamori noa te mau aposetolo e te tahi atu tei tiahia na roto i teie ô î i te here, i te Atua mau ma te faaroo. Eaha te haamaitairaa a muri aˈe? “Te feia hoi i noaa ia ratou te maitai rahi, e te parau-tia i horoahia maira, e rahi atu ïa to ratou mana [ei arii] i te ora i te taata hoê ra, ia Iesu Mesia.” Mea taa ê roa te faahopearaa o te parau-tia i horoahia mai, e ora ïa.—Roma 5:17; a taio i te Luka 22:28-30.
15 E riro te feia e fanaˈo i tera ô, oia hoi ia tiahia ratou, ei tamarii pae varua a te Atua. Ei feia tufaa e te Mesia, te tiaturi ra ratou e e faatiahia mai ratou mai te pohe mai ei tamarii varua i te raˈi no te “mana” ei arii e o Iesu Mesia.—A taio i te Roma 8:15-17.
To te Atua here ia vetahi ê
16. E fanaˈo te feia e tiaturi ra e ora i te fenua i teihea ô i teie nei â?
16 O te tahi noa mau Kerisetiano taiva ore e tiaturi ra i te Atua e e tavini ra ia ˈna te “mana” ei arii e te Mesia i te raˈi. Hoê â tiaturiraa Bibilia to e rave rahi e to te mau tavini a te Atua hou te Kerisetianoraa, e ora e a muri noa ˈtu i roto i te Paradaiso i te fenua. E fanaˈo anei ratou i te ô î i te here a te Atua i teie nei â a tiahia ˈi ratou no te ora i te fenua? Ma te mahanahana mau, “E” ia au i ta Paulo i papai i to Roma.
17, 18. (a) Ua ahahia Aberahama e te Atua no to ˈna faaroo? (b) Mea nafea Aberahama i tiahia ˈi e Iehova?
17 Ua faahiti Paulo i te hiˈoraa maitai roa o Aberahama. E taata faaroo oia tei ora hou Iehova a horoa ˈi i te Ture a Mose ia Iseraela e na mua roa ˈˈe te Mesia i avari ai i te ravea no te ora i te raˈi. (Heb. 10:19, 20) Te taio ra tatou: “E ere hoi i to te ture tei parauhia mai ia Aberahama ra e to ˈna huaai, e e riro oia ei fatu no te fenua, no te parau-tia râ i te faaroo.” (Roma 4:13; Iak. 2:23, 24) Ua tiahia ˈtura Aberahama taiva ore e te Atua.—A taio i te Roma 4:20-22.
18 E ere i te auraa e aita Aberahama i rave i te hara a tavini ai oia ia Iehova e rave rahi matahiti. Ua tiahia oia no te tahi atu tumu. (Roma 3:10, 23) No to ˈna paari hau ê, ua tâuˈa Iehova i te faaroo rahi o Aberahama e ta ˈna mau ohipa e au i to ˈna faaroo. Ua tiaturi Aberahama i te “huaai,” aore ra huero, fafauhia o te na roto mai ia ˈna. O te Mesia taua Huero ra. (Gen. 15:6; 22:15-18) Maoti te hoo i aufauhia e te Mesia ra o Iesu e tia ˈi i te Atua Haava ia faaore i te hara i ravehia i mutaa ihora. No reira ïa Aberahama e te tahi atu mau taata paieti hou te Kerisetianoraa e nehenehe ai e faatiahia mai te pohe mai.—A taio i te Roma 3:24, 25; Sal. 32:1, 2.
Ia tiahia tatou i teie mahana
19. No te aha e faaitoitoraa ˈi no e rave rahi i teie mahana te tiaraahia Aberahama e te Atua?
19 E faaitoitoraa no te mau Kerisetiano mau i teie mahana te tiaraahia Aberahama e te Atua î i te here. Aita oia i tiahia e Iehova mai tei faatavaihia i te varua ei ‘feia tufaa e te Mesia.’ Ua “haapaohia” teie pǔpǔ iti “ei feia moˈa” e ei ‘tamarii na te Atua.’ (Roma 1:7; 8:14, 17, 33) Area Aberahama, ua riro ïa ei ‘taua no te Atua’ hou roa te tusia taraehara i pûpûhia ˈi. (Iak. 2:23; Isa. 41:8) E te mau Kerisetiano mau ïa e tiaturi ra e ora i roto i te Paradaiso i te fenua?
20. Eaha ta te Atua e titau ra i te feia i tiahia e ana i teie mahana mai ta ˈna i titau ia Aberahama?
20 Aita ratou i fanaˈo i “te parau-tia i horoahia maira” no te ora i nia i te raˈi maoti te hoo i aufauhia e te Mesia ra o Iesu. (Roma 3:24; 5:15, 17) E faaroo rahi râ to ratou i te Atua e i te hoo ta ˈna i horoa mai. Te faaite ra ratou i te reira na roto i te mau ohipa maitatai, mai te ‘parau-haere-raa i te basileia o te Atua e te haapiiraa i te mau parau o te Fatu ra o Iesu Mesia.’ (Ohi. 28:31) No reira ratou e tiahia ˈi e Iehova mai ia Aberahama. Mea taa ê te ô ta ratou e fanaˈo, te auhoaraa e te Atua, e te ô ta te feia faatavaihia e fanaˈo. Te farii nei râ ratou i te reira ma te mauruuru rahi.
21. E nafea tatou e fanaˈo ai i te here o te Atua e ta ˈna parau-tia?
21 E fafau te mau tia faatere e rave rahi mea, e ere râ no ǒ mai ia ratou to oe tiaturiraa e ora e a muri noa ˈtu. E opuaraa paari te reira na Iehova te Arii o te ao taatoa. Ia tupu ta ˈna opuaraa, ua faanaho riirii oia i te mau mea tei taaihia i te parau-tia mau. E faaiteraa atoa ïa i to ˈna here rahi. No reira Paulo i parau ai: “Ua faarahi . . . te Atua i to ˈna aroha ia tatou nei, i te mea te vai taata hara noa nei â tatou, i pohe ai te Mesia no tatou.”—Roma 5:8.
[Nota i raro i te api]
a E itehia tera manaˈo i roto i Te Pare Tiairaa o te 15 no Mati 2000, api 4, paratarafa 4 e te Étude perspicace des Écritures, buka 2, api 728, paratarafa 2 e 3.
Te haamanaˈo ra anei outou?
• Ua raea te huaai o Adamu e te aha, e eaha te faahopearaa?
• Mea nafea te hoo i horoahia ˈi, e ua faito te reira i te aha?
• Ia tiahia outou e te Atua, eaha ta teie ô e horoa mai?
[Uiraa haapiiraa]
[Hohoˈa i te api 17]
Ua hara Adamu taata tia roa. Ua pûpû Iesu taata tia roa i te “hoo” e faito i tei ere
[Hohoˈa i te api 18]
Maoti Iesu e tiahia ˈi tatou, tera te evanelia!
