Ta te Parau a te Atua e haapii maira

Eaha te tiaturiraa no tei pohe?

I roto i teie tumu parau, e ite oe i te mau uiraa ta oe paha i uiui na e ihea e taio ai i te pahonoraa i roto i ta oe Bibilia. E oaoa te mau Ite no Iehova i te aparau no nia i teie mau pahonoraa e oe.

1. Eaha te tiaturiraa no tei pohe?

I to Iesu taeraa ˈtu i Betania, i pihai iho ia Ierusalema, ua pohe to ˈna hoa ra o Lazaro e maha mahana. Ua haere atu Iesu i te menema, apitihia e Mareta e Maria, na tuahine o to ˈna hoa i pohe. Putuputu oioi maira te hoê nahoa taata. E nehenehe anei oe e feruri i to Mareta raua Maria oaoa a faahoˈi ai Iesu ia Lazaro i te ora?—A taio i te Ioane 11:20-24, 38-44.

Ua tiaturi Mareta e e faatiahia mai iho â tei pohe. Ua ite te mau tavini taiva ore atoa a Iehova e i mua nei, e faatia te Atua i tei pohe no te ora faahou i nia i te fenua.—A taio i te Ioba 14:14, 15.

2. Eaha te huru o tei pohe?

E ora te taata e te animara maoti te puai ora, oia hoi te “aho.” Aita to tatou e varua o te ora noa ia pohe tatou. (Koheleta 3:19; Genese 7:21, 22) Ua hamanihia tatou e te repo fenua. (Genese 2:7; 3:19) E mou to tatou mau manaˈo ia pohe to tatou roro. No reira, i to Lazaro faahoˈiraahia mai i te ora, aita oia i faatia i ta ˈna i ite i roto i te pohe, aita hoi ta tei pohe e parau itea.—A taio i te Salamo 146:4b; Koheleta 9:5, 10.

Eita iho â tei pohe e mauiui. Ua hape te haapiiraa e e haamauiui te Atua i te taata ia pohe ratou. E pari haavare te reira i te Atua. Mea riri na ˈna te manaˈo e haamauiui i te taata i roto i te auahi.—A taio i te Ieremia 7:31.

 3. E nehenehe anei e paraparau i tei pohe?

Eita tei pohe e paraparau. (Salamo 115:17) Te mau demoni râ, oia ïa. Te haavare nei ratou e o ratou te varua o te taata i pohe. (Petero 2, 2:4) Te opani ra Iehova ia tamata i te paraparau i tei pohe.—A taio i te Deuteronomi 18:10, 11.

4. O vai te faahoˈihia mai i te ora?

I roto i te ao apî e fatata maira, e mirioni taata i roto i te menema te faahoˈihia mai i te ora. Oia atoa tei rave i te ohipa ino no te mea aita ratou i ite o vai Iehova.—A taio i te Luka 23:43; Ohipa 24:15.

E nehenehe tei faatiahia mai e haapii i te parau mau no nia i te Atua e e faaite i to ratou faaroo ia Iesu ma te auraro ia ˈna. (Apokalupo 20:11-13) Ia rave ratou i te mea maitai, e ora ratou e a muri noa ˈtu i nia i te fenua. Teie râ, e rave noa vetahi i te mea ino. E riro ïa to ratou faatia-faahou-raa ei haavaraa e e haamouhia ratou.—A taio i te Ioane 5:28, 29.

5. Eaha ta te faatia-faahou-raa e faaite maira no nia ia Iehova?

E tupu te tia-faahou-raa no te mea ua tono te Atua i ta ˈna Tamaiti no te horoa i to ˈna ora no tatou. E tapao te reira o te here e te hamani maitai rahi o Iehova.—A taio i te Ioane 3:16; Roma 6:23.

No te faahohonu atu â, a hiˈo i te pene 6 e 7 o teie buka, Eaha ta te Bibilia e haapii mau ra?, piahia e te mau Ite no Iehova.

[Hohoˈa i te api 22]

Ua hamanihia Adamu e te repo fenua