Eaha ta te tamarii e haapii e tia ˈi?

“Te mau parau moˈa atoa i papaihia ra e mea faaurua mai ïa e te Atua, e e mea maitai ei haapiiraa, ei aˈoraa, ei faaiteraa hapa, ei faaite mai i te parau-tia.”—TIMOTEO 2, 3:16.

MEA faufaa roa ia ite te mau tamarii i te parau mau no nia i te Atua. Maoti te aha? Te Bibilia ïa, te buka faaroo faatura-roa ˈˈe-hia i te ao nei.

E au te Bibilia i te hoê rata ta te Atua i papai na ta ˈna mau tamarii atoa, te feia apî e te taata paari. I reira oia e faaite ai i to ˈna huru e eaha te mea maitai e eaha te mea ino. Teie te tahi mau irava Bibilia e te mau haapiiraa e huti atoa mai te mau tamarii rii.

Ta te Atua e hinaaro ia ite tatou no nia ia ˈna

◼ Te parau ra te Bibilia: “Ia ite te taata atoa e, o Iehova to oe iˈoa, e o oe anaˈe tei Teitei i te fenua atoa nei.”—Salamo 83:18.

Haapiiraa: Te vai mau ra te Atua e e iˈoa to ˈna.

◼ Te parau ra te Bibilia: “E imi hoi Iehova i te mau aau atoa ra, e te ite ra oia i te mau manaˈo atoa. Ia imi oe ia ˈna ra, e itea ˈtu oia e oe.”—Paraleipomeno 1, 28:9.

Haapiiraa: Te tâuˈa ra te Atua ra o Iehova ia tatou paatoa, tae noa ˈtu te mau tamarii rii. (Salamo 10:14; 146:9) Te hinaaro ra oia ia ite tatou ia ˈna.

◼ Te parau ra te Bibilia: “Eiaha outou e hamani ino i . . . te otare. Ia hamani ino noa ˈˈe oe [ia ratou], ia pii mai ratou ia ˈu ra, e faaroo papu ïa vau i ta ratou pii.”—Exodo 22:22-24.

Haapiiraa: E faaroo atoa Iehova i te pure a te mau tamarii rii. E nehenehe tatou e paraparau noa i te Atua no te faaite atu i to tatou manaˈo hohonu.

◼ Te parau ra te Bibilia: “Ua na nia iho ua na nia iho ratou i te faaooo i te Atua e ua aa ˈtu i Tei Moˈa i Iseraela nei.”—Salamo 78:41.

Haapiiraa: E oaoa aore ra e peapea Iehova, tei te huru ïa o ta tatou paraparau e ohipa. E feruri anaˈe ïa hou a parau e a rave ai i te tahi mea.

 To tatou huru i nia i te mau taata mea taa ê ia tatou

◼ Te parau ra te Bibilia: “E ore te Atua e haapao i te huru o te taata. O tei mǎtaˈu râ ia ˈna, e o tei rave i te parau-tia i te mau fenua atoa ra, o te itehia mai ïa e ana.”—Ohipa 10:34, 35.

Haapiiraa: Te farii ra te Atua i te mau huru taata atoa. Eiaha ïa tatou e hiˈo ino i te mau taata ěê.

◼ Te parau ra te Bibilia: “Ia vai ineine â outou ia parau atu i te taata atoa ia ui mai ia outou i te tiaturi i roto ia outou na, ma te mǎrû e te auraro [aore ra faatura] maite.”—Petero 1, 3:15.

Haapiiraa: Ia papu to tatou manaˈo ia tauaparau tatou no nia i te haapaoraa, eiaha râ e faahepo. E faatura atoa anaˈe i te feia e tiaturiraa ê ta ratou i te pae faaroo.

To tatou huru i nia i te mau melo utuafare

◼ Te parau ra te Bibilia: “E te mau tamarii ra, e faaroo i to outou mau metua i te mau mea atoa nei, e mea mauruuru hoi te reira i te Fatu.”—Kolosa 3:20.

Haapiiraa: Ia faaroo te mau tamarii, tapao faaite ïa e te here ra ratou i to ratou na metua e te hinaaro atoa ra e faaoaoa i te Atua.

◼ Te parau ra te Bibilia: “E faaoromai te tahi i te tahi, e faaore te tahi i ta te tahi ra hapa, i pari hiaˈi oia ra : mai ta te Fatu [ra o Iehova] hoi i faaore i ta outou na, e na reiraˈtoa outou.”—Kolosa 3:13, “Te Bibilia Moˈa V.C.J.S.” (1976)

Haapiiraa: I te tahi taime, e hapa mai vetahi ê e te mau melo atoa o to tatou utuafare. Ia faaore te Atua i ta tatou hapa, ia na reira atoa tatou i ta vetahi ê e tia ˈi.—Mataio 6:14, 15.

 A faaite i te parau mau e a hamani maitai

◼ Te parau ra te Bibilia: “E haapae i te haavare, ei parau mau ta te taata atoa ia parau atu i te tahi.”—Ephesia 4:25.

Haapiiraa: Ia faaite tatou i te parau mau, te pee ra ïa tatou i te Atua o te oaoa hoi. Ia matau râ tatou i te haavare, e riro ïa tatou mai te Diabolo, ‘te metua o te haavare,’ te enemi o te Atua.—Ioane 8:44; Tito 1:2.

◼ Te parau ra te Bibilia: “Te mau mea atoa ta outou i hinaaro ia vetahi ê ra, e na reira atoa ˈtu outou ia ratou.”—Mataio 7:12.

Haapiiraa: E tâuˈa anaˈe i te manaˈo e te hinaaro mau o to tatou utuafare e to vetahi ê. Ia aroha tatou i te taata, mea papu e e na reira atoa mai ratou.—Petero 1, 3:8; Luka 6:38.

E nehenehe te mau haapiiraa Bibilia ta tatou i ite mai nei e tauturu i te mau tamarii ia paari mai ma te aroha e te faatura ia vetahi ê. Teie râ, na vai e haapii i teie mau mea ia ratou?