Te parau mau no nia ia Aramagedo

“E varua demoni . . . tei haere i te hui arii o te fenua nei e o te ao atoa nei [e] ua haaputuputu ihora ratou i te hoê vahi, o Aramagedo te iˈoa i te parau Hebera ra.”—APOKALUPO 16:14, 16.

E VAHI o Aramagedo. E au ra râ e aita e vahi mau mai teie i nia i te fenua.

Eaha ïa te auraa mau o te taˈo “Aramagedo”? No te aha i taai-pinepine-hia ˈi te reira i te hoê tupuraa, mai te hoê tamaˈi?

Haaputuputuhia i te hoê vahi, o Aramagedo te iˈoa

Te auraa o te taˈo Hebera tumu Aramagedo, o “Mouˈa no Megido” ïa. Noa ˈtu e aita tera mouˈa, te vai ra te hoê vahi o Megido te iˈoa. Tei te pae apatoerau tooa o te râ o Megido i te vahi e faaeahia ra e Iseraela i tahito e te vai ra e piti purumu rahi i reira. Mea rahi te tamaˈi tei tupu i pihaiiho e e upootiaraa papu tei itehia. No reira te iˈoa Megido i taaihia ˈi i te tamaˈi. a

Mea faufaa mau râ o Megido eiaha no te mau tamaˈi tei tupu i ǒ, no te tumu râ ratou i aro ai. E tuhaa Megido o te Fenua tǎpǔhia ta te Atua ra o Iehova i horoa i te mau Iseraela. (Exodo 33:1; Iosua 12:7, 21) Ua fafau oia e e paruru oia ia ratou i te mau enemi. O ta ˈna iho â i rave.  (Deuteronomi 6:18, 19) Ei hiˈoraa, i Megido Iehova i te paruru-semeio-raa i te mau Iseraela i te nuu enemi a te arii no Kanaana o Iabina e a te raatira o ta ˈna nuu, o Sisera.—Te mau tavana 4:14-16.

E auraa taipe rahi aˈe râ to te taˈo “Aramagedo.” Ua taaihia te reira i te hoê aroraa i rotopu e piti nuu puai mau.

Ia au i te parau tohu o te Apokalupo, fatata Satani e ta ˈna mau demoni i te turai i te mau faatereraa taata ia haaputuputu i ta ratou mau nuu no te haafifi i te nunaa o te Atua e i ta ratou ohipa. E upootia te Atua e e haamou oia i te mau mirioni taata i aro ia ˈna.—Apokalupo 19:11-18.

Ia au i te Bibilia, e Atua aroha e te hamani maitai Iehova, e aita oia e riri vave noa. (Nehemia 9:17) No te aha ïa oia e haapohe ai e rave rahi taata? No te taa i ta te Atua mau ohipa, e titauhia ia pahono i teie na uiraa e toru: (1) Na vai e haamata i te tamaˈi? (2) No te aha te Atua e aro atoa ˈi? (3) Eaha te faahopearaa o teie tamaˈi i nia i te fenua e i te feia e parahi ra i nia iho?

1. NA VAI E HAAMATA I TE TAMAˈI?

E tamaˈi a te Atua o Aramagedo, e ere no te haavî i te taata, no te paruru râ i te feia maitai i tei hamani ino ia ratou. O vai te aro atu ia ˈna? “Te hui arii o te fenua nei e o te ao atoa nei,” oia hoi te mau tia faatere o te ao. No te aha? E faaohipa Satani i te mau faatereraa e te mau nuu faehau mai te pepe hurio no te aro faahope roa i te feia e haamori ra i te Atua ra o Iehova.—Apokalupo 16:13, 14; 19:17, 18.

I te tahi mau fenua, mea faufaa roa te tiamâraa ia faaite i te parau e te tiamâraa i te pae faaroo. Mea maamaa ïa te manaˈo e e taotia aore ra e faaore te mau faatereraa i te mau faaroo atoa. Ua itehia râ te reira i na mua ˈˈe e i teie atoa mahana. b E piti aˈe râ taa-ê-raa rahi i rotopu i te mau aroraa i tahito e te aroraa tei taaihia ia Aramagedo. A tahi, tei nia te aroraa i te fenua taatoa. Te  piti, mea puai aˈe ta Iehova pahonoraa i to mutaa ihora. (Ieremia 25:32, 33) Te faataa ra te Bibilia i teie tamaˈi mai “te tamaˈi i taua mahana rahi o te Atua Puai hope ra.”

2. NO TE AHA TE ATUA E ARO ATOA ˈI?

Te haapii nei Iehova i ta ˈna feia haamori ia vai hau noa e ia here i to ratou enemi. (Mika 4:1-3; Mataio 5:43, 44; 26:52) Eita ïa ratou e rave i te mauhaa tamaˈi no te paruru ia ratou ia aro-uˈana-hia ratou. Ia ore Iehova e faaora i to ˈna nunaa, aita faahou ratou, e e faainohia ïa to ˈna iˈoa. E ia manuïa te feia e aro ra i te Atua ia faaore roa i to ˈNa nunaa, e au ïa o ˈna i te hoê Atua aroha ore, te tano ore e te puai ore. E ere roa ˈtu râ mai tera!—Salamo 37:28, 29.

Aita roa ˈtu te Atua e hinaaro ra ia pohe hoê noa ˈˈe taata. No reira oia e faaara mai ai eaha ta ˈna e rave. (Petero 2, 3:9) Maoti te mau faatiaraa a te Bibilia, te haamanaˈo maira oia e ua tahoo oia i to ˈna nunaa a arohia ˈi ratou. (Te mau arii 2, 19:35) Te faaara atoa maira te mau Papai e ia aro Satani e te feia e turu ra ia ˈna i te nunaa o te Atua, e faaite atu Iehova i to ˈna puai. Ua tohu ê na hoi te Parau a te Atua e e haamou Iehova i te feia ino. (Maseli 2:21, 22; Tesalonia 2, 1:6-9) I tera taime, e taa i teie mau taata e te aro ra ratou i te Atua Mana hope.—Ezekiela 38:21-23.

3. EAHA TE FAAHOPEARAA VAI MAORO O TEIE TAMAˈI?

Ia hope te tamaˈi o Aramagedo, e mirioni taata te faaorahia. I reira e haamata ˈtu ai te hoê tau hau i te fenua nei.—Apokalupo 21:3, 4.

Te faahiti ra te buka Apokalupo i te “feia rahi roa” e ore e pau ia taio o te ora ˈtu i teie tamaˈi. (Apokalupo 7:9, 14) Arataihia e te Atua, e apiti teie mau taata i te faariroraa i te fenua ei paradaiso, mai ta Iehova i opua i te omuaraa.

Ua ite anei tatou afea te nunaa o te Atua e arohia ˈi?

[Nota i raro i te api]

[Hohoˈa i te api 6]

Ua haapohe te Atua ra o Iehova i te mau enemi o to ˈna nunaa, e ua paruru i ta ˈna mau tavini i tahito ra

[Hohoˈa i te api 7]

E paruru â Iehova i to ˈna nunaa i te tamaˈi o Aramagedo