1, 2. E tano ia feruri e ua ineine anei tatou i te faaore i ta vetahi ê hapa. No te aha?

 MAOTI te Bibilia i ite ai tatou i to Iehova manaˈo i te hara e to ˈna huru aau ia hara tatou. Te faaite atoa maira ta ˈna Parau e ua ineine oia i te faaore i te hara. I to na mua ˈtu tumu parau, ua ite mai tatou i ta Davida raua Manase i rave i faaore ai Iehova i ta raua hara. No to raua peapea rahi, ua faˈi raua i ta raua mau ohipa ino ia Iehova e ua haapae roa i te reira. Ua tatarahapa mau â raua e ua haamaitai â Iehova ia raua.

² E o tatou ïa e ora nei i roto i te hoê ao ino e te haavî uˈana e e haapao noa te taata ia ratou? Ua ineine anei tatou i te faaore i ta vetahi ê hapa? Ahani o to oe fetii atoa tei pohe ia Manase, mai te aha ïa to oe huru? E haere anei ia oe ia faaore i ta Manase hara? No te aha e haapii ai i te faaore i te hapa? Ia rave ino te tahi taata ia oe, eaha te tauturu atu ia haavî i te inoino, ia pee i te haerea ta Iehova e au e ia ineine i te faaore i te hara?

3-5. (a) Ua faahiti Iesu i teihea parabole no te faataa i te faufaaraa ia faaore i ta vetahi ê hapa? (b) Eaha ta Iesu e haapii maira i roto i te Mataio 18:21-35?

³ Ia ineine iho â tatou i te faaore i te hapa a vetahi ê, melo anei o te amuiraa aore ra eita. E vai hau noa ïa tatou e te mau melo utuafare, te hoa, te taata-tupu e o Iehova. Ia au i te Bibilia, e titauraa Kerisetiano ia faaore tatou i ta vetahi ê hapa noa ˈtu ehia taime e mea faufaa te reira. No te  aha? Na te parabole a Iesu no nia i te tavini tei tarahu i te moni i to ˈna fatu e pahono mai.

⁴ Ia pee ta ˈna tarahu, e titauhia ia rave te tavini i te ohipa e 60 mirioni mahana. Teie râ, ua faaore te fatu i ta ˈna tarahu. I muri iho, ua farerei teie tavini i te tahi atu tavini tei tarahu ia ˈna i te moni, no 100 noa râ mahana ohipa. Noa ˈtu te taparu a tera tavini e tiai rii â, aita te tavini matamua i farii. Ua tuu râ ia ˈna i te tapearaa. Ua riri roa te fatu i te tavini ino tei ore i aroha i to ˈna taeae tavini. Ua aroha hoi te fatu ia ˈna. Tuu atura oia ia ˈna i te fare tapearaa, haapao pee roa ta ˈna tarahu.—Mat. 18:21-34.

⁵ Eaha ïa ta Iesu e haapii maira? Teie ïa: “E na reira atoa mai tau Metua i te ao ra ia outou atoa na, ia ore outou ia faaore ma te aau atoa i te hapa a to ˈna taeae.” (Mat. 18:35) No to tatou huru tia ore, e hara iho â tatou. Eita ïa e tia ia tatou ia pee roa i te mau ture aveia a Iehova. Ua ineine râ oia i te faaore, i te tumâ roa ei auraa parau, i ta tatou hapa. E faaore anaˈe ïa i ta vetahi ê hapa ia riro Iehova ei hoa no tatou. O te auraa ïa o ta Iesu parau i roto i ta ˈna Aˈoraa i nia i te mouˈa: “Ia faaore hoi outou i ta vetahi ê ra hapa, e faaore atoa mai to outou Metua i te ao ra i ta outou. Ia ore râ outou ia faaore i ta vetahi ê ra hapa, e ore atoa to outou Metua e faaore mai i ta outou hapa.”—Mat. 6:14, 15.

6. No te aha e ere ai i te mea ohie ia faaore i ta vetahi ê hapa?

⁶ E na ô paha oe, ‘Parau mau iho â ïa tena, e ere râ i te mea ohie.’ Ia hapa mai te tahi taata, e nehenehe tatou e riri, e inoino, e hinaaro ia faautuahia aore ra ia mauiui atoa oia. No reira vetahi e manaˈo ai e eita roa ˈtu e haere ia ratou ia faaore i ta ˈna hapa. Mai tera atoa anei no oe? Mai te peu e e, e nehenehe oe e haapii i te faaore i ta vetahi ê hapa mai ta Iehova e titau maira. E nafea ïa?

7, 8. Ia hapa mai te tahi taata a inoino atu ai tatou, eaha te tauturu mai ia faaore i te reira?

⁷ E inoino paha tatou ia hapa mai te tahi taata aore ra ia manaˈo tatou e ua hapa mai oia. I te hoê mahana ua riri roa te hoê taurearea e teie ta ˈna i parau: “Ua haere au i rapae i te fare ma te parau e eita vau e hoˈi faahou mai. E mahana maitai taua mahana ra, a hahaere ai au na te hoê vahi nehenehe e te maniania ore. Mǎrû riirii mai nei to ˈu riri. Tau hora i muri iho, hoˈi atura vau i te fare ma te tatarahapa i to ˈu riri-roa-raa.” Mai teie taurearea, a tiai rii ia mǎrû mai oe. E nehenehe ïa oe e feruri maite i te ohipa i tupu. Ia na reira oe, eita ïa oe e rave i te tahi mea e tatarahapa ˈi oe i muri iho.—Eph. 4:26; Mas. 14:29; Iak. 1:19, 20.

⁸ E nafea râ mai te peu e te vai noa ra te inoino? A feruri ïa i te tumu i inoino ai oe. No te mea anei mea tano ore te ohipa i tupu aore ra aita tera taata i faatura ia oe? No te mea atoa anei e te manaˈo ra oe e te hinaaro ra iho â oia e haamauiui ia oe? Mea ino mau anei te ohipa ta ˈna i rave? Ia feruri oe i te tumu i inoino ai oe, e nehenehe ïa oe e ite i te tahi mau aratairaa Bibilia o te tauturu atu ia haavî ia oe, a mauruuru ai Iehova. (A taio i te Maseli 15:28; 17:27.) Ia na reira oe, e ineine ïa oe i te  faaore i te hapa. E ere i te mea ohie. Maoti râ te reira e vaiiho ai oe i te parau a te Atua ia hiˈopoa i ‘te manaˈo e te opua o to aau,’ a faaore atu ai i te hapa mai ia Iehova.—Heb. 4:12.

9, 10. (a) Eaha te nehenehe e tupu ia hapa mai te tahi taata? (b) Eaha te tupu ia ore outou ia ru i te riri, ia ineine râ i te faaore i te hapa?

⁹ E riri te taata no te tumu e rave rau. Ei hiˈoraa, te faahoro ra paha oe i te pereoo, a fatata ˈi te tahi atu pereoo i te faaû mai. E nafea ïa oe? Ua taparahi roa vetahi i te taata faahoro no to ratou riri rahi. Area oe, te Kerisetiano, eiaha ïa e na reira.

¹⁰ Mea maitai aˈe ia feruri na mua. Peneiaˈe no oe te hape, te rave ra paha oe i te tahi mea a faahoro ai i te pereoo. Te fifi atoa ra paha te pereoo o tera taata. Ia feruri oe i te tumu o te ohipa i tupu, ma te haamanaˈo e aita oe i ite pauroa i te tumu, e mǎrû mai ïa to oe riri e inoino, a faaore atu ai i te hapa. Te na ô maira te Koheleta 7:9: “Eiaha ia ru noa to aau i te riri, tei te opu o te maamaa ra te riri i te vai-maite-raa.” Ua manaˈo paha tatou e rave rahi taime e ua opua iho â te tahi taata e haamauiui ia tatou. E ere roa ˈtu râ. E hape noa hoi no to tatou tiaraa taata hara aore ra no te taa ore. Aita atoa hoi tatou i ite i te taatoaraa o te tupuraa. Ia ineine ïa oe i te faaore i ta vetahi ê hapa ma te here, e oaoa ïa oe.—A taio i te Petero 1, 4:8.

11. Noa ˈtu te huru o te taata i roto i te pororaa, ia aha tatou?

¹¹ E nafea ia haavî ia oe ia iria mai te tahi taata i roto i te pororaa? I to Iesu tonoraa e 70 pǐpǐ e poro na te mau fare, ua poroi oia ia ratou ia na ô: “Ei hau to teie nei utuafare.” Ua parau â oia: “E tei reira te hoê tamaiti no te hau, e vai â taua hau ra i nia iho ia ˈna; aore ra, e hoˈi mai ïa i nia iho ia outou.” (Luka 10:1, 5, 6) Ia farii te taata i te parau apî oaoa ta tatou e poro ra, e faufaahia ratou. E oaoa ïa tatou. I te tahi râ taime, e iria mai ratou. E riri atoa anei ïa tatou? Ua parau Iesu e ia vai hau noa tatou. Noa ˈtu te huru o te taata i roto i te pororaa, ia ineine tatou i te vaiiho ia ratou ma te hau.

12. Ia aha tatou ia au i te Ephesia 4:31, 32?

¹² A faaitoito i te vai hau noa i roto i te pororaa e te tahi atu mau tupuraa atoa. Ia faaore oe i ta vetahi ê hapa, e ere ïa te auraa e ia farii oe i to ratou haerea ino aore ra ia manaˈo oe e e hapa iti noa tera. Teie râ, eiaha e inoino faahou ia ratou, ia vai hau râ. E manaˈo noa vetahi i te ohipa i tupu, eita râ ratou e oaoa. A haavî ïa i to oe riri. Ia ore anaˈe, eita oe e oaoa. Ia ineine ïa oe i te faaore i te hapa.—A taio i te Ephesia 4:31, 32.

13. (a) E nafea te hoê Kerisetiano e ‘haapue ai i te arahu’ ama i nia iho i te upoo o to ˈna enemi? (b) Eaha paha te tupu ia faaite tatou i te mǎrû i te feia e riri mai?

¹³ E nehenehe oe e tauturu i te tahi taata tei rave ino ia oe ia farii i te mau haapiiraa Bibilia. Ua papai te aposetolo Paulo: “Te poia ra to enemi, faaamu atu ia ˈna; e te poihâ ra, faainu atu ia ˈna; te haapue ra hoi oe i te auahi arahu i nia iho i tana upoo i reira. Eiaha [oe]  ia pohe i te ino, ia pohe râ te ino ia oe i te maitai.” (Roma 12:20, 21) Maoti to oe hamani maitai i te feia e riri mai, e nehenehe ratou e mǎrû mai a taui atu ai. Ia taa ia oe to ratou huru aau e ia aroha ˈtu oe, e nehenehe oe e tauturu ia ratou ia haapii i te Bibilia. A faaite i te mǎrû noa ˈtu eaha te tupuraa. E feruri paha ïa ratou i to oe haerea maitai.—Pet. 1, 2:12; 3:16.

14. No te aha ia ineine ai i te faaore i te hapa a te taata i haamauiui mai?

¹⁴ Te vai ra râ te taata eiaha tatou e amuimui atu. Mai te feia i tiavaruhia, no te mea ua rave ratou i te tahi hara rahi e aita i tatarahapa. Ua haamauiui paha hoê o ratou ia oe, mea fifi roa ïa ia faaore i ta ˈna hapa noa ˈtu e ua tatarahapa oia i muri iho. Eita hoi e ore oioi te mauiui. Mea maitai ïa ia tamau i te taparu ia Iehova ia tauturu ia oe ia faaore i te hapa. Inaha, o Iehova anaˈe tei ite eaha to roto i te aau o tera taata. Na ˈna hoi e hiˈopoa i to ˈna aau e mea faaoromai oia i te feia rave hara. (Sal. 7:9; Mas. 17:3) Te na ô ra te Bibilia: “Eiaha roa te ino e tahoohia i te ino i te taata atoa nei. E haamanaˈo na i te mea maitai i te aro o te taata atoa nei. Peneiaˈe o te tia ra, e parahi hau noa outou i roto i te taata atoa nei. E au mau here e, eiaha outou e tahoo, tuu noa ˈtu râ i te  riri; ua papaihia hoi e, Te parau maira Iehova, Ei ia ˈu te riri, na ˈu ïa e tahoo atu.” (Roma 12:17-19) Eiaha ïa tatou e haava i te taata. (Mat. 7:1, 2) O Iehova te Haava parau-tia.

15. Ia haamanaˈo tatou i te aha e iti mai ai to tatou riri i tei hapa mai?

¹⁵ Mea fifi paha ia faaore i te hapa a te taata i haamauiui mai o tei tatarahapa. E haamanaˈo anaˈe e te faaruru atoa ra oia i te tahi fifi iti rahi, te mau faahopearaa ïa o te tiaraa taata hara. (Roma 3:23) E aroha to Iehova i te huitaata hara. Mea tano ïa ia pure no te taata i hapa mai, e iti mai ïa to tatou riri ia ˈna. Eiaha tatou e tamau i te inoino i te feia i haamauiui mai. Ua parau hoi Iesu ia ‘aroha ˈtu i to tatou mau enemi e ia pure no tei hamani ino mai.’—Mat. 5:44.

16, 17. Ia aha tatou ia faaoti te mau matahiapo e ua tatarahapa te hoê taata hara, e no te aha?

¹⁶ Ua horoa Iehova i te mau matahiapo Kerisetiano i te hopoia e faaoti e ua tatarahapa anei tei hara aore ra aita. Aita teie mau taeae i ite i te mau tupuraa atoa mai te Atua. E tutava râ ratou i te pee i te aratairaa a te Parau a te Atua e a te varua moˈa. E pure ïa ratou ia Iehova ia tauturu mai, a rave atu ai i te faaotiraa e au i to Iehova manaˈo.—Mat. 18:18.

¹⁷ I reira e itehia ˈi to tatou taiva ore. E faaore anei tatou i te hapa a tei tatarahapa, a faaite papu atu ai i to tatou here ia ˈna? (Kor. 2, 2:5-8) E ere paha i te mea ohie mai te peu e ua haamauiui oia ia tatou aore ra i te hoê fetii. E tiaturi anaˈe râ ia Iehova e i ta ˈna i faanaho no te faaafaro i teie fifi i roto i te amuiraa. E ineine ïa tatou i te faaore i te hapa.—Mas. 3:5, 6.

18. Eaha te maitai ia ineine tatou i te faaore i te hapa?

¹⁸ Ia ore tatou e faaore i te hapa, e maˈihia e e hepohepo tatou. E fifi atoa tatou e vetahi ê. Ia ineine râ tatou i te faaore i te hapa, mea rahi ïa te maitai. E feruriraa e e aau oaoa to tatou no te mea ua haapae tatou i te riri e te inoino. Mea afaro atoa tatou e vetahi ê. Te mea faufaa roa ˈˈe râ, te taairaa maitai ïa e o Iehova, to tatou Metua i te raˈi.—A taio i te Ephesia 4:32; Kolosa 3:12, 14.