Te na ô ra te Bibilia, “Ia mana . . . te taata paieti ore ra ua oto . . . te taata.”—Maseli 29:2.

I te roaraa o te tau, e rave rahi faatere tei haavî i te huiraatira. E mauiui mau ïa tei itehia. E manaˈo maitai paha to vetahi, ia mana anaˈe râ ratou, e pinepine eita ïa e tâuˈa faahou i te taata, e tutava noa râ i te tapea i te tiaraa. No te tahi atu, e faaohipa ratou i te mana no to ratou iho maitai noa ˈtu e e ati te huiraatira i muri aˈe. Ua faataa Henry Kissinger, te tahi tia faatere tahito no Marite, ia tuatapapahia, e mea papu e ua tutava te taata i te faatupu i ta ratou mau opuaraa, aita râ i manuïa noa ˈˈe.

Te faaite atoa ra te Bibilia: “E ere hoi tei taua taata e haere ra i te haapao i to ˈna taahiraa.” (Ieremia 10:23) Te ere ra ïa te taata tia ore i te paari e ite no te faanaho maitai i ta ˈna iho ohipa. Mai te peu e eita oia e nehenehe e haapao i to ˈna taahiraa, e tia anei ïa ia ˈna ia faatere i te hoê nunaa? Te taa ra anei ia oe te tumu eita ˈi te taata e nehenehe e faaore i te mauiui? Te faaite ra te tau e na te faatereraa ino e faatupu i te reira!

Ua parau Iesu, “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.”—Ioane 13:35.

Te faaitoito nei te mau aratai haapaoraa e pǔpǔ faaroo ia here e ia tahoê. Aita râ ratou i manuïa, te itehia ra hoi e aita to ratou mau taata i faatupu i te here mau a ore atu ai te ino. E pinepine, ua turu te mau tia haapaoraa i te amahamaha, haerea haavarevare, aroraa ia vetahi ê e i te tahi nunaa taata. I roto i ta ˈna buka, ua papai te taata maimi i te pae faaroo, Hans Küng, te haerea e poritita ino roa, o tei faahuru-ê-hia ïa, haamauhia e faarirohia e mea mau na te haapaoraa.—Christianity and the World Religions.

Te faatia atoa nei e rave rahi haapaoraa i te taatiraa hou te faaipoiporaa, te taatiraa e te tahi atu taata e ere i te hoa faaipoipo e te peu mahu. No reira i rahi ai te maˈi, te haamarua tamarii e  hapû hinaaro-ore-hia. Ua fifi atoa to vetahi faaipoiporaa e utuafare. E pinepine, o te mauiui e hepohepo te itehia.

“Ua haavarehia . . . te taata ia faahahau-ê-hia, e ia riro noa ˈtu i to ˈna iho hinaaro tia ore. E ua tô anaˈe taua hinaaro tia ore ra, fanau maira ta ˈna, o te hara.”—Iakobo 1:14, 15.

No te huru tia ore, e hape e e rave iho â te taata i te mea ino. E mea tia atoa ia patoi noa i te hinaaro e faatupu i ta te tino i opua. (Ephesia 2:3) Ia tano te tupuraa e mea puai anaˈe te hinaaro tia ore, e ere i te mea ohie ia haavî ia tatou. Ia faatupuhia te reira, o te mauiui te faahopearaa.

Ua na ô te taata papai P. Mehta: “Te tumu o te rahiraa o te mauiui, o to tatou iho ïa mau hinaaro puai, te imiraa ia mâha te reira e te nounou.” No te ava, te raau taero, te pere moni, te taatiraa e te tahi atu taata e ere i te hoa faaipoipo e te vai ra ˈtu â i fifi ai e rave rahi “taata faaturahia.” No tera mau hinaaro tia ore e peu huru rau i mauiui roa ˈi to ratou utuafare, hoa e vetahi ê. Te tu nei ïa to tatou manaˈo i ta te Bibilia e parau ra: ‘Ua ite hoi tatou e, te uuru tahi nei te taata atoa i hamanihia nei ma te mauiui e tae roa aˈenei i teie nei mahana.’—Roma 8:22.

Te faaite ra te Bibilia e o Satani “te atua o teie nei ao” e e rave rahi melahi puai parauhia demoni, te turu ra ia ˈna.—Korinetia 2, 4:4; Apokalupo 12:9.

Mai ia Satani, te haa nei te mau demoni no te faatere e haavare i te taata. Ua taa i te aposetolo Paulo i te reira i parau ai o ˈna: ‘E ere hoi i te taata ta tatou e to nei o te feia hau râ, e te mana, e te mau tavana o teie nei ao pouri, e te mau varua iino i te reva nei.’—Ephesia 6:12.

Noa ˈtu e mea au na ratou e haamauiui i te taata, e ere tera ta te mau demoni tapiraa matamua. Te hinaaro ra hoi ratou ia fariu ê te taata i te Atua Teitei, Iehova. (Salamo 83:18) E rave rau ravea ta te mau demoni e faaohipa ra no te haavare e faatere i te taata. O te peu hiˈo fetia, tahutahu e tohuraa te tahi. No reira Iehova e faaara e e paruru ai i te feia atoa e patoi ia Satani e te mau demoni i tera mau marei atâta.—Iakobo 4:7.

A piti tausani matahiti aˈenei, ua faaite te Bibilia: “E tupu te ati rahi i taua anotau hopea nei, ia ite mai oe.”

Ma te faataa i te tumu e tupu ai te ati rahi i te mau mahana hopea, te na ô ra te Bibilia: “E riro te taata nei ei miimii, e nounou moni, e faaahaaha, e teoteo . . . e aroha ore, e tahemo parau au, e pari haavare noa, e haapao ore, e iria, e te au ore i te taata maitatai ra, e haavare, e mârô, e faateitei, e te hinaaro i te mau mea e navenave ai ra aore hinaaro i te Atua.” I te mea e te ora nei tatou i te “anotau hopea” e rahi iho â ïa te mauiui.—Timoteo 2, 3:1-4.

Ia au i te mau faataaraa ta tatou i hiˈopoa mai nei, noa ˈtu e e manaˈo maitai to te taata, te taa ra anei ia oe i te tumu eita ˈi ta ˈna e nehenehe e faaore i te mauiui? Teie nei, e nafea ïa? E mea tia ia fariu i te Atua Poiete o tei fafau e ‘haamou i te ohipa a te diabolo’ e tei pee ra ia ˈna. (Ioane 1, 3:8) E faaite atu to muri nei tumu parau i ta te Atua e rave no te faaore i te mau tumu atoa o te mauiui.