Oraraa oaoa i teie nei â e a muri noa ˈtu

I TEIE nei â, e faufaahia to oe oraraa. E nafea? Ma te pee i ta te Bibilia e parau ra.

TE PARAU RA TE BIBILIA: “E ere [anei] to te taata nei maitai te amu e te inu i te maa ra, ei maitai no ˈna i ta ˈna ra mau ohipa?” ta te arii Solomona ïa i papai.—KOHELETA 2:24.

Ua poietehia tatou ia mauruuru i te ohipa maitai. E nehenehe tatou e oaoa i te oraraa noa ˈtu te mau tupuraa fifi roa ia rave maite tatou i te ohipa ma te afaro.

TE PARAU RA TE BIBILIA: “E mea maitai i te horoa ˈtu i te rave mai.”—OHIPA 20:35.

Mea rahi tei horoa i to ratou taime e puai no te tauturu ia vetahi ê i roto i te fifi. Ua ite ratou e mea maitai mau â, a faufaahia ˈtu â ˈi to ratou oraraa. Ua papai Solomona: “Eiaha oe e tapea i te maitai i te taata e au ia ˈna ia hopoi ra, tei to rima taua maitai ra ia hopoi.”—Maseli 3:27.

A hiˈo na ia Ralph, tei apiti i ta ˈna vahine i roto i te taviniraa Kerisetiano taime taatoa i muri aˈe i te faatuhaaraa. E haapii raua i te Bibilia ia vetahi ê e rave rahi hora i te avaˈe. Te na ô ra oia: “Ia hoˈi mâua i te fare i te ahiahi, ua rohirohi mâua no te matahiti rahi e no te horoaraa i te taime no te tavini i to tatou Metua i te raˈi. E rohirohi maitai râ!” Te oaoa nei raua no te mea ua matau raua i te horoa noa ia raua.

 TE PARAU RA TE BIBILIA: “E aroha mai â te taua i te mau mahana atoa ra, i fanau mai râ te taeae no te anotau e ati ai ra.”—MASELI 17:17.

E ere i te mea ohie ia faaruru oe anaˈe i te fifi. Te feia aita to ratou e hoa papu ia au i te hoê philosopho, mai te huru ra e ua moe ratou i te medebara. Mea ohie e mea oaoa aˈe te oraraa mai te peu e e hoa papu to oe e o oe atoa no ratou.

TE PARAU RA TE BIBILIA: “O tei faaroo â e ua haapao i te parau a te Atua, o ratou tei maitai.”—LUKA 11:28.

Ua faataa Iesu e mea faufaa roa ia faaroo e ia haapao i te parau a te Atua e ite ai oe i te tupuraa o ta ˈna mau parau fafau. E hinaaro iho â tatou e taa e mea faufaa anei te oraraa, area te animara eita ïa. Te pahono maira te Atua ra o Iehova na roto i ta ˈna Parau te Bibilia. Ua ite mai nei tatou e te faaite ra te Bibilia eaha te opuaraa a te Atua no te fenua, no te aha tatou i poietehia ˈi, no te aha te mauiui, e eaha ta te Atua e titau maira. Ia taa i teie pue parau mau Bibilia e faufaahia ˈi to tatou oraraa. Te oaoa nei te feia e faataa ra i te taime no te haapii e no te faaohipa i te Bibilia. No te aha? E taairaa papu hoi to ratou e te Atua oaoa.—Timoteo 1, 1:11.

TE PARAU RA TE BIBILIA: “E haamanaˈo i tei Hamani ia oe . . . aita i tae i te mau mahana ino ra, e aita i tae i te mau matahiti e parau ai oe ra e, Aita roa o ˈu e maitairaa.”—KOHELETA 12:1.

No tatou paatoa ta Solomona aˈoraa i te feia apî o tei ore hoi i ite i te fifi o te oraraa. Eiaha e na ô: “E amu tatou e e inu hoi; ananahi hoi tatou e pohe ai.” (Korinetia 1, 15:32) Ia tuu oe ia Iehova na mua,  e faufaahia to oe oraraa. E maitai oe ia au i te Koheleta 8:12.

Ua ite Wendi, te hoê tamahine, i te tanoraa o teie parau. Ua haapii oia e to ˈna tuahine i te reo Paniora i to raua apîraa, no te reva i te Repupirita Dominicaine e poro i te parau apî maitai o te Bibilia. Mea rahi te haapaeraa ta raua i rave no te poro e ono avaˈe i tera vahi e hinaarohia ˈi te tauturu. Ua oaoa mau râ raua! Ua hau aˈe te haamaitairaa i te haapaeraa.

E faufaahia te oraraa ia vai taiva ore i te Atua

Ua turai Satani ia Adamu raua Eva ia patoi i te Atua e ua manaˈo e e taiva te taata atoa ia Iehova ia tamatahia ratou. (Ioba 1:9-11; 2:4) E nehenehe oe e haapapu e e haavare Satani. E nafea? Ma te tapea i to oe taiva ore ia Iehova, ma te pee i ta ˈna i parau e ma te faaite e to Iehova anaˈe te tiaraa e faaoti eaha te mea maitai e eaha te mea ino. (Apokalupo 4:11) E faufaahia ˈtu â to oe oraraa ia faatupu oe i te taairaa piri e o Iehova.

Ia pee tatou i te haerea maitai, e fifi paha tatou. E faufaa ore anei râ to tatou oraraa? Eita. A feruri na: ia faaino te hoê taata i to tatou hoa aore ra fetii here, e paruru tatou i to ˈna roo. E fifi paha tatou. Tera râ, e faufaa ore anei to tatou oraraa? Eita ïa! E oaoa tatou i te na reira. E oaoa atoa to Iehova aau ia vai taiva ore tatou ia ˈna.—Maseli 27:11.

Oraraa oaoa e a muri noa ˈtu

A tutava i te haapii atu â no nia i te Atua e ta ˈna opuaraa. Ua parau Iesu Mesia: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) Ia tupu hope roa te opuaraa a te Atua no te fenua, e fanaˈo ai te taata taiva ore i te ora mure ore mai ta Iehova i manaˈo i te haamataraa: te oaoa i roto i te paradaiso i te fenua.—Salamo 145:16.

I roto i te Bibilia, ta te Atua Parau, e noaa ˈi ia oe te ite ta Iesu i faahiti. Ia hinaaro oe i te tauturu, a papai noa ˈtu i te feia i pia i teie vea. Na ratou e faanaho ia tauturu te hoê taata ia oe ia ite eaha ta te Bibilia e haapii mau ra.